ನೈಸ್ ಯೋಜನೆ ನನ್ನ ಕೂಸಾದರೆ, ಸೂಲಗಿತ್ತಿ ಯಾರು? ಎಂದು ಮಾಜಿ ಪ್ರಧಾನಿ ದೇವೇಗೌಡ ಪ್ರಶ್ನೆ

ಹಾಸನ, ಅ.6: ನೈಸ್ (NICE) ರಸ್ತೆ ಯೋಜನೆ ದೇವೇಗೌಡರ ಕೂಸು ಎಂದು ಟೀಕಿಸುವವರು, ಆ ಯೋಜನೆಯನ್ನು ಹೆರಿಗೆ ಮಾಡಿಸಿದ ಸೂಲಗಿತ್ತಿ ಯಾರು ಎಂಬುದನ್ನೂ ಹೇಳಬೇಕಲ್ಲವೇ?” ಎಂದು ಮಾಜಿ ಪ್ರಧಾನಿ ಹೆಚ್.ಡಿ. ದೇವೇಗೌಡರು ಅವರು ತಮ್ಮದೇ ಶೈಲಿಯಲ್ಲಿ ಟಾಂಗ್ ನೀಡಿದ್ದಾರೆ. ಹಾಸನದಲ್ಲಿ ಮಂಗಳವಾರ (ಅ.6) ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ದೇವೇಗೌಡರು, ನೈಸ್ ಯೋಜನೆ, ಎಸ್‌ಐಆರ್ ಕದನ, ಕಾಂಗ್ರೆಸ್ ನಾಯಕರ ಪ್ರಚಾರ ವೈಖರಿ ಹಾಗೂ ತಮ್ಮ ಸಕ್ರಿಯ ರಾಜಕೀಯ ಭವಿಷ್ಯದ ಕುರಿತು ಸುದೀರ್ಘವಾಗಿ ಹಂಚಿಕೊಂಡಿದ್ದಾರೆ.

1992 ರಲ್ಲಿ ಅಂದಿನ ಆರ್ಥಿಕ ಸುಧಾರಣೆಗಳ ಕಾಲದಲ್ಲಿ ನಡೆದ ಒಪ್ಪಂದಗಳ ಕುರಿತು ಸ್ಮರಿಸಿದ ಮಾಜಿ ಪ್ರಧಾನಿ, “ಅಮೆರಿಕದ ಕಂಪನಿ ಸೇರಿದಂತೆ ಮೂರು ಸಂಸ್ಥೆಗಳು ಸೇರಿ ಮಾಡಿದ ಎಂಒಯುಗೆ ನಾನು ಅಂದು ಸಹಿ ಹಾಕಿದೆ ಅಷ್ಟೇ. ನಂತರ ನಾನು ದೆಹಲಿ ರಾಜಕೀಯಕ್ಕೆ ಹೋದೆ. ಬಳಿಕ ಏನಾಯಿತು ಎಂಬುದು ಎಲ್ಲರಿಗೂ ಗೊತ್ತಿದೆ. ನೈಸ್ ಆಸ್ತಿ ವಿಚಾರದಲ್ಲಿ ಎಷ್ಟೇ ಪ್ರಯತ್ನಿಸಿದರೂ ಸತ್ಯವನ್ನು ಮರೆಮಾಚಲು ಯಾರಿಂದಲೂ ಸಾಧ್ಯವಿಲ್ಲ. ಸಿದ್ಧರಾಮಯ್ಯ ಅವರು ದೀಪದ ಬೆಳಕಿನಲ್ಲಿ ಓದಿದೆ ಎನ್ನುತ್ತಾರೆ. ನಾನಂತೂ ಲೈಟೇ ಇಲ್ಲದ ಹಳ್ಳಿಯಲ್ಲಿ ಓದಿ ಬಂದವನು. ದೇವೇಗೌಡ ಸಾಯಬಹುದು, ಆದರೆ ಆತ ಮಾಡಿದ ಕೆಲಸಗಳನ್ನು ಇತಿಹಾಸ ಮರೆಯುವುದಿಲ್ಲ” ಎಂದರು.

“ನನ್ನ ಕಿಡ್ನಿಗೆ ಸಮಸ್ಯೆ ಇರಬಹುದು, ಬ್ರೇನ್‌ಗೆ ಅಲ್ಲ”: ಸಕ್ರಿಯ ರಾಜಕೀಯಕ್ಕೆ ಕಂ‌ಬ್ಯಾಕ್ ಎಚ್ಚರಿಕೆ

ತಮ್ಮ ಆರೋಗ್ಯದ ಸ್ಥಿತಿಗತಿಯ ಕುರಿತು ಮಾತನಾಡಿದ 93 ವರ್ಷದ ಹಿರಿಯ ನಾಯಕ, “ನನಗೆ ಕಿಡ್ನಿ ಸಮಸ್ಯೆ ಇದೆ ಎನ್ನುವುದು ಎಲ್ಲರಿಗೂ ಗೊತ್ತು. ಆದರೆ ಡಯಾಲಿಸಿಸ್ ಆಗುತ್ತಿರುವುದು ಕಿಡ್ನಿಗೆ ಮಾತ್ರ, ಬ್ರೇನ್‌ಗಲ್ಲ, ನನ್ನ ಬ್ರೇನ್ ಪಕ್ಕಾ ಆಗಿದೆ. ಈ ಬಾರಿಯ ಪಿತೃಪಕ್ಷದ ಕಾರ್ಯಕ್ರಮಗಳನ್ನು ನಮ್ಮ ಸ್ವಗ್ರಾಮ ಹರದನಹಳ್ಳಿಯಲ್ಲೇ ನಾಲ್ವರೂ ಗಂಡುಮಕ್ಕಳು ಹಾಗೂ ಮೊಮ್ಮಕ್ಕಳು ಸೇರಿ ನೆರವೇರಿಸಲಿದ್ದೇವೆ. ಪಿತೃಪಕ್ಷ ಮುಗಿದ ತಕ್ಷಣವೇ ನಾನು ರಾಜಕೀಯದಲ್ಲಿ ಮತ್ತಷ್ಟು ಸಕ್ರಿಯವಾಗಿ ತೊಡಗಿಸಿಕೊಳ್ಳುತ್ತೇನೆ” ಎಂದು ಸ್ಪಷ್ಟಪಡಿಸಿದರು.

ಎಸ್‌ಐಆರ್ (SIR) ವಿಚಾರ ಪ್ರಸ್ತುತ ಸುಪ್ರೀಂ ಕೋರ್ಟ್‌ನಲ್ಲಿದೆ. ನ್ಯಾಯಾಲಯವೇ ತೀರ್ಪು ನೀಡಲಿದೆ. ರಾಹುಲ್ ಗಾಂಧಿ ಯುವಕರಿದ್ದಾರೆ, ಅನುಭವದ ಕೊರತೆ ಎಂದು ನಾನು ಹೇಳಲ್ಲ. ಆದರೆ ತುಂಬಾ ಸ್ಪೀಡ್ ಆಗಿ ಹೋಗಬೇಕು ಎನ್ನುವ ಗಡಿಬಿಡಿಯಲ್ಲಿದ್ದಾರೆ. ನ್ಯಾಯಾಲಯದ ಅಂತಿಮ ತೀರ್ಪಿನ ಬಳಿಕ ದೇಶದ ಹಿರಿಯ ನಾಗರಿಕನಾಗಿ ಪ್ರತಿಕ್ರಿಯಿಸುತ್ತೇನೆ ಎಂದರು. ಮುಂಬರುವ ಪರಿಷತ್ ಹಾಗೂ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಬಿಜೆಪಿ ಮತ್ತು ಜೆಡಿಎಸ್ ಒಟ್ಟಾಗಿ ಸ್ಪರ್ಧಿಸಲಿವೆ ಎಂದು ಬಿ.ಎಸ್. ಯಡಿಯೂರಪ್ಪ ಈಗಾಗಲೇ ಸ್ಪಷ್ಟಪಡಿಸಿದ್ದಾರೆ. ಕಾಂಗ್ರೆಸ್ ವಿರುದ್ಧ ಎರಡೂ ಪಕ್ಷಗಳು ಶಕ್ತಿಯುತವಾಗಿ ಒಂದಾಗಿ ಹೋರಾಡಲಿದ್ದು, ಮೈತ್ರಿಯಲ್ಲಿ ಯಾವುದೇ ಕೊರತೆಯಿಲ್ಲ ಎಂದು ದೇವೇಗೌಡರು ವಿಶ್ವಾಸ ವ್ಯಕ್ತಪಡಿಸಿದರು.

ಇದನ್ನೂ ಓದಿ: ಅಂಬರೀಶ್​​ಗೆ ‘ಕರ್ನಾಟಕ ರತ್ನ’: ಸರ್ಕಾರಕ್ಕೆ ಸಚಿವ ರಾಮಲಿಂಗಾ ರೆಡ್ಡಿ ಪತ್ರ

“ನನ್ನ ಇಡೀ ರಾಜಕೀಯ ಜೀವನ ರೈತರಿಗಾಗಿ”: ಸಂಸತ್ ಭಾಷಣದ ಪುಸ್ತಕಗಳು ಬಿಡುಗಡೆಗೆ ಸಜ್ಜು

ತಮ್ಮ ರಾಜಕೀಯ ಯಾನ ಹಾಗೂ ರೈತಪರ ಹೋರಾಟವನ್ನು ಸ್ಮರಿಸಿದ ದೇವೇಗೌಡರು, “ನಾನು ಸತತ 22 ವರ್ಷಗಳ ಕಾಲ ಸಂಸತ್ತಿನಲ್ಲಿ ಕನ್ನಡದಲ್ಲೇ ಮಾತನಾಡಿದ್ದೇನೆ. ನನ್ನ ಇಡೀ ರಾಜಕೀಯ ಜೀವನವನ್ನು ರೈತರ ಹಿತರಕ್ಷಣೆಗಾಗಿಯೇ ಮುಡುಪಾಗಿಟ್ಟಿದ್ದೇನೆ. ಇತ್ತೀಚೆಗೆ ಕೇಂದ್ರದ ಬರ ಅಧ್ಯಯನ ತಂಡ ಬಂದಿದ್ದು, ರೈತರು ತೀವ್ರ ಸಂಕಷ್ಟದಲ್ಲಿದ್ದಾರೆ” ಎಂದರು. ಸಂಸತ್ತಿನ ಎರಡೂ ಸದನಗಳಲ್ಲಿ ಅವರು ಮಾಡಿದ ಐತಿಹಾಸಿಕ ಭಾಷಣಗಳನ್ನು ಒಳಗೊಂಡ ‘ನೇಗಿನ ಗೆರೆಗಳು’ ಹಾಗೂ ಇಂಗ್ಲಿಷ್ ಅವೃತ್ತಿಯ ಎರಡು ಪುಸ್ತಕಗಳು ಶೀಘ್ರವೇ ಬಿಡುಗಡೆಯಾಗಲಿವೆ. ಈ ಪೈಕಿ ಕನ್ನಡ ಪುಸ್ತಕದ 15,000 ಪ್ರತಿಗಳು ಈಗಾಗಲೇ ಪ್ರಿಂಟ್ ಆಗಿ ಸಂಪೂರ್ಣ ಮಾರಾಟವಾಗಿವೆ ಎಂದು ತಿಳಿಸಿದರು. ದಿವಂಗತ ಎಸ್. ಬಂಗಾರಪ್ಪ ಅವರು ನದಿ ನೀರು ಬಿಡಲ್ಲ ಎಂದು ನಿರ್ಧಾರ ಕೈಗೊಂಡಾಗ, ಅದನ್ನು 9 ನ್ಯಾಯಮೂರ್ತಿಗಳ ಲಾರ್ಜ್ ಬೆಂಚ್‌ಗೆ ರಾಷ್ಟ್ರಪತಿಗಳು ರೆಫರ್ ಮಾಡಿದ್ದ ಘಟನೆಯನ್ನು ಗೌಡರು ನೆನಪಿಸಿಕೊಂಡರು.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ