Traffic Updates: ಏರೋ ಇಂಡಿಯಾ ಶೋ; ಬೆಂಗಳೂರಿನಲ್ಲಿ ಟ್ರಾಫಿಕ್ ಬದಲಾವಣೆ; ಹೊಸ ಅಪ್ಡೇಟ್ಸ್ ಇಲ್ಲಿವೆ
Aero India Show 2023: ಯಲಹಂಕದಲ್ಲಿ ಸೋಮವಾರ ನಡೆಯುವ ಏರೋ ಇಂಡಿಯಾ ಶೋ ಉದ್ಘಾಟನಾ ಕಾರ್ಯಕ್ರಮಕ್ಕಾಗಿ ಬೆಂಗಳೂರು ಟ್ರಾಫಿಕ್ ಪೊಲೀಸ್ ಕೆಲ ಅಗತ್ಯ ಮುನ್ನೆಚ್ಚರಿಕೆ ಕ್ರಮ ಕೈಗೊಂಡಿದೆ. ಯಲಹಂಕ ಹಾಗೂ ಬಳ್ಳಾರಿ ರಸ್ತೆ ಬಳಸುವವರು ಇತ್ತ ಗಮನ ಕೊಡಿ.
Updated on:Feb 12, 2023 | 2:22 PM
ಬೆಂಗಳೂರು: ನಾಳೆ ಸೋಮವಾರ ಏರೋ ಇಂಡಿಯಾ ಶೋ (Aero India Show) ಉದ್ಘಾಟನೆಗೊಳ್ಳಲಿದ್ದು, ಅದಕ್ಕಾಗಿ ಯಲಹಂಕ ಸುತ್ತಮುತ್ತ ಟ್ರಾಫಿಕ್ ನಿಯಂತ್ರಣಕ್ಕೆ (Traffic changes) ಕ್ರಮ ಕೈಗೊಳ್ಳಲಾಗಿದೆ. ಫೆಬ್ರುವರಿ 13ರಂದು ಬೆಳಗ್ಗೆ 8ರಿಂದ 11:30ವರೆಗೆ ಬಳ್ಳಾರಿ ರಸ್ತೆಯ ಎಸ್ಟೀಮ್ ಮಾಲ್ನಿಂದ ಎಲಿವೇಟೆಡ್ ರಸ್ತೆಯಲ್ಲಿ (Elevated Road Stretch) ವಾಹನಗಳ ಚಾಲನೆಗೆ ನಿಷೇಧ ಹಾಕಲಾಗಿದೆ. ಕಾರ್ಯಕ್ರಮದ ಪಾಸ್ ಹೊಂದಿರುವ ವಾಹನಗಳಿಗೆ ಮಾತ್ರ ಈ ರಸ್ತೆಯಲ್ಲಿ ಪ್ರವೇಶ ಇರುತ್ತದೆ.
ಯಲಹಂಕ ಹಾಗು ಸುತ್ತಲ ಪ್ರದೇಶಗಳಿಗೆ ಹೋಗಬೇಕಾದ ಜನರು ಎಲಿವೇಟೆಡ್ ರಸ್ತೆ ಬದಲು ಕೆಳಗಿನ ಸರ್ವಿಸ್ ರಸ್ತೆಯನ್ನು ಬಳಸಬೇಕು. ವಿಮಾನ ನಿಲ್ದಾಣಕ್ಕೆ ಹೋಗಬೇಕೆನ್ನುವವರು ಹೆಣ್ಣೂರು ಜಂಕ್ಷನ್ ಮೂಲಕ ಪರ್ಯಾಯ ಮಾರ್ಗ ಬಳಸಬೇಕು ಎಂದು ಬೆಂಗಳೂರು ಸಂಚಾರ ಪೊಲೀಸ್ ಇಲಾಖೆ ಮಾಧ್ಯಮಗಳಿಗೆ ಪ್ರಕಟಣೆ ಹೊರಡಿಸಿದೆ.
ಬೆಂಗಳೂರಿನಲ್ಲಿ ಸಂಚಾರ ವ್ಯತ್ಯಯ
ಏರೋ ಇಂಡಿಯಾ ಶೋ ಅನ್ನು ಪ್ರಧಾನಿ ನರೇಂದ್ರ ಮೋದಿ ನಾಳೆ ಉದ್ಘಾಟಿಸುತ್ತಿದ್ದಾರೆ. ಎಲ್ಲಾ 5 ದಿನಗಳಿಗೂ ಅನ್ವಯವಾಗುವಂತೆ ಟ್ರಾಫಿಕ್ ನಿಯಂತ್ರಣ ಕ್ರಮಗಳನ್ನು ಚಾಲನೆಗೆ ತರಲಾಗುತ್ತಿದೆ.
ಏರ್ಪೋರ್ಟ್ಗೆ ಹೋಗುವ ರಸ್ತೆಯಲ್ಲಿ ದೊಡ್ಡ ವಾಹನಗಳ ಸಂಚಾರಕ್ಕೆ ಐದು ದಿನಗಳು ಅವಕಾಶ ನಿರಾಕರಿಸಲಾಗಿದೆ. ಬೆಂಗಳೂರಿನ ಪೂರ್ವಭಾಗದಿಂದ ಏರ್ಪೋರ್ಟ್ಗೆ ಹೋಗುವ ಪ್ರಯಾಣಿಕರು ಕೆಆರ್ ಪುರಂ ಹೆಣ್ಣೂರು ಕ್ರಾಸ್, ಮ್ಯಾಲನಹಳ್ಳಿ, ಬೇಗೂರು ಬ್ಯಾಕ್ ಗೇಟ್ ಮೂಲಕ ಏರ್ಪೋರ್ಟ್ ತಲುಪಬಹುದು.
ಪಶ್ಚಿಮ ಭಾಗದಿಂದ ಏರ್ಪೋರ್ಟ್ಗೆ ಹೋಗುವವರು ಗೊರಗುಂಟೆ ಪಾಳ್ಯ, ಬಿಇಎಲ್ ಸರ್ಕಲ್, ಗಂಗಮ್ಮ ಸರ್ಕಲ್, ಮದರ್ ಡೈರಿ, ಉನ್ನಿಕೃಷ್ಣನ್ ಜಂಕ್ಷನ್, ದೊಡ್ಡಬಳ್ಳಾಪುರ ರಸ್ತೆ, ರಾಜಾನುಕುಂಟೆ, ಅದ್ದಿಗನಹಳ್ಳಿ, ಎಂವಿಐಟಿ, ವಿದ್ಯಾನಗರ್ ಕ್ರಾಸ್ ಮೂಲಕ ಹಾದು ಹೋಗಬಹುದು.
ಬೆಂಗಳೂರು ದಕ್ಷಿಣ ಭಾಗದಿಂದ ಏರ್ಪೋರ್ಟ್ಗೆ ಹೋಗಲು ಮೈಸೂರು ರಸ್ತೆ, ನಾಯಂಡಹಳ್ಳಿ, ಚಂದ್ರಲೇಔಟ್, ಗೊರಗುಂಟೆ ಪಾಳ್ಯ, ಬಿಇಎಲ್ ಸರ್ಕಲ್, ಗಂಗಮ್ಮ ಸರ್ಕಲ್, ಮದರ್ ಡೈರಿ, ಉನ್ನಿಕೃಷ್ಣನ್ ಜಂಕ್ಷನ್, ದೊಡ್ಡಬಳ್ಳಾಪುರ ರಸ್ತೆ, ರಾಜಾನುಕುಂಟೆ, ಅದ್ದಿಗನಹಳ್ಳಿ, ಎಂವಿಐಟಿ ಕ್ರಾಸ್ ಮತ್ತು ವಿದ್ಯಾನಗರ್ ಕ್ರಾಸ್ ಈ ಮಾರ್ಗ ಬಳಸಬಹುದು.
ದೊಡ್ಡ ವಾಹನಗಳಿಗೆ ಪ್ರತ್ಯೇಕ ಮಾರ್ಗಗಳು:
ಬಳ್ಳಾರಿ ರಸ್ತೆಯಲ್ಲಿ ದೊಡ್ಡ ವಾಹನಗಳ ಸಂಚಾರವನ್ನು ಫೆಬ್ರುವರಿ 17ರವರೆಗೂ ತಡೆಯಲಾಗಿದೆ. ಹೈದರಾಬಾದ್ ಮತ್ತು ಚಿಕ್ಕಬಳ್ಳಾಪುರದಿಂದ ಬರುವ ದೊಡ್ಡ ವಾಹನಗಳು ಹಾಗೂ ಖಾಸಗಿ ವಾಹನಗಳು ದೇವನಹಳ್ಳಿ ಬಳಿ ದೊಡ್ಡಬಳ್ಳಾರಪುರ ಕ್ರಾಸ್ನಿಂದ ತಿರುವು ತೆಗೆದುಕೊಂಡು ರಾಹೆ4 ತುಮಕೂರು ಪುಣೆ ರಸ್ತೆ ಕಡೆ ಹೋಗಬಹುದು.
ತುಮಕೂರು ರಸ್ತೆ ಕಡೆಯಿಂದ ಬರುವ ದೊಡ್ಡ ವಾಹನಗಳು ಸಿಎಂಟಿಐ ಜಂಕ್ಷನ್ ಬಳಿ ಡೈವರ್ಶನ್ ತೆಗೆದುಕೊಂಡು ರಿಂಗ್ ರಸ್ತೆಯತ್ತ ಸಾಗಿ ನೈಸ್ ರಸ್ತೆ ತಲುಪಬಹುದು.
ಇದನ್ನೂ ಓದಿ: PM Narendra Modi: ನಾಳೆ ಏರ್ಶೋ ಉದ್ಘಾಟನೆಗೆ ಇಂದು ಬೆಂಗಳೂರಿಗೆ ಆಗಮಿಸಲಿರುವ ಪ್ರಧಾನಿ ಮೋದಿ
ತೋಟಗೆರೆ ಬಸವಣ್ಣ ದೇವಸ್ಥಾನ ಕಡೆಯಿಂದ ಬರುವ ವಾಹನಗಳು ದೊಡ್ಡಬಳ್ಳಾಪುರ ದೇವನಹಳ್ಳಿ ರಸ್ತೆ ಮೂಲಕ ಹೊಸಕೋಟೆಯತ್ತ ಹೋಗಬಹುದು. ನೆಲಮಂಗಲದಿಂದ ಬರುವವವರು ಸೊಂಡೇಕೊಪ್ಪ ಮೂಲಕ ನೈಸ್ ರಸ್ತೆ ತಲುಪಬಹುದು.
ಚಿಕ್ಕಬಾಣಾವರ ಮೂಲಕ ಬರುವ ವಾಹನಗಳು ತೋಟಗೆರೆ ಬಸವಣ್ಣ ದೇವಸ್ಥಾನದತ್ತ ಯೂಟರ್ನ್ ಪಡೆದು ಅಲ್ಲಿಂದ ದೊಡ್ಡಬಳ್ಳಾಪುರ ದೇವನಹಳ್ಳಿ ರಸ್ತೆ ಮೂಲಕ ಹೊಸಕೋಟೆ ತಲುಪಬಹುದು.
ನೆಲಮಂಗಲದಿಂದ ಬರುವ ವಾಹನಗಳು ಸೊಂಡೇಕೊಪ್ಪ ಮೂಲಕ ರೈಸ್ ರಸ್ತೆ ತಲುಪಬಹುದು.
Published On - 2:22 pm, Sun, 12 February 23
