ತಂಡವನ್ನು ಸುರಕ್ಷಿತವಾಗಿ ದಡಕ್ಕೆ ತಲುಪಿಸಿದ ವಿಹಾರಿ- ಅಶ್ವಿನ್​; 3ನೇ ಟೆಸ್ಟ್​ ಡ್ರಾನಲ್ಲಿ ಅಂತ್ಯ

ಭಾರತ- ಆಸ್ಟ್ರೇಲಿಯಾ ನಡುವಿನ 3ನೇ ಟೆಸ್ಟ್​ ಪಂದ್ಯ ಡ್ರಾನಲ್ಲಿ ಅಂತ್ಯವಾಗಿದೆ. ಹೀಗಾಗಿ ಎರಡು ತಂಡಗಳು 1-1 ರ ಸಮಬಲ ಸಾಧಿಸಿವೆ. ಹೀಗಾಗಿ ಬ್ರಿಸ್ಬೇನ್‌ನಲ್ಲಿ ಜನವರಿ 15 ರಿಂದ ಪ್ರಾರಂಭವಾಗಲಿರುವ 4ನೇ ಹಾಗೂ ಅಂತಿಮ ಟೆಸ್ಟ್​ ಪಂದ್ಯ ಎರಡು ತಂಡಗಳಿಗೂ ಮಹತ್ವದದ್ದಾಗಿದ್ದು, ಅಂತಿಮ ಟೆಸ್ಟ್​ನಲ್ಲಿ ಗೆದ್ದ ತಂಡ ಸರಣಿಯನ್ನು ತನ್ನದಾಗಿಸಿಕೊಳ್ಳಲಿದೆ.

  • TV9 Web Team
  • Published On - 12:44 PM, 11 Jan 2021
ತಂಡವನ್ನು ಸುರಕ್ಷಿತವಾಗಿ ದಡಕ್ಕೆ ತಲುಪಿಸಿದ ವಿಹಾರಿ- ಅಶ್ವಿನ್​; 3ನೇ ಟೆಸ್ಟ್​ ಡ್ರಾನಲ್ಲಿ ಅಂತ್ಯ
ಉತ್ತಮ ಜೊತೆಯಾಟದೊಂದಿಗೆ ತಂಡವನ್ನ ಸೋಲಿನಿಂದ ಪಾರು ಮಾಡಿದ ಅಶ್ವಿನ್​- ವಿಹಾರಿ

ಸಿಡ್ನಿ: ಭಾರತ- ಆಸ್ಟ್ರೇಲಿಯಾ ನಡುವಿನ 3ನೇ ಟೆಸ್ಟ್​ ಪಂದ್ಯ ಡ್ರಾನಲ್ಲಿ ಅಂತ್ಯವಾಗಿದೆ. ಹೀಗಾಗಿ ಎರಡು ತಂಡಗಳು 1-1 ರ ಸಮಬಲ ಸಾಧಿಸಿವೆ. ಹೀಗಾಗಿ ಬ್ರಿಸ್ಬೇನ್‌ನಲ್ಲಿ ಜನವರಿ 15 ರಿಂದ ಪ್ರಾರಂಭವಾಗಲಿರುವ 4ನೇ ಹಾಗೂ ಅಂತಿಮ ಟೆಸ್ಟ್​ ಪಂದ್ಯ ಎರಡು ತಂಡಗಳಿಗೂ ಮಹತ್ವದದ್ದಾಗಿದ್ದು, ಅಂತಿಮ ಟೆಸ್ಟ್​ನಲ್ಲಿ ಗೆದ್ದ ತಂಡ ಸರಣಿಯನ್ನು ತನ್ನದಾಗಿಸಿಕೊಳ್ಳಲಿದೆ.

ಒಂದು ಹಂತದಲ್ಲಿ ಗೆಲುವಿನ ಲಯದಲ್ಲಿದ್ದ ಟೀಂ ಇಂಡಿಯಾ ರಿಶಭ್​ ಪಂತ್​ ಹಾಗೂ ಚೇತೇಶ್ವರ್​ ಪೂಜಾರ ವಿಕೆಟ್​ ಕಳೆದುಕೊಂಡ ಬಳಿಕ ಸುಳಿನ ಸುಳಿಗೆ ಸಿಲುಕಿಕೊಂಡಿತ್ತು. ಆದರೆ ಜವಬ್ದಾರಿಯುತ ಆಟಕ್ಕೆ ಮುಂದಾದ ಹನುಮ ವಿಹಾರಿ ಹಾಗೂ ರವಿಚಂದ್ರನ್​ ಅಶ್ವಿನ್​ ತಾಳ್ಮೆಯ ಆಟಕ್ಕೆ ಮುಂದಾದರು. ಆದರೆ ಬ್ಯಾಟಿಂಗ್​ನ ಆರಂಭದಲ್ಲೇ ಗಾಯದ ಸಮಸ್ಯೆಗೆ ಒಳಗಾದ ಹನುಮ ವಿಹಾರಿ ಮೈದಾನದಲ್ಲಿ ರನ್​ ಗಳಿಸಲು ಪರದಾಡಿದರು. ಹೀಗಾಗಿ ವಿಹಾರಿಗೆ ಉತ್ತಮ ಸಾಥ್​ ನೀಡಿದ ಅಶ್ವಿನ್​ ತಂಡವನ್ನು ಸೋಲಿನ ಸುಳಿಯಿಂದ ಪಾರು ಮಾಡಿದರು. ಅಲ್ಲದೆ ಈ ಜೋಡಿ 256 ಬಾಲ್​ಗಳನ್ನ ಎದುರಿಸುವುದರಿಂದಿಗೆ 50 ರನ್​ಗಳ ಜೊತೆಯಾಟ ಆಡಿತು. ಅಂತಿಮವಾಗಿ 161 ಬಾಲ್​ ಎದುರಿಸಿದ ವಿಹಾರಿ 23 ರನ್​ ಗಳಿಸಿದರೆ, 128 ಬಾಲ್​ ಎದುರಿಸಿದ ಅಶ್ವಿನ್​ 33 ರನ್​ ಗಳಿಸಿ ಅಜೇಯರಾಗಿ ಉಳಿದರು.

ಆಸಿಸ್​ ವೇಗಿಗಳಿಗೆ ಬ್ರಹ್ಮ ನಿರಸನ..
ದಿನದ ಆರಂಭದಲ್ಲೇ ಟೀಂ ಇಂಡಿಯಾ ನಾಯಕ ರಹಾನೆ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದ ಆಸಿಸ್​ ಬೌಲರ್​ಗಳು, ನಂತರ 97 ರನ್​ ಗಳಿಸಿದ್ದ ಪಂತ್​ ಹಾಗೂ 77 ರನ್​ ಗಳಿಸಿದ್ದ ಪೂಜಾರ ವಿಕೆಟ್​ ಪಡೆದ ಬಳಿಕ ಗೆಲುವು ನಮದೆ ಎಂಬಂತೆ ಬೀಗಲು ಶುರು ಮಾಡಿದ್ದರು. ಆದರೆ ಟೀಂ ಇಂಡಿಯಾದ ಆಟಗಾರರಾದ ವಿಹಾರಿ ಹಾಗೂ ಅಶ್ವಿನ್​, ಆಸಿಸ್​ ವೇಗಿಗಳ ಆಲೋಚನೆಗೆ ಬೆಂಕಿ ಹಚ್ಚಿದರು. ಆಸಿಸ್​ ವೇಗಿಗಳ ಘಾತಕ ವೇಗವನ್ನು ಸಮರ್ಥವಾಗಿ ಎದುರಿಸಿದ ಟೀಂ ಇಂಡಿಯಾ ಆಟಗಾರರು, ಆಸಿಸ್​ ತಂಡದ ಗೆಲುವಿನ ಕನಸಿಗೆ ತಣ್ಣೀರೆರಚಿದರು.

ಗಾಯದ ಸಮಸ್ಯೆಯಲ್ಲೂ ವಿಶಿಷ್ಟ ಸಾಧನೆ ಮಾಡಿದ ವಿಹಾರಿ..
ಟೀಂ ಇಂಡಿಯಾದಲ್ಲಿ ಈಗ ತಾನೇ ಕಾಣಿಸಿಕೊಳ್ಳುತ್ತಿರುವ ಹನುಮ ವಿಹಾರಿ ಆಸ್ಟ್ರೇಲಿಯಾ ಟೆಸ್ಟ್​ ಸರಣಿಯಲ್ಲಿ ಅಷ್ಟೇನೂ ಉತ್ತಮವಾಗಿ ಆಡಿರಲಿಲ್ಲ. ಹೀಗಾಗಿ ಕನ್ನಡಿಗ ರಾಹುಲ್​ ಬದಲು ವಿಹಾರಿಗೆ ಸ್ಥಾನ ನೀಡಿದಿದ್ದಕ್ಕಾಗಿ ಕ್ರಿಕೆಟ್​ ಪ್ರೇಮಿಗಳು ಬಿಸಿಸಿಐ ವಿರುದ್ದ ಕಿಡಿಕ್ಕಾರಿದ್ದರು. ಹೀಗಾಗಿ ವಿಹಾರಿ ಮೇಲೆ ಆಡಲೇ ಬೇಕಾದ ಒತ್ತಡ ಇತ್ತು. ಇದಕ್ಕೆ ಹಿನ್ನಡೆಯೆಂಬಂತೆ ವಿಹಾರಿಗೆ 3ನೇ ಟೆಸ್ಟ್​ನ 2ನೇ ಇನ್ನಿಂಗ್ಸ್​ನಲ್ಲಿ ಬ್ಯಾಟಿಂಗ್​ ಮಾಡುವ ವೇಳೆ ಮಂಡಿ ನೋವು ಕಾಣಿಸಿಕೊಂಡಿತು.

ಹೀಗಾಗಿ ವಿಹಾರಿ ರನ್​ ಗಳಿಸಲು ಪರದಾಡುವಂತ್ತಾಯಿತು. ಆದರೆ ದೃತಿಗೆಡದ ಹನುಮ ವಿಹಾರಿ ತಂಡವನ್ನು ದಡ ಸೇರಿಸುವಲ್ಲಿ ಪ್ರಮುಖ ಪಾತ್ರವಹಿಸಿದರು. ಅಲ್ಲದೆ ಗಾಯದ ಸಮಸ್ಯೆಯಿದ್ದರು ತಾಳ್ಮೆಯ ಆಟವಾಡಿದ ವಿಹಾರಿ ಬರೋಬ್ಬರಿ 161 ಬಾಲ್​ ಎದುರಿಸಿ ಕೇವಲ 23 ರನ್​ ಗಳಿಸಿದರು. ಈ ಮೂಲಕ ಟೆಸ್ಟ್​ ಕ್ರಿಕೆಟ್​ನಲ್ಲಿ ಅತೀ ಹೆಚ್ಚು ಬಾಲ್​ ಎದುರಿಸಿ, ಕಡಿಮೆ ರನ್​ ಕಲೆ ಹಾಕಿದ ಮೊದಲ ಭಾರತೀಯ ಆಟಗಾರ ಎಂಬ ಹೆಗ್ಗಳಿಗೆ ವಿಹಾರಿ ಪಾತ್ರರಾದರು.

ರಾಹುಲ್​ ದ್ರಾವಿಡ್​ ಹುಟ್ಟುಹಬ್ಬಕ್ಕೆ ತಕ್ಕನಾದ ಉಡುಗೂರೆಕೊಟ್ಟ ಅಶ್ವಿನ್​- ವಿಹಾರಿ..
ಇಂದು ಟೀಂ ಇಂಡಿಯಾ ಮಾಜಿ ನಾಯಕ ಹಾಗೂ ಕನ್ನಡಿಗ ರಾಹುಲ್​ ದ್ರಾವಿಡ್​ ತಮ್ಮ 48 ನೇ ಜನುಮದಿನವನ್ನು ಆಚರಿಸಿಕೊಳ್ಳುತ್ತಿದ್ದಾರೆ. ದ್ರಾವಿಡ್​ ಟೆಸ್ಟ್​ ಆಡುವ ವೇಳೆ ತಮ್ಮ ತಾಳ್ಮೆಯ ಆಟದಿಂದಲೇ ಎದುರಾಳಿ ತಂಡದ ಬೌಲರ್​ಗಳನ್ನು ಹೈರಾಣಾಗಿಸುತ್ತಿದ್ದರು. ತಾಳ್ಮೆಯ ಆಟಕ್ಕೆ ಹೆಚ್ಚು ಒತ್ತು ನೀಡುತ್ತಿದ್ದ ದ್ರಾವಿಡ್​ ಟೆಸ್ಟ್​ ಕ್ರಿಕೆಟ್​ಗೆ ಹೇಳಿ ಮಾಡಿಸಿದ ಆಟಗಾರನ್ನಾಗಿದ್ದರು. ಮೈದಾನದಲ್ಲಿ ಅತೀ ಹೆಚ್ಚು ಸಮಯ ನಿಂತು ಬ್ಯಾಟಿಂಗ್​ ಮಾಡುತ್ತಿದ್ದ ದ್ರಾವಿಡ್​, ಟೀಂ ಇಂಡಿಯಾಕ್ಕೆ ಎಷ್ಟೋ ಪಂದ್ಯಗಳನ್ನ ಗೆಲ್ಲಿಸಿಕೊಟ್ಟಿದ್ದಾರೆ.​ ಈ ತಾಳ್ಮೆಯ ಆಟದಿಂದಲ್ಲೇ ದ್ರಾವಿಡ್, ಅಂತರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ‘ದಿ ವಾಲ್’​ ಎಂದು ಗುರುತಿಸಿಕೊಂಡಿದ್ದರು. ಇಂದು ಟೀಂ ಇಂಡಿಯಾ ಆಟಗಾರರು ತಮ್ಮ ತಾಳ್ಮೆಯ ಆಟದಿಂದಾಗಿ ತಂಡವನ್ನು ಸೋಲಿನ ದವಡೆಯಿಂದ ಪಾರು ಮಾಡಿದ್ದಾರೆ. ಹೀಗಾಗಿ ಇಂದು ಜನುಮ ದಿನ ಆಚರಿಸಿಕೊಳ್ಳುತ್ತಿರುವ ದ್ರಾವಿಡ್​ಗೆ ಇದು ಉತ್ತಮ ಉಡುಗೊರೆಯಾಗಿದೆ