Housing loan: ಶೇ 7ರೊಳಗೆ ಇಳಿಯಿತು ಈ ಬ್ಯಾಂಕ್ಗಳ ಗೃಹ ಸಾಲ ಬಡ್ಡಿ ದರ
ಪ್ರಮುಖ ಬ್ಯಾಂಕ್ಗಳಿಂದ Housing loan ಬಡ್ಡಿ ದರ ಶೇಕಡಾ 7ಕ್ಕಿಂತ ಕಡಿಮೆಯಲ್ಲಿ ನೀಡಲಾಗುತ್ತಿದೆ. ದೇಶದ ಅತಿ ದೊಡ್ಡ ಬ್ಯಾಂಕ್ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದಿಂದ ಪ್ರೊಸೆಸಿಂಗ್ ಫೀ ಕೂಡ ಮನ್ನಾ ಮಾಡಲಾಗಿದೆ. ಇದು ಮಾರ್ಚ್ 31ರ ತನಕ ಅನ್ವಯ ಆಗುತ್ತದೆ.
ಹತ್ತು ವರ್ಷಗಳಲ್ಲೇ ಕನಿಷ್ಠ ಮಟ್ಟವಾದ ವಾರ್ಷಿಕ ಶೇ 6.7ಕ್ಕೆ ಗೃಹ ಸಾಲದ ಬಡ್ಡಿದರ ಇಳಿಸಿ, ಶುಕ್ರವಾರ ಐಸಿಐಸಿಐ ಬ್ಯಾಂಕ್ ಘೋಷಣೆ ಮಾಡಿದೆ. ಮಾರ್ಚ್ 5, 2021ರಿಂದ ಈ ದರವು ಅನ್ವಯ ಆಗಲಿದೆ. ಗ್ರಾಹಕರು ರೂ 75 ಲಕ್ಷದವರೆಗಿನ ಸಾಲವನ್ನು ಇದೇ ಬಡ್ಡಿ ದರದಲ್ಲಿ ಪಡೆಯಬಹುದು. 75 ಲಕ್ಷ ರೂಪಾಯಿ ಮೇಲ್ಪಟ್ಟ ಸಾಲಕ್ಕೆ ಶೇಕಡಾ 6.75ರ ಬಡ್ಡಿ ದರ ಆಗುತ್ತದೆ. ಈ ಪರಿಷ್ಕೃತ ಬಡ್ಡಿ ದರವು ಮಾರ್ಚ್ 31, 2021ರ ತನಕ ದೊರೆಯುತ್ತದೆ ಎಂದು ಬ್ಯಾಂಕ್ನಿಂದ ತಿಳಿಸಲಾಗಿದೆ.
‘ತಮ್ಮ ಸ್ವಂತ ಬಳಕೆಗಾಗಿ ಮನೆ ಖರೀದಿ ಮಾಡಬೇಕು ಎಂದು ಕಳೆದ ಕೆಲವು ತಿಂಗಳಿಂದ ಗ್ರಾಹಕರಿಂದ ಬೇಡಿಕೆ ಹೆಚ್ಚಾಗಿರುವುದು ನಮಗೆ ಕಂಡುಬಂದಿದೆ. ಕಡಿಮೆ ಬಡ್ಡಿ ದರವನ್ನು ಗಮನದಲ್ಲಿ ಇಟ್ಟುಕೊಂಡು ಹೇಳುವುದಾದರೆ ಕನಸಿನ ಮನೆಯನ್ನು ಖರೀದಿ ಮಾಡುವುದಕ್ಕೆ ಇದು ಅವಕಾಶ’ ಎಂದು ಐಸಿಐಸಿಐ ಬ್ಯಾಂಕ್ ಸೆಕ್ಯೂರ್ಡ್ ಅಸೆಟ್ಸ್ ಮುಖ್ಯಸ್ಥ ರವಿ ನಾರಾಯಣನ್ ಹೇಳಿದ್ದಾರೆ.
ಶೇ 7ರ ಬಡ್ಡಿದರದೊಳಗೆ ಬಂತು ಗೃಹ ಸಾಲ ಕಳೆದ ವಾರ ದೇಶದ ಅತಿ ದೊಡ್ಡ ಬ್ಯಾಂಕ್ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ), ಕೊಟಕ್ ಮಹೀಂದ್ರಾ ಬ್ಯಾಂಕ್ನಿಂದ ಮತ್ತು ಈ ವಾರದ ಶುರುವಿನಲ್ಲಿ ಎಚ್ಡಿಎಫ್ಸಿಯಿಂದ ಗೃಹ ಸಾಲದ ಬಡ್ಡಿ ದರವನ್ನು ಇಳಿಕೆ ಮಾಡಲಾಗಿದೆ. ಮಾರುಕಟ್ಟೆಯಲ್ಲಿ ಸ್ಪರ್ಧೆ ವಿಪರೀತ ಹೆಚ್ಚಾಗುತ್ತಿರುವುದರಿಂದ ಇಂಥ ಬೆಳವಣಿಗೆ ಆಗಿದೆ. ಎಸ್ಬಿಐ, ಎಚ್ಡಿಎಫ್ಸಿ ಗೃಹ ಸಾಲ ದರವನ್ನು ಶೇ 6.7 ಹಾಗೂ ಶೇ 6.75ಕ್ಕೆ ಇಳಿಸಿವೆ. ಇನ್ನು ಕೊಟಕ್ ಮಹೀಂದ್ರಾ ಬ್ಯಾಂಕ್ನಿಂದ ಶೇ 6.65ಕ್ಕೆ ತರಲಾಗಿದೆ.
ಐಸಿಐಸಿಐ ಬ್ಯಾಂಕ್ ತಿಳಿಸಿರುವ ಪ್ರಕಾರ, ಹೊಸಬರು ಕೂಡ ಈ ಸಾಲಕ್ಕೆ ಡಿಜಿಟಲ್ ಆಗಿ ಬ್ಯಾಂಕ್ ವೆಬ್ಸೈಟ್ ಮೂಲಕ ಹಾಗೂ ಮೊಬೈಲ್ ಬ್ಯಾಂಕಿಂಗ್ ಪ್ಲಾಟ್ಫಾರ್ಮ್ iMobile ಪೇ ಮೂಲಕ ಅರ್ಜಿ ಹಾಕಬಹುದು. 2020ರ ನವೆಂಬರ್ನಲ್ಲಿ ಮನೆ ಅಡಮಾನ ಇರಿಸಿಕೊಂಡು ಸಾಲ ನೀಡುವ ಪೋರ್ಟ್ಫೋಲಿಯೋದಲ್ಲಿ 2 ಲಕ್ಷ ಕೋಟಿ ರೂಪಾಯಿ ದಾಟಿದ ಮೊದಲ ಖಾಸಗಿ ಬ್ಯಾಂಕ್ ಎನಿಸಿಕೊಂಡಿತು ಐಸಿಐಸಿಐ ಬ್ಯಾಂಕ್. 2021ರ ಎರಡನೇ ತ್ರೈಮಾಸಿಕಕ್ಕಿಂತ ಮೂರನೇ ತ್ರೈಮಾಸಿಕದಲ್ಲಿ ಅಡಮಾನ ಸಾಲದ ವಿತರಣೆ ಐಸಿಐಸಿಐ ಬ್ಯಾಂಕ್ನದು ಹೆಚ್ಚಿದೆ. 2020ರ ಡಿಸೆಂಬರ್ನಲ್ಲಿ ಸಾರ್ವಕಾಲಿಕ ತಿಂಗಳ ಗರಿಷ್ಠ ಮಟ್ಟವನ್ನು ತಲುಪಿತು ಎಂದು ತಿಳಿಸಲಾಗಿದೆ.
ಪ್ರೊಸೆಸಿಂಗ್ ಶುಲ್ಕ ಮನ್ನಾ ಮಾರ್ಚ್ 3ನೇ ತಾರೀಕಿನಂದು ಎಚ್ಡಿಎಫ್ಸಿ ತಿಳಿಸಿರುವಂತೆ, ಎಲ್ಲ ರೀಟೇಲ್ ಗ್ರಾಹಕರಿಗೂ ಮಾರ್ಚ್ 4ರಿಂದ ಅನ್ವಯ ಆಗುವಂತೆ ಗೃಹಸಾಲ ದರವನ್ನು 5 ಬೇಸಿಸ್ ಪಾಯಿಂಟ್ ಇಳಿಕೆ ಮಾಡಲಾಗಿದೆ. ಈ ದರ ಇಳಿಕೆಯಿಂದ ಎಚ್ಡಿಎಫ್ಸಿ ಗೃಹ ಸಾಲ ಪಡೆಯುವ ಎಲ್ಲ ಗ್ರಾಹಕರಿಗೂ ಅನ್ವಯ ಆಗುತ್ತದೆ. ಸಾಲದ ಮೊತ್ತ ಎಷ್ಟೇ ಆಗಿದ್ದರೂ ಬಡ್ಡಿ ದರವನ್ನು ಶೇ 6.75ಕ್ಕೆ ನಿಗದಿ ಮಾಡಲಾಗಿದೆ. ಎಸ್ಬಿಐನಿಂದ ಶೇ 6.70ಗೆ ಇಳಿಸಲಾಗಿದೆ. ಜತೆಗೆ ಪ್ರೊಸೆಸಿಂಗ್ ಶುಲ್ಕವನ್ನು ಮನ್ನಾ ಮಾಡಲಾಗಿದೆ. ಇನ್ನು ಖಾಸಗಿ ಬ್ಯಾಂಕ್ ಆದ ಕೊಟಕ್ ಮಹೀಂದ್ರಾ ಬ್ಯಾಂಕ್ನಿಂದಲೂ ಈಚೆಗೆ ಸಾಲದ ಮೇಲಿನ ಬಡ್ಡಿ ದರ ಇಳಿಕೆ ಮಾಡಲಾಗಿದೆ.
ಅಂದಹಾಗೆ 2019ರ ಫೆಬ್ರವರಿಯಿಂದ ಇಲ್ಲಿಯ ತನಕ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾವು ರೆಪೋ ದರವನ್ನು (ವಾಣಿಜ್ಯ ಬ್ಯಾಂಕ್ಗಳಿಗೆ ನೀಡುವ ಸಾಲದ ಮೇಲಿನ ಬಡ್ಡಿ ದರ) 250 ಬಿಪಿಎಸ್ ಇಳಿಕೆ ಮಾಡಿದೆ. ಅದರ ಪರಿಣಾಮವಾಗಿ ವಾಣಿಜ್ಯ ಬ್ಯಾಂಕ್ಗಳು ಸಹ ಸಾಲದ ಮೇಲೆ ಬಡ್ಡಿ ದರ ಇಳಿಸಿವೆ.
ಇದನ್ನೂ ಓದಿ: Housing Loan: ಮನೆ ಕಟ್ಟಲು, ಖರೀದಿ ಮಾಡಲು ಸಾಲ ಮಾಡುವ ಮುನ್ನ ತಿಳಿಯಲೇಬೇಕಾದ ಸಂಗತಿಗಳು
