ಜಲಾವೃತಗೊಂಡ ಸೇತುವೆ ದಾಟಲು ಹೋಗಿ 260 ಚೀಲ ಸಕ್ಕರೆ ನೀರುಪಾಲು!

ಬೆಳಗಾವಿ: ಲಾರಿ ಪಲ್ಟಿಯಾಗಿ 260 ಚೀಲ ಸಕ್ಕರೆ ನೀರುಪಾಲಾಗಿರುವ ಘಟನೆ ಗೋಕಾಕ್ ತಾಲೂಕಿನ ರಡ್ಡೇರಟ್ಟಿ ಬಳಿಯ ಚಿಕ್ಕ ಸೇತುವೆ ಮೇಲೆ ನಡೆದಿದೆ.

ಬೆಳಗಾವಿ ಜಿಲ್ಲೆ ಗೋಕಾಕ್ ತಾಲೂಕಿನ ವಿವಿಧೆಡೆ ಧಾರಾಕಾರ ಮಳೆ ಸುರಿಯುತ್ತಿದೆ. ಹೀಗಾಗಿ ರಡ್ಡೇರಟ್ಟಿ-ಯಾದವಾಡ ಸಂಪರ್ಕ ಕಲ್ಪಿಸುವ ಚಿಕ್ಕ ಸೇತುವೆ ಜಲಾವೃತವಾಗಿತ್ತು. ಈ ರೀತಿ ಜಲಾವೃತಗೊಂಡು ತುಂಬಿ ಹರಿಯುತ್ತಿರುವ ಸೇತುವೆ ಮೇಲೆಯೇ ಚಾಲಕ ಲಾರಿ ಚಲಾಯಿಸಿದ್ದಾನೆ. ಈ ವೇಳೆ ನೀರಿನ ರಭಸಕ್ಕೆ ಚಾಲಕನ ನಿಯಂತ್ರಣ ತಪ್ಪಿ ಲಾರಿ ಪಲ್ಟಿಯಾಗಿದೆ.

ಲಾರಿಯಲ್ಲಿದ್ದ ಸುಮಾರು 260 ಸಕ್ಕರೆ ಚೀಲ ನೀರಿಗೆ ಬಿದ್ದು ನೀರುಪಾಲಾಗಿದೆ. ಬಾಗಲಕೋಟೆ ಜಿಲ್ಲೆ ಮಹಾಲಿಂಗಪುರ ಮೂಲದ ವ್ಯಕ್ತಿಗೆ ಸೇರಿದ ಲಾರಿ ಇದಾಗಿದ್ದು, ರಡ್ಡೇರಟ್ಟಿ ಮಾರ್ಗವಾಗಿ ಯಾದವಾಡ ಗ್ರಾಮದತ್ತ ಲಾರಿ ಹೊರಟಿತ್ತು.