ಚಿಂತಾಮಣಿ ಬಳಿ ಕಾರಿಗೆ ಬೆಂಕಿ, ಭಸ್ಮಗೊಂಡ ವ್ಯಕ್ತಿ ಬೆಂಗಳೂರಿನವ್ರು, ಪ್ರಕರಣದ ಅಸಲಿಯತ್ತೇನು?

ಚಿಕ್ಕಬಳ್ಳಾಪುರ: ಚಿಂತಾಮಣಿ ತಾಲೂಕಿನ ಕೇತನಾಯಕನಹಳ್ಳಿ ಬಳಿಯ ನೀಲಗಿರಿ ತೋಪಿನಲ್ಲಿ ವ್ಯಕ್ತಿಯನ್ನು ಕೂಡಿಹಾಕಿ ಕಾರು ಸಮೇತ ಸುಟ್ಟುಹಾಕಲಾಗಿತ್ತು. ತನಿಖೆ ನಡೆಸಿದ ಪೊಲೀಸರು ಕಾರಿನಲ್ಲಿದ್ದ ಮಾಲೀಕರ ಗುರುತು ಪತ್ತೆ ಹಚ್ಚಿದ್ದಾರೆ.

ಫೆ.8ರಂದು ಚಿಂತಾಮಣಿ ಗ್ರಾಮಾಂತರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಸಂಪೂರ್ಣ ಸುಟ್ಟು ಕರಕಲಾದ ಸ್ಥಿತಿಯಲ್ಲಿ ಕಾರು ಹಾಗೂ ಮೃತದೇಹ ಪತ್ತೆಯಾಗಿತ್ತು. ಕೆಎ 51, ಕೆಎಂ 969 ನಂಬರ್​ನ ಬ್ರೀಜಾ ಕಾರು ಸುಮಿತ್ರಮ್ಮ ಕಫೂರ್ ಎಂಬುವರ ಹೆಸರಿನಲ್ಲಿದೆ.

ಬೆಂಗಳೂರಿನ ಕಾಡುಗೋಡಿ ನಿವಾಸಿ ಸುಮಿತ್ರಮ್ಮ ಮಗ ಧರ್ಮೇಂದ್ರ ಈ ಕಾರನ್ನು ಬಳಸುತ್ತಿದ್ದ. ಹಾಗಾಗಿ ಕಾರಿನಲ್ಲಿ ಪತ್ತೆಯಾದ ಕಳೆಬರಹ ಧರ್ಮೇಂದ್ರನದ್ದೇ ಎಂದು ಪ್ರಾಥಮಿಕವಾಗಿ ಪೊಲೀಸರಿಗೆ ತಿಳಿದು ಬಂದಿದೆ. ಧರ್ಮೇಂದ್ರಗೆ ಇಬ್ಬರು ಪತ್ನಿಯರು ಇದ್ದಾರೆ ಎನ್ನಲಾಗಿದೆ. ಪ್ರಕರಣವನ್ನ ಬೆನ್ನಟ್ಟಿರುವ ಪೊಲೀಸರಿಗೆ ಕೌಟುಂಬಿಕ ಕಲಹ ಹಿನ್ನೆಲೆಯಲ್ಲಿ ಸುಪಾರಿ ಕೊಲೆ ಶಂಕೆ ವ್ಯಕ್ತವಾಗಿದೆ. ಹೀಗಾಗಿ ಕೋಲಾರ ಎಸ್​ಪಿ ಕಾರ್ತಿಕ್ ರೆಡ್ಡಿ ನೇತೃತ್ವದಲ್ಲಿ ತನಿಖೆ ಚುರುಕುಗೊಂಡಿದೆ.