ಆಸ್ಪತ್ರೆ ಸಿಬ್ಬಂದಿಯ ಎಡವಟ್ಟು: ಮಗಳ ಮುಖವನ್ನ ಕೊನೇ ಬಾರಿ ನೋಡಲಾಗದೆ ತಾಯಿಯ ರೋದನೆ

ಚಿಕ್ಕಮಗಳೂರು : ಸೂಕ್ತ ಸಮಯಕ್ಕೆ ಚಿಕಿತ್ಸೆ ಸಿಗದೆ ವಿಶೇಷಚೇತನ ಯುವತಿಯೊಬ್ಬರು ಆಸ್ಪತ್ರೆಯಲ್ಲಿ ನರಳಿ ನರಳಿ ಸಾವನ್ನಪ್ಪಿರುವ ಘಟನೆ ನಗರದಲ್ಲಿ ನಡೆದಿದೆ.

ನಗರದ ಗೌರಿ ಕಾಲುವೆಯ ವಿಶೇಷಚೇತನ ಯುವತಿ ನಾಫೀಯಾ ಮೃತ ದುರ್ದೈವಿ. ನಾಫೀಯಾ ಮೊದಲ ವರ್ಷದ ಬಿಕಾಂ ವಿದ್ಯಾರ್ಥಿ. ಇತ್ತೀಚೆಗೆ, ತೀವ್ರ ಜ್ವರದಿಂದ ಬಳಲುತ್ತಿದ್ದ ಯುವತಿಯನ್ನು ಖಾಸಗಿ ಆಸ್ಪತ್ರೆಗೆ ಕರೆದೊಯ್ದಿದ್ದರು. ಆದರೆ, ಯುವತಿಯ ಕೊರೊನಾ ರಿಪೋರ್ಟ್ ಇಲ್ಲ ಎಂಬ ಕಾರಣದಿಂದಾಗಿ ಆಸ್ಪತ್ರೆ ಸಿಬ್ಬಂದಿ ಚಿಕಿತ್ಸೆ ನೀಡಲು ಹಿಂದೇಟು ಹಾಕಿದ್ದರು.

ನಂತರ ಜಿಲ್ಲಾಸ್ಪತ್ರೆಗೆ ಯುವತಿಯನ್ನು ಕರೆದುಕೊಂಡು ಹೋಗಲಾಗಿದೆ. ಆದರೆ ಅಲ್ಲಿ ಯುವತಿಯನ್ನು ಮೂರು ಗಂಟೆಗಳ ಕಾಲ ಬೆಡ್ ನೀಡದೆ ಅಲೆದಾಡಿಸಿದ್ದರು. ಈ ಕಾರಣದಿಂದಾಗಿ ಯುವತಿ ಸೂಕ್ತ ಸಮಯಕ್ಕೆ ಚಿಕಿತ್ಸೆ ಸಿಗದೆ ಜುಲೈ 24ರಂದು ಸಾವನ್ನಪ್ಪಿದ್ದರು. ಆದರೆ, ಯುವತಿಗೆ ಕೊರೊನಾ ಸೋಂಕಿರಬಹುದು ಎಂದು ಆಸ್ಪತ್ರೆ ಸಿಬ್ಬಂದಿ ಆಕೆಯ ಮೃತದೇಹವನ್ನು ಸಂಬಂಧಿಕರಿಗೆ ನೀಡಿರಲಿಲ್ಲ.

ಆದರೆ ನಿನ್ನೆ ಯುವತಿಯ ಕೊರೊನಾ ವರದಿ ಬಂದಿದ್ದು, ಆಕೆಗೆ, ಸೋಂಕು ಇಲ್ಲ ಎಂಬುದು ದೃಢಪಟ್ಟಿದೆ. ಹೀಗಾಗಿ, ಆಸ್ಪತ್ರೆ ಸಿಬ್ಬಂದಿಯವರ ಎಡವಟ್ಟಿನಿಂದಾಗಿ ನನ್ನ ಮಗಳ ಮುಖವನ್ನು ಕೊನೇ ಬಾರಿ ನೋಡಲಿ ಆಗಲೇ ಇಲ್ಲ ಎಂದು ಆಕೆಯ ತಾಯಿ ಕಣ್ಣೀರಿಟ್ಟರು.