Solar Eclipse: ಸಂಪೂರ್ಣ ಸೂರ್ಯ ಗ್ರಹಣ; ಈ ಅವಕಾಶ ತಪ್ಪಿದರೆ 1000 ವರ್ಷ ಕಾಯಬೇಕು!

ಸೂರ್ಯನನ್ನು ಚಂದ್ರನು ಸಂಪೂರ್ಣವಾಗಿ ಮರೆಮಾಚುವ, ಭೂಮಿಯ ಮೇಲೆ ನೆರಳು ಬೀಳಿಸುವ ಸಂಪೂರ್ಣ ಸೂರ್ಯ ಗ್ರಹಣವು ಅತ್ಯಂತ ಅಪರೂಪದ ಆಕಾಶ ವಿದ್ಯಮಾನವಾಗಿದೆ. ಇದು ಏಪ್ರಿಲ್ 8ರಂದು ಸಂಭವಿಸುತ್ತದೆ. ಸಂಪೂರ್ಣ ಸೂರ್ಯಗ್ರಹಣದ (Total Solar Eclipse) ಅದೇ ಸಂಪೂರ್ಣತೆಯೊಂದಿಗೆ ಅದೇ ಸ್ಥಳದಲ್ಲಿ ಮರುಕಳಿಸಲು 400ರಿಂದ 1,000 ವರ್ಷಗಳ ಸಮಯವನ್ನು ತೆಗೆದುಕೊಳ್ಳುತ್ತದೆ.

2024ರ ಗ್ರಹಣವು ಬಹಳ ವಿಶೇಷವಾಗಿದೆ. ಇದು ಮೆಕ್ಸಿಕೋದಿಂದ ಯುನೈಟೆಡ್ ಸ್ಟೇಟ್ಸ್ ಮೂಲಕ ಮತ್ತು ಕೆನಡಾದವರೆಗೆ ವಿಸ್ತರಿಸುತ್ತದೆ. ಈ ಮಾರ್ಗವು ಈ ಪ್ರದೇಶಗಳಾದ್ಯಂತ ಲಕ್ಷಾಂತರ ಜನರಿಗೆ ಸೂರ್ಯನನ್ನು ಸಂಪೂರ್ಣ ಕತ್ತಲೆಯಲ್ಲಿ ಅನುಭವಿಸಲು ಅನುವು ಮಾಡಿಕೊಡುತ್ತದೆ. ಈ ಸಂಪೂರ್ಣ ಸೂರ್ಯಗ್ರಹಣ ಉತ್ತರ ಅಮೆರಿಕಾದಲ್ಲಿ 2033ರವರೆಗೆ ಮತ್ತೆ ಗೋಚರಿಸುವುದಿಲ್ಲ. ಪಶ್ಚಿಮ ಕೆನಡಾ, ಮೊಂಟಾನಾ ಮತ್ತು ಉತ್ತರ ಡಕೋಟಾದ ಭಾಗಗಳಲ್ಲಿ 2044ರವರೆಗೆ ಗೋಚರಿಸುವುದಿಲ್ಲ.

ಇದನ್ನೂ ಓದಿ: Chandra Grahan 2024: ಚಂದ್ರ ಗ್ರಹಣದ ದಿನ ಗರ್ಭಿಣಿಯರು ಈ ತಪ್ಪುಗಳನ್ನು ಮಾಡಬೇಡಿ

ಸಂಪೂರ್ಣ ಸೂರ್ಯಗ್ರಹಣ ಸಂಭವಿಸಲು ಸೂರ್ಯ, ಚಂದ್ರ ಮತ್ತು ಭೂಮಿಯ ಜೋಡಣೆಯು ನಿಖರವಾಗಿರಬೇಕು. ಭೂಮಿಯ ಸುತ್ತ ಚಂದ್ರನ ಕಕ್ಷೆಯು ಸೂರ್ಯನ ಸುತ್ತ ಭೂಮಿಯ ಕಕ್ಷೆಗೆ ಹೋಲಿಸಿದರೆ ಸ್ವಲ್ಪ ಓರೆಯಾಗಿರುತ್ತದೆ. ಇದರರ್ಥ ಹೆಚ್ಚಿನ ಸಮಯ, ಚಂದ್ರನ ನೆರಳು ಭೂಮಿಯನ್ನು ತಪ್ಪಿಸುತ್ತದೆ ಅಥವಾ ಅದನ್ನು ಭಾಗಶಃ ಆವರಿಸುತ್ತದೆ. ಇದರ ಪರಿಣಾಮವಾಗಿ ಭಾಗಶಃ ಗ್ರಹಣಗಳು ಸಂಭವಿಸಬಹುದು ಅಥವಾ ಗ್ರಹಣವೇ ಇರುವುದಿಲ್ಲ.

ಸಂಪೂರ್ಣ ಸೂರ್ಯ ಗ್ರಹಣಗಳು ದಕ್ಷಿಣ ಪೆಸಿಫಿಕ್ ಅಥವಾ ಅಂಟಾರ್ಕ್ಟಿಕ್‌ನಂತಹ ದೂರದ ಸ್ಥಳಗಳಲ್ಲಿ ಹೆಚ್ಚಾಗಿ ಕಂಡುಬರುತ್ತವೆ. 2024ರ ಉತ್ತರ ಅಮೆರಿಕಾದ ಗ್ರಹಣವನ್ನು ಅನುಸರಿಸಿ, ಯುರೋಪ್​ನಲ್ಲಿ ಮುಂದಿನ ಸಂಪೂರ್ಣ ಸೂರ್ಯಗ್ರಹಣ 2026ರಲ್ಲಿ ಸಂಭವಿಸಲಿದೆ. ಇದು ಗ್ರೀನ್​ಲ್ಯಾಂಡ್, ಐಸ್​ಲ್ಯಾಂಡ್ ಮತ್ತು ಸ್ಪೇನ್‌ನ ಉತ್ತರದ ಅಂಚಿನಲ್ಲಿರುವ ಪ್ರದೇಶಗಳ ಮೇಲೆ ಪರಿಣಾಮ ಬೀರುತ್ತದೆ.

ಇದನ್ನೂ ಓದಿ: Solar Eclipse 2024: ಈ ವರ್ಷದ ಮೊದಲ ಸೂರ್ಯಗ್ರಹಣದ ದಿನ, ಸಮಯದ ಮಾಹಿತಿ ಇಲ್ಲಿದೆ

ಸಂಪೂರ್ಣ ಸೂರ್ಯಗ್ರಹಣಗಳನ್ನು ಭೂಮಿಯ ಮೇಲಿನ ನಿರ್ದಿಷ್ಟ ಸ್ಥಳಗಳಿಂದ ಮಾತ್ರ ವೀಕ್ಷಿಸಬಹುದು. ಸಂಪೂರ್ಣ ಗ್ರಹಣವು ಗೋಚರಿಸುವ ಸಂಪೂರ್ಣತೆಯ ಮಾರ್ಗವು ತುಲನಾತ್ಮಕವಾಗಿ ಕಿರಿದಾಗಿರುತ್ತದೆ. ಸಾಮಾನ್ಯವಾಗಿ ಕೆಲವೇ ಡಜನ್ ಮೈಲುಗಳಷ್ಟು ಅಗಲವಿರುತ್ತದೆ. ಈ ಮಾರ್ಗದ ಹೊರಗೆ ಈ ಗ್ರಹಣವನ್ನು ಪೂರ್ಣವಾಗಿ ವೀಕ್ಷಿಸಲು ಸಾಧ್ಯವಾಗುವುದಿಲ್ಲ.

ಇನ್ನಷ್ಟು ಜೀವನಶೈಲಿಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ