ಮಿದುಳು ಸರ್ಜರಿ ವೇಳೆ ಗಾಯತ್ರಿ ಮಂತ್ರ ಪಠಿಸಿದ ರೋಗಿ; ನಂತರ ನಡೆಯಿತು ವೈದ್ಯಕೀಯ ಲೋಕ ಅಚ್ಚರಿ ಪಡುವಂಥ ಪವಾಡ

ವೈದ್ಯಕೀಯ ಲೋಕವೇ  ಅಚ್ಚರಿಪಡುವಂತಹ ಪವಾಡಗಳು ಅದೆಷ್ಟೋ ನಡೆದುಹೋಗಿವೆ. ಹಾಗೇ ಈಗೊಂದು ಘಟನೆ ನಡೆದಿದ್ದು ಜೈಪುರದ ನಾರಾಯಣ ಆಸ್ಪತ್ರೆಯಲ್ಲಿ. ಇಲ್ಲಿ ನಿವೃತ್ತ ಪೊಲೀಸ್​ ಕಾನ್​ಸ್ಟೆಬಲ್​ ಒಬ್ಬರಿಗೆ ಮಿದುಳು ಸರ್ಜರಿ (Brain Surgery) ನಡೆದಿತ್ತು. ಮಿದುಳಿನಲ್ಲಿ ಗಡ್ಡೆಯಾಗಿ ತುಂಬ ಸಂಕಷ್ಟದಲ್ಲಿದ್ದ ಇವರಿಗೆ ಸರ್ಜರಿ ಮಾಡುವುದಾಗಿ ನಿಶ್ಚಯವೇನೋ ಆಗಿತ್ತು. ಆದರೆ ಆ ಶಸ್ತ್ರಚಿಕಿತ್ಸೆಯಲ್ಲಿ ಸ್ವಲ್ಪ ಏರುಪೇರಾದರೂ ಆ ರೋಗಿಯ ಆರೋಗ್ಯ (Health) ಇನ್ನಷ್ಟು ಹದಗೆಡುವ ಸಾಧ್ಯತೆ ಇತ್ತು. ಅದೆಲ್ಲಕ್ಕಿಂತ ಮಿಗಿಲಾಗಿ, ವೈದ್ಯರುಗಳಿಗೇ ಪೂರ್ತಿಯಾಗಿ ನಂಬಿಕೆ ಇರಲಿಲ್ಲ, ಸರ್ಜರಿ ಯಶಸ್ವಿಯಾಗಬಹುದು ಎಂದು.

ಆದರೆ ಪವಾಡವೆಂಬಂತೆ ರೋಗಿಗೆ ಮಾಡಲಾದ ಸರ್ಜರಿ ಯಶಸ್ವಿಯಾಗಿದೆ. ಅದಕ್ಕೆ ಕಾರಣ ಆ ಪೊಲೀಸ್​ ಕಾನ್​ಸ್ಟೆಬಲ್​ ತಮ್ಮ ಸರ್ಜರಿ ವೇಳೆ ಪಠಿಸುತ್ತಿದ್ದ ಗಾಯತ್ರಿ ಮಂತ್ರ ಎಂದೇ ಹೇಳಲಾಗುತ್ತಿದೆ. ಪೊಲೀಸ್ ಕಾನ್​ಸ್ಟೆಬಲ್​ ಹೆಸರು ರಿದಂಲಾಲ್​ ರಾಮ್​. 57ವರ್ಷದ ಇವರಿಗೆ ತೀವ್ರವಾಗಿ ಅಪಸ್ಮಾರ ಕಾಣಿಸಿಕೊಂಡಿತ್ತು. ರೋಗ ವಿಕಾರದಿಂದ ಮಾತಾಡಲೂ ಸಾಧ್ಯವಾಗುತ್ತಿರಲಿಲ್ಲ. ತಪಾಸಣೆ ಮಾಡಿದಾಗ ಅವರ ಮಿದುಳಿನಲ್ಲಿ ಗಡ್ಡೆ ಇರುವುದು ಗೊತ್ತಾಗಿತ್ತು. ಸರ್ಜರಿ ಮಾಡುವಾಗ ಚೂರೇಚೂರು ಹೆಚ್ಚು ಕಡಿಮೆಯಾದರೂ ಪೂರ್ತಿಯಾಗಿ ಮಾತು ನಿಲ್ಲುತ್ತಿತ್ತು ಅಥವಾ ಪ್ಯಾರಾಲಿಸಿಸ್​ ಉಂಟಾಗುತ್ತಿತ್ತು. ಮಿದುಳಿನ ತುಂಬ ಸೂಕ್ಷ್ಮವಾದ ಜಾಗದಲ್ಲಿ ಈ ಗಡ್ಡೆ ಇದ್ದಿದ್ದರಿಂದ ಅಪಾಯ ಜಾಸ್ತಿಯಾಗಿಯೇ ಇತ್ತು. ಆದರೂ ಆಸ್ಪತ್ರೆಯ ಡಾ.ಕೆ.ಕೆ.ಬನ್ಸಾಲ್​ ನೇತೃತ್ವದ ತಂಡ ಈ ಸಂಕೀರ್ಣ ಸರ್ಜರಿಯನ್ನು ನಡೆಸಿತ್ತು. ಸುಮಾರು ನಾಲ್ಕು ತಾಸುಗಳ ಕಾಲ ನಡೆದ ಶಸ್ತ್ರಚಿಕಿತ್ಸೆ ವೇಳೆ ಪೊಲೀಸ್​ ಕಾನ್​ಸ್ಟೆಬಲ್​ ಒಂದೇ ಸಮನೆ ಗಾಯತ್ರಿ ಮಂತ್ರ ಪಠಣ ಮಾಡುತ್ತಲೇ ಇದ್ದರು.

ಈ ಗಡ್ಡೆ ತುಂಬ ಸೂಕ್ಷ್ಮ ಪ್ರದೇಶದಲ್ಲಿ ಆಗಿತ್ತು. ಅದರ ನಿಖರ ಸ್ಥಳದ ಮೇಲೆ ಗಮನ ಕೇಂದ್ರೀಕರಿಸಲು ಹೆಚ್ಚಿನ ಸಾಮರ್ಥ್ಯವಿರುವ ಮೈಕ್ರೋಸ್ಕೋಪ್​ ಬಳಸಬೇಕಾಯಿತು ಎಂದು ಆಸ್ಪತ್ರೆ ನಿರ್ದೇಶಕರಾದ ಡಾ. ಮಾಲಾ ಅರೋನ್​ ತಿಳಿಸಿದ್ದಾರೆ. ಇನ್ನು ಸರ್ಜರಿ ವೇಳೆ ರಾಮ್​ ಅವರು ಎಚ್ಚರವಾಗಿರುವಂತೆಯೇ ನೋಡಿಕೊಳ್ಳಲಾಗಿತ್ತು. ತಲೆಭಾಗಕ್ಕೆ ಅನಸ್ತೇಶಿಯಾ ಕೊಡಲಾಗಿತ್ತು. ರಾಮ್​ ತಮ್ಮ ಮನಸಿನ ಭಯ ಹೋಗಲಾಡಿಸಿಕೊಳ್ಳಲು ಗಾಯತ್ರಿ ಮಂತ್ರ ಪಠಣೆ ಮಾಡುತ್ತಿದ್ದರೂ ಎಂದೂ ಮಾಲಾ ಹೇಳಿದ್ದಾರೆ. 2018ರಲ್ಲೂ ಇಂಥದ್ದೇ ಒಂದು ಪ್ರಕರಣ ನಡೆದಿತ್ತು. 30 ವರ್ಷದ ಅಕೌಂಟಂಟ್​ ಒಬ್ಬರು ತಮ್ಮ ಮಿದುಳು ಸರ್ಜರಿ ವೇಳೆ ಹನುಮಾನ್​ ಚಾಲೀಸಾ ಪಠಿಸುತ್ತಿದ್ದರು.

ಇದನ್ನೂ ಓದಿ: ರಾಜ್ಯಸಭೆಯಲ್ಲಿ ಗಲಭೆಯೆಬ್ಬಿಸಿದವರ ವಿರುದ್ಧ ಕ್ರಮ, ನಿಮ್ಮ ವರ್ತನೆಯಿಂದ ರಾತ್ರಿ ನಿದ್ರೆಯೇ ಮಾಡಿಲ್ಲ; ಭಾವುಕರಾದ ವೆಂಕಯ್ಯ ನಾಯ್ಡು

ಭಾರತದ ಹೊರಗೆ ಕೊವಿಡ್ ಲಸಿಕೆ ಪಡೆದವರಿಗೆ ಶೀಘ್ರದಲ್ಲೇ ಪ್ರಮಾಣಪತ್ರ ನೀಡಲಿದೆ ಕೇಂದ್ರ ಸರ್ಕಾರ