ದೆಹಲಿಯಲ್ಲಿ ಮತ್ತೊಂದು ವಾರದ ಅವಧಿಗೆ ಲಾಕ್ಡೌನ್ ವಿಸ್ತರಿಸಿದ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್
ಸರ್ಕಾರ ಹೊರಡಿಸಿರುವ ಆದೇಶದ ಪ್ರಕಾರ ಮೆಡಿಕಲ್ ಶಾಪ್, ತರಕಾರಿ ಅಂಗಡಿ, ಕಿರಾಣಾ ಅಂಗಡಿ ಮೊದಲಾದ ಅಗತ್ಯ ಸೇವೆಗಳಿಗೆ ಅನುಮತಿ ಇರುತ್ತದೆ. ಆದರೆ, ಅಂಗಡಿಗಳ ಮಾಲೀಕರು ಮತ್ತು ಗ್ರಾಹಕರು ದೈಹಿಕ ಅಂತರವನ್ನು ಕಾಯ್ದುಕೊಳ್ಳಬೇಕಾಗುತ್ತದೆ.
ನವದೆಹಲಿ: ದೆಹಲಿಯಲ್ಲಿ ಕೊವಿಡ್-19 ಸೊಂಕಿನ ಪ್ರಕರಣಗಳ ಸಂಖ್ಯೆ ನಿರಂತರವಾಗಿ ಏರುತ್ತಿರುವ ಹಿನ್ನೆಲೆಯಲ್ಲಿ ಅಲ್ಲಿನ ಸರ್ಕಾರವು ಈಗ ಜಾರಿಯಲ್ಲಿವ ಲಾಕ್ಡೌನ್ ಅನ್ನು ಮತ್ತೊಂದು ವಾರದ ಅವಧಿಗೆ ವಿಸ್ತರಿಸುವ ನಿರ್ಧಾರವನ್ನು ಶನಿವಾರದಂದು ತೆಗೆದುಕೊಂಡಿತು. ಈ ಕುರಿತು ಟ್ವೀಟ್ ಮಾಡಿರುವ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರು, ‘ದೆಹಲಿಯಲ್ಲಿ ಲಾಕ್ಡೌನ್ ಒಂದು ಅವಧಿಯವರೆಗೆ ವಿಸ್ತರಿಸಲಾಗಿದೆ,’ ಎಂದಿದ್ದಾರೆ. ಈ ನಿರ್ಧಾರದ ಅನುಗುಣವಾಗಿ ದೆಹಲಿಯಲ್ಲಿ ಲಾಕ್ಡೌನ್ ಮೇ 10 ಬೆಳಗ್ಗೆ 5 ಗಂಟೆಯವರಗೆ ಮುಂದುವರಿಯಲಿದೆ. ಈ ಹಿಂದೆ ಪ್ರಕಟಿಸಿದ ಹಾಗೆಯೇ, ಲಾಕ್ಡೌನ್ ಸಡಲಿಕೆ ಮತ್ತು ನಿರ್ಬಂಧಗಳು ಮುಂದುವರಿಯಲಿವೆ. ಸರ್ಕಾರ ಹೊರಡಿಸಿರುವ ಆದೇಶದ ಪ್ರಕಾರ ಮೆಡಿಕಲ್ ಶಾಪ್, ತರಕಾರಿ ಅಂಗಡಿ, ಕಿರಾಣಾ ಅಂಗಡಿ ಮೊದಲಾದ ಅಗತ್ಯ ಸೇವೆಗಳಿಗೆ ಅನುಮತಿ ಇರುತ್ತದೆ. ಆದರೆ, ಅಂಗಡಿಗಳ ಮಾಲೀಕರು ಮತ್ತು ಗ್ರಾಹಕರು ದೈಹಿಕ ಅಂತರವನ್ನು ಕಾಯ್ದುಕೊಳ್ಳಬೇಕಾಗುತ್ತದೆ.
Lockdown in Delhi is being extended by one week
— Arvind Kejriwal (@ArvindKejriwal) May 1, 2021
ಕಳೆದ 15 ದಿನಗಳಿಂದ ರಾಷ್ಟ್ರದ ರಾಜಧಾನಿಯಲ್ಲಿ ಕೊವಿಡ್-19 ಪ್ರಕರಣಗಳ ಸಂಖ್ಯೆ ತ್ವರಿತವಾಗಿ ಹೆಚ್ಚುತ್ತಿದ್ದು ಆಸ್ಪತ್ರೆಗಳಲ್ಲಿ ಬೆಡ್ಗಳ ತೀವ್ರ ಕೊರತೆ ತಲೆದೋರಿದೆ. ಸಾವುಗಳ ಸಂಖ್ಯೆ ಸಹ ವಿಪರೀತವಾಗಿದ್ದು ಚಿತಾಗಾರಗಳ ಮುಂದೆ ಅಂಬ್ಯುಲೆನ್ಸ್ಗಳು ಸಾಲುಗಟ್ಟಿರುವುದು ಸಾಮಾನ್ಯ ದೃಶ್ಯವಾಗಿದೆ. ಕೆಲ ದಿನಗಳಿಂದ ಆಸ್ಪತ್ರೆಗಳು ರೋಗಿಗಳಿಗೆ ಚಿಕಿತ್ಸೆ ನೀಡಲು ಆಕ್ಸಿಜನ್ ಸಿಲಿಂಡರ್ಗಳ ಕೊರತೆ ಎದುರಿಸುತ್ತಿವೆ.
ಶನಿವಾರದಂದು ವೈದ್ಯಕೀಯ ಆಕ್ಸಿಜನ್ ಕೊರತೆಯಿಂದಾಗಿ ದೆಹಲಿಯ ಬಾತ್ರಾ ಆಸ್ಪತ್ರೆಯಲ್ಲಿ 12 ಸೋಂಕಿತರು ಮತ್ತೊಬ್ಬ ಡಾಕ್ಟರ್ ಬಲಿಯಾಗಿದ್ದಾರೆ. ‘ಚಿಂತಾಜನಕದ ಸ್ಥಿತಿಯಲ್ಲಿರುವ ಇನ್ನೂ 5 ರೋಗಿಗಳನ್ನು ಕೃತಕ ಉಸಿರಾಟದ ಮೂಲಕ ಉಳಿಸುವ ಪ್ರಯತ್ನ ಮಾಡುತ್ತಿದ್ದೇವೆ,’ ಎಂದು ಆಸ್ಪತ್ರೆಯ ನಿರ್ದೇಶಕ ಎಸ್.ಸಿ.ಗುಪ್ತಾ ಹೇಳಿದ್ದಾರೆ.
ಸದರಿ ಘಟನೆಯ ಬಗ್ಗೆ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರು ಆಘಾತ ವ್ಯಕ್ತಪಡಿಸಿದ್ದಾರೆ. ‘ಈ ಸುದ್ದಿ ತೀವ್ರ ನೋವನ್ನುಂಟು ಮಾಡಿದೆ. ಸಕಾಲದಲ್ಲಿ ಆಮ್ಲಜನಕ ನೀಡಿ ಅವರ ಪ್ರಾಣಗಳನ್ನು ಉಳಿಸಬಹುದಾಗಿತ್ತು. ದೆಹಲಿಗೆ ಅದರೆ ಪಾಲಿನ ಆಕ್ಸಿಜನ್ ಸಿಗಬೇಕಿದೆ. ನಮ್ಮ ಜನ ಹೀಗೆ ಸಾಯುವುದನ್ನು ನೋಡಲು ಸಾಧ್ಯವಿಲ್ಲ. ದೆಹಲಿಗೆ 976 ಟನ್ಗಳಷ್ಟು ಆಮ್ಲಜನಕದ ಅವಶ್ಯಕತೆಯಿದೆ. ಆದರೆ ಶುಕ್ರವಾರ ನಮಗೆ ಕೇವಲ 312 ಟನ್ ಮಾತ್ರ ಸಿಕ್ಕಿದೆ. ಅಷ್ಟು ಚಿಕ್ಕ ಪ್ರಮಾಣದ ಆಕಸಿಜನ್ನನೊಂದಿಗೆ ದೆಹಲಿ ಹೇಗೆ ಉಸಿರಾಡಬಲ್ಲದು,’ ಎಂದು ಅವರು ಟ್ವೀಟ್ ಮಾಡಿದ್ದಾರೆ.
ಈ ವಾರದ ಆರಂಭದಲ್ಲಿ ದೆಹಲಿಯ 95 ವ್ಯಾಪಾರಿ ಸಂಘಗಳು ದೆಹಲಿಯ ಲೆಪ್ಟಿನೆಂಟ್ ಜನರಲ್ ಅನಿಲ್ ಬೈಜಲ್ ಮತ್ತು ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಅವರಿಗೆ ಸೋಂಕನ್ನು ತಡೆಯಲು ಮೇ 15ರವರೆಗೆ ಲಾಕ್ಡೌನ್ ವಿಸ್ತರಿಸಬೇಕೆಂದು ಆಗ್ರಹಿಸಿದ್ದರು.
ಇದನ್ನೂ ಓದಿ: Delhi Lockdown : ರಾಷ್ಟ್ರ ರಾಜಧಾನಿ ದೆಹಲಿ ಲಾಕ್ಡೌನ್| ಸಾಗರೋಪಾದಿಯಲ್ಲಿ ಊರುಗಳತ್ತ ಹೊರಟ ಜನ.!
ಇದನ್ನೂ ಓದಿ: ಜನರು ಸಾಯುವುದನ್ನು ಕಂಡು ಕಣ್ಣು ಮುಚ್ಚಿಕೊಂಡು ಇರಲಾಗದು; ಕೇಂದ್ರ ಸರ್ಕಾರದ ಕಿವಿ ಹಿಂಡಿದ ದೆಹಲಿ ಹೈಕೋರ್ಟ್
Published On - 9:37 pm, Sat, 1 May 21