ಬಿಜೆಪಿಯವರು ಬಂಗಲೆಯನ್ನು ಇಟ್ಟುಕೊಳ್ಳಬಹುದು, ನಾವು ಜನರ ಹೃದಯದಲ್ಲಿರುತ್ತೇವೆ: ಅತಿಶಿ

ದೆಹಲಿ ಅಕ್ಟೋಬರ್ 10: ಅತಿಶಿ (Atishi) ಅವರನ್ನು ಸಿಎಂ ನಿವಾಸದಿಂದ ಹೊರಹಾಕಲ್ಪಟ್ಟ ಆರೋಪದೊಂದಿಗೆ ಆಮ್ ಆದ್ಮಿ ಪಕ್ಷ (AAP) ಮತ್ತು ಕೇಂದ್ರದ ನಡುವಿನ ಭಿನ್ನಾಭಿಪ್ರಾಯವು ಮತ್ತಷ್ಟು ಹೆಚ್ಚಿದೆ. ಬಿಜೆಪಿ ಸಿಎಂ ಬಂಗಲೆಯನ್ನು ಸ್ವಾಧೀನಪಡಿಸಿಕೊಳ್ಳಲು ಪ್ರಯತ್ನಿಸುತ್ತಿದೆ ಎಂದು ದೆಹಲಿ ಮುಖ್ಯಮಂತ್ರಿ ಆರೋಪಿಸಿದ್ದಾರೆ. ಬಿಜೆಪಿ ಬಯಸಿದರೆ ಅವರು ಆ ಬಂಗಲೆ ಇಟ್ಟುಕೊಳ್ಳಬಹುದು, ನಾವು ಜನರ ಹೃದಯದಲ್ಲಿ ವಾಸಿಸುತ್ತೇವೆ ಎಂದಿದ್ದಾರೆ ಅತಿಶಿ.

ಎಎಪಿ ನೇತೃತ್ವದ ದೆಹಲಿ ಸರ್ಕಾರವನ್ನು ದುರ್ಬಲಗೊಳಿಸಲು ಬಿಜೆಪಿ ವಿವಿಧ ತಂತ್ರಗಳನ್ನು ಬಳಸುತ್ತಿದೆ ಎಂದು ಆರೋಪಿಸಿದ ಅತಿಶಿ “ಆಪರೇಷನ್ ಕಮಲ” ವನ್ನು ಹೈಲೈಟ್ ಮಾಡಿದ್ದಾರೆ. ಬಿಜೆಪಿಯು ತಾನು ಸೋತ ರಾಜ್ಯಗಳಲ್ಲಿ ಸರ್ಕಾರಗಳನ್ನು ಸ್ಥಾಪಿಸಲು ಶಾಸಕರಿಗೆ ಆಮಿಷಗಳನ್ನು ಒಡ್ಡುತ್ತದೆ ಮತ್ತು ಲಂಚ ನೀಡುತ್ತದೆ ಎಂದು ಸೂಚಿಸಲು ವಿರೋಧ ಪಕ್ಷಗಳು ಬಳಸುವ ಪದವಾಗಿದೆ ಆಪರೇಷನ್ ಕಮಲ.

‘ಚುನಾವಣೆಯಲ್ಲಿ ನಮ್ಮನ್ನು ಸೋಲಿಸಲು ಸಾಧ್ಯವಿಲ್ಲ ಎಂಬ ಆತಂಕ ಬಿಜೆಪಿಗಿದೆ. ಅವರು ಸರ್ಕಾರ ರಚಿಸಲು ವಿಫಲರಾದಾಗ, ಅವರು ‘ಆಪರೇಷನ್ ಕಮಲ’ವನ್ನು ಆಶ್ರಯಿಸುತ್ತಾರೆ ಮತ್ತು ನಾಯಕರನ್ನು ಜೈಲಿಗೆ ಹಾಕುತ್ತಾರೆ. ಸ್ವಂತ ಮುಖ್ಯಮಂತ್ರಿಯನ್ನು ಹೊಂದಲು ಸಾಧ್ಯವಾಗದ ಅವರು ಈಗ ಮುಖ್ಯಮಂತ್ರಿಗಳ ನಿವಾಸವನ್ನು ವಶಪಡಿಸಿಕೊಳ್ಳಲು ಯೋಚಿಸುತ್ತಿದ್ದಾರೆ. ಇದು ಅವರಿಗೆ ಶಾಂತಿಯನ್ನು ತರುವುದಾದರೆ ಅವರು ಹಾಗೇ ಮಾಡಲಿ.

ನಾವು ಐಷಾರಾಮಿ ಕಾರುಗಳು ಮತ್ತು ಬಂಗಲೆಗಳಲ್ಲಿ ವಾಸಿಸಲು ರಾಜಕೀಯಕ್ಕೆ ಬಂದಿಲ್ಲ. ಅಗತ್ಯವಿದ್ದರೆ ಬೀದಿಗಿಳಿದು ಆಡಳಿತ ನಡೆಸುತ್ತೇವೆ. ಬಿಜೆಪಿಯವರು ಬಂಗಲೆಯನ್ನು ಆನಂದಿಸಬಹುದು. ನಾವು ಜನರ ಹೃದಯದಲ್ಲಿ ವಾಸಿಸುತ್ತೇವೆ ಎಂದು ಅತಿಶಿ ಹೇಳಿದ್ದಾರೆ.

ಅರವಿಂದ ಕೇಜ್ರಿವಾಲ್ ರಾಜೀನಾಮೆ ನೀಡಿದ ಕೆಲವೇ ದಿನಗಳಲ್ಲಿ ಅತಿಶಿ ಅವರು ಸೆಪ್ಟೆಂಬರ್ 21 ರಂದು ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದರು. ಮದ್ಯ ನೀತಿ ಪ್ರಕರಣದಲ್ಲಿ ಸುಪ್ರೀಂಕೋರ್ಟ್‌ನಿಂದ ಜಾಮೀನು ಪಡೆದ ನಂತರ ಸಿಎಂ ಸ್ಥಾನದಿಂದ ಕೆಳಗಿಳಿಯುತ್ತಿದ್ದೇನೆ. ಮುಂಬರುವ ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ಎಎಪಿ ಮರು ಆಯ್ಕೆಯಾದರೆ ಮತ್ತು ಜನರಿಂದ ನ್ಯಾಯವನ್ನು ಪಡೆದರೆ ಮಾತ್ರ ನಾನು ಸಿಎಂ ಸ್ಥಾನಕ್ಕೆ ಮರಳುವುದಾಗಿ ಕೇಜ್ರಿವಾಲ್ ಹೇಳಿದ್ದಾರೆ.

ಇದನ್ನೂ ಓದಿ: ಹಿಜ್ಬ್-ಉತ್-ತಹ್ರೀರ್ ಅನ್ನು ಭಯೋತ್ಪಾದಕ ಸಂಘಟನೆ ಎಂದು ಘೋಷಿಸಿದ ಕೇಂದ್ರ ಸರ್ಕಾರ

ಈ ಹಿಂದೆ ಕೇಜ್ರಿವಾಲ್ ಅವರು ನೆಲೆಸಿದ್ದ ಅಧಿಕೃತ ನಿವಾಸಕ್ಕೆ ತೆರಳಿದ ಕೇವಲ ಎರಡು ದಿನಗಳ ನಂತರ ಅತಿಶಿ ಅವರನ್ನು ಹೊರಹಾಕಲಾಗಿದೆ ಎಂದು ಎಎಪಿ ಮಂಗಳವಾರ ಆರೋಪಿಸಿದೆ. “ದೇಶದ ಇತಿಹಾಸದಲ್ಲಿ ಮೊದಲ ಬಾರಿಗೆ ಮುಖ್ಯಮಂತ್ರಿ ನಿವಾಸವನ್ನು ಖಾಲಿ ಮಾಡಲಾಗಿದೆ. ಬಿಜೆಪಿಯ ಆಜ್ಞೆಯ ಮೇರೆಗೆ, ಲೆಫ್ಟಿನೆಂಟ್ ಗವರ್ನರ್ ಅವರು ಮುಖ್ಯಮಂತ್ರಿ ಅತಿಶಿ ಅವರ ವಸ್ತುಗಳನ್ನು ಬಲವಂತವಾಗಿ ನಿವಾಸದಿಂದ ತೆಗೆದುಹಾಕಿದರು, ”ಎಂದು ಮುಖ್ಯಮಂತ್ರಿ ಕಚೇರಿ (ಸಿಎಂಒ) ಆರೋಪಿಸಿದೆ.

ಲೆಫ್ಟಿನೆಂಟ್ ಗವರ್ನರ್ ವಿಕೆ ಸಕ್ಸೇನಾ ಅವರ ಕಚೇರಿಯು ತನ್ನ ಅಧಿಕೃತ ಹಂಚಿಕೆಗೆ ಮುಂಚೆಯೇ ಅತಿಶಿ ತನ್ನ ವಸ್ತುಗಳನ್ನು ಬಂಗಲೆಯಲ್ಲಿ ಸಂಗ್ರಹಿಸಿದ್ದಳು ಮತ್ತು ನಂತರ ಅವುಗಳನ್ನು ಸ್ವತಃ ತೆಗೆದುಹಾಕಿದ್ದಾರೆ ಎಂದು ಮೂಲಗಳನ್ನು ಉಲ್ಲೇಖಿಸಿ ಎನ್‌ಡಿಟಿವಿ ವರದಿ ಮಾಡಿದೆ.