ಮಧುಮೇಹ ,ಹೃದ್ರೋಗ ಮತ್ತು ಕಿಡ್ನಿ ಕಾಯಿಲೆಗಿರುವ ಔಷಧಿಗಳ ಬೆಲೆ ಕಡಿತಕ್ಕೆ ಸರ್ಕಾರ ಚಿಂತನೆ

ಲಾಭದ ಪ್ರಮಾಣಕ್ಕೆ ಮಿತಿ ವಿಧಿಸುವ (trade margins)ಮೂಲಕ ನರೇಂದ್ರ ಮೋದಿ (Narendra Modi) ನೇತೃತ್ವದ ಸರ್ಕಾರ ಕೆಲವು ನಿರ್ಣಾಯಕ ಔಷಧಿಗಳ ಬೆಲೆ ಕಡಿತಕ್ಕೆ ಚಿಂತನೆ ನಡೆಸಿದೆ ಎಂದು ನ್ಯೂಸ್18 ಡಾಟ್ ಕಾಂ ವರದಿ ಮಾಡಿದೆ. ಲಾಭಾಂಶಕ್ಕೆ ಮಿತಿ ವಿಧಿಸುವುದು ಅಥವಾ ಟ್ರೇಡ್ ಮಾರ್ಜಿನ್ ಎಂದರೆ ಉತ್ಪಾದನಾ ವೆಚ್ಚ ಮತ್ತು ರೋಗಿಗಳಿಗೆ ನೀಡುವ ಎಂಆರ್​​ಪಿ(ಗರಿಷ್ಠ ಮಾರಾಟ ಬೆಲೆ) ನಡುವಿನ ಅಂತರವಾಗಿದೆ. ಈ ಮೂಲಕ ಸಕ್ಕರೆ ಕಾಯಿಲೆ, ಹೃದಯ ಸಂಬಂಧಿ ಕಾಯಿಲೆ ಮತ್ತು ಗಂಭೀರವಾದ ಕಿಡ್ನಿ ಕಾಯಿಲೆಗಿರುವ ಔಷಧಿಗಳ ಬೆಲೆ ಕಡಿಮೆ ಮಾಡಲು ಪ್ರಯತ್ನಿಸಲಾಗುತ್ತಿದೆ ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಲಾಭಾಂಶದ ಮಿತಿಯನ್ನು ಹಂತ ಹಂತವಾಗಿ ಮಾಡಲಾಗುತ್ತದೆ. ಉದಾಹರಣೆಗೆ ಮೊದಲಿಗೆ ನಾವು ಕ್ಯಾನ್ಸರ್ ರೋಗ ಗುಣಪಡಿಸುವ ಔಷಧಿಗಳಿಗೆ ಲಾಭಾಂಶ ಮಿತಿಯನ್ನು ಕಡಿತ ಮಾಡಿದೆವು. ಅದೇ ರೀತಿ  ಈ ಬಾರಿನ ನಾವು ಮಧುವೇಹ ಅಥವಾ ಕಿಡ್ನಿ ರೋಗಕ್ಕಿರುವ ಔಷಧಿಗಳ ಲಾಭಾಂಶದ ಮಿತಿ ಕಡಿತ ಘೋಷಿಸಲಿದ್ದೇವೆ ಎಂದು ಮೂಲಗಳು ಹೇಳಿವೆ.

ರಾಷ್ಟ್ರೀಯ ಔಷಧ ದರ ಪ್ರಾಧಿಕಾರ (NPPA) ಈ ಬಗ್ಗೆ ಹಲವಾರು ತಿಂಗಳಿನಿಂದ ಕಾರ್ಯಪ್ರವೃತ್ತವಾಗಿದೆ ಎಂದು ಮೂಲಗಳು ಹೇಳಿವೆ. 2018-19ರಲ್ಲಿ ರಾಷ್ಟ್ರೀಯ ಔಷಧ ದರ ಪ್ರಾಧಿಕಾರವು ಆಯ್ಕೆ ಮಾಡಲಾದ 42 ನಾನ್ ಶೆಡ್ಯೂಲ್ಡ್ ಆಂಟಿ ಕ್ಯಾನ್ಸರ್ ಔಷಧಿಗಳ ಟ್ರೇಡ್ ಮಾರ್ಜಿನ್ ಮಿತಿಗೊಳಿಸಿತು. ಇದರಿಂದಾಗಿ ಈ ಔಷಧಿಗಳ 526 ಬ್ರಾಂಡ್  ಗಳ ಎಂಆರ್ ಪಿ ಮೇಲೆ ಶೇ90ರಷ್ಟು ಕಡಿತ ಆಗಿದೆ ಎಂದು ಕೇಂದ್ರ ಆರೋಗ್ಯ ಸಚಿವ ಮನ್ಸುಖ್ ಮಾಂಡವಿಯಾ ಲೋಕಸಭೆಯಲ್ಲಿ ಹೇಳಿದ್ದಾರೆ.

ಈ ಬಾರಿ ಎನ್ ಪಿಪಿಎ ಈ ಬಗ್ಗೆ ಅಧ್ಯಯನ ನಡೆಸುತ್ತಿದ್ದು, ಅದರ ಫಲಿತಾಂಶವನ್ನು ಆಧರಿಸಿ ನಿರ್ಧಾರ ತೆಗೆದುಕೊಳ್ಳಲಿದೆ.