Covovax Covid 19 Vaccine: ಕೊವಾವ್ಯಾಕ್ಸ್ ಲಸಿಕೆಯ ಮಕ್ಕಳ ಮೇಲಿನ ಪ್ರಯೋಗಕ್ಕೆ ಒಪ್ಪಿಗೆ ನೀಡದ ಕೇಂದ್ರ ತಜ್ಞರ ಸಮಿತಿ; ಸೀರಮ್ ಸಂಸ್ಥೆಗೆ ಸಿಗದ ಅನುಮತಿ
ಯುಎಸ್ನ ನೊವಾವ್ಯಾಕ್ಸ್ ಸಂಸ್ಥೆಯ ಲಸಿಕೆಯನ್ನು ಭಾರತದಲ್ಲಿ ಕೊವಾವ್ಯಾಕ್ಸ್ ಹೆಸರಿನಲ್ಲಿ ಪುಣೆಯ ಸೀರಮ್ ಇನ್ಸ್ಟಿಟ್ಯೂಟ್ ಉತ್ಪಾದನೆ ಮಾಡಿದ್ದು, ಸೆಪ್ಟೆಂಬರ್ ಹೊತ್ತಿಗೆ ಬಳಕೆಗೆ ಮುಕ್ತಗೊಳಿಸಲು ನಿರ್ಧರಿಸಿದೆ. ಹಾಗೇ, ಜುಲೈನಿಂದ ಮಕ್ಕಳ ಮೇಲೆ ಕೂಡ ಕ್ಲಿನಿಕಲ್ ಪ್ರಯೋಗ ನಡೆಸಲು ತೀರ್ಮಾನಿಸಿತ್ತು.
Updated on: Jul 01, 2021 | 10:07 AM
ಯುಎಸ್ ಮೂಲದ ಕೊವಾವ್ಯಾಕ್ಸ್ ಲಸಿಕೆಯನ್ನು 2-17ವರ್ಷದವರ ಮೇಲೆ 2 ಮತ್ತು 3ನೇ ಹಂತದ ಕ್ಲಿನಿಕಲ್ ಟ್ರಯಲ್ ನಡೆಸಲು ಕೇಂದ್ರದ ತಜ್ಞರ ಸಮಿತಿ ಒಪ್ಪಿಗೆ ನೀಡಿಲ್ಲ. ಈ ಲಸಿಕೆಯನ್ನು ಪುಣೆಯ ಸೀರಮ್ ಇನ್ಸ್ಟಿಟ್ಯೂಟ್ ಭಾರತದಲ್ಲಿ ಉತ್ಪಾದನೆ ಮಾಡುತ್ತಿದೆ. ಆದರೆ ಕೊವಾವ್ಯಾಕ್ಸ್ ಕ್ಲಿನಿಕಲ್ ಪ್ರಯೋಗವನ್ನು ಮೊದಲು ವಯಸ್ಕರ ಮೇಲೆ ಮಾಡಿ ಮುಗಿಸಿ. ಸದ್ಯಕ್ಕೇನೂ 2-17ವರ್ಷದವರ ಮೇಲೆ ಬೇಡ ಎಂದು ಈ ಸಮಿತಿ ಸೀರಮ್ ಸಂಸ್ಥೆಗೆ ಹೇಳಿದ್ದಾಗಿ ಮೂಲಗಳು ತಿಳಿಸಿವೆ.
ಯುಎಸ್ನ ನೊವಾವ್ಯಾಕ್ಸ್ ಸಂಸ್ಥೆಯ ಲಸಿಕೆಯನ್ನು ಭಾರತದಲ್ಲಿ ಕೊವಾವ್ಯಾಕ್ಸ್ ಹೆಸರಿನಲ್ಲಿ ಪುಣೆಯ ಸೀರಮ್ ಇನ್ಸ್ಟಿಟ್ಯೂಟ್ ಉತ್ಪಾದನೆ ಮಾಡಿದ್ದು, ಸೆಪ್ಟೆಂಬರ್ ಹೊತ್ತಿಗೆ ಬಳಕೆಗೆ ಮುಕ್ತಗೊಳಿಸಲು ನಿರ್ಧರಿಸಿದೆ. ಹಾಗೇ, ಜುಲೈನಿಂದ ಮಕ್ಕಳ ಮೇಲೆ ಕೂಡ ಕ್ಲಿನಿಕಲ್ ಪ್ರಯೋಗ ನಡೆಸಲು ತೀರ್ಮಾನಿಸಿತ್ತು. ಇದಕ್ಕೆ ಅನುಮತಿ ಕೋರಿ ಭಾರತೀಯ ಔಷಧ ನಿಯಂತ್ರಣ ಪ್ರಾಧಿಕಾರ (DCGI)ಕ್ಕೆ ಸೋಮವಾರ ಅರ್ಜಿಯನ್ನೂ ಸಲ್ಲಿಸಿತ್ತು. ನಾವು ಒಟ್ಟು 10 ಪ್ರದೇಶಗಳಲ್ಲಿ, 920 ಮಕ್ಕಳ ಮೇಲೆ ಕೊವಾವ್ಯಾಕ್ಸ್ ಲಸಿಕೆ ಪ್ರಯೋಗ ನಡೆಸಲು ಇಚ್ಛಿಸಿದ್ದೇವೆ. ಅದರಲ್ಲಿ 2-11 ವರ್ಷದ 460 ಮಕ್ಕಳು ಮತ್ತು 12-17ವರ್ಷದ 460 ಮಕ್ಕಳನ್ನು ಆಯ್ಕೆ ಮಾಡಿ, ಕ್ಲಿನಿಕಲ್ ಟ್ರಯಲ್ಗೆ ಒಳಪಡಿಸುತ್ತೇವೆ. ಇದಕ್ಕೆ ಅನುಮತಿ ಕೊಡಿ ಎಂದು ಸೀರಮ್ ಸಂಸ್ಥೆ ಡಿಸಿಜಿಐಗೆ ಕೇಳಿತ್ತು.
ಆದರೆ ಕೇಂದ್ರ ಔಷಧ ಪ್ರಮಾಣಿತ ನಿಯಂತ್ರಣ ಸಂಸ್ಥೆ (ಸಿಡಿಎಸ್ಸಿಒ)ಯ ಕೊವಿಡ್ 19 ಸಂಬಂಧಿತ ವಿಷಯ ತಜ್ಞರ ಸಮಿತಿ (ಎಸ್ಇಸಿ) ಇದನ್ನು ಒಪ್ಪಿಕೊಂಡಿಲ್ಲ. ಸೀರಮ್ ಸಂಸ್ಥೆಯ ಅರ್ಜಿಯನ್ನು ಸವಿಸ್ತಾರವಾಗಿ ಪರಿಶೀಲನೆ ನಡೆಸಿದ ಸಿಡಿಎಸ್ಸಿಒ, ಈ ಲಸಿಕೆಗೆ ಇನ್ನೂ ಯಾವುದೇ ದೇಶದಲ್ಲೂ ಅನುಮೋದನೆ ಸಿಕ್ಕಿಲ್ಲ. ಮಕ್ಕಳ ಮೇಲೆ ಪ್ರಯೋಗ ನಡೆಸುವ ಮೊದಲು, ಸದ್ಯ ವಯಸ್ಕರ ಮೇಲೆ ನಡೆಯುತ್ತಿರುವ ಕ್ಲಿನಿಕಲ್ ಟ್ರಯಲ್ನಲ್ಲಿ ಕಂಡು ಬಂದ ಲಸಿಕೆಯ ಸುರಕ್ಷತೆಯ ಮಟ್ಟ ಮತ್ತು ಪ್ರತಿರೋಧಕ ಶಕ್ತಿಯ ಡಾಟಾವನ್ನು ಸೀರಮ್ ಸಂಸ್ಥೆ ಸಲ್ಲಿಸಬೇಕು. ಅದನ್ನು ಪರಿಶೀಲನೆ ನಡೆಸಿದ ಬಳಿಕವಷ್ಟೇ ಮುಂದಿನ ನಿರ್ಧಾರ ಕೈಗೊಳ್ಳಲಾಗುವುದು ಎಂದು ತಜ್ಞರ ಸಮಿತಿ ಸ್ಪಷ್ಟಪಡಿಸಿದೆ.
ಅಮೆರಿಕದಲ್ಲಿ ಸದ್ಯ ಬಳಕೆಯಾಗುತ್ತಿರುವ ಫಿಜರ್ ಲಸಿಕೆ ಕೊವಿಡ್ 19 ವಿರುದ್ಧ ಶೇ. 91.3ರಷ್ಟು ಪರಿಣಾಮಕಾರಿಯಾದರೆ, ಮಾಡೆರ್ನಾ ಶೇ.90ರಷ್ಟು ಪರಿಣಾಮ ಬೀರುತ್ತದೆ. ನೊವಾವ್ಯಾಕ್ಸ್ ಇವೆರಡಕ್ಕಿಂತಲೂ ಹೆಚ್ಚು ಅಂದರೆ ಶೇ.94ರಷ್ಟು ಪ್ರಭಾವಶಾಲಿ ಎಂಬುದು ಅದರ ಮೂರನೇ ಹಂತದ ಕ್ಲಿನಿಕಲ್ ಟ್ರಯಲ್ನ ಫಲಿತಾಂಶ. ಈ ನೊವಾವ್ಯಾಕ್ಸ್ನ್ನು ಪುಣೆಯ ಸೀರಮ್ ಇನ್ಸ್ಟಿಟ್ಯೂಟ್ನಲ್ಲಿ ಉತ್ಪಾದಿಸಲು, ಕ್ಲಿನಿಕಲ್ ಟ್ರಯಲ್ ನಡೆಸಲು ಕೇಂದ್ರ ಸರ್ಕಾರ ಅನುಮತಿ ನೀಡಿದ್ದರೂ, ಒಮ್ಮೆಲೇ ಮಕ್ಕಳ ಮೇಲೆ ಪ್ರಯೋಗ ಬೇಡ ಎಂದು ಹೇಳಿದೆ.
ಇದನ್ನೂ ಓದಿ: ರಾಜ್ ಕೌಶಲ್ ಅಂತ್ಯಕ್ರಿಯೆ: ಸಂಪ್ರದಾಯಕ್ಕೆ ಸೆಡ್ಡು ಹೊಡೆದು ಗಂಡನ ಅಂತ್ಯಸಂಸ್ಕಾರ ಮಾಡಿದ ಮಂದಿರಾ ಬೇಡಿ
(Central Government panel says no to Covovax trial on children In India)
