Covid-19: ಮುಂದಿನ ದಿನಗಳಲ್ಲಿ ನೆಗಡಿಯಂತೆ ಮಕ್ಕಳಿಗೆ ಕೊವಿಡ್ ಕೂಡ ಸಾಮಾನ್ಯ ರೋಗವಾಗಲಿದೆ!

ನವದೆಹಲಿ: ಈಗಾಗಲೇ ಭಾರತದಲ್ಲಿ ಕೊರೊನಾ 3ನೇ ಅಲೆಯ ಆತಂಕ ಎದುರಾಗಿದೆ. ಇನ್ನೂ ದೇಶದಲ್ಲಿ ಕೊವಿಡ್ ಅಟ್ಟಹಾಸ ಕಡಿಮೆಯಾಗಿಲ್ಲ. ನಿನ್ನೆ ಒಂದೇ ದಿನ ಭಾರತದಲ್ಲಿ 40,120 ಕೊರೊನಾ ಕೇಸುಗಳು (Coronavirus Cases) ಪತ್ತೆಯಾಗಿವೆ. ಈ ನಡುವೆ ಕೊರೊನಾ (COVID-19) ನಿಯಂತ್ರಿಸಲು ಭಾರತದಲ್ಲಿ ಈಗಾಗಲೇ 5 ಲಸಿಕೆಗಳು (Covid Vaccines) ಲಭ್ಯ ಇವೆ. ಆದರೆ, ಯಾವ ಲಸಿಕೆಯಿಂದಲೂ ಈ ಕೊರೊನಾ ವೈರಸ್ ಜಗತ್ತಿನಿಂದ ಶಾಶ್ವತವಾಗಿ ನಾಶವಾಗಲು ಸಾಧ್ಯವಿಲ್ಲ, ಮಕ್ಕಳಲ್ಲಿ ಶೀತ ಹೇಗೆ ಸಾಮಾನ್ಯವಾಗಿರುತ್ತದೋ ಹಾಗೇ ಮುಂಬರುವ ದಿನಗಳಲ್ಲಿ ಕೊರೊನಾ ಸಾಮಾನ್ಯ ರೋಗವಾಗಲಿದೆ ಎಂಬ ಮಾಹಿತಿಯನ್ನು ಸಂಶೋಧನೆಯೊಂದು ಬಯಲು ಮಾಡಿದೆ.

ಮಕ್ಕಳಲ್ಲಿ ರೋಗ ನಿರೋಧಕ ಶಕ್ತಿ ಕಡಿಮೆ ಇರುವುದರಿಂದ ಕೊವಿಡ್ ವಯಸ್ಕರಿಗಿಂತಲೂ ಮಕ್ಕಳ ಮೇಲೆ ಹೆಚ್ಚಿನ ಪರಿಣಾಮ ಬೀರುತ್ತದೆ. ಇದೀಗ ಕೊರೊನಾ ರೂಪಾಂತರಿ ವೈರಸ್​ಗಳು ಕೂಡ ಕಾಣಿಸಿಕೊಳ್ಳಲಾರಂಭಿಸಿದೆ. ಭಾರತಕ್ಕೆ ಡೆಲ್ಟಾ ರೂಪಾಂತರಿ ವೈರಸ್ ಕಾಲಿಟ್ಟಿದ್ದು, ಇನ್ನಷ್ಟು ಆತಂಕ ಎದುರಾಗಿದೆ. ಇನ್ನು ಮುಂದೆ ಪೊಲಿಯೋ ಲಸಿಕೆಯಂತೆ ಮಕ್ಕಳಿಗೆ ಕೊರೊನಾ ಲಸಿಕೆಯೂ ಸಾಮಾನ್ಯವಾಗುವ ಸಾಧ್ಯತೆಯಿದೆ. ಹಾಗೇ ನೆಗಡಿಯಂತೆ ಕೊವಿಡ್ ಕೂಡ ಸಾಮಾನ್ಯ ರೋಗ ಲಕ್ಷಣವಾಗಿ ಮುಂದುವರೆಯಲಿದೆ ಎಂದು ಅಧ್ಯಯನವೊಂದು ತಿಳಿಸಿದೆ.

18 ವರ್ಷ ಮೇಲ್ಪಟ್ಟವರಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಾಗಿರುತ್ತದೆ ಅಥವಾ ಅವರು ಕೊರೊನಾ ಲಸಿಕೆ ಪಡೆದಿರುತ್ತಾರೆ. ಹೀಗಾಗಿ, ಅವರಿಗಿಂತಲೂ ಮಕ್ಕಳಲ್ಲಿ ಕೊವಿಡ್ ಹೆಚ್ಚಾಗಿ ಕಾಣಿಸಿಕೊಳ್ಳಲಿದೆ. ಹೀಗಾಗಿ, ಮಕ್ಕಳಿಗೆ ಕೊರೊನಾ ತಗುಲುವ ಸಾಧ್ಯತೆಯಿದೆ ಎನ್ನಲಾಗಿದೆ. 1889ರಿಂದ 1890ರ ಅವಧಿಯಲ್ಲಿ ಕಾಣಿಸಿಕೊಂಡ ರಷ್ಯನ್ ಫ್ಲೂದಿಂದ 18 ವರ್ಷದೊಳಗಿನ ಹಾಗೂ 70 ವರ್ಷ ಮೇಲ್ಪಟ್ಟ ಲಕ್ಷಾಂತರ ಜನರು ಸಾವನ್ನಪ್ಪಿದ್ದರು. ನಂತರ ಅದು ಸಾಮಾನ್ಯ ರೋಗದಂತಾಯಿತು. ಅದೇ ರೀತಿ ಕೊವಿಡ್ ಕೂಡ ಮುಂದಿನ ದಿನಗಳಲ್ಲಿ ಸಾಮಾನ್ಯ ರೋಗವಾಗಲಿದೆ.

ಭಾರತದಲ್ಲಿ ಈಗಾಗಲೇ ಕೊರೊನಾ 3ನೇ ಅಲೆ ಶುರುವಾಗಿದೆ ಎಂದು ತಜ್ಞರು ಹೇಳಿಕೆ ನೀಡಿರುವ ಬೆನ್ನಲ್ಲೇ ಈ ಮೂರನೇ ಅಲೆಯಿಂದ ಮಕ್ಕಳಲ್ಲಿ ಕೊರೊನಾ ಸೋಂಕು ಹೆಚ್ಚಾಗಿ ಕಾಣಿಸಿಕೊಳ್ಳಲಿದೆ ಎನ್ನಲಾಗಿದೆ. ಬೆಂಗಳೂರೊಂದನ್ನೇ ಪರಿಗಣಿಸಿದರೆ 5 ದಿನದಲ್ಲಿ 9 ವರ್ಷದೊಳಗಿನ 106 ಮತ್ತು 9ರಿಂದ 19 ವರ್ಷದೊಳಗಿನ 136 ಜನರು ಸೇರಿ ಒಟ್ಟು 242 ಮಕ್ಕಳಿಗೆ ಕೊರೊನಾ ಸೋಂಕು ಪತ್ತೆಯಾಗಿದೆ. ಮುಂದಿನ ದಿನಗಳಲ್ಲಿ ಮಕ್ಕಳಲ್ಲಿ ಕೊರೊನಾ ಕೇಸುಗಳ ಸಂಖ್ಯೆ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಆರೋಗ್ಯ ಇಲಾಖೆ ಮುನ್ನೆಚ್ಚರಿಕೆ ನೀಡಿದೆ. ಹೀಗಾಗಿ, ಮಕ್ಕಳಿಗೆ ಭವಿಷ್ಯದಲ್ಲೂ ಕೊರೊನಾ ಭೀತಿ ತಪ್ಪಿದ್ದಲ್ಲ.

ಇದನ್ನೂ ಓದಿ: Delta Plus Variant: ಮುಂಬೈನಲ್ಲಿ ಡೆಲ್ಟಾ ಪ್ಲಸ್​ ಸೋಂಕಿಗೆ ಮೊದಲ ಬಲಿ; ಎರಡು ಡೋಸ್​ ಕೊರೊನಾ ಲಸಿಕೆ ಪಡೆದ ವೃದ್ಧೆ ಸಾವು

Coronavirus cases in India: ದೇಶದಲ್ಲಿ 40,120 ಹೊಸ ಕೊವಿಡ್ ಪ್ರಕರಣ ಪತ್ತೆ, 585 ಮಂದಿ ಸಾವು

(COVID-19 may become childhood disease over the years like common cold Study Reveals)