ಇಎಸ್ಐ- ಆಯುಷ್ಮಾನ್ ಭಾರತ್ ಪಿಎಂಜೆಎವೈ ಒಗ್ಗೂಡಿಸಿದ ಕೇಂದ್ರ; 1.35 ಕೋಟಿ ಜನರಿಗೆ ಅನುಕೂಲ
ಎಂಪ್ಲಾಯೀಸ್ ಸ್ಟೇಟ್ ಇನ್ಷೂರೆನ್ಸ್ ಅನ್ನು ಆಯುಷ್ಮಾನ್ ಭಾರತ್ ಜತೆಗೆ ಒಗ್ಗೂಡಿಸಲಾಗಿದೆ. ಇದರಿಂದ ಕರ್ನಾಟಕ ಸೇರಿ ನಾಲ್ಕು ರಾಜ್ಯಗಳ 113 ಜಿಲ್ಲೆಗಳಲ್ಲಿ 1.35 ಲೋಟಿ ಜನರಿಗೆ ಅನುಕೂಲ ಆಗಲಿದೆ.
Updated on: Mar 12, 2021 | 2:51 PM
ಎಂಪ್ಲಾಯೀಸ್ ಸ್ಟೇಟ್ ಇನ್ಷೂರೆನ್ಸ್ (ಇಎಸ್ಐ) ಅನ್ನು ಆಯುಷ್ಮಾನ್ ಭಾರತ್ ಪಿಎಂಜೆಎವೈ ಜತೆ ಒಟ್ಟು ಮಾಡುವುದಾಗಿ ಕೇಂದ್ರ ಕಾರ್ಮಿಕ ಇಲಾಖೆ ಘೋಷಣೆ ಮಾಡಿದೆ. ಇದರಿಂದ ನಾಲ್ಕು ರಾಜ್ಯಗಳ- ಕರ್ನಾಟಕ, ಛತ್ತೀಸ್ಗಢ, ಮಧ್ಯಪ್ರದೇಶ ಮತ್ತು ಮಹಾರಾಷ್ಟ್ರದ 113 ಜಿಲ್ಲೆಗಳ 1.35 ಕೋಟಿ ಜನರಿಗೆ ಇದರಿಂದ ಸಹಾಯ ಆಗುತ್ತದೆ. ಆಯುಷ್ಮಾನ್ ಭಾರತ್ ಅಡಿಯಲ್ಲಿ ಬರುವ ಆಸ್ಪತ್ರೆಗಳಲ್ಲಿ ನಗದುರಹಿತವಾಗಿ (ಕ್ಯಾಶ್ಲೆಸ್) ವೈದ್ಯಕೀಯ ಚಿಕಿತ್ಸೆ ದೊರೆಯುತ್ತದೆ. “ಇಎಸ್ಐಸಿ ಒಗ್ಗೂಡುವುದರಿಂದ ಇಂಥ ಜಿಲ್ಲೆಗಳಲ್ಲಿ ಇರುವ 1.35 ಕೋಟಿ ಇಎಸ್ಐ ಫಲಾನುಭವಿಗಳಿಗೆ ಆಯುಷ್ಮಾನ್ ಭಾರತ್ ಪಿಎಂ- ಜೆಎವೈ ಆಸ್ಪತ್ರೆಗಳ ಮೂಲಕ ನಗದುರಹಿತ ಚಿಕಿತ್ಸೆಯು ದೊರೆಯುತ್ತದೆ. ಇದಕ್ಕೆ ಯಾವ ರೆಫರಲ್ ಅಗತ್ಯ ಇಲ್ಲ,” ಎಂದು ಅಧಿಕೃತ ಹೇಳಿಕೆಯಲ್ಲಿ ತಿಳಿಸಲಾಗಿದೆ.
ಫಲಾನುಭವಿಗಳು ಇಎಸ್ಐಸಿ ಇ-ಪೆಹಚಾನ್ ಕಾರ್ಡ್ ಅಥವಾ ಹೆಲ್ತ್ ಪಾಸ್ಬುಕ್ ಹಾಗೂ ಜತೆಗೆ ಆಧಾರ್ ಕಾರ್ಡ್ ಸಹ ತೆಗೆದುಕೊಂಡು ಹೋಗಬೇಕು. 113 ಜಿಲ್ಲೆಗಳಲ್ಲಿ ಯಾವ್ಆವ ಆಸ್ಪತ್ರೆಗಳು ಒಳಗೊಂಡಿವೆ ಎಂಬುದರ ಮಾಹಿತಿ ಇಎಸ್ಐಸಿ ಅಧಿಕೃತ ವೆಬ್ಸೈಟ್ನಲ್ಲಿ ಲಭ್ಯವಿದೆ. “ಪಿಎಂ- ಜೆಎವೈ ಫಲಾನುಭವಿಗಳು ಸಹ ಕಡಿಮೆ ಬಳಕೆ ಆಗುವ ಬಿಹಾರ, ಗುಜರಾತ್, ಕರ್ನಾಟಕ, ಮಹಾರಾಷ್ಟ್ರ, ರಾಜಸ್ಥಾನ ಮತ್ತು ಉತ್ತರಪ್ರದೇಶದ 15 ಇಎಸ್ಐಸಿ ಆಸ್ಪತ್ರೆ/ವೈದ್ಯಕೀಯ ಕಾಲೇಜುಗಳಲ್ಲಿ ನಗದುರಹಿತ ವೈದ್ಯಕೀಯ ಚಿಕಿತ್ಸೆ ಪಡೆಯಬಹುದು,” ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಸದ್ಯಕ್ಕೆ ದೇಶದಲ್ಲಿ ಒಟ್ಟಾರೆಯಾಗಿ 1520 ಇಎಸ್ಐ ಡಿಸ್ಪೆನ್ಸರಿಗಳು ಮತ್ತು 159 ಆಸ್ಪತ್ರೆಗಳು ಇವೆ. ಅವುಗಳಲ್ಲಿ 45 ಡಿಸ್ಪೆನ್ಸರಿಗಳನ್ನು ನೇರವಾಗಿ ಇಎಸ್ಐಸಿ ನಡೆಸುತ್ತದೆ. ಉಳಿದವು ರಾಜ್ಯ ಸರ್ಕಾರಗಳ ಅಡಿಯಲ್ಲಿ ಬರುತ್ತವೆ.
ಆಸ್ಪತ್ರೆಯಲ್ಲಿ ದೊರೆಯುವ ಸೌಲಭ್ಯಗಳು 1. ಇಎಸ್ಐ ಫಲಾನುಭವಿಗಳಿಗೆ ಆಯುಷ್ಮಾನ್ ಭಾರತ್ ಪಿಎಂ- ಜೆಎವೈ ಆಸ್ಪತ್ರೆಗಳಲ್ಲಿ ಆರೋಗ್ಯ ರಕ್ಷಣೆ ವ್ಯವಸ್ಥೆಗಳು ದೊರೆಯುತ್ತವೆ. 2. ಆಯುಷ್ಮಾನ್ ಭಾರತ್ ಪಿಎಂ- ಜೆಎವೈ ಫಲಾನುಭವಿಗಳಿಗೆ ಇಎಸ್ಐಸಿ ಅಡಿಯಲ್ಲಿ ಬರುವ ಆಸ್ಪತ್ರೆಗಳಲ್ಲಿ ಆರೋಗ್ಯ ವ್ಯವಸ್ಥೆಗಳು ಸಿಗುತ್ತವೆ. 3. ಇಎಸ್ಐಸಿ ಫಲಾನುಭವಿಗಳಿಗೆ ಇಎಸ್ಐಎಸ್ ಕಾರ್ಡ್ ಮೂಲಕ ಮಾತ್ರ ಆಯುಷ್ಮಾನ್ ಭಾರತ್ ಪಿಎಂ- ಜೆಎವೈ ಆಸ್ಪತ್ರೆಗಳಲ್ಲಿ ಉಚಿತ ಚಿಕಿತ್ಸೆ ಲಭ್ಯವಾಗುತ್ತದೆ. 4. ಅದೇ ರೀತಿ ಆಯುಷ್ಮಾನ್ ಭಾರತ್ ಪಿಎಂ- ಜೆಎವೈ ಫಲಾನುಭವಿಗಳು ಇಎಸ್ಐಸಿ ಅಡಿಯಲ್ಲಿ ಬರುವ ಆಸ್ಪತ್ರೆಗಳು ಆರೋಗ್ಯ ವ್ಯವಸ್ಥೆ ಅನುಕೂಲಗಳನ್ನು ಪಡೆಯಬಹುದು.
ಈ ಎಲ್ಲ ಸೇವೆಗಳಿಗಾಗಿ ಇಎಸ್ಐ ಇ-ಐಡಿ ಕಾರ್ಡ್ ಅಥವಾ ಹೆಲ್ತ್ ಕಾರ್ಡ್ ಅಥವಾ ಆಧಾರ್ ಅಗತ್ಯ. ಈ ಬಗ್ಗೆ ಇನ್ನಷ್ಟು ಮಾಹಿತಿ ಬೇಕಾದಲ್ಲಿ ಟೋಲ್ ಫ್ರೀ ಸಹಾಯವಾಣಿ 1800 112 526/1800 113 839 ಸಂಪರ್ಕಿಸಬಹುದು. ಕಾರ್ಮಿಕ ಮತ್ತು ಉದ್ಯೋಗ ಖಾತೆ ರಾಜ್ಯ ಸಚಿವ ಸಂತೋಷ್ ಕುಮಾರ್ ಗಂಗ್ವರ್ ನವದೆಹಲಿಯಲ್ಲಿ ಈ ಯೋಜನೆಗಳ ಒಗ್ಗೂಡಿಸುವ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.
ಇದನ್ನೂ ಓದಿ:ಆಯುಷ್ಮಾನ್ ಭಾರತ್: 112 ಜಿಲ್ಲೆಗಳಲ್ಲಿ ಹೊಸ ಆಸ್ಪತ್ರೆಗಳ ನಿರ್ಮಾಣ ಗುರಿ
