ಉತ್ತರ ಪ್ರದೇಶದಲ್ಲಿ ನಾಲ್ಕು ವಾಹನಗಳಿಗೆ ಡಿಕ್ಕಿ ಹೊಡೆದ ರೈಲು; 5 ಮಂದಿ ಸಾವು

ಶಹಜಾನ್​ಪುರ: ಉತ್ತರ ಪ್ರದೇಶದ ಶಹಜಾನ್​ಪುರದಲ್ಲಿ ರೈಲು ಕೆಲವು ವಾಹನಗಳಿಗೆ ಡಿಕ್ಕಿ ಹೊಡೆದ ಪರಿಣಾಮ 5ಮಂದಿ ಮೃತಪಟ್ಟಿದ್ದಾರೆ. ಇನ್ನೋರ್ವ ಗಾಯಗೊಂಡು ಆಸ್ಪತ್ರೆ ಸೇರಿದ್ದಾರೆ. ಘಟನೆ ನಡೆದಿದ್ದು ಶಹಜಾನ್​ಪುರದ ಮ್ಯಾನ್​ ಲೆವೆಲ್​ ಕ್ರಾಸಿಂಗ್​ ಬಳಿ. ಅಂದರೆ ವಾಹನ ಸಂಚಾರ ರಸ್ತೆ ಮತ್ತು ರೈಲ್ವೆ ಹಳಿ ಕೂಡುವಲ್ಲಿ ಒಂದು ಗೇಟ್ ಇಡಲಾಗುತ್ತದೆ. ರೈಲು ಬರುವ ಹೊತ್ತಿಗೆ ಈ ಗೇಟ್​ನ್ನು ಮುಚ್ಚಬೇಕು. ಆದರೆ ಶಹಜಾನ್​ಪುರದ ಈ ಕ್ರಾಸಿಂಗ್ ಬಳಿ ಗೇಟ್​ ತೆರೆದೇ ಇದ್ದ ಕಾರಣ ಈ ಅವಘಡ ನಡೆದಿದೆ.

ರೈಲ್ವೆ ಮ್ಯಾನೆಲ್​ ಕ್ರಾಸಿಂಗ್​ ಬಳಿ ವಾಹನಗಳಿಗೆ ಡಿಕ್ಕಿ ಹೊಡೆದ ಲಖನೌ-ಚಂಡಿಗಢ್​ ಸೂಪರ್ ಪಾಸ್ಟ್​ ರೈಲು ನಂತರ ಹಳಿ ತಪ್ಪಿದೆ. ಇದರಿಂದಾಗಿ ಎರಡೂ ದಿಕ್ಕಿನಿಂದಲೂ ರೈಲು ಸಂಚಾರಕ್ಕೆ ತೊಡಕಾಗಿತ್ತು ಎಂದು ಸ್ಥಳೀಯ ಗ್ರಾಮಾಂತರ ಎಸ್​ಪಿ ಸಂಜೀವ್​ ಬಾಜ್​ಪೇಯಿ ತಿಳಿಸಿದ್ದಾರೆ.

ಮೀರಾನ್​​ಪುರ ಕತ್ರಾ ರೈಲ್ವೆ ಸ್ಟೇಶನ್​​ ದಾಟಿದ ರೈಲು ಮಾರ್ಗದಲ್ಲಿ ಸಿಗುವ ಮ್ಯಾನೆಲ್​ ಕ್ರಾಸ್​​ನಲ್ಲಿ ಎರಡು ಟ್ರಕ್​, ಒಂದು ಕಾರು ಮತ್ತು ಒಂದು ಬೈಕ್​​ಗೆ ಡಿಕ್ಕಿ ಹೊಡೆದಿದೆ. ಮೃತಪಟ್ಟ ಐವರಲ್ಲಿ ಮೂವರು ಒಂದೇ ಕುಟುಂಬದವರು. ಒಬ್ಬ ವ್ಯಕ್ತಿ ಗಂಭೀರವಾಗಿ ಗಾಯಗೊಂಡಿದ್ದು ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಇನ್ನು ರೈಲು ಬರುವ ಸಮಯವಾದರೂ ಗೇಟ್​ ಯಾಕೆ ತೆರೆದಿತ್ತು ಎಂಬ ಬಗ್ಗೆ ತನಿಖೆ ನಡೆಸುವುದಾಗಿ ಎಸ್​ಪಿ ಹೇಳಿದ್ದಾರೆ. ಸದ್ಯ ಸ್ಥಳದಲ್ಲಿ ಪೊಲೀಸರು, ರೈಲ್ವೆ ಅಧಿಕಾರಿಗಳು, ರಕ್ಷಣಾ ಸಿಬ್ಬಂದಿ ಸ್ಥಳದಲ್ಲಿದ್ದಾರೆ. ರೈಲ್ವೆ ಇಲಾಖೆಯ ಇಂಜಿನಿಯರ್​ಗಳು ಧಾವಿಸಿದ್ದಾರೆ. ಅಲ್ಲಿ ಹಾಳಾಗಿರುವ ಹಳಿ ದುರಸ್ತಿ ಕಾರ್ಯ ನಡೆಯುತ್ತಿದೆ. ಎಲ್ಲವೂ ಸರಿ ಆಗಿ, ರೈಲುಗಳು ಸಂಚರಿಸಲು ಇನ್ನೂ ಮೂರ್ನಾಲ್ಕು ತಾಸಾದರೂ ಬೇಕು ಎಂದು ಜಿಲ್ಲಾಧಿಕಾರಿ ವಿಕ್ರಮ್ ಸಿಂಗ್​ ತಿಳಿಸಿದ್ದಾರೆ. ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್​ ಅವರು ಮೃತರ ಕುಟುಂಬಕ್ಕೆ ತಲಾ 2 ಲಕ್ಷ ರೂ.ಪರಿಹಾರ ಘೋಷಿಸಿದ್ದು, ಸಂತಾಪ ಸೂಚಿಸಿದ್ದಾರೆ.

ಇದನ್ನೂ ಓದಿ: ಎಷ್ಟು ಪ್ರಯತ್ನಿಸಿದರೂ ತಾಯಿಯನ್ನು ಉಳಿಸಿಕೊಳ್ಳಲಾಗಲಿಲ್ಲ, ಆ್ಯಂಬುಲೆನ್ಸ್ ತಬ್ಬಿ ಕಣ್ಣೀರು ಹಾಕಿದ ಪೊಲೀಸ್ ಸಿಬ್ಬಂದಿ

ಮೊಹಮದ್ ನಲಪಾಡ್ ಅಂಡ್​ ಗ್ಯಾಂಗ್ ನನಗೆ ಹಿಂಸಿಸುತ್ತಿದ್ದಾರೆ- ಹೈಗ್ರೌಂಡ್ಸ್​ ಠಾಣೆಯಲ್ಲಿ 3 ಪುಟಗಳ ದೂರು ದಾಖಲು