FutureCrime Summit 2024: ಯಶಸ್ವಿಯಾಗಿ ನಡೆಯಿತು ಮೊದಲ ಫ್ಯೂಚರ್ ಕ್ರೈಮ್ ಸಮಾವೇಶ; ಭವಿಷ್ಯದ ಅಪರಾಧಗಳ ಬಗ್ಗೆ ತಜ್ಞರಿಂದ ವಿಚಾರ ವಿನಿಮಯ
2 Days Summit In New Delhi Ends On Feb 9th: ತಂತ್ರಜ್ಞಾನ ಆವಿಷ್ಕರಣೆಗೊಂಡಂತೆಲ್ಲಾ ಅಪರಾಧಿಗಳಿಗೂ ಈ ಟೆಕ್ನಾಲಜಿ ಅಸ್ತ್ರವಾಗಿವೆ. ಹೊಸ ಮಾದರಿ ಅಪಾಯಗಳು ಎದುರಾಗುತ್ತಿವೆ. ಭವಿಷ್ಯದ ಅಪರಾಧಗಳೇನು, ಅದನ್ನು ಎದುರಿಸುವುದು ಹೇಗೆ ಎಂದು ಚರ್ಚಿಸಲು ಫ್ಯೂಚರ್ಕ್ರೈಮ್ ಸಮಿಟ್ ನಡೆಸಲಾಗಿದೆ. ಫೆಬ್ರುವರಿ 8 ಮತ್ತು 9ರಂದು ದೆಹಲಿಯಲ್ಲಿ ಮೊದಲ ಆವೃತ್ತಿಯ ಫ್ಯೂಚರ್ ಕ್ರೈಮ್ ಸಮಿಟ್ ನಡೆದಿದೆ.
Updated on: Feb 09, 2024 | 4:30 PM
ನವದೆಹಲಿ, ಫೆಬ್ರುವರಿ 9: ಭವಿಷ್ಯದ ಅಪರಾಧಗಳ ಬಗ್ಗೆ ವಿಚಾರ ವಿನಿಮಯ ಮತ್ತು ಹೋರಾಟ ರೂಪಿಸಲು ಫ್ಯೂಚರ್ ಕ್ರೈಮ್ ಸಮಿಟ್ (FutureCrime Summit 2024) ರೂಪಿಸಲಾಗಿದೆ. ಇದರ ಮೊದಲ ಆವೃತ್ತಿ ರಾಷ್ಟ್ರರಾಜಧಾನಿಯಲ್ಲಿ ನಡೆದಿದೆ. ನಿನ್ನೆ ಫೆಬ್ರುವರಿ 8ಕ್ಕೆ ಆರಂಭಗೊಂಡ 2024ರ ಫ್ಯೂಚರ್ಕ್ರೈಮ್ ಸಮಿಟ್ ಇಂದು ಸಂಜೆ ಮುಕ್ತಾಯಗೊಳ್ಳುತ್ತಿದೆ. ಕಾನಪುರ್ ಐಐಟಿಯ ಸಹಯೋಗದೊಂದಿಗೆ ಫ್ಯೂಚರ್ ಕ್ರೈಮ್ ರಿಸರ್ಚ್ ಫೌಂಡೇಶನ್ (FCRF) ಈ ಸಮಾವೇಶವನ್ನು ಆಯೋಜಿಸಿದೆ. ದೇಶದ ಸೈಬರ್ ಸೆಕ್ಯೂರಿಟಿ, ಡಿಜಿಟಲ್ ಫೋರೆನ್ಸಿಕ್ಸ್, ಹಣಕಾಸು ಅಪರಾಧ ನಿಯಂತ್ರಣ ಕ್ಷೇತ್ರದ ಸರ್ವೋತ್ಕೃಷ್ಟ ಪರಿಣಿತರು ಈ ಸಮಿಟ್ನಲ್ಲಿ ಪಾಲ್ಗೊಂಡು ತಮ್ಮ ಅಮೂಲ್ಯ ಸಲಹೆ, ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.
ತಂತ್ರಜ್ಞಾನ ಆವಿಷ್ಕರಣೆಗೊಂಡಂತೆಲ್ಲಾ ಅಪರಾಧಗಳ ವಿಸ್ತಾರ ಮತ್ತು ಪರಿಭಾಷೆ ಬದಲಾಗುತ್ತಲೇ ಇರುತ್ತದೆ. ಅಪರಾಧಿಗಳು ಹೊಸ ಹೊಸ ತಂತ್ರಜ್ಞಾನ ಬಳಸಿ ಘಾತುಕ ಕೃತ್ಯ ಎಸಗುತ್ತಾರೆ. ಇವತ್ತು ಆನ್ಲೈನ್ನಲ್ಲಿ ಹಣ ವಂಚನೆ ಮಾಡುವುದು ಇತ್ಯಾದಿ ಸೈಬರ್ ಕ್ರೈಮ್ ಹೆಚ್ಚಾಗಿದೆ. ಭವಿಷ್ಯದಲ್ಲಿ ವೆಬ್3 ತಂತ್ರಜ್ಞಾನದ ಹವಾ ಇರಲಿದ್ದು, ಸೈಬರ್ ಕ್ರಿಮಿನಲ್ಗಳಿಗೆ ಅದೂ ಕೂಡ ಅಸ್ತ್ರವಾಗಬಹುದು. ಹೀಗಾಗಿ, ವೆಬ್ 3.0 ಕಾನೂನು ಜಾರಿ, ಕ್ರಿಪ್ಟೋ ಕ್ರೈಮ್, ಬ್ಲಾಕ್ಚೈನ್ ಫೋರೆನ್ಸಿಂಗ್, ಪ್ರೆಡಿಕ್ಟಿವ್ ಪೋಲಿಸಿಂಗ್ ಇತ್ಯಾದಿ ವಿಷಯಗಳತ್ತ ಪರಿಣಿತರು ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಳ್ಳಲು ಫ್ಯೂಚರ್ಕ್ರೈಮ್ ಸಮಿಟ್ ಪರಿಣಾಮಕಾರಿ ವೇದಿಕೆ ಆಗಿದೆ.
ಇದನ್ನೂ ಓದಿ: ಹಲ್ದ್ವಾನಿ ಹಿಂಸಾಚಾರ ಪೂರ್ವ ಯೋಜಿತ: ಜಿಲ್ಲಾ ಮೆಜಿಸ್ಟ್ರೇಟ್
ರಕ್ಷಣಾ ಸಚಿವಾಲಯದ ಮುಖ್ಯ ಸಲಹೆಗಾರ ವಿನೋದ್ ಜಿ ಖಂಡರೆ, ಎಲೆಕ್ಟ್ರಾನಿಕ್ಸ್ ಸಚಿವಾಲಯದಲ್ಲಿ ನ್ಯಾಷನಲ್ ಸೈಬರ್ ಸೆಕ್ಯೂರಿಟಿ ಕೋ ಆರ್ಡಿನೇಟರ್ ಆಗಿರುವ ಲೆಫ್ಟಿನೆಂಟ್ ಜನರಲ್ ಎಂ.ಯು. ನಾಯರ್, ಆಂಧ್ರದ ಮಾಜಿ ಡಿಜಿಪಿ ಸಂತೋಷ್ ಮೆಹ್ರಾ, ಐಐಟಿ ಕಾನಪುರ್ನ ಸಿಇಒ ಡಾ. ನಿಖಿಲ್ ಅಗರ್ವಾಲ್, ಉ.ಪ್ರ. ಮಾಜಿ ಡಿಜಿಪಿ ಡಾ. ವಿಕ್ರಮ್ ಸಿಂಗ್ ಮೊದಲಾದ ಪರಿಣಿತರು ಎರಡು ದಿನಗಳ ಈ ಶೃಂಗಸಭೆಯಲ್ಲಿ ಪಾಲ್ಗೊಂಡು ಮಾತನಾಡಿದ್ದಾರೆ. ಪೇಟಿಎಂ, ಟೆಕ್ ಮಹೀಂದ್ರ ಮೊದಲಾದ ಹಣಕಾಸು ಮತ್ತು ಫಿನ್ಟೆಕ್ ಕಂಪನಿಗಳಿಂದ ಪರಿಣಿತರು ಬಂದು ಮಾತನಾಡಿದ್ದಾರೆ.
ಫ್ಯೂಚರ್ಕ್ರೈಮ್ ಸಮಿಟ್ 2024ನ ಮೊದಲ ದಿನದಂದು (ಫೆ. 8) ನಡೆದ ಚರ್ಚಿತ ವಿಚಾರಗಳು
- ಪ್ರಮುಖ ವಲಯಗಳಲ್ಲಿ ಪ್ರಬಲ ಸೈಬರ್ ಡಿಫೆನ್ಸ್ ನಿರ್ಮಿಸುವುದು
- ಕ್ರಿಪ್ಟೋ ಕ್ರೈಮ್, ಬ್ಲಾಕ್ಚೈನ್ ಫೋರೆನ್ಸಿಕ್ಸ್
- ಪ್ರೆಡಿಕ್ಟಿವ್ ಪೊಲೀಸಿಂಗ್
- ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಮತ್ತು ಭವಿಷ್ಯದ ಅಪರಾಧಗಳು
- ಅಂತರ್ಜಾಲದಲ್ಲಿ ವೈಯಕ್ತಿಕ ಸುರಕ್ಷತೆ, ಮಕ್ಕಳ ರಕ್ಷಣೆ ಇತ್ಯಾದಿ ವಿಚಾರಗಳು
- ಡೀಪ್ಫೇಕ್ ಅಪರಾಧಗಳು ಹಾಗೂ ನಿಗ್ರಹ ವಿಧಾನ
- ವೆಬ್ 3 ಕಾನೂನು ಜಾರಿಯಲ್ಲಿನ ಸವಾಲುಗಳು
- ಕ್ಲೌಡ್ ಫೋರೆನ್ಸಿಕ್ಸ್
ಇದನ್ನೂ ಓದಿ: ಟಿವಿ ಚಾನಲ್ನಲ್ಲಿ ಬರೋ ಬಿಸಿನೆಸ್ ತಜ್ಞರಿಗೆ ದಂಡ ಕಕ್ಕಿಸಿದ ಸೆಬಿ; ಒಳಗೊಳಗೆ ನಡೆದಿರುತ್ತೆ ಡೀಲಿಂಗ್, ಹುಷಾರ್
ಎರಡನೆ ದಿನದಂದು ಚರ್ಚಿತವಾದ ವಿಷಯಗಳು
- ಕ್ವಾಂಟಮ್ ಯುಗದಲ್ಲಿ ಸೈಬರ್ ಸೆಕ್ಯೂರಿಟಿ
- ಸೈಬರ್ ಕ್ರೈಮ್ನಲ್ಲಿ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್
- ಮುಂದಿನ ತಲೆಮಾರಿನ ಸೈಬರ್ ದಾಳಿಗಳು
- ಭವಿಷ್ಯದ ಅಪಾಯಗಳು
- ಭವಿಷ್ಯದ ಸೈಬರ್ ಅಪರಾಧಗಳು ಹಾಗೂ ಕಾನೂನಿನ ತೊಡಕು
- ರಾಷ್ಟ್ರೀಯ ಸೈಬರ್ ಸೆಕ್ಯೂರಿಟಿಗೆ ಡಿಜಿಟಲ್ ಅಪಾಯಗಳು
- ಜನರೇಟಿವ್ ಎಐ, ಡಿಎಒ, ಡೀಫೈಗಳಿಂದ ಆಗುವ ಸಂಭಾವ್ಯ ಅಪಾಯ
- ಬಿಎಫ್ಎಸ್ಐ ಸೆಕ್ಟರ್ನಲ್ಲಿ ವಂಚನೆ
- ಸೈಬರ್ ಫೋರೆನ್ಸಿಕ್ಸ್ ಕ್ಷೇತ್ರದ ಇತ್ತೀಚಿನ ಆವಿಷ್ಕರಣೆಗಳು
- ಸೈಬರ್ ಥ್ರೆಟ್ ಇಂಟೆಲಿಜೆನ್ಸ್, ಸೋಷಿಯಲ್ ಮೀಡಿಯಾ ಅನಾಲಿಟಿಕ್ಸ್, ಒಎಸ್ಐಎನ್ಟಿ ಟೂಲ್ಸ್ ಬಗ್ಗೆ ಚರ್ಚೆ
- ತ್ವರಿತ ತಂತ್ರಜ್ಞಾನ ಆವಿಷ್ಕರಣೆಗಳ ಮಧ್ಯೆ ಡಾಟಾ ರಕ್ಷಣೆ ಹೇಗೆ?
- ಡಾರ್ಕ್ ವೆಬ್ ತನಿಖೆ ವಿಚಾರಗಳು
ಫ್ಯೂಚರ್ಕ್ರೈಮ್ ಸಮಿಟ್ನ ಪ್ರಾಯೋಜಕರು
ಪ್ರೋಡಿಸ್ಕವರ್ ಫೋರೆನ್ಸಿಕ್ಸ್, ಎಕ್ಸ್ಟೆರೋ, ಟ್ರೈನೆಕ್ಸಿಯಾ, ರೀ ಸೆಕ್ಯೂರಿಟಿ, ಇಸೆಕ್ಫೋರ್ಟ್, ಇನ್ನೇಫು ಲ್ಯಾಬ್ಸ್, ಫೋರೆನ್ಸಿಕ್ಸ್ ಕೇರ್, ಎಂಎಸ್ಎಬಿ, ಟೆಕ್ಡಿಫೆನ್ಸ್, ಎಂಫಿಲ್ಟರ್ಐಟಿ, ನ್ಯಾಂಗಿಯಾ ಆಂಡರ್ಸನ್ ಇಂಡಿಯಾ ಮತ್ತು ಆರ್ಮಾನ್ಟೆಕ್ ಸಂಸ್ಥೆಗಳು ಈ ಶೃಂಗಸಭೆಯ ಪ್ರಾಯೋಜಕತ್ವ ವಹಿಸಿವೆ.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
