Covid Vaccine: ವರ್ಷಾಂತ್ಯದೊಳಗೆ ಭಾರತದಲ್ಲಿ ಸಿಗಲಿರುವ 8 ಕೊರೊನಾ ಲಸಿಕೆಗಳು ಯಾವುವು?

Coronavirus Vaccinations: ಈ ಪೈಕಿ ಬಯೋಲಾಜಿಕಲ್ ಇ, ಜೈಡಸ್ ಕ್ಯಾಡಿಲಾ, ಜೆನ್ನೋವಾ ಹಾಗೂ ಭಾರತ್ ಬಯೋಟೆಕ್ ಸಂಸ್ಥೆಯ ಮೂಗಿಗೆ ಬಿಡುವ ಲಸಿಕೆ ವಿವಧ ಹಂತದ ವೈದ್ಯಕೀಯ ಪರೀಕ್ಷೆಗಳನ್ನು ಎದುರಿಸುತ್ತಿದ್ದು, ಸೆರಮ್​ ಇನ್​ಸ್ಟಿಟ್ಯೂಟ್ ಆಫ್ ಇಂಡಿಯಾ ಉತ್ಪಾದಿಸಲಿರುವ ನೋವಾವ್ಯಾಕ್ಸ್ ಲಸಿಕೆ 2 ನೇ ಹಂತದ ಪ್ರಯೋಗಕ್ಕೆ ಒಳಗಾಗಿದೆ.

  • Updated On - 11:18 am, Sat, 15 May 21 Edited By: Apurva Kumar
Covid Vaccine: ವರ್ಷಾಂತ್ಯದೊಳಗೆ ಭಾರತದಲ್ಲಿ ಸಿಗಲಿರುವ 8 ಕೊರೊನಾ ಲಸಿಕೆಗಳು ಯಾವುವು?
ಪ್ರಾತಿನಿಧಿಕ ಚಿತ್ರ

ದೆಹಲಿ: ಭಾರತ ಕೊರೊನಾ ಎರಡನೇ ಅಲೆಯ ನಡುವೆಯೇ ಲಸಿಕೆ ಕೊರತೆಯನ್ನು ತೀವ್ರವಾಗಿ ಎದುರಿಸುತ್ತಿದೆ. ಜನವರಿ 16ರಿಂದ ವೈದ್ಯರು, ದಾದಿಯರು, ಫ್ರಂಟ್​ಲೈನ್ ವಾರಿಯರ್ಸ್​ ಹಾಗೂ ಬಹು ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿರುವವರಿಗೆ ಲಸಿಕೆ ವಿತರಣೆ ಆರಂಭವಾಯಿತಾದರೂ ನಂತರದ ಹಂತದಲ್ಲಿ 45 ವರ್ಷ ಮೇಲ್ಪಟ್ಟ ಎಲ್ಲಾ ನಾಗರೀಕರಿಗೂ ಲಸಿಕೆ ನೀಡುವುದಾಗಿ ಸರ್ಕಾರ ಘೋಷಿಸಿತು. ಇದೀಗ ಮೇ 1ರಿಂದ 18ರಿಂದ 44 ವರ್ಷ ವಯಸ್ಸಿನವರಿಗೂ ಲಸಿಕೆ ನೀಡುವುದಾಗಿ ಭರವಸೆ ನೀಡಲಾಗಿದ್ದು, ಸದ್ಯ ಲಸಿಕೆ ಅಭಾವದಿಂದ ಅನೇಕ ಕಡೆ ಸಮಸ್ಯೆ ತಲೆದೋರಿದೆ. ಇಷ್ಟು ದಿನ ಭಾರತ್ ಬಯೋಟೆಕ್ ಸಂಸ್ಥೆ ಅಭಿವೃದ್ಧಿಪಡಿಸಿದ ಕೊವ್ಯಾಕ್ಸಿನ್ ಹಾಗೂ ಸೆರಮ್ ಇನ್​ಸ್ಟಿಟ್ಯೂಟ್ ಆಫ್ ಇಂಡಿಯಾ ತಯಾರಿಸಿದ ಕೊವಿಶೀಲ್ಡ್ ಲಸಿಕೆಯನ್ನು ಮಾತ್ರ ನೀಡಲಾಗುತ್ತಿತ್ತು. ಆದರೆ, ಇದೀಗ ಲಸಿಕೆ ಕೊರತೆ ಎದುರಾಗುತ್ತಿರುವ ಹೊತ್ತಿನಲ್ಲಿ ರಷ್ಯಾದಿಂದ ಆಮದು ಮಾಡಿಕೊಂಡ ಸ್ಪುಟ್ನಿಕ್ ವಿ ಲಸಿಕೆ ವಿತರಣೆಗೂ ಸಿದ್ಧತೆ ನಡೆದಿದ್ದು ಅದರ ಬೆನ್ನಲ್ಲೇ ಇನ್ನೂ ಹಲವು ಹೊಸ ಲಸಿಕೆಗಳು ಮಾರುಕಟ್ಟೆಗೆ ಬರುವುದು ಬಹುತೇಕ ಖಚಿತವಾಗಿದೆ. ಆ ಮೂಲಕ ಶೀಘ್ರದಲ್ಲೇ ದೇಶದಲ್ಲಿ ಒಟ್ಟು ಎಂಟು ಕೊರೊನಾ ಲಸಿಕೆಗಳು ಲಭ್ಯವಾಗಲಿವೆ.

2021ರ ಅಂತ್ಯದೊಳಗೆ ದೇಶದ ಎಲ್ಲಾ ನಾಗರೀಕರಿಗೆ ಲಸಿಕೆ ನೀಡುವ ಗುರಿಯನ್ನು ಸರ್ಕಾರ ಇಟ್ಟುಕೊಂಡಿದ್ದು ಒಟ್ಟು 8 ಸಂಸ್ಥೆಗಳ 200 ಕೋಟಿ ಡೋಸ್​ಗೂ ಹೆಚ್ಚು ಕೊರೊನಾ ಲಸಿಕೆಯನ್ನು ಆಗಸ್ಟ್​ನಿಂದ ಡಿಸೆಂಬರ್ ಒಳಗೆ ಹೊಂದಲು ಯೋಜನೆ ರೂಪಿಸುತ್ತಿದೆ. ಈ ಬಗ್ಗೆ ಮಾತನಾಡಿರುವ ನೀತಿ ಆಯೋಗದ ಸದಸ್ಯ ಡಾ.ವಿ.ಕೆ.ಪೌಲ್, ಆಗಸ್ಟ್​ನಿಂದ ಡಿಸೆಂಬರ್ ನಡುವಿನ ಐದು ತಿಂಗಳ ಅವಧಿಯಲ್ಲಿ ಒಟ್ಟು 200ಕೋಟಿ ಡೋಸ್​ಗೂ ಹೆಚ್ಚು ಕೊರೊನಾ ಲಸಿಕೆಯನ್ನು ಭಾರತದಲ್ಲಿ ಉತ್ಪಾದಿಸಲು ತೀರ್ಮಾನಿಸಲಾಗಿದೆ ಎಂದಿದ್ದಾರೆ. ಆರೋಗ್ಯ ಇಲಾಖೆಯ ಪ್ರಕಾರ ಒಟ್ಟು 216 ಕೋಟಿ ಡೋಸ್ ಲಸಿಕೆಯಲ್ಲಿ 75ಕೋಟಿ ಡೋಸ್ ಕೊವಿಶೀಲ್ಡ್, 55 ಕೋಟಿ ಡೋಸ್ ಕೊವ್ಯಾಕ್ಸಿನ್ ಲಸಿಕೆ ಇರಲಿದ್ದು, ಸ್ಪುಟ್ನಿಕ್ ವಿ ಲಸಿಕೆ 15.6 ಕೋಟಿ, ಬಯೋ ಇ ಸಬ್ ಯುನಿಟ್ ವ್ಯಾಕ್ಸಿನ್ 30 ಕೋಟಿ, ಜೈಡಸ್ ಕ್ಯಾಡಿಲಾ ಡಿಎನ್​ಎ ವ್ಯಾಕ್ಸಿನ್ 5 ಕೋಟಿ, ಎಸ್​ಐಐ ನೋವಾವ್ಯಾಕ್ಸ್ 20 ಕೋಟಿ, ಬಿಬಿ ನಾಸಲ್ ವ್ಯಾಕ್ಸಿನ್ 10 ಕೋಟಿ ಹಾಗೂ ಜೆನ್ನೋವಾ ಎಂಆರ್​ಎನ್​ಎ ವ್ಯಾಕ್ಸಿನ್ ಆರು ಕೋಟಿ ಡೋಸ್ ಇರಲಿದೆ ಎಂದು ತಿಳಿದುಬಂದಿದೆ.

ಈ ಪೈಕಿ ಬಯೋಲಾಜಿಕಲ್ ಇ, ಜೈಡಸ್ ಕ್ಯಾಡಿಲಾ, ಜೆನ್ನೋವಾ ಹಾಗೂ ಭಾರತ್ ಬಯೋಟೆಕ್ ಸಂಸ್ಥೆಯ ಮೂಗಿಗೆ ಬಿಡುವ ಲಸಿಕೆ ವಿವಧ ಹಂತದ ವೈದ್ಯಕೀಯ ಪರೀಕ್ಷೆಗಳನ್ನು ಎದುರಿಸುತ್ತಿದ್ದು, ಸೆರಮ್​ ಇನ್​ಸ್ಟಿಟ್ಯೂಟ್ ಆಫ್ ಇಂಡಿಯಾ ಉತ್ಪಾದಿಸಲಿರುವ ನೋವಾವ್ಯಾಕ್ಸ್ ಲಸಿಕೆ 2 ನೇ ಹಂತದ ಪ್ರಯೋಗಕ್ಕೆ ಒಳಗಾಗಿದೆ.

VACCINE IN INDIA

ಯಾವ ಲಸಿಕೆಯನ್ನು ಎಷ್ಟು ಪ್ರಮಾಣದಲ್ಲಿ ಕಾಯ್ದಿರಿಸಲಾಗಿದೆ?

(India will have 8 different corona vaccines by the end of 2021)

ಇದನ್ನೂ ಓದಿ:
Sputnik V: ಸ್ಪುಟ್ನಿಕ್​ ವಿ ಕೊರೊನಾ ಲಸಿಕೆ ಒಂದು ಡೋಸ್​ಗೆ 995.40 ರೂ; ಭಾರತದಲ್ಲಿ ಉತ್ಪಾದನೆ ಆರಂಭವಾದ ನಂತರ ಬೆಲೆ ತಗ್ಗುವ ಸಾಧ್ಯತೆ