ಗುಜರಾತ್‌ನಲ್ಲಿ ನಾಳೆ ಮಿಯಾವಾಕಿ ಅರಣ್ಯ, ಮೇಜ್ ಗಾರ್ಡನ್ ಉದ್ಘಾಟನೆ; ಈ ಹೊಸ ಪ್ರವಾಸಿ ತಾಣಗಳ ಬಗ್ಗೆ ಇಲ್ಲಿದೆ ಮಾಹಿತಿ

ಗುಜರಾತ್‌ನಲ್ಲಿ ನಾಳೆ(ಸೋಮವಾರ) ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರು ಕೆವಾಡಿಯಾದಲ್ಲಿ ಎರಡು ಹೊಸ ಪ್ರವಾಸಿ ಆಕರ್ಷಣೆಗಳಾದ ಮೇಜ್ ಗಾರ್ಡನ್ (Maze Garden) ಮತ್ತು ಮಿಯಾವಾಕಿ ಅರಣ್ಯವನ್ನು (Miyawaki Forest) ಉದ್ಘಾಟಿಸಲಿದ್ದಾರೆ. ಪ್ರಧಾನ ಮಂತ್ರಿಗಳ ಕಚೇರಿ (PMO) ಹೊರಡಿಸಿದ ಹೇಳಿಕೆಯ ಪ್ರಕಾರ, ಮೇಜ್ ಗಾರ್ಡನ್ ಮೂರು ಎಕರೆ ಪ್ರದೇಶದಲ್ಲಿ ಹರಡಿಕೊಂಡಿದ್ದು ಇದು ದೇಶದಲ್ಲೇ ಅತಿ ದೊಡ್ಡ ಉದ್ಯಾನವಾಗಿದೆ. ಮಿಯಾವಾಕಿ ಅರಣ್ಯವನ್ನು ಸುಮಾರು ಎರಡು ಎಕರೆ ಪ್ರದೇಶದಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ಇದನ್ನು ಜಪಾನಿನ ಸಸ್ಯಶಾಸ್ತ್ರಜ್ಞ ಅಕಿರಾ ಮಿಯಾವಾಕಿ ಅವರ ತಂತ್ರವನ್ನು ಬಳಸಿಕೊಂಡು ಅಭಿವೃದ್ಧಿಪಡಿಸಲಾಗಿದೆ.

ಕೆವಾಡಿಯಾದಲ್ಲಿನ ಎರಡು ಹೊಸ ಪ್ರವಾಸಿ ಆಕರ್ಷಣೆಗಳ ಬಗ್ಗೆ ನೀವು ತಿಳಿದುಕೊಳ್ಳಬೇಕಾದದ್ದು

ಮೇಜ್ ಗಾರ್ಡನ್

1. ಮೇಜ್ ಗಾರ್ಡನ್ ಮೂರು ಎಕರೆ ಪ್ರದೇಶದಲ್ಲಿ ಹರಡಿಕೊಂಡಿದೆ, ಇದು ಭಾರತದಲ್ಲಿನ ದೊಡ್ಡ ಉದ್ಯಾನವನವಾಗಿದೆ.
2. ಉದ್ಯಾನವು ಸುಮಾರು 2.1 ಕಿಲೋಮೀಟರ್ ಮಾರ್ಗವನ್ನು ಹೊಂದಿದೆ ಎಂದು ಪಿಎಂಒ ಹೇಳಿಕೆ ತಿಳಿಸಿದೆ. ಇದನ್ನು ‘ಶ್ರೀಯಂತ್ರ’ ಆಕಾರದಲ್ಲಿ ವಿನ್ಯಾಸಗೊಳಿಸಲಾಗಿದೆ, ಇದು ಸ್ಥಳಕ್ಕೆ ಧನಾತ್ಮಕ ಶಕ್ತಿಯನ್ನು ತರುತ್ತದೆ ಎಂದು ನಂಬಲಾಗಿದೆ.
3. ಉದ್ಯಾನದಲ್ಲಿ 1.8 ಲಕ್ಷ ಸಸಿಗಳನ್ನು ನೆಡಲಾಗಿದೆ. ಇದು ಭೂದೃಶ್ಯದ ಸೌಂದರ್ಯವನ್ನು ಹೆಚ್ಚಿಸಿದೆ ಎಂದು ಪಿಎಂಒ ಹೇಳಿಕೆಯಲ್ಲಿ ಸೇರಿಸಲಾಗಿದೆ. ಆರೆಂಜ್ ಜೆಮಿನ್, ಮಧು ಕಾಮಿನಿ, ಗ್ಲೋರಿ ಬೋವರ್ ಮತ್ತು ಮೆಹಂದಿ ಸಸಿಗಳು ಇಲ್ಲಿವೆ.
4. ಈ ಸ್ಥಳವು ಮೂಲತಃ  ಅವಶೇಷಗಳ ಡಂಪಿಂಗ್  ತಾಣವಾಗಿತ್ತು, ಅದು ಈಗ ಹಸಿರು ಭೂದೃಶ್ಯವಾಗಿ ಮಾರ್ಪಟ್ಟಿದೆ. ಈ ಭೂಮಿ ಸುತ್ತಮುತ್ತಲ ಪ್ರದೇಶವನ್ನು ಸುಂದರಗೊಳಿಸುವುದಲ್ಲದೆ, ಪಕ್ಷಿಗಳು, ಚಿಟ್ಟೆಗಳು ಮತ್ತು ಜೇನುನೊಣಗಳು ಅಭಿವೃದ್ಧಿ ಹೊಂದುತ್ತಿರುವ ಚಂದದ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸಲು ಸಹಾಯ ಮಾಡಿದೆ.

ಮಿಯಾವಾಕಿ ಅರಣ್ಯ

1. ಜಪಾನಿನ ಸಸ್ಯಶಾಸ್ತ್ರಜ್ಞ ಅಕಿರಾ ಮಿಯಾವಾಕಿ ಅವರು ಪ್ರವರ್ತಿಸಿದ ತಂತ್ರವನ್ನು ಬಳಸಿಕೊಂಡು ಅರಣ್ಯವನ್ನು ಅಭಿವೃದ್ಧಿಪಡಿಸಲಾಗಿದೆ. ಇದು ಕಡಿಮೆ ಅವಧಿಯಲ್ಲಿ ದಟ್ಟವಾದ, ಸ್ಥಳೀಯ ಕಾಡುಗಳನ್ನು ನಿರ್ಮಿಸಲು ಸಹಾಯ ಮಾಡುತ್ತದೆ.
2. ಈ ವಿಧಾನವನ್ನು ಬಳಸಿಕೊಂಡು ಸಸ್ಯಗಳ ಬೆಳವಣಿಗೆಯು ಹತ್ತು ಪಟ್ಟು ವೇಗವಾಗಿರುತ್ತದೆ. ಇದರ ಪರಿಣಾಮವಾಗಿ, ಅಭಿವೃದ್ಧಿ ಹೊಂದಿದ ಅರಣ್ಯವು ಮೂವತ್ತು ಪಟ್ಟು ದಟ್ಟವಾಗಿರುತ್ತದೆ.
3. ಸುಮಾರು ಎರಡು ಎಕರೆ ಪ್ರದೇಶದಲ್ಲಿ ಹರಡಿರುವ ಮಿಯಾವಾಕಿ ಅರಣ್ಯವು ಸ್ಥಳೀಯ ಹೂವಿನ ಉದ್ಯಾನ, ಒಂದು ಟಿಂಬರ್ ಗಾರ್ಡನ್,  ಒಂದು ಹಣ್ಣಿನ ಉದ್ಯಾನ; ಒಂದು ಔಷಧೀಯ ಉದ್ಯಾನ, ಮಿಶ್ರ ಜಾತಿಗಳ ಮಿಯಾವಾಕಿ ವಿಭಾಗ,ಡಿಜಿಟಲ್ ಓರಿಯಂಟೇಶನ್ ಸೆಂಟರ್ ಅನ್ನು ಹೊಂದಿದೆ.
4. ಮೇಜ್ ಗಾರ್ಡನ್ ಮತ್ತು ಮಿಯಾವಾಕಿ ಅರಣ್ಯವು ಐಕಾನಿಕ್ ಸ್ಟ್ಯಾಚ್ಯೂ ಆಫ್ ಯೂನಿಟಿಯ ಪ್ರವಾಸಿ ಮೌಲ್ಯವನ್ನು ಹೆಚ್ಚಿಸುತ್ತದೆ.

ಇದನ್ನೂ ಓದಿ: ಸರ್ದಾರ್‌ ಪಟೇಲರ ಬಾನೆತ್ತರದ ಏಕತಾ ಪ್ರತಿಮೆಗೆ ಮೆರುಗು ನೀಡುವ ಮೇಜ್‌ ಗಾರ್ಡನ್‌ ಹೇಗಿದೆ ನೋಡಿ