ಎನ್‌ಸಿಪಿಯ ಸುಪ್ರಿಯಾ ಸುಲೆಗೆ ಸಂಸದ್ ವಿಶಿಷ್ಟ್ ರತ್ನ, ಎಚ್​ವಿ ಹಂದೆ ಮತ್ತು ವೀರಪ್ಪ ಮೊಯ್ಲಿಗೆ ಜೀವಮಾನ ಸಾಧನೆ ಪ್ರಶಸ್ತಿ

ದೆಹಲಿ: ಎನ್‌ಸಿಪಿಯ ಸುಪ್ರಿಯಾ ಸುಲೆ (Supriya Sule)ಮತ್ತು ಬಿಜೆಡಿಯ ಅಮರ್ ಪಟ್ನಾಯಕ್ ಸೇರಿದಂತೆ 11 ಸಂಸದರು 2022 ರ ಸಂಸದ್ ರತ್ನ ಪ್ರಶಸ್ತಿಯನ್ನು(Sansad Ratna Award) ಪಡೆಯಲಿದ್ದಾರೆ ಎಂದು ಪ್ರೈಮ್ ಪಾಯಿಂಟ್ ಫೌಂಡೇಶನ್ ಮಂಗಳವಾರ ತಿಳಿಸಿದೆ. ತೀರ್ಪುಗಾರರ ಸಮಿತಿಯು ತಮಿಳುನಾಡಿನ ಹಿರಿಯ ಬಿಜೆಪಿ ನಾಯಕ ಎಚ್ ವಿ ಹಂದೆ ಮತ್ತು ಕಾಂಗ್ರೆಸ್ ಹಿರಿಯ ನಾಯಕ ಎಂ ವೀರಪ್ಪ ಮೊಯ್ಲಿ (M Veerappa Moily) ಅವರನ್ನು ಜೀವಮಾನ ಸಾಧನೆ ಪ್ರಶಸ್ತಿಗೆ ನಾಮನಿರ್ದೇಶನ ಮಾಡಿದೆ. ನಾಲ್ಕು ಸಂಸದೀಯ ಸ್ಥಾಯಿ ಸಮಿತಿಗಳಾದ ಕೃಷಿ, ಹಣಕಾಸು, ಶಿಕ್ಷಣ ಮತ್ತು ಕಾರ್ಮಿಕ ಸಮಿತಿಗಳಿಗೆ ಅದರ ಕೊಡುಗೆಗಳಿಗಾಗಿ ಪ್ರಶಸ್ತಿ ನೀಡಲಾಗುವುದು.  11 ಸಂಸದರಲ್ಲಿ ಎಂಟು ಮಂದಿ ಲೋಕಸಭೆಯಿಂದ ಮತ್ತು ಮೂವರು ರಾಜ್ಯಸಭೆಯಿಂದ ಸೇರಿದ್ದಾರೆ ಎಂದು ಫೌಂಡೇಶನ್ ಹೇಳಿಕೆಯಲ್ಲಿ ತಿಳಿಸಿದೆ.  ಸಂಸದ್ ರತ್ನ ಪ್ರಶಸ್ತಿ ಪ್ರದಾನ ಸಮಾರಂಭದ 12 ನೇ ಆವೃತ್ತಿ ಫೆಬ್ರವರಿ 26 ರಂದು ರಾಷ್ಟ್ರ ರಾಜಧಾನಿಯಲ್ಲಿ ನಡೆಯಲಿದೆ. ಪ್ರತಿಷ್ಠಾನದ ಪ್ರಕಾರ, ನ್ಯಾಶನಲಿಸ್ಟ್ ಕಾಂಗ್ರೆಸ್ ಪಕ್ಷದ (ಎನ್‌ಸಿಪಿ) ಸಂಸದೆ ಸುಲೆ, ರೆವಲ್ಯೂಷನರಿ ಸೋಷಿಯಲಿಸ್ಟ್ ಪಾರ್ಟಿ (ಆರ್‌ಎಸ್‌ಪಿ) ಸಂಸದ ಎನ್‌ಕೆ ಪ್ರೇಮಚಂದ್ರನ್ ಮತ್ತು ಶಿವಸೇನಾ ಸಂಸದ ಶ್ರೀರಂಗ ಅಪ್ಪಾ ಬಾರ್ನೆ ಅವರಿಗೆ ತಮ್ಮ ನಿರಂತರ ಅತ್ಯುತ್ತಮ ಸಾಧನೆಗಾಗಿ ‘ಸಂಸದ್ ವಿಶಿಷ್ಟ ರತ್ನ’ ಪ್ರಶಸ್ತಿಯನ್ನು ನೀಡಲಾಗುತ್ತದೆ. ತೃಣಮೂಲ ಕಾಂಗ್ರೆಸ್ ಸಂಸದ ಸೌಗತ ರಾಯ್ (ಪಶ್ಚಿಮ ಬಂಗಾಳ), ಕಾಂಗ್ರೆಸ್ ಸಂಸದ ಕುಲದೀಪ್ ರೈ ಶರ್ಮಾ (ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು), ಮತ್ತು ಭಾರತೀಯ ಜನತಾ ಪಕ್ಷದ (ಬಿಜೆಪಿ) ಸಂಸದರಾದ ಬಿದ್ಯುತ್ ಬರನ್ ಮಹತೋ (ಜಾರ್ಖಂಡ್), ಹೀನಾ ವಿಜಯಕುಮಾರ್ ಗವಿತ್ (ಮಹಾರಾಷ್ಟ್ರ) ಮತ್ತು ಸುಧೀರ್ ಗುಪ್ತಾ (ಮಧ್ಯಪ್ರದೇಶ) 17ನೇ ಲೋಕಸಭೆಯಲ್ಲಿನ ಸಾಧನೆಗಾಗಿ ಸಂಸದ್ ರತ್ನ ಪ್ರಶಸ್ತಿಯನ್ನು ಪಡೆಯಲಿದ್ದಾರೆ ಎಂದು ಅದು ಹೇಳಿದೆ.

ಮೇಲ್ಮನೆಯಲ್ಲಿ ಬಿಜು ಜನತಾ ದಳ (ಬಿಜೆಡಿ) ಸಂಸದ ಅಮರ್ ಪಟ್ನಾಯಕ್ (ಒಡಿಶಾ) ಮತ್ತು ಎನ್‌ಸಿಪಿ ಸಂಸದ ಫೌಜಿಯಾ ತಹಸೀನ್ ಅಹ್ಮದ್ ಖಾನ್ (ಮಹಾರಾಷ್ಟ್ರ) ಅವರಿಗೆ 2021 ರಲ್ಲಿ ಸಿಟ್ಟಿಂಗ್ ಮೆಂಬರ್ಸ್ ವಿಭಾಗದ ಅಡಿಯಲ್ಲಿ ಅವರ ಕಾರ್ಯಕ್ಷಮತೆಗಾಗಿ ಪ್ರಶಸ್ತಿ ನೀಡಲಾಗುತ್ತದೆ.

ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (ಮಾರ್ಕ್ಸ್‌ವಾದಿ) ಸಂಸದ ಕೆ ಕೆ ರಾಗೇಶ್ (ಕೇರಳ) ಅವರನ್ನು ರಾಜ್ಯಸಭೆಯಲ್ಲಿ ಅವರ ಪೂರ್ಣಾವಧಿಯಲ್ಲಿ ಅತ್ಯುತ್ತಮ ಸಾಧನೆಗಾಗಿ ‘2021 ರಲ್ಲಿ ನಿವೃತ್ತ ಸದಸ್ಯರು’ ವಿಭಾಗದಲ್ಲಿ ಪ್ರಶಸ್ತಿಗೆ ನಾಮನಿರ್ದೇಶನ ಮಾಡಲಾಗಿದೆ ಎಂದು ಅದು ತಿಳಿಸಿದೆ.

ಪಿಆರ್‌ಎಸ್ ಇಂಡಿಯಾ ಒದಗಿಸಿದ ದತ್ತಾಂಶದ ಆಧಾರದ ಮೇಲೆ 17ನೇ ಲೋಕಸಭೆಯ ಆರಂಭದಿಂದ 2021ರ ಚಳಿಗಾಲದ ಅಧಿವೇಶನದ ಅಂತ್ಯದವರೆಗೆ ಅವರ ಸಂಚಿತ ಕಾರ್ಯಕ್ಷಮತೆಯನ್ನು ಆಧರಿಸಿ ಪ್ರಶಸ್ತಿ ಪುರಸ್ಕೃತರನ್ನು ಆಯ್ಕೆ ಮಾಡಲಾಗಿದೆ ಎಂದು ಪ್ರೈಮ್ ಪಾಯಿಂಟ್ ಫೌಂಡೇಶನ್‌ನ ಸಂಸ್ಥಾಪಕ ಅಧ್ಯಕ್ಷ ಕೆ ಶ್ರೀನಿವಾಸನ್ ತಿಳಿಸಿದ್ದಾರೆ.

ಸಂಸದೀಯ ವ್ಯವಹಾರಗಳ ರಾಜ್ಯ ಸಚಿವ ಅರ್ಜುನ್ ರಾಮ್ ಮೇಘವಾಲ್ ಅವರು ಸಂಸದ್ ರತ್ನ ಪ್ರಶಸ್ತಿ ಸಮಿತಿಯ ಅಧ್ಯಕ್ಷರಾಗಿದ್ದರು ಮತ್ತು ಭಾರತದ ಮಾಜಿ ಮುಖ್ಯ ಚುನಾವಣಾ ಆಯುಕ್ತರಾದ ಟಿ ಎಸ್ ಕೃಷ್ಣಮೂರ್ತಿ ಅವರು ಸಹ-ಅಧ್ಯಕ್ಷರಾಗಿದ್ದರು.

ಮಾಜಿ ರಾಷ್ಟ್ರಪತಿ ದಿವಂಗತ ಎಪಿಜೆ ಅಬ್ದುಲ್ ಕಲಾಂ ಅವರ ಸಲಹೆಯ ಮೇರೆಗೆ ಉನ್ನತ ಸಾಧನೆ ಮಾಡಿದ ಸಂಸದರನ್ನು ಗೌರವಿಸಲು ಪ್ರಶಸ್ತಿಗಳನ್ನು ಸ್ಥಾಪಿಸಲಾಗಿದೆ. ಮೊದಲ ಪ್ರಶಸ್ತಿ ಸಮಾರಂಭವು 2010 ರಲ್ಲಿ ಚೆನ್ನೈನಲ್ಲಿ ನಡೆಯಿತು, ಕಲಾಂ ಅವರೇ ಈ ಉಪಕ್ರಮವನ್ನು ಪ್ರಾರಂಭಿಸಿದರು. ಪ್ರತಿಷ್ಠಾನದ ಪ್ರಕಾರ, ಇಲ್ಲಿಯವರೆಗೆ, 75 ಅತ್ಯುತ್ತಮ ಸಂಸದರನ್ನು ಗೌರವಿಸಲಾಗಿದೆ.

ಇದನ್ನೂ ಓದಿ: ಕೇರಳದ ಕಾಸರಗೋಡು ಸರ್ಕಾರಿ ಕಾಲೇಜಿನಲ್ಲಿ ಹಿಜಾಬ್ ಧರಿಸಿದ ವಿದ್ಯಾರ್ಥಿನಿಗೆ ಕಾಲೇಜು ಯೂನಿಯನ್ ಚುನಾವಣೆಯಲ್ಲಿ ಗೆಲುವು