New Labour Codes: ವಾರದ ನಾಲ್ಕು ದಿನ ಕೆಲಸ, ಈ ನಾಲ್ಕು ದಿನ ಕೆಲಸದ ಅವಧಿ ದೀರ್ಘ; ಶೀಘ್ರದಲ್ಲೇ ಬರಲಿದೆ ನೂತನ ಕಾರ್ಮಿಕ ಸಂಹಿತೆ

ನವದೆಹಲಿ: ಕೇಂದ್ರ ಕಾರ್ಮಿಕ ಮತ್ತು ನೌಕರರ ಸಚಿವಾಲಯವು ನೂತನ ಕಾರ್ಮಿಕ ಸಂಹಿತೆ ಹೊರಡಿಸುವ ಸಿದ್ದತೆ ನಡೆಸುತ್ತಿದ್ದು ವಾರದ ನಾಲ್ಕು ದಿನ ಮಾತ್ರ ಕೆಲಸ ಮಾಡುವ ವ್ಯವಸ್ಥೆಯನ್ನು ಜಾರಿ ಮಾಡಲಿದೆ. ಕಂಪನಿಗಳಲ್ಲಿ ನೌಕರರು ವಾರದ ನಾಲ್ಕು ದಿನ ಮಾತ್ರ ಕೆಲಸ ಮಾಡುತ್ತಿದ್ದರೆ ಕೆಲಸದ ಅವಧಿಯೂ ದೀರ್ಘವಾಗಿರುತ್ತದೆ. ವಾರದಲ್ಲಿ 48 ಗಂಟೆಗಳ ಕಾಲ ಕೆಲಸ ಮಾಡಬೇಕು ಎಂಬ ನಿಯಮದಲ್ಲಿ ಯಾವುದೇ ಬದಲಾವಣೆ ಇಲ್ಲ. ಅಷ್ಟೇ ಅಲ್ಲದೆ ರಾಜ್ಯ ವಿಮೆ ಪ್ರಕಾರ ನೌಕರರಿಗೆ ಉಚಿತ ವೈದ್ಯಕೀಯ ತಪಾಸಣೆಯನ್ನು ನೀಡುವ ವ್ಯವಸ್ಥೆಯನ್ನೂ ಸಂಹಿತೆಯಲ್ಲಿ ಸೇರಿಸಲಾಗಿದೆ.

ನೌಕರರ ಅನುಮತಿ ಪಡೆದು ಪ್ರತಿದಿನ 12 ಗಂಟೆಗಳ ಕಾಲ ಕೆಲಸ ಮಾಡಲು ಕಂಪನಿಗಳು ನೌಕರರಿಗೆ ಹೇಳಬಹುದು. ಇದರ ಜತೆಗೆ ನೌಕರರಿಗೆ 3 ದಿನ ಸಂಬಳ ಸಹಿತ ರಜೆ (paid leaves) ಇರುತ್ತದೆ ಎಂದು ಕಾರ್ಮಿಕ ಮತ್ತು ನೌಕರರ ಸಚಿವಾಲಯದ ಕಾರ್ಯದರ್ಶಿ ಅಪೂರ್ವ ಚಂದ್ರ ಹೇಳಿದ್ದಾರೆ.

ನಾವು ಈ ರೀತಿ ಕೆಲಸ ಮಾಡಬೇಕು ಎಂದು ನೌಕರರನ್ನು ಅಥವಾ ಕಂಪನಿಯವರನ್ನು ಒತ್ತಾಯಿಸುವುದಿಲ್ಲ. ಕೆಲವು ಬದಲಾವಣೆಗಳನ್ನು ತರಲು ಪ್ರಯತ್ನಿಸಿದ್ದೇವೆ. ಕಾರ್ಮಿಕರ ಸಂಹಿತೆಯ ಕರಡು ಪ್ರತಿ ಈಗ ಅಂತಿಮ ಘಟ್ಟದಲ್ಲಿದ್ದು ಉತ್ತರ ಪ್ರದೇಶ, ಪಂಜಾಬ್, ಮಧ್ಯಪ್ರದೇಶ ಮೊದಲಾದ ರಾಜ್ಯಗಳು ಈ ವಾರ ಕರಡು ಪ್ರತಿ ಸಿದ್ಧಪಡಿಸಲಿವೆ.

ಕೆಲಸದ ದಿನಗಳು 5 ದಿನಕ್ಕಿಂತ ಕಡಿಮೆ ಇರಬೇಕು. ಕೆಲಸದ ದಿನ ನಾಲ್ಕು ಆಗಿದ್ದರೆ ಕಂಪನಿಯು ನೌಕರರಿಗೆ ಮೂರು ದಿನ ಸಂಬಳ ಸಹಿತ ರಜೆ ನೀಡಬೇಕು. ಉದ್ಯೋಗದ ಸುರಕ್ಷೆ, ಆರೋಗ್ಯ ಮತ್ತು ಕೆಲಸದ ರೀತಿ ಸಂಹಿತೆ 2020 ಕರಡು ಪ್ರಕಾರ ವಾರದಲ್ಲಿನ ಕೆಲಸದ ಅವಧಿ 48 ಗಂಟೆಗಳು ಆಗಿರುತ್ತದೆ. ಕೆಲಸದ ದಿನಗಳ ಬದಲಾವಣೆಗೆ ಕಂಪನಿ ಮತ್ತು ನೌಕರರು ಒಪ್ಪಿರಬೇಕು. ಇದಕ್ಕೆ ಒತ್ತಾಯ ಮಾಡಬಾರದು ಎಂದು ಚಂದ್ರ ಹೇಳಿದ್ದಾರೆ.

ಇದನ್ನೂ ಓದಿ:  ಕಾರ್ಮಿರನ್ನು ವಜಾ ಮಾಡಲು ವಿಚಾರಣೆ ಪ್ರಕ್ರಿಯೆ ಕಡ್ಡಾಯವಲ್ಲ: ಸುಪ್ರೀಂಕೋರ್ಟ್

ಆಹಾರ ವಸ್ತುಗಳನ್ನು ಗ್ರಾಹಕರಿಗೆ ಪೂರೈಸುವ ಸ್ವಿಗಿ, ಜೊಮ್ಯಾಟೊ ಮೊದಲಾದ ಕಂಪನಿಗಳ ನೌಕರರು, ಪ್ಲಾಟ್​ಫಾರಂ ಕಾರ್ಯಕರ್ತರು, ವಲಸೆ ಕಾರ್ಮಿಕರು ಸೇರಿದಂತೆ ಅಸಂಘಟಿತ ವಲಯದ ಕಾರ್ಮಿಕರ ನೋಂದಣಿ ಮತ್ತು ಇತರ ವ್ಯವಸ್ಥೆಗಳನ್ನು ನೀಡುವುದಕ್ಕಾಗಿ ಕಾರ್ಮಿಕರ ಸಚಿವಾಲಯ ಜೂನ್ 2021ರಲ್ಲಿ ವೆಬ್ ಪೋರ್ಟಲ್ ಅನಾವರಣ ಮಾಡಲಿದೆ. ಹೊಸ ನಿಯಮಗಳನ್ನು ರೂಪಿಸುವ ಕೆಲಸ ನಡೆದುಬರುತ್ತಿದ್ದು ಮುಂದಿನ ವಾರ ಅದು ಪೂರ್ಣಗೊಳ್ಳಲಿದೆ. ವೇತನ ಸಂಹಿತೆ, ಕೈಗಾರಿಕಾ ವ್ಯವಹಾರ, ಉದ್ಯೋಗದ ಸುರಕ್ಷತೆ, ಆರೋಗ್ಯ ಮತ್ತು ಕೆಲಸದ ರೀತಿ (OSH) ಮತ್ತು ಸಾಮಾಜಿಕ ಸುರಕ್ಷಾ ಸಂಹಿತೆ ಮೊದಲಾದ ಸಂಹಿತೆಗಳನ್ನು ಸಚಿವಾಲಯ ಶೀಘ್ರದಲ್ಲಿಯೇ ಪ್ರಕಟಿಸಲಿದೆ ಎಂದು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಚಂದ್ರ ಹೇಳಿದ್ದಾರೆ.