ದೆಹಲಿಯಲ್ಲಿ ಶವಾಗಾರವಾಗಿ ನಿರ್ಮಾಣಗೊಂಡ ಸಾರ್ವಜನಿಕ ಉದ್ಯಾನವನ

ದೆಹಲಿ: ಪ್ರತಿನಿತ್ಯ ಕೊವಿಡ್​ ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಿರುವ ಕಾರಣದಿಂದಾಗಿ ಸಾವಿನ ಸಂಖ್ಯೆಯೂ ಕೂಡಾ ಹೆಚ್ಚುತ್ತಿದೆ. ಬೇರೆ ವಿಧಿಯಿಲ್ಲದೇ ಸಾರ್ವಜನಿಕ ಉದ್ಯಾನವನಗಳನ್ನು ಶಾವಾಗಾರವಾಗಿ ನಿರ್ಮಿಸುವ ಪರಿಸ್ಥಿತಿ ಎದುರಾಗಿದೆ. ಕೊವಿಡ್​ ಸೋಂಕಿಗೆ ಬಲಿಯಾದವರ ಅಂತ್ಯಕ್ರಿಯೆಗೆ ಶವಾಗಾರಕ್ಕಾಗಿ ಅಲೆದಾಡುವ ಪರಿಸ್ಥಿತಿ ಎದುರಾಗಿದೆ. ಈ ನಿಟ್ಟಿನಲ್ಲಿ ಆಗ್ನೇಯ ದೆಹಲಿಯಲ್ಲಿ ಸಾರ್ವಜನಿಕ ಉದ್ಯಾನವನವನ್ನು ಶವಾಗಾರವಾಗಿ ಪರಿವರ್ತಿಸಲಾಗಿದೆ.

ಶನಿವಾರ 27 ಕೊವಿಡ್​ ಸೋಂಕಿನಿಂದ ಸಾವಿಗೀಡಾದ ದೇಹಗಳು ಇದ್ದವು. ಭಾನುವಾರ ಸಂಜೆ 5 ಗಂಟೆಯವರೆಗೆ 30ಕ್ಕಿಂತಲೂ ಹೆಚ್ಚು ದೇಹಗಳು ಬಂದಿದ್ದವು. ಕೊವಿಡ್​ ಸಂಬಂಧಿಸಿದ ಸಾವುಗಳು ದಿನೇ ದಿನೇ ಹೆಚ್ಚುತ್ತಿವೆ. ನಾವು ಸ್ಥಳಾವಕಾಶವನ್ನು ಕಡಿಮೆ ಹೊಂದಿದ್ದೇವೆ. 20 ಹೊಸ ಪ್ಲಾಟ್​ಫಾರ್ಮ್​ಗಳೊಂದಿಗೆ ಪರಿಸ್ಥಿತಿಯನ್ನು ಉತ್ತಮವಾಗಿ ನಿರ್ವಹಿಸುವ ಭರವಸೆ ನಮಗಿದೆ. ಪ್ರಸ್ತುತದಲ್ಲಿ ಬೆಳಿಗ್ಗೆ 6ರಿಂದ ಮಧ್ಯರಾತ್ರಿಯವರೆಗೆ ಕಾರ್ಯ ನಿರ್ವಹಿಸುತ್ತಿದ್ದೇವೆ ಎಂದು ಸರಾಯ್​ ಕೇಲ್​ ಖಾನ್​ ಸ್ಮಶಾನದ ಕೆಲಸಗಾರರೊಬ್ಬರು ಹೇಳಿದ್ದಾರೆ.

ಉದ್ಯಾನವನದ ಉಳಿದ ಭಾಗಗಳಲ್ಲಿ ಇನ್ನೂ 50 ಪ್ಲಾಟ್​ಫಾರ್ಮ್​ಗಳು ಬರಬಹುದು ಎಂದು ಫ್ಲಾಟ್​ಫಾರ್ಮ್​ಗಳನ್ನು ನಿರ್ಮಿಸಲು ದಕ್ಷಿಣ ನಾಗರಿಕ ಸಂಸ್ಥೆಯಿಂದ ನಿಯೋಜಿಸಲ್ಪಟ್ಟ ಗುತ್ತಿಗೆದಾರ ಶ್ಯಾಮ್​ ಕುಮಾರ್​ ಹೇಳಿದ್ದಾರೆ. ಶವಸಂಸ್ಕಾರದ ಮೈದಾನದಲ್ಲಿ ಸ್ಥಳಕ್ಕಾಗಿ ಜನರು ಪರದಾಡುತ್ತಿದ್ದಾರೆ. ಅನೇಕರು ಅಂತಿಮ ವಿಧಿವಿಧಾನಗಳನ್ನು ನಿರ್ವಹಿಸಲು ಆರು ಗಂಟೆಗೂ ಹೆಚ್ಚು ಕಾಯಬೇಕಾದ ಸಂದರ್ಭ ಎದುರಾಗಿದೆ ಎಂದು ತಮ್ಮ ಸೋದರ ಮಾವನ ಅಂತ್ಯ ಸಂಸ್ಕಾರಕ್ಕೆ ಬಂದಿದ್ದ ಸುರೇಶ್​ ಭಾರತಿ ಹೇಳಿಕೆ ನೀಡಿದ್ದಾರೆ. ದೆಹಲಿಯ ಆಸ್ಪತ್ರೆಯಿಂದ ಮೂರು ಶವಗಳನ್ನು ಶವಾಗಾರಕ್ಕೆ ತಂದ ಆಂಬ್ಯಲೆನ್ಸ್​ ಚಾಲಕ ಸಮತೋಷ್​ ಕುಮಾರ್​, ದೆಹಲಿಯ ಇತರ ಎಲ್ಲಾ ಶವಾಗಾರಗಳಲ್ಲಿಯೂ ಪರಿಸ್ಥಿತಿ ಹಿಗೆಯೇ ಇದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ದೆಹಲಿಯಲ್ಲಿ ಕೊವಿಡ್ ಪ್ರಕರಣ ಹೆಚ್ಚಳ, ಮೇ 3ರವರೆಗೆ ಲಾಕ್​ಡೌನ್ ವಿಸ್ತರಣೆ: ಅರವಿಂದ್ ಕೇಜ್ರಿವಾಲ್