ಇಂದು ಸಂಜೆ 7ಕ್ಕೆ ವಿದ್ಯಾರ್ಥಿಗಳೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಪರೀಕ್ಷಾ ಪೆ ಚರ್ಚಾ; ನೀವೂ ವೀಕ್ಷಿಸಬಹುದು- ಎಲ್ಲಿ? ಹೇಗೆ? ಇಲ್ಲಿದೆ ಮಾಹಿತಿ

ದೆಹಲಿ: ಪ್ರಧಾನಿ ನರೇಂದ್ರ ಮೋದಿಯವರು ಇಂದು (ಏಪ್ರಿಲ್ 7) ಸಂಜೆ 7ಗಂಟೆಗೆ ವಿದ್ಯಾರ್ಥಿಗಳು, ಅವರ ಪಾಲಕರು ಮತ್ತು ಶಿಕ್ಷಕರೊಂದಿಗೆ ವರ್ಚ್ಯುವಲ್ ಆಗಿ ಪರೀಕ್ಷಾ ಪೆ ಚರ್ಚಾ ಸಂವಾದ ನಡೆಸಲಿದ್ದಾರೆ. ಸಾಮಾನ್ಯವಾಗಿ ಇಷ್ಟು ವರ್ಷ ಪರೀಕ್ಷಾ ಪೆ ಚರ್ಚಾ ಮುಖಾಮುಖಿ ಸಂವಾದ ಇರುತ್ತಿತ್ತು. ಆದರೆ ಈ ಬಾರಿ ಕೊರೊನಾ ಸಾಂಕ್ರಾಮಿಕ ರೋಗದ ಕಾರಣ ವರ್ಚ್ಯುವಲ್ ಆಗಿ ನಡೆಯಲಿದೆ. 14 ಲಕ್ಷಕ್ಕೂ ಅಧಿಕ ವಿದ್ಯಾರ್ಥಿಗಳು, ಶಿಕ್ಷಕರು, ಪಾಲಕರು ಮೋದಿಯವರೊಂದಿಗೆ ಸಂವಾದದಲ್ಲಿ ಪಾಲ್ಗೊಳ್ಳಲಿದ್ದಾರೆ. ಈ ವರ್ಚ್ಯುವಲ್ ಸಂವಾದದಲ್ಲಿ ಯಾರೆಲ್ಲ ಗೆಲ್ಲುತ್ತಾರೋ, ಅವರಿಗೆ ಪ್ರಧಾನಿ ನರೇಂದ್ರ ಮೋದಿಯವರೊಟ್ಟಿಗೆ ಮುಖತಃ ಚರ್ಚೆ ನಡೆಸುವ ಅವಕಾಶ ಇರಲಿದೆ ಎಂದು ಶಿಕ್ಷಣ ಸಚಿವ ರಮೇಶ್​ ಪೋಖ್ರಿಯಾಲ್​ ನಿಶಾಂಕ್ ತಿಳಿಸಿದ್ದಾರೆ.

ಇನ್ನು ನರೇಂದ್ರ ಮೋದಿಯವರು ವಿದ್ಯಾರ್ಥಿಗಳು, ಪಾಲಕರು, ಶಿಕ್ಷಕರೊಂದಿಗೆ ಪರೀಕ್ಷಾ ಪೆ ಚರ್ಚಾ ಸಂವಾದ ನಡೆಸುವುದನ್ನು ಎಲ್ಲರೂ ವೀಕ್ಷಿಸಬಹುದಾಗಿದೆ. ಬರೀ ಸಂವಾದದಲ್ಲಿ ಪಾಲ್ಗೊಳ್ಳುವವರಷ್ಟೇ ಅಲ್ಲ, ಭಾಗವಹಿಸದೆ ಇರುವವರೂ ನೋಡಬಹುದು. ದೂರದರ್ಶನ ಸೇರಿ, ಸ್ವಯಂಪ್ರಭಾ ಗ್ರೂಫ್​ನ 32 ಚಾನೆಲ್​​ಗಳು ಈ ಪರೀಕ್ಷಾ ಪೆ ಚರ್ಚಾ ಕಾರ್ಯಕ್ರಮವನ್ನು ಬಿತ್ತರಿಸಲಿವೆ. ಹಾಗೇ, ಪ್ರಧಾನಿ ನರೇಂದ್ರ ಮೋದಿ, ಶಿಕ್ಷಣ ಸಚಿವ ರಮೇಶ್ ಪೋಖ್ರಿಯಾಲ್​ರ ಸಾಮಾಜಿಕ ಜಾಲತಾಣಗಳಲ್ಲೂ ಪ್ರಸಾರಗೊಳ್ಳಲಿವೆ. ಪ್ರೆಸ್ ಇನ್​ಫಾರ್ಮೇಶನ್​ ಬ್ಯೂರೋ (PIB)ದ ಯೂಟ್ಯೂಬ್​, ಟ್ವಿಟರ್​​ಗಳಲ್ಲಿ ಕೂಡ ಪರೀಕ್ಷಾ ಪೆ ಚರ್ಚಾ ಸಂವಾದದ ಲೈವ್​ ನೋಡಬಹುದು.

ಪರೀಕ್ಷಾ ಪೆ ಚರ್ಚಾಕ್ಕೆ ಆಯ್ಕೆಯಾದ ವಿದ್ಯಾರ್ಥಿಗಳು, ಶಿಕ್ಷಕರು, ಪಾಲಕರು ಮಾತ್ರ ಪ್ರಧಾನಿ ಮೋದಿಯವರಿಗೆ ಪ್ರಶ್ನೆ ಕೇಳಬಹುದಾಗಿದ್ದು, ಉಳಿದವರು ಕಾರ್ಯಕ್ರಮವನ್ನು ವೀಕ್ಷಿಸಬಹುದಷ್ಟೇ. ಈ ಹಂತದಲ್ಲಿ ಗೆದ್ದವರು ವಿಶೇಷವಾಗಿ ವಿನ್ಯಾಸ ಮಾಡಲಾದ ಪ್ರಮಾಣಪತ್ರ, ಪರೀಕ್ಷಾ ಪೆ ಚರ್ಚಾ ಕಿಟ್​ಗಳು ಮತ್ತು ಪ್ರಧಾನಿ ನರೇಂದ್ರ ಮೋದಿಯವರ ಆಟೋಗ್ರಾಫ್ ಇರುವ ಡಿಜಿಟಲ್ ಸ್ಮರಣಾರ್ಥಗಳನ್ನು ಪಡೆಯಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಇನ್ನು ಈ ಹಂತದಲ್ಲಿ ಭಾಗವಹಿಸಿದವರಲ್ಲಿ 1500 ವಿದ್ಯಾರ್ಥಿಗಳನ್ನು, 250 ಶಿಕ್ಷಕರು ಮತ್ತು 250 ಪಾಲಕರನ್ನಷ್ಟೇ ಜಯಶಾಲಿಗಳೆಂದು ಆಯ್ಕೆ ಮಾಡಿ, ಪ್ರಧಾನಿ ಮೋದಿಯವರೊಂದಿಗೆ ಮುಖಾಮುಖಿ ಚರ್ಚೆಗೆ ಅವಕಾಶ ನೀಡಲಾಗುವುದು.

ಪರೀಕ್ಷಾ ಪೆ ಚರ್ಚಾಗೆ ನೋಂದಣಿ ಫೆಬ್ರವರಿ 18ರಿಂದ ಪ್ರಾರಂಭವಾಗಿ, ಮಾರ್ಚ್​ 14ರಂದು ಮುಕ್ತಾಯಗೊಂಡಿದೆ. 14 ಲಕ್ಷ ಜನರು ನೋಂದಣಿ ಮಾಡಿಕೊಂಡಿದ್ದಾರೆ ಎಂದು ಶಿಕ್ಷಣ ಸಚಿವ ರಮೇಶ್ ಪೋಖ್ರಿಯಾಲ್ ಅವರು ಹಿಂದೆಯೇ ತಿಳಿಸಿದ್ದಾರೆ. ಇಂದು 10.5 ಲಕ್ಷ ವಿದ್ಯಾರ್ಥಿಗಳು, 2.6 ಲಕ್ಷ ಶಿಕ್ಷಕರು, 92,00 ಪಾಲಕರು ಭಾಗವಹಿಸಲಿದ್ದಾರೆ. ಈ ಪರೀಕ್ಷಾ ಪೆ ಚರ್ಚಾ ಮೊದಲು ಶುರುವಾಗಿದ್ದು 2018ರಲ್ಲಿ. ಹಾಗೇ ಮೊದಲ ಸಂವಾದ ದೆಹಲಿಯ ಟಾಕಟೋರಾ ಕ್ರೀಡಾಂಗಣದಲ್ಲಿ ನಡೆದಿತ್ತು.

ಇದನ್ನೂ ಓದಿ: ಬಾಂಗ್ಲಾ ಹೋರಾಟದಲ್ಲಿ ನರೇಂದ್ರ ಮೋದಿ ಭಾಗವಹಿಸಿಲ್ಲ; ಬರೀ ಸುಳ್ಳು ಹೇಳಿಕೊಂಡು ಓಡಾಡ್ತಿದ್ದಾರೆ: ಮಲ್ಲಿಕಾರ್ಜುನ ಖರ್ಗೆ

IPL 2021: 100 ದೇಶಗಳ ಡಿಜಿಟಲ್ ಪ್ರಸಾರದ ಹಕ್ಕು ಯುಪ್​ ಟಿವಿ ಪಾಲು! ಭಾರತೀಯರಿಗಿಲ್ಲ ಕಡಿಮೆ ದರದಲ್ಲಿ ಐಪಿಎಲ್ ವೀಕ್ಷಿಸುವ ಭಾಗ್ಯ

(PM Narendra Modi to Interact With Students Today In Pariksha Pe Charcha 2021)