ಪ್ರಿಯಾಂಕಾ ಗಾಂಧಿ ವಾದ್ರಾ-ಜಯಂತ್​ ಚೌಧರಿ ಒಂದೇ ವಿಮಾನದಲ್ಲಿ ದೆಹಲಿಗೆ ಪ್ರಯಾಣ; ರಾಜಕೀಯ ವಲಯದಲ್ಲಿ ಭರ್ಜರಿ ಕುತೂಹಲ

ಲಖನೌ: ಕಾಂಗ್ರೆಸ್​ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಇಂದು ಲಖನೌದ ಏರ್​ಪೋರ್ಟ್​​ನಲ್ಲಿ ಆರ್​ಎಲ್​ಡಿ (ರಾಷ್ಟ್ರೀಯ ಲೋಕ ದಳ) ಮುಖ್ಯಸ್ಥ ಜಯಂತ್​ ಚೌಧರಿ ಅವರನ್ನು ಭೇಟಿಯಾದರು. ಅದಾದ ಬಳಿಕ ಇಬ್ಬರೂ ಛತ್ತೀಸ್​ಗಢ್​ ಸರ್ಕಾರದ ಚಾರ್ಟರ್ಡ್​ ವಿಮಾನದಲ್ಲಿ ದೆಹಲಿಗೆ ತೆರಳಿದರು. ಈ ಹೊಸ ಬೆಳವಣಿಗೆ ಈಗಾಗಲೇ ರಾಜಕೀಯ ವಲಯದಲ್ಲಿ ಕುತೂಹಲ ಸೃಷ್ಟಿಸಿದೆ.  

ಭಾನುವಾರ ಗೋರಖ್​ಪುರದಲ್ಲಿ ನಡೆದಿದ್ದ ಪ್ರತಿಜ್ಞಾ ರ್ಯಾಲಿಯಲ್ಲಿ ಮಾತನಾಡಿದ್ದ ಪ್ರಿಯಾಂಕಾ ಗಾಂಧಿ ವಾದ್ರಾ ದೆಹಲಿಗೆ ಹೋಗಲೆಂದು ಲಖನೌ ಏರ್​ಪೋರ್ಟ್​ಗೆ ಹೋಗಿದ್ದರು. ಅದೇ ಹೊತ್ತಿಗೆ ಜಯಂತ್​ ಚೌಧರಿ ಕೂಡ ಅಲ್ಲಿಗೆ ಆಗಮಿಸಿದ್ದಾರೆ.  ರಾಷ್ಟ್ರೀಯ ಲೋಕ ದಳ (ಆರ್​ಎಲ್​ಡಿ) ಉತ್ತರ ಪ್ರದೇಶದ ಮಾಜಿ ಸಿಎಂ ಅಖಿಲೇಶ್​ ಯಾದವ್​ ಅವರ ಸಮಾಜವಾದಿ ಪಕ್ಷ (SP)ದ ಮೈತ್ರಿ ಪಕ್ಷ. ಇದೀಗ ಆರ್​ಎಲ್​ಡಿ ಮತ್ತು ಕಾಂಗ್ರೆಸ್​ ಭೇಟಿ ಕುತೂಹಲ ಮೂಡಿಸಿದೆ.  ಮುಂದಿನ ಚುನಾವಣೆಯಲ್ಲಿ ಸೀಟು ಹಂಚಿಕೆ ಸಂಬಂಧ ಎಸ್​ಪಿ ಪಕ್ಷವನ್ನು ಹೆದರಿಸುವ ತಂತ್ರಗಾರಿಕೆಯಾ ಎಂಬಂಥ ಪ್ರಶ್ನೆಗಳೂ ಎದ್ದಿವೆ. ಈ ಬೆನ್ನಲ್ಲೇ ಪ್ರಿಯಾಂಕಾ ಗಾಂಧಿ ಮತ್ತು ಜಯಂತ್​ ಚೌಧರಿ ಭೇಟಿ ಬಗ್ಗೆ ಪ್ರತಿಕ್ರಿಯೆ ನೀಡಿದ ಆರ್​ಎಲ್​ಡಿ ಹಿರಿಯ ನಾಯಕರೊಬ್ಬರು, ಇವರಿಬ್ಬರದ್ದೂ ಶಿಷ್ಟಾಚಾರದ ಭೇಟಿಯಷ್ಟೇ. ಮೊದಲೆಲ್ಲ ಹೀಗೆ ಪ್ರತಿಪಕ್ಷಗಳ ನಾಯಕರು ಭೇಟಿಯಾಗುವುದು, ಒಟ್ಟಿಗೆ ಪ್ರಯಾಣ ಮಾಡುವುದು ಸಾಮಾನ್ಯವಾಗಿತ್ತು. ಆದರೆ ಬಿಜೆಪಿ ಅಧಿಕಾರಕ್ಕೆ ಬಂದ ಮೇಲೆ ಆ ಸಂಸ್ಕೃತಿ ಮಾಯವಾಗಿದೆ. ಪ್ರತಿಪಕ್ಷಗಳ ನಾಯಕರು ಪರಸ್ಪರ ಶತ್ರುಗಳಂತೆ ವರ್ತಿಸುವಂತಾಗಿದೆ ಎಂದು ಹೇಳಿದ್ದಾರೆ.

ಜಯಂತ್​ ಚೌಧರಿ ಅವರ ವಿಮಾನ 5.30ರ ಹೊತ್ತಿಗೆ ಅಲ್ಲಿಂದ ಹೋಗುವುದಿತ್ತು. ಅವರು 4ಗಂಟೆಗೇ ಅಲ್ಲಿದ್ದರು. 5ಗಂಟೆ ಹೊತ್ತಿಗೆ ಪ್ರಿಯಾಂಕಾ ಗಾಂಧಿ ಏರ್​ಪೋರ್ಟ್​ಗೆ ಹೋದರು. ತಾವು ಹೋಗಲಿರುವ ಫ್ಲೈಟ್​ನಲ್ಲೇ ಬರುವಂತೆ ಜಯಂತ್​ ಚೌಧರಿಗೆ ಅವರು ಆಹ್ವಾನ ನೀಡಿದರು. ಆದರೆ ಮೊದಲು ಜಯಂತ್​ ಚೌಧರಿ ಒಪ್ಪಲಿಲ್ಲ. ಆದರೆ ಬಳಿಕ ಅವರ ವಿಮಾನ ವಿಳಂಬವಾಯಿತು. ಹೀಗಾಗಿ ಪ್ರಿಯಾಂಗಾ ಗಾಂಧಿಯವರು ದೆಹಲಿಗೆ ಹೋಗಲಿದ್ದ ವಿಮಾನಕ್ಕೆ ಹೋಗಿದ್ದಾರೆ. ಜಯಂತ್​ ಚೌಧರಿ ಜತೆ ಇನ್ನಿಬ್ಬರು ಆರ್​ಎಲ್​ಡಿ ನಾಯಕರೂ ಇದ್ದರು ಎಂದೂ ತಿಳಿಸಿದ್ದಾರೆ.

ಮೈತ್ರಿ ಬದಲಾಗಲಿದೆಯಾ? ಇದಿಷ್ಟು ಆಗಿದ್ದೇ ತಡ ಈಗ ಆರ್​ಎಲ್​ಡಿ ಮೈತ್ರಿ ಬದಲಾಗಲಿದೆಯಾ ಎಂಬ ಪ್ರಶ್ನೆ ಎದ್ದಿದೆ. ರಾಜಕೀಯವಲಯದಲ್ಲಿ ಇದೇ ಗುಸುಗುಸು ಪ್ರಾರಂಭವಾಗಿದೆ. 2017ರ ಚುನಾವಣೆಯಲ್ಲಿ ಎಸ್​ಪಿ ಮೈತ್ರಿಯೊಂದಿಗೆ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದ ಕಾಂಗ್ರೆಸ್​ ಈ ಬಾರಿ ಆರ್​ಎಲ್​ಡಿ ಸೆಳೆಯುವ ತಂತ್ರ ನಡೆಸುತ್ತಿದೆಯಾ ಎಂಬ ಪ್ರಶ್ನೆಯೂ ಎದ್ದಿದೆ. ಈ ಬಗ್ಗೆ ಆರ್​ಎಲ್​ಡಿಯ ಉತ್ತರ ಪ್ರದೇಶ ಅಧ್ಯಕ್ಷ ಮಸೂದ್​ ಅಹ್ಮದ್​ರನ್ನು ಪಿಟಿಐ ಸುದ್ದಿಸಂಸ್ಥೆ ಸಂಪರ್ಕಿಸಿದಾಗ, ಆರ್​ಎಲ್​ಡಿಯ ಚುನಾವಣಾ ಮೈತ್ರಿ ಎಂದಿಗೂ ಎಸ್​ಪಿ ಪಕ್ಷದೊಟ್ಟಿಗೆ. ಈ ಬಗ್ಗೆ ನಿರ್ಣಯವೂ ಆಗಿದೆ. ಸೀಟು ಹಂಚಿಕೆ ಕಾರ್ಯ ಶೀಘ್ರದಲ್ಲೇ ನಡೆಯಲಿದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ಅಳು ಮತ್ತು ನಗು ಎರಡೂ ಭಾವನೆಗಳೇ, ಅಳುವುದು ತಪ್ಪಲ್ಲ ಮತ್ತು ಬಲಹೀನತೆಯೂ ಅಲ್ಲ: ಡಾ ಸೌಜನ್ಯ ವಶಿಷ್ಠ