ಒಮಿಕ್ರಾನ್​ ಹೈರಿಸ್ಕ್​ ದೇಶಗಳಿಂದ ಬಂದ 6 ಮಂದಿಯಲ್ಲಿ ಕೊವಿಡ್​ 19 ದೃಢ; ಎಲ್ಲರ ಮಾದರಿಗಳೂ ಲ್ಯಾಬ್​​ಗೆ ರವಾನೆ

ಒಮಿಕ್ರಾನ್​ ಸೋಂಕು ಹೆಚ್ಚಾದ ಬೆನ್ನಲ್ಲೇ ಭಾರತ ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ಹೊಸ ಮಾರ್ಗಸೂಚಿ ಬಿಡುಗಡೆ ಮಾಡಿದೆ. ಅದರಲ್ಲೂ ಒಮಿಕ್ರಾನ್​ ಹೈ ರಿಸ್ಕ್​ ದೇಶಗಳು ಎಂದು ವಿಂಗಡಿಸಿಕೊಂಡು, ಅಂಥ ದೇಶಗಳಿಂದ ಭಾರತಕ್ಕೆ ಬರುವವರು ಕಡ್ಡಾಯವಾಗಿ ಕೆಲವು ನಿಯಮಗಳ ಪಾಲನೆ ಮಾಡಬೇಕಿದೆ. ಆದರೆ ಈಗೊಂದು ಆತಂಕ ಎದುರಾಗಿದೆ.  ಒಮಿಕ್ರಾನ್​ ಹೈರಿಸ್ಕ್​ ಇರುವ ದೇಶಗಳಿಂದ ಬುಧವಾರ ಒಟ್ಟಾರೆ 3 ಸಾವಿರಕ್ಕೂ ಹೆಚ್ಚು ಪ್ರಯಾಣಿಕರು ಭಾರತಕ್ಕೆ ಬಂದಿದ್ದು, ಅವರಲ್ಲಿ ಆರು ಮಂದಿಯಲ್ಲಿ ಬುಧವಾರ ಕೊವಿಡ್​ 19 ವೈರಸ್ ದೃಢಪಟ್ಟಿದೆ. ಇದು ಒಮಿಕ್ರಾನ್​ ಸೋಂಕಿರಬಹುದಾ ಎಂದು ಪತ್ತೆ ಹಚ್ಚಲು ಸೋಂಕಿತರ ಮಾದರಿಯನ್ನು ಜಿನೋಮಿಕ್​ ಸಿಕ್ವೆನ್ಸಿಂಗ್​​ಗೆ ಕಳಿಸಲಾಗಿದೆ. 

ಬುಧವಾರ ಮಧ್ಯಾಹ್ನ 4ಗಂಟೆಯವರೆಗೆ ಒಟ್ಟು 11 ಅಂತಾರಾಷ್ಟ್ರೀಯ ವಿಮಾನಗಳು ಭಾರತದ ವಿವಿಧ ವಿಮಾನ ನಿಲ್ದಾಣಗಳಲ್ಲಿ ಲ್ಯಾಂಡ್​ ಆಗಿವೆ. ಇವುಗಳಿಂದ  3476 ಪ್ರಯಾಣಿಕರು ಆಗಮಿಸಿದ್ದಾರೆ. ಹೀಗೆ ತಲುಪಿದ ಎಲ್ಲ ಪ್ರಯಾಣಿಕರಿಗೂ ನಿಯಮದಂತೆ ಆರ್​ಟಿಪಿಸಿಆರ್​ ಟೆಸ್ಟ್​ ಮಾಡಲಾಗಿದೆ. ಅದರಲ್ಲಿ 6ಮಂದಿಯಲ್ಲಿ ಸೋಂಕು ದೃಢಪಟ್ಟಿದೆ. ನೆದರ್​​ಲ್ಯಾಂಡ್ ಮತ್ತು ಯುಕೆಯಿಂದ ದೆಹಲಿಗೆ ಬಂದ ಒಟ್ಟು ನಾಲ್ವರಲ್ಲಿ ಕೊರೊನಾ ಕಾಣಿಸಿಕೊಂಡಿದೆ. ಇವೆರಡೂ ಕೂಡ ಒಮಿಕ್ರಾನ್​ ಹೈರಿಸ್ಕ್​ ದೇಶಗಳ ಪಟ್ಟಿಗೇ ಸೇರುತ್ತವೆ.  ಹೀಗೆ ಕೊರೊನಾ ದೃಢಪಟ್ಟವರನ್ನು ಸದ್ಯ ಎಲ್​ಎನ್​ಜೆಪಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಹಾಗೇ, ಅಂತಾರಾಷ್ಟ್ರೀಯ ಪ್ರಯಾಣಿಕರ ತಪಾಸಣೆ ವಿಚಾರದಲ್ಲಿ ಗಮನಹರಿಸಲಾಗುತ್ತಿದೆ ಎಂದು ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿದೆ.

ಕೇಂದ್ರ ಸರ್ಕಾರದ ಜತೆಗೆ ಕೆಲವು ರಾಜ್ಯಸರ್ಕಾರಗಳೂ ಕೂಡ ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ಕಟ್ಟುನಿಟ್ಟಿನ ಮಾರ್ಗಸೂಚಿ ಪ್ರಕಟಪಡಿಸಿವೆ. ಈ ಸಾಲಿನಲ್ಲಿ ಮಹಾರಾಷ್ಟ್ರವೂ ಒಂದು. ಮಹಾರಾಷ್ಟ್ರಕ್ಕೆ ಹೈರಿಸ್ಕ್​ ದೇಶಗಳಿಂದ ಬರುವ ಅಂತಾರಾಷ್ಟ್ರೀಯ ಪ್ರಯಾಣಿಕರು ಕಡ್ಡಾಯವಾಗಿ 7 ದಿನಗಳ ಸಾಂಸ್ಥಿಕ ಕ್ವಾರಂಟೈನ್​​ಗೆ ಒಳಗಾಗಬೇಕು. 2, 4 ಮತ್ತು 7ನೇ ದಿನ ಆರ್​ಟಿಪಿಸಿಆರ್​ ಟೆಸ್ಟ್​ ಆಗಬೇಕು. ಈ ಮೂರು ಟೆಸ್ಟ್​​ಗಳಲ್ಲಿ ಒಂದು ಟೆಸ್ಟ್​​ನಲ್ಲಿ ವರದಿ ಪಾಸಿಟಿವ್ ಬಂದರೂ ಅವರನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗುವುದು ಎಂದು ಮಹಾ ಸರ್ಕಾರ ಹೇಳಿದೆ.  ಕರ್ನಟಕ ಕೂಡ ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ನಿಯಮ ಪ್ರಕಟಿಸಿದೆ. ಒಮಿಕ್ರಾನ್​ ಹೈರಿಸ್ಕ್​ ದೇಶಗಳಿಂದ ಬರುವ ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ಆರ್​ಟಿಸಿಪಿಆರ್ ಟೆಸ್ಟ್​ ಮಾಡಲಾಗುವುದು. ಯಾರಲ್ಲೇ ಕೊವಿಡ್ 19 ಕಂಡುಬಂದರೂ ಅವರನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗುವುದು. ಯಾರಲ್ಲಾದರೂ ನೆಗೆಟಿವ್​ ಬಂದರೂ ಕೂಡ ಅವರು ಏಳು ದಿನಗಳ ಕಾಲ ಮನೆಯಲ್ಲೇ ಕ್ವಾರಂಟೈನ್​ ಆಗಬೇಕು. ಕ್ವಾರಂಟೈನ್​ನ 5ನೇ ದಿನಕ್ಕೆ ಒಂದು ಆರ್​ಟಿಪಿಸಿಆರ್​ ತಪಾಸಣೆ ಮಾಡಲಾಗುತ್ತದೆ ಎಂದು ತಿಳಿಸಿದೆ.

ಇದನ್ನೂ ಓದಿ: Karnataka Weather Today: ಇಂದಿನಿಂದ 3 ದಿನ ಕರ್ನಾಟಕದಲ್ಲಿ ವ್ಯಾಪಕ ಮಳೆ; ಆಂಧ್ರ ಪ್ರದೇಶ, ಒಡಿಶಾದಲ್ಲಿ ಚಂಡಮಾರುತದ ಭೀತಿ