ಜಮ್ಮು-ಕಾಶ್ಮೀರದಲ್ಲಿ ಮತ್ತೆ ಇಬ್ಬರು ನಾಗರಿಕರ ಹತ್ಯೆ ಮಾಡಿದ ಉಗ್ರರು; ಮೆಹಬೂಬಾ ಮುಫ್ತಿ ಆಕ್ರೋಶ

ದೆಹಲಿ: ಜಮ್ಮು-ಕಾಶ್ಮೀರ (Jammu-Kashmir)ದಲ್ಲಿ ಇಂದು ಮತ್ತೆ ಇಬ್ಬರು ನಾಗರಿಕರ ಹತ್ಯೆಯಾಗಿದೆ. ಅದರಲ್ಲಿ ಒಬ್ಬ ಬಿಹಾರ ಮೂಲಕ ವ್ಯಾಪಾರಿಯಾಗಿದ್ದಾರೆ ಇನ್ನೊಬ್ಬರು ಉತ್ತರಪ್ರದೇಶದ ಕಾರ್ಮಿಕ. ಮೊದಲ ಘಟನೆ ನಡೆದದ್ದು ಶ್ರೀನಗರದ ಈದಗಡ್​​ ಪ್ರದೇಶದಲ್ಲಿ ಇಂದು ಸಂಜೆ 6.40ರ ಹೊತ್ತಿಗೆ. ಇಲ್ಲಿ ಶಂಕಿತ ಉಗ್ರನೊಬ್ಬ 36ವರ್ಷದ, ಬಿಹಾರ ಮೂಲದ ಅರವಿಂದ್​ ಕುಮಾರ್​ ಎಂಬುವರ ಮೇಲೆ ದಾಳಿ ನಡೆಸಿದ್ದಾನೆ. ಇದೇ ತಿಂಗಳ ಪ್ರಾರಂಭದಲ್ಲಿ ಈ ಪ್ರದೇಶದಲ್ಲಿ ವಿರೇಂದ್ರ ಪಾಸ್ವಾನ್​ ಎಂಬ ಬೀದಿ ವ್ಯಾಪಾರಿಯನ್ನು ಉಗ್ರರು ಕೊಂದಿದ್ದರು.  

ಉಗ್ರನ ದಾಳಿಯಿಂದ ಗಂಭೀರವಾಗಿ ಗಾಯಗೊಂಡಿದ್ದ ಕುಮಾರ್​​ನನ್ನು ಶ್ರೀನಗರದ ಸರ್ಕಾರಿ ವೈದ್ಯಕೀಯ ಕಾಲೇಜಿಗೆ ಸೇರಿಸಲಾಗಿತ್ತು. ಆದರೆ ಕರೆದುಕೊಂಡುಬರುವಷ್ಟರಲ್ಲೇ ಆತ ಮೃತಪಟ್ಟಿದ್ದಾಗಿ ವೈದ್ಯರು ಘೋಷಿಸಿದ್ದಾರೆ. ಈ ಅರವಿಂದ್​ ಕುಮಾರ್ ಮೂಲತಃ ಬಿಹಾರದ ಬಂಕಾದವರಾಗಿದ್ದು, ಶ್ರೀನಗರದಲ್ಲಿ ಬೀದಿಬದಿಯ ವ್ಯಾಪಾರಿಯಾಗಿದ್ದರು.  ಅಂದಹಾಗೆ ಈ ಹಿಂದೆ ಹತ್ಯೆಯಾಗಿದ್ದ ವೀರೇಂದ್ರ ಪಾಸ್ವಾನ್ ಕೂಡ ಬಿಹಾರದವರೇ ಆಗಿದ್ದಾರೆ. ಈಗ ಅರವಿಂದ್​ ಕುಮಾರ್​ ಅವರನ್ನು ಹತ್ಯೆ ಮಾಡುವ ಮೊದಲು ಆ ಉಗ್ರ ಆತನ ಐಡಿ ಕಾರ್ಡ್ ನೋಡಿದ್ದಾನೆ. ನಂತರ ತಲೆಗೆ ಶೂಟ್ ಮಾಡಿದ್ದಾನೆ ಎಂದೂ ಹೇಳಲಾಗಿದೆ.  ಹಾಗೇ ಎರಡನೇ ದಾಳಿಯಾಗಿದ್ದು ಪುಲ್ವಾಮಾದಲ್ಲಿ. ಸಾಗಿರ್​ ಅಹ್ಮದ್​ ಎಂಬುವರ ಮೇಲೆ ಶಂಕಿತ ಉಗ್ರ ದಾಳಿ ಮಾಡಿದ್ದಾನೆ. ಈ ಸಾಗಿರ್​ ಮೂಲತಃ ಉತ್ತರಪ್ರದೇಶದ ಸಹರಾನ್​​ಪುರದವರು. ಪುಲ್ವಾಮಾದಲ್ಲಿ ಕಾರ್ಪೆಂಟರ್​ ಕೆಲಸ ಮಾಡುತ್ತಿದ್ದರು. ಉಗ್ರನ ದಾಳಿಯಿಂದ ಗಂಭೀರವಾಗಿ ಗಾಯಗೊಂಡಿದ್ದ ಅವರನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತಾದರೂ ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದಾರೆ.

ಮೆಹಬೂಬಾ ಮುಫ್ತಿ ಆಕ್ರೋಶ
ಹೀಗೆ ಜಮ್ಮು-ಕಾಶ್ಮೀರದಲ್ಲಿ ಪದೇಪದೆ ನಾಗರಿಕರ ಹತ್ಯೆ ನಡೆಯುತ್ತಿರುವ ಬಗ್ಗೆ ಮೆಹಬೂಬ ಮುಫ್ತಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಟ್ವೀಟ್​ ಮಾಡಿರುವ ಅವರು, ಮುಗ್ಧ ನಾಗರಿಕರು ತಮ್ಮ ಕೆಲಸ ಮುಗಿಸಿ, ಪತ್ನಿ ಮತ್ತು ಮಕ್ಕಳನ್ನು ನೋಡಲು ಮನೆಗೆ ಹೋಗುವ ದಾರಿಯಲ್ಲಿ ಸಾಯುತ್ತಿದ್ದಾರೆ. ಹಾಗೇ, ಈಗ ಪೂಂಚ್​​ನಲ್ಲಿ ಸ್ಥಳೀಯನಲ್ಲದ ಒಬ್ಬ ವ್ಯಾಪಾರಿಯನ್ನು ಹತ್ಯೆ ಮಾಡಲಾಗಿದೆ. ಹೀಗೆ ಸಾಯುತ್ತಿರುವ ಅಮಾಯಕರು ನಿಜಕ್ಕೂ ಈಗಲೇ ಸಾವಿಗೆ ಯೋಗ್ಯರಲ್ಲ ಎಂದು ಹೇಳಿದ್ದಾರೆ. ಹಾಗೇ ಕೇಂದ್ರ ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಜಮ್ಮು-ಕಾಶ್ಮಿರದಲ್ಲಿ ಇದೀಗ ಮುಗ್ಧ ನಾಗರಿಕರನ್ನು ಕೊಲ್ಲುವ ಪ್ರವೃತ್ತಿ ಹೆಚ್ಚುತ್ತಿದೆ. ಇತ್ತೀಚೆಗಷ್ಟೇ ಒಂದು ಶಾಲೆಗೆ ನುಗ್ಗಿ ಇಬ್ಬರು ಸಿಖ್​ ಶಿಕ್ಷಕರನ್ನು ಉಗ್ರರು ಹತ್ಯೆ ಮಾಡಿದ್ದರು. ಹಾಗೇ ಬೀದಿ ಬದಿಯ ವ್ಯಾಪಾರಿಗಳನ್ನೂ ಕಾರಣವಿಲ್ಲದೆ ಕೊಲ್ಲುತ್ತಿದ್ದಾರೆ. ಇಂಥ ಉಗ್ರರ ವಿರುದ್ಧ ಸೇನಾ ಕಾರ್ಯಾಚರಣೆಯೂ ನಡೆಯುತ್ತಿದೆ. ಈ ಎನ್​ಕೌಂಟರ್​​ನಲ್ಲಿ ಭಾರತೀಯ ಸೇನಾ ಯೋಧರೂ ಹುತಾತ್ಮರಾಗಿದ್ದಾರೆ.

ಇದನ್ನೂ ಓದಿ: T20 World Cup 2021: ಧೋನಿ ಎಂಟ್ರಿಯಿಂದ ಥ್ರಿಲ್ ಆಗಿದ್ದೇವೆ: ಆದರೆ ಕೋಚ್ ಯಾರೆಂದು ಗೊತ್ತಿಲ್ಲ ಎಂದ ಕೊಹ್ಲಿ

ಜಪಾನಿನ ಕವಾಸಕಿ 4 ವರ್ಷಗಳ ನಂತರ ಇಲೆಕ್ಟ್ರಿಕ್ ಬೈಕ್ ತಯಾರಿಸಲಿದೆ, ಮಾರಾಟ ಮಾತ್ರ ಕೇವಲ ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ!