ನೀವು ಕುಡಿಯೋ ಹರ್ಬಲ್ ಟೀ ನಿಜಕ್ಕೂ ಚಹಾವೇ?: FSSAI ಕೊಟ್ಟ ಸ್ಪಷ್ಟನೆ ಇಲ್ಲಿದೆ
ನಾವು ಚಹಾ ಎಂದು ಸೇವಿಸುವ ಉತ್ಪನ್ನಗಳ ಪೈಕಿ ನಿಜಕ್ಕೂ ಟೀ ಯಾವುದು ಎಂಬ ಬಗ್ಗೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಸ್ಪಷ್ಟನೆ ನೀಡಿದೆ. ಡಿಸೆಂಬರ್ 24ರಂದು ಈ ಬಗ್ಗೆ ಆದೇಶ ಹೊರಡಿಸಲಾಗಿದ್ದು, ಮಿಸ್ ಬ್ರ್ಯಾಂಡಿಂಗ್ ಮಾಡಿದಲ್ಲಿ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಕಾಯ್ದೆ 2006ರ ಪ್ರಕಾರ ಕ್ರಮ ಕೈಗೊಳ್ಳುವ ಬಗ್ಗೆ FSSAI ಎಚ್ಚರಿಸಿದೆ.
Updated on: Dec 26, 2025 | 1:02 PM
ನವದೆಹಲಿ, ಡಿಸೆಂಬರ್ 26: ಇಂದು ಮಾರುಕಟ್ಟೆಯಲ್ಲಿ ಬಗೆ ಬಗೆಯ ಟೀಗಳು ಲಭ್ಯವಿವೆ. ಫ್ಲೇವರ್ಡ್ ಚಹಾಗಳ ಚೊತೆಗೆ ಹರ್ಬಲ್ ಟೀಗಳಿಗೆ ಜನ ಮಾರು ಹೋಗುತ್ತಿದ್ದಾರೆ. ಆದರೆ ಇವೆಲ್ಲವನ್ನೂ ನಿಜಕ್ಕೂ ಟೀ ಎಂದು ಕರೆಯಬಹುದಾ? ಈ ಪ್ರಶ್ನೆಗೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಉತ್ತರಿಸಿದ್ದು, ಇವೆಲ್ಲವನ್ನು ಚಹಾ ಎನ್ನಲು ಆಗಲ್ಲ ಎಂದು ಸ್ಪಷ್ಟವಾಗಿ ಹೇಳಿದೆ.
FSSAI ಪ್ರಕಾರ, ಚಹಾ ಗಿಡದಿಂದ ಪಡೆಯಲಾಗುವ ಉತ್ಪನ್ನಗಳಿಂದ ತಯಾರಿಸಲ್ಪಟ್ಟವು ಮಾತ್ರ ಈ ವ್ಯಾಪ್ತಿಗೆ ಬರುತ್ತವೆ. ಕಾಂಗ್ರಾ ಚಹಾ ಮತ್ತು ಹಸಿರು ಚಹಾ ಸೇರಿದಂತೆ ಮುಂತಾದವುಗಳನ್ನು ಟೀ ಹೆಸರಲ್ಲಿ ಮಾರಾಟ ಮಾಡಬಹುದು. ಅದನ್ನು ಹೊರತುಪಡಿಸಿ ಇತರ ಯಾವುದೇ ಕಷಾಯಗಳು ಅಥವಾ ಪಾನೀಯಗಳು ಈ ಹೆಸರನ್ನು ಬಳಸುವಂತಿಲ್ಲ. ಡಿಸೆಂಬರ್ 24ರಂದು ಈ ಬಗ್ಗೆ ಆದೇಶ ಹೊರಡಿಸಲಾಗಿದ್ದು, ನಿಯಮ ಉಲ್ಲಂಘನೆ ಮಾಡಿದಲ್ಲಿ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಕಾಯ್ದೆ 2006 ಹಾಗೂ ಅದರ ನಿಯಮಾವಳಿಗಳ ಪ್ರಕಾರ ಕ್ರಮ ಕೈಗೊಳ್ಳುವ ಬಗ್ಗೆ FSSAI ಎಚ್ಚರಿಸಿದೆ.
ಇದನ್ನೂ ಓದಿ: ಈ 7 ಆರೋಗ್ಯ ಸಮಸ್ಯೆ ಇರುವವರು ತಪ್ಪಿಯೂ ಖಾಲಿ ಹೊಟ್ಟೆಯಲ್ಲಿ ಟೀ ಕುಡಿಯಬಾರದು ಎಚ್ಚರ!
ಅಂಗಡಿಗಳು ಮತ್ತು ಆನ್ಲೈನ್ ವೇದಿಕೆಗಳಲ್ಲಿ ಹರ್ಬಲ್ ಟೀ, ಜಾಸ್ಮಿನ್ ಟೀ, ರೂಯಿಬೋಸ್ ಟೀ ಹಾಗೂ ಹೂವಿನ ಚಹಾಗಳ ಹೆಸರಿನಲ್ಲಿ ಟೀ ಪುಡಿ/ಸ್ಯಾಚೆಟ್ ಮಾರಾಟವಾಗುತ್ತಿವೆ. ಆದರೆ Camellia sinensisನಿಂದ ಉತ್ಪತ್ತಿಯಾಗದ ಹರ್ಬಲ್ ಇನ್ಫ್ಯೂಷನ್ಗಳು ಅಥವಾ ಮಿಶ್ರಣಗಳನ್ನು ‘ಚಹಾ’ ಎಂದು ಕರೆಯಲು ಆಗಲ್ಲ ಎಂದು FSSAI ತಿಳಿಸಿದ್ದು, ಇವುಗಳನ್ನು ಟೀ ಹೆಸರಲ್ಲಿ ಮಾರಾಟ ಮಾಡುವುದು ಮಿಸ್ ಬ್ರ್ಯಾಂಡಿಂಗ್ ಎಂದು ಹೇಳಿದೆ. ಈ ಆದೇಶವು ತಯಾರಿಕೆ, ಪ್ಯಾಕಿಂಗ್, ಆಮದು ಅಥವಾ ಮಾರಾಟದಲ್ಲಿ ತೊಡಗಿರುವ ಆಹಾರ ಉದ್ಯಮಿಗಳು ಹಾಗೂ ಇ-ಕಾಮರ್ಸ್ ವೇದಿಕೆಗಳಿಗೆ ಅನ್ವಯವಾಗಲಿದೆ. ಎಲ್ಲಾ ರಾಜ್ಯಗಳ ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಆಹಾರ ಸುರಕ್ಷತಾ ಆಯುಕ್ತರು ಹಾಗೂ FSSAIಯ ಪ್ರಾದೇಶಿಕ ನಿರ್ದೇಶಕರು ಈ ನಿಯಮಗಳ ಪಾಲನೆ ಜೊತೆಗೆ ಮೇಲ್ವಿಚಾರಣೆ ಮಾಡುವಂತೆಯೂ ಸೂಚಿಸಲಾಗಿದೆ.
ಆಹಾರ ವಸ್ತುಗಳ ತಪ್ಪು ಬ್ರ್ಯಾಂಡಿಂಗ್ ಬಗ್ಗೆ ಇತ್ತೀಚೆಗೆ FSSAI ನೀಡಿರುವ ಎರಡನೇ ಎಚ್ಚರಿಕೆ ಇದಾಗಿದೆ. ಹಣ್ಣು ಆಧಾರಿತ, ಕಾರ್ಬೊನೇಟ್ ರಹಿತ ಅಥವಾ ರೆಡಿ-ಟು-ಡ್ರಿಂಕ್ ಪಾನೀಯಗಳಂತಹ ಆಹಾರ ಉತ್ಪನ್ನಗಳನ್ನು ‘ORS’ ಹೆಸರಲ್ಲಿ ಮಾರಾಟ ಮಾಡುವಂತಿಲ್ಲ ಎಂದು ಅಕ್ಟೋಬರ್ನಲ್ಲಿ ಆದೇಶಿಸಲಾಗಿತ್ತು. ಇವುಗಳ ಮಾರಾಟಕ್ಕೆ ಕಡಿವಾಣ ಹಾಕಲು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಆಹಾರ ಆಯುಕ್ತರಿಗೆ ನಿಯಂತ್ರಕ ಪ್ರಾಧಿಕಾರ ಪತ್ರ ಬರೆದಿತ್ತು.
ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ.
