ಇಂದೋರ್‌ನ ಡೆಲಿ ಕಾಲೇಜಿಗೂ ಸಿಂಧಿಯಾ ಮನೆತನಕ್ಕೂ ಏನು ಸಂಬಂಧ?; ದಿಗ್ವಿಜಯ್ ಸಿಂಗ್ ಹೇಳಿಕೆ ಬಳಿಕ ಶುರುವಾಯ್ತು ಹೊಸ ಚರ್ಚೆ

ಇಂದೋರ್, ಅಕ್ಟೋಬರ್ 26: ಇಂದೋರ್‌ನ ಪ್ರತಿಷ್ಠಿತ ಡೆಲಿ ಕಾಲೇಜ್ ಆವರಣದಲ್ಲಿ ಆರ್‌ಎಸ್‌ಎಸ್ ಕಾರ್ಯಕ್ರಮವೊಂದನ್ನು ಆಯೋಜಿಸಿದ್ದಕ್ಕೆ ಕಾಂಗ್ರೆಸ್ ಹಿರಿಯ ನಾಯಕ ಹಾಗೂ ಮಧ್ಯಪ್ರದೇಶದ ಮಾಜಿ ಮುಖ್ಯಮಂತ್ರಿ ದಿಗ್ವಿಜಯ್ ಸಿಂಗ್ ಆಕ್ಷೇಪ ವ್ಯಕ್ತಪಡಿಸಿದ್ದರು. ಇದಾದ ಬಳಿಕ, ಸಿಂಧಿಯಾ ರಾಜಮನೆತನ ಮತ್ತು ಈ ಸಂಸ್ಥೆಯ ಇತಿಹಾಸದ ಕುರಿತು ಭಾರಿ ರಾಜಕೀಯ ಚರ್ಚೆ ಶುರುವಾಗಿದೆ. ಆರ್‌ಎಸ್‌ಎಸ್ ಮೇಲೆ ಪ್ರೀತಿಯಿದ್ದರೆ ಈ ಕಾರ್ಯಕ್ರಮವನ್ನು ಡೆಲಿ ಕಾಲೇಜಿನ ಬದಲಾಗಿ ಗ್ವಾಲಿಯರ್‌ನಲ್ಲಿರುವ ‘ಸಿಂಧಿಯಾ ಸ್ಕೂಲ್’ನಲ್ಲಿ ಆಯೋಜಿಸಬಹುದಿತ್ತು ಎಂದು ದಿಗ್ವಿಜಯ್ ಸಿಂಗ್ ವ್ಯಂಗ್ಯವಾಡಿದ್ದರು. ಇದಕ್ಕೆ ತಿರುಗೇಟು ನೀಡಿದ್ದ ಕೇಂದ್ರ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ, “ಡೆಲಿ ಕಾಲೇಜು ಕೂಡ ಸಿಂಧಿಯಾ ಕುಟುಂಬ ಸ್ಥಾಪಿಸಿದ ಸಂಸ್ಥೆಯಾಗಿದೆ. ದಿಗ್ವಿಜಯ್ ಸಿಂಗ್ ಅವರಿಗೆ ಆಗಾಗ ಕೆಲವು ವಿಷಯಗಳು ಮರೆಯುತ್ತವೆ, ಅವರಿಗೆ ನೆನಪಿಸುವುದು ನನ್ನ ಕೆಲಸ” ಎಂದಿದ್ದರು. ಇದಕ್ಕೆ ಪ್ರತಿಯಾಗಿ ದಿಗ್ವಿಜಯ್ ಸಿಂಗ್, ಸಿಂಧಿಯಾ ಕುಟುಂಬವು ಕೇವಲ ದಾನಿ ಮನೆತನವಾಗಿತ್ತೇ ಹೊರತು ಅವರೊಬ್ಬರೇ ಕಾಲೇಜಿನ ಸಂಸ್ಥಾಪಕರಲ್ಲ ಎಂದು ವಾದಿಸಿದ್ದಾರೆ.

ಈ ರಾಜಕೀಯ ಆರೋಪ-ಪ್ರತ್ಯಾರೋಪಗಳ ಬೆನ್ನಲ್ಲೇ, ಡೆಲಿ ಕಾಲೇಜಿನ ಮೂಲ ಇತಿಹಾಸ ಹಾಗೂ ಸಂಸ್ಥೆಯ ನಿರ್ಮಾಣದಲ್ಲಿ ಸಿಂಧಿಯಾ ಕುಟುಂಬದ ಪಾತ್ರವೇನು ಎಂಬ ಕುರಿತು ಐತಿಹಾಸಿಕ ಮಾಹಿತಿಗಳು ಬಹಿರಂಗಗೊಂಡಿವೆ. 1870ರ ಸುಮಾರಿನಲ್ಲಿ ಮಧ್ಯ ಭಾರತದ ಬ್ರಿಟಿಷ್ ಏಜೆಂಟ್ ಆಗಿದ್ದ ಸರ್ ಹೆನ್ರಿ ಡೆಲಿ ಮತ್ತು ಗ್ವಾಲಿಯರ್‌ನ ಮಹಾರಾಜ ಜಯಾಜಿರಾವ್ ಸಿಂಧಿಯಾ ಅವರ ನಡುವೆ ನಡೆದ ಐತಿಹಾಸಿಕ ಸಮಾಲೋಚನೆಯಲ್ಲಿ ಈ ಕಾಲೇಜಿನ ಪರಿಕಲ್ಪನೆ ಹುಟ್ಟಿಕೊಂಡಿತು. ಆರಂಭದಲ್ಲಿ ‘ರೆಸಿಡೆನ್ಸಿ ಸ್ಕೂಲ್’ ಆಗಿ ಆರಂಭವಾದ ಈ ಸಂಸ್ಥೆ, ನಂತರ ರಾಜಕುಮಾರರ ಶಿಕ್ಷಣಕ್ಕಾಗಿ ‘ಇಂದೋರ್ ರೆಸಿಡೆನ್ಸಿ ರಾಜ್‌ಕುಮಾರ್ ಕಾಲೇಜ್’ ಎಂದು ಹೆಸರಾಯಿತು. ಸರ್ ಹೆನ್ರಿ ಡೆಲಿ ಅವರ ಹೆಸರನ್ನೇ ಈ ಕಾಲೇಜಿಗೆ ಇಡಲಾಯಿತು.

ಇದನ್ನೂ ಓದಿ: 300 ವರ್ಷದ ಹಿಂದಿನ ಪಾರಂಪರಿಕ ಉತ್ಸವದಲ್ಲಿ ಪಾಲ್ಗೊಂಡ ಕೇಂದ್ರ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ

118 ಎಕರೆ ವಿಸ್ತೀರ್ಣದ ಈ ಕಾಲೇಜು ಆವರಣದ ನಿರ್ಮಾಣ ಕಾರ್ಯವು 1906ರಲ್ಲಿ ಆರಂಭಗೊಂಡು, 1916ರಲ್ಲಿ ಅಧಿಕೃತವಾಗಿ ಉದ್ಘಾಟನೆಗೊಂಡಿತು. 1906ರ ‘ಸಿವಿಲ್ ಇಂಜಿನಿಯರಿಂಗ್ ರಿಪೋರ್ಟ್ ಆಫ್ ಬಿಲ್ಡಿಂಗ್’ ದಾಖಲೆಗಳ ಪ್ರಕಾರ, ಕಾಲೇಜು ಕಟ್ಟಡದ ನಿರ್ಮಾಣಕ್ಕಾಗಿ ಗ್ವಾಲಿಯರ್‌ನ ಸಿಂಧಿಯಾ ರಾಜಮನೆತನವು ಅತ್ಯಧಿಕ ಅಂದರೆ 5 ಲಕ್ಷ ರೂ. ಕೊಡುಗೆ ನೀಡಿತ್ತು. ಇಂದೋರ್‌ನ ಹೋಳ್ಕರ್ ಮನೆತನ 2 ಲಕ್ಷ ರೂ. ಹಾಗೂ ರೇವಾ ರಾಜಮನೆತನ 1.5 ಲಕ್ಷ ರೂ. ನೆರವು ನೀಡಿದ್ದವು. ಇತರ ರಾಜಮನೆತನಗಳನ್ನೂ ಈ ಯೋಜನೆಗೆ ಜೊತೆಗೂಡಿಸುವಲ್ಲಿ ಸಿಂಧಿಯಾ ಕುಟುಂಬ ಪ್ರಮುಖ ಪಾತ್ರ ವಹಿಸಿತ್ತು.

ಇದನ್ನೂ ಓದಿ: ದಶಕಗಳ ಸಂಪರ್ಕದ ಕನಸು ಸಾಕಾರ: ಅಸ್ಸಾಂ ರೈಲ್ವೆಗೆ ಪೂರ್ಣ ವಿದ್ಯುತ್ ಸ್ಪರ್ಶ, ಜ್ಯೋತಿರಾದಿತ್ಯ ಸಿಂಧಿಯಾ ಮೆಚ್ಚುಗೆ 

ಮಹಾರಾಜ ಮಾಧವ್ ರಾವ್ ಸಿಂಧಿಯಾ ಅವರ ಕೊಡುಗೆಯೇನು?:

ಗ್ವಾಲಿಯರ್‌ನ ಮಹಾರಾಜ ಶ್ರೀಮಂತ್ ಮಾಧವ್ ರಾವ್ ಸಿಂಧಿಯಾ ಅವರು ಕಾಲೇಜಿನ ಪ್ರಮುಖ ಪೋಷಕರು ಹಾಗೂ ಮಾರ್ಗದರ್ಶಕರಾಗಿದ್ದರು. ಈ ಕಾಲೇಜು ಆವರಣದಲ್ಲಿರುವ ‘ಗ್ವಾಲಿಯರ್ ಹೌಸ್’ ಮತ್ತು ‘ಸಿಂಧಿಯಾ ಪೆವಿಲಿಯನ್’ ರಚನೆಗಳು ಹಾಗೂ ಸಭಾಂಗಣದಲ್ಲಿರುವ ಮಹಾರಾಜ ಸಿಂಧಿಯಾ ಅವರ ತೈಲಚಿತ್ರವು ಈ ಸಂಸ್ಥೆಯೊಂದಿಗೆ ಆ ಕುಟುಂಬ ಹೊಂದಿದ್ದ ನಿಕಟ ಐತಿಹಾಸಿಕ ಸಂಬಂಧವನ್ನು ಸಾರುತ್ತವೆ.

ಆದ್ದರಿಂದ ಐತಿಹಾಸಿಕ ದಾಖಲೆಗಳ ಪ್ರಕಾರ, ಡೆಲಿ ಕಾಲೇಜು ಬ್ರಿಟಿಷ್ ಅಧಿಕಾರಿ ಸರ್ ಹೆನ್ರಿ ಡೆಲಿ ಅವರ ಹೆಸರಿನಲ್ಲಿ ನಿರ್ಮಾಣವಾದರೂ, ಅದರ ಪರಿಕಲ್ಪನೆ, ಮೂಲ ನಿಧಿ ಸಂಗ್ರಹಣೆ ಹಾಗೂ 118 ಎಕರೆಯ ಬೃಹತ್ ಆವರಣ ನಿರ್ಮಾಣದಲ್ಲಿ ಗ್ವಾಲಿಯರ್‌ನ ಸಿಂಧಿಯಾ ರಾಜಮನೆತನದ ಪಾತ್ರ ಅತ್ಯಂತ ನಿರ್ಣಾಯಕವಾಗಿತ್ತು ಎಂಬುದು ಸ್ಪಷ್ಟವಾಗುತ್ತದೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ