ಬರೋಬ್ಬರಿ 50 ಟಿ20 ಪಂದ್ಯಗಳಲ್ಲಿ ಗೆಲುವು; ಧೋನಿ- ಕೊಹ್ಲಿಯನ್ನು ಮೀರಿಸಿದ ಹರ್ಮನ್‌ಪ್ರೀತ್ ಕೌರ್
IND vs AUS: ಹರ್ಮನ್ ನಾಯಕತ್ವದಲ್ಲಿ ಭಾರತ 50 ಟಿ20 ಪಂದ್ಯಗಳನ್ನು ಗೆದ್ದಿದೆ. ಎಂಎಸ್ ಧೋನಿ ನಾಯಕತ್ವದಲ್ಲಿ ಭಾರತ 41 ಟಿ20 ಪಂದ್ಯಗಳನ್ನು ಮತ್ತು ರೋಹಿತ್ ಶರ್ಮಾ ಅವರ ನಾಯಕತ್ವದಲ್ಲಿ 39 ಪಂದ್ಯಗಳನ್ನು ಗೆದ್ದಿದೆ.
ಡಾ. ಡಿವೈ ಪಾಟಿಲ್ ಸ್ಪೋರ್ಟ್ಸ್ ಅಕಾಡೆಮಿಯಲ್ಲಿ ನಡೆದ ಭಾರತ ಹಾಗೂ ಆಸ್ಟ್ರೇಲಿಯಾ ಮಹಿಳಾ ತಂಡಗಳ ನಡುವಣ ಎರಡನೇ ಟಿ20 ಪಂದ್ಯದಲ್ಲಿ ಸೂಪರ್ ಓವರ್ನಲ್ಲಿ ಬೊಂಬಾಟ್ ಬ್ಯಾಟಿಂಗ್ ಪ್ರದರ್ಶಿಸಿದ ಭಾರತ ಐದು ಪಂದ್ಯಗಳ ಟಿ20 ಸರಣಿಯಲ್ಲಿ 1-1 ಅಂತರದಲ್ಲಿ ಸರಣಿಯನ್ನು ಸಮಬಲಗೊಳಿಸಿದೆ.
ಇದರೊಂದಿಗೆ, ಭಾರತವು ಆಸ್ಟ್ರೇಲಿಯಾದ ಅಜೇಯ ಪ್ರಯಾಣದಲ್ಲಿ ಬ್ರೇಕ್ ಹಾಕಿದೆ. ಆಸ್ಟ್ರೇಲಿಯಾ ಈ ವರ್ಷ ಸತತ 16 ಟಿ 20 ಪಂದ್ಯಗಳನ್ನು ಗೆದ್ದಿದೆ. ಆದರೆ 17 ನೇ ಪಂದ್ಯವನ್ನು ಗೆಲ್ಲುವ ಆಸೀಸ್ ಕನಸ್ಸಿಗೆ ಭಾರತ ಸೂಪರ್ ಓವರ್ನಲ್ಲಿ ಬ್ರೇಕ್ ಹಾಕಿದೆ. ಆಸ್ಟ್ರೇಲಿಯಾ ವಿರುದ್ಧದ ಈ ದೊಡ್ಡ ಗೆಲುವಿನೊಂದಿಗೆ, ಕ್ಯಾಪ್ಟನ್ ಹರ್ಮನ್‌ಪ್ರೀತ್ ಕೌರ್ ಕೂಡ ಇತಿಹಾಸ ಸೃಷ್ಟಿಸಿದ್ದಾರೆ.
ಈ ಗೆಲುವಿನೊಂದಿಗೆ ಹರ್ಮನ್‌ಪ್ರೀತ್ ಕೌರ್ ಅತಿ ಹೆಚ್ಚು ಅಂತರರಾಷ್ಟ್ರೀಯ ಟಿ20 ಪಂದ್ಯಗಳನ್ನು ಗೆದ್ದ ಭಾರತೀಯ ನಾಯಕಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಹರ್ಮನ್ ನಾಯಕತ್ವದಲ್ಲಿ ಭಾರತ 50 ಟಿ20 ಪಂದ್ಯಗಳನ್ನು ಗೆದ್ದಿದೆ. ಎಂಎಸ್ ಧೋನಿ ನಾಯಕತ್ವದಲ್ಲಿ ಭಾರತ 41 ಟಿ20 ಪಂದ್ಯಗಳನ್ನು ಮತ್ತು ರೋಹಿತ್ ಶರ್ಮಾ ಅವರ ನಾಯಕತ್ವದಲ್ಲಿ 39 ಪಂದ್ಯಗಳನ್ನು ಗೆದ್ದಿದೆ. ಅದೇ ಸಮಯದಲ್ಲಿ, ಕೊಹ್ಲಿಯ ನಾಯಕತ್ವದಡಿಯಲ್ಲಿ ಭಾರತ 30 ಟಿ20 ಪಂದ್ಯಗಳನ್ನು ಗೆದ್ದುಕೊಂಡಿತ್ತು.
ಎಂ.ಎಸ್. ಧೋನಿ 2007 ಮತ್ತು 2016 ರ ನಡುವೆ ಭಾರತದ ಪರ 72 ಟಿ20 ಪಂದ್ಯಗಳಲ್ಲಿ ನಾಯಕತ್ವವಹಿಸಿದ್ದರು. ಇದರಲ್ಲಿ 41 ಪಂದ್ಯಗಳಲ್ಲಿ ಗೆಲುವು ಸಾಧಿಸಿದರೆ, 28 ಪಂದ್ಯಗಳಲ್ಲಿ ಸೋಲನುಭವಿಸಿದ್ದರು.
ಪ್ರಸ್ತುತ ಭಾರತೀಯ ನಾಯಕ ರೋಹಿತ್ ಶರ್ಮಾ ಇದುವರೆಗೆ 51 ಟಿ 20 ಪಂದ್ಯಗಳಲ್ಲಿ ತಂಡವನ್ನು ಮುನ್ನಡೆಸಿದ್ದು, ಅದರಲ್ಲಿ 39 ಪಂದ್ಯಗಳನ್ನು ಗೆದ್ದು, 12 ಪಂದ್ಯಗಳಲ್ಲಿ ಸೊಲನುಭವಿಸಿದ್ದಾರೆ.
ಅದೇ ಸಮಯದಲ್ಲಿ, ವಿರಾಟ್ ಕೊಹ್ಲಿಯ ನಾಯಕತ್ವದಡಿಯಲ್ಲಿ, ಭಾರತ 50 ಟಿ 20 ಪಂದ್ಯಗಳನ್ನು ಆಡಿದ್ದು, 30 ಪಂದ್ಯಗಳಲ್ಲಿ ಗೆದ್ದು, 16 ಪಂದ್ಯಗಳಲ್ಲಿ ಸೋತಿದೆ.
Published On - 12:30 pm, Mon, 12 December 22