IPL 2025: 18 ಸೀಸನ್ಗಳಿಗೆ 11 ಕೋಚ್ಗಳು: ಕಪ್ ಗೆಲ್ಲಲು ಮುಂದುವರೆದ ಪಂಜಾಬ್ ಕಿಂಗ್ಸ್ ಪ್ಲ್ಯಾನ್
IPL 2025: ಐಪಿಎಲ್ ಇತಿಹಾಸದಲ್ಲಿ ಅತೀ ಹೆಚ್ಚು ನಾಯಕರಗಳನ್ನು ಪರಿಚಯಿಸಿದ ದಾಖಲೆ ಹೊಂದಿರುವ ಪಂಜಾಬ್ ಕಿಂಗ್ಸ್ ಇದೀಗ ಕೋಚ್ಗಳ ನೇಮಕದ ವಿಷಯದಲ್ಲೂ ಮುಂಚೂಣಿಯಲ್ಲಿದೆ. ಏಕೆಂದರೆ ಕಳೆದ 17 ಸೀಸನ್ಗಳಲ್ಲಿ 10 ಕೋಚ್ಗಳನ್ನು ನೇಮಕ ಮಾಡಿದ್ದ ಪಂಜಾಬ್ ಫ್ರಾಂಚೈಸಿ ಇದೀಗ 11ನೇ ಕೋಚ್ ಆಗಿ ರಿಕಿ ಪಾಂಟಿಂಗ್ ಅವರನ್ನು ಆಯ್ಕೆ ಮಾಡಿಕೊಂಡಿದೆ.
ಐಪಿಎಲ್ ಇತಿಹಾಸದಲ್ಲಿ ಒಮ್ಮೆಯೂ ಟ್ರೋಫಿ ಎತ್ತಿ ಹಿಡಿಯದ ನಾಲ್ಕು ತಂಡಗಳಲ್ಲಿ ಪಂಜಾಬ್ ಕಿಂಗ್ಸ್ ಕೂಡ ಒಂದು. ಕಳೆದ 17 ಸೀಸನ್ಗಳಿಂದ ಕಣಕ್ಕಿಳಿಯುತ್ತಿದ್ದರೂ ಪಂಜಾಬ್ ಪಾಲಿಗೆ ಐಪಿಎಲ್ ಕಿರೀಟ ಮರೀಚಿಕೆಯಾಗಿಯೇ ಉಳಿದಿದೆ. ಹೀಗಾಗಿಯೇ ಕಳೆದ 17 ಸೀಸನ್ಗಳಲ್ಲಿ ಪಂಜಾಬ್ ಕಿಂಗ್ಸ್ 10 ಬಾರಿ ಕೋಚ್ಗಳನ್ನು ಬದಲಿಸಿದೆ.
1 / 5
ಇದೀಗ ಪಂಜಾಬ್ ಕಿಂಗ್ಸ್ ತಂಡದ 11ನೇ ಕೋಚ್ ಆಗಿ ರಿಕಿ ಪಾಂಟಿಂಗ್ ಆಯ್ಕೆಯಾಗಿದ್ದಾರೆ. ಈ ಹಿಂದೆ ಮುಂಬೈ ಇಂಡಿಯನ್ಸ್ ಹಾಗೂ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಮುಖ್ಯ ಕೋಚ್ ಹುದ್ದೆಯಲ್ಲಿ ಕಾಣಿಸಿಕೊಂಡಿದ್ದ ಆಸ್ಟ್ರೇಲಿಯಾ ತಂಡ ಮಾಜಿ ನಾಯಕನನ್ನು ಈ ಬಾರಿ ಪಂಜಾಬ್ ಕಿಂಗ್ಸ್ ತನ್ನ ತೆಕ್ಕೆಗೆ ತೆಗೆದುಕೊಂಡಿದೆ. ಈ ಮೂಲಕ ಚೊಚ್ಚಲ ಬಾರಿ ಐಪಿಎಲ್ ಟ್ರೋಫಿ ಗೆಲ್ಲಲು ಪ್ಲ್ಯಾನ್ ರೂಪಿಸಿದೆ.
2 / 5
ಇದಕ್ಕೂ ಮುನ್ನ ಪಂಜಾಬ್ ಕಿಂಗ್ಸ್ ತಂಡವು 10 ಕೋಚ್ಗಳ ಮುಂದಾಳತ್ವದಲ್ಲಿ ಕಣಕ್ಕಿಳಿದಿತ್ತು. 2008 ರಲ್ಲಿ ನಡೆದ ಚೊಚ್ಚಲ ಟೂರ್ನಿಯಲ್ಲಿ ಪಂಜಾಬ್ ಕಿಂಗ್ಸ್ ತಂಡದ ಕೋಚ್ ಆಗಿ ಟಾಮ್ ಮೂಡಿ ಕಾಣಿಸಿಕೊಂಡಿದ್ದರು. ಇದಾದ ಬಳಿಕ ಮೈಕೆಲ್ ಬೆವೆನ್ (2011), ಆ್ಯಡಂ ಗಿಲ್ಕ್ರಿಸ್ಟ್ (2012), ಡಾರೆನ್ ಲೆಹ್ಮನ್ (2013) ಹಾಗೂ ಸಂಜಯ್ ಬಂಗಾರ್ (2014-2016) ಪಂಜಾಬ್ ಪಡೆಯ ಕೋಚ್ ಹುದ್ದೆಯಲ್ಲಿ ಕಾಣಿಸಿಕೊಂಡಿದ್ದರು.
3 / 5
ಇನ್ನು 2017 ರಲ್ಲಿ ಟೀಮ್ ಇಂಡಿಯಾದ ಮಾಜಿ ಆಟಗಾರ ವಿರೇಂದ್ರ ಸೆಹ್ವಾಗ್ ಪಂಜಾಬ್ ಕಿಂಗ್ಸ್ ತಂಡದ ಮುಖ್ಯ ಕೋಚ್ ಹುದ್ದೆಯನ್ನು ಅಲಂಕರಿಸಿದ್ದರು. ಆದರೆ ಅದು ಕೇವಲ ಒಂದು ಸೀಸನ್ಗೆ ಸೀಮಿತವಾಯಿತು. 2018 ರಲ್ಲಿ ಈ ಸ್ಥಾನಕ್ಕೆ ಬ್ರಾಡ್ ಹಾಡ್ಜ್ ನೇಮಕವಾಗಿದ್ದರು. ಆ ನಂತರ ಮೈಕ್ ಹೆಸ್ಸನ್ (2019) ಮತ್ತು ಅನಿಲ್ ಕುಂಬ್ಳೆ (2020-22) ಪಂಜಾಬ್ ಕಿಂಗ್ಸ್ ತಂಡ ಹೆಡ್ ಕೋಚ್ ಆಗಿ ಕಾರ್ಯ ನಿರ್ವಹಿಸಿದ್ದರು. ಇನ್ನು ಕಳೆದ ಎರಡು ಸೀಸನ್ಗಳಲ್ಲಿ ಟ್ರೆವರ್ ಬೇಲಿಸ್ (2023-24) ಮುಖ್ಯ ಕೋಚ್ ಹುದ್ದೆಯನ್ನು ಅಲಂಕರಿಸಿದರೂ ಪಂಜಾಬ್ ಕಿಂಗ್ಸ್ ತಂಡದ ಕಪ್ ಗೆಲ್ಲುವ ಕನಸು ಈಡೇರಿರಲಿಲ್ಲ. ಹೀಗಾಗಿ ಈ ಬಾರಿ ಹೊಸ ಕೋಚ್ನ ನೇಮಕ ಮಾಡಲಾಗಿದೆ.
4 / 5
ಅದರಂತೆ ಇದೀಗ 2015 ರಲ್ಲಿ ಮುಂಬೈ ಇಂಡಿಯನ್ಸ್ ತಂಡಕ್ಕೆ ಚಾಂಪಿಯನ್ ಪಟ್ಟ ತಂದುಕೊಟ್ಟ ಹಾಗೂ 2020 ರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಫೈನಲ್ಗೇರಿಸಿದ್ದ ತರಬೇತುದಾರ ರಿಕಿ ಪಾಂಟಿಂಗ್ ಅವರನ್ನು ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿ ಹೆಡ್ ಕೋಚ್ ಆಗಿ ಆಯ್ಕೆ ಮಾಡಿದೆ. ಈ ಮೂಲಕ ಮುಂಬರುವ ಐಪಿಎಲ್ನಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಲು ಪಂಜಾಬ್ ಕಿಂಗ್ಸ್ ಈಗಲೇ ಭರ್ಜರಿ ಪ್ಲ್ಯಾನ್ ರೂಪಿಸುತ್ತಿದೆ.
