IPL 2025: ದುಡ್ಡಿಗಿಂತ ತಂಡವೇ ಮುಖ್ಯ: ಇವರು ಕೋಟಿ ರೂ. ಕಡಿತಗೊಳಿಸಿದ ಆಟಗಾರರು
IPL 2025: ಐಪಿಎಲ್ ಸೀಸನ್-18 ಕ್ಕಾಗಿ ರಿಟೈನ್ ಆಗಿರುವ ಸ್ಟಾರ್ ಆಟಗಾರರಲ್ಲಿ ಅತ್ಯಂತ ಕಡಿಮೆ ಮೊತ್ತ ಪಡೆದಿರುವುದು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ. ಕಳೆದ ಬಾರಿ 12 ಕೋಟಿ ರೂ. ಪಡೆದಿದ್ದ ಧೋನಿ ಈ ಬಾರಿ ಒಂದಂಕಿ ಕೋಟಿಯೊಂದಿಗೆ ಸಿಎಸ್ಕೆ ತಂಡದಲ್ಲೇ ಉಳಿದಿದ್ದಾರೆ.
ಐಪಿಎಲ್ ಮೆಗಾ ಹರಾಜಿಗೂ ಮುನ್ನ 10 ಫ್ರಾಂಚೈಸಿಗಳು ಒಟ್ಟು 46 ಆಟಗಾರರನ್ನು ರಿಟೈನ್ ಮಾಡಿಕೊಂಡಿದೆ. ಈ ನಲ್ವತ್ತಾರು ಆಟಗಾರರಲ್ಲಿ 5 ಪ್ಲೇಯರ್ಸ್ ತಮ್ಮ ಸಂಭಾವನೆಯಲ್ಲಿ ಭಾರೀ ಕಡಿತ ಮಾಡಿಕೊಂಡಿದ್ದಾರೆ. ಅಂದರೆ ಐಪಿಎಲ್ 2024 ರಲ್ಲಿ ಪಡೆದ ಸಂಭಾವನೆಗಿಂತ ಈ ಬಾರಿ ಕಡಿಮೆ ಮೊತ್ತ ಪಡೆದುಕೊಂಡಿದ್ದಾರೆ. ಆ ಆಟಗಾರರು ಯಾರೆಂದರೆ....
ಮಹೇಂದ್ರ ಸಿಂಗ್ ಧೋನಿ: ಐಪಿಎಲ್ 2024 ರಲ್ಲಿ ಮಹೇಂದ್ರ ಸಿಂಗ್ ಧೋನಿಗೆ ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿ ನೀಡಿದ ಮೊತ್ತ 12 ಕೋಟಿ ರೂ. ಆದರೆ ಈ ಬಾರಿ ಕೇವಲ 4 ಕೋಟಿ ರೂ.ಗೆ ಧೋನಿ ಸಿಎಸ್ಕೆ ತಂಡದಲ್ಲೇ ಉಳಿದುಕೊಂಡಿದ್ದಾರೆ. ಅಂದರೆ ಬರೋಬ್ಬರಿ 8 ಕೋಟಿ ರೂ. ಕಡಿತ ಮಾಡಿಕೊಂಡಿದ್ದಾರೆ.
ಆ್ಯಂಡ್ರೆ ರಸೆಲ್: ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡದ ಸ್ಟಾರ್ ಆಲ್ರೌಂಡರ್ ಕಳೆದ ಸೀಸನ್ನಲ್ಲಿ 16 ಕೋಟಿ ರೂ. ಪಡೆದಿದ್ದರು. ಆದರೆ ಈ ಬಾರಿ ರಸೆಲ್ ಅವರನ್ನು ಕೇವಲ 12 ಕೋಟಿ ರೂ.ಗೆ ರಿಟೈನ್ ಮಾಡಲಾಗಿದೆ. ಅಂದರೆ ತಮ್ಮ ಸಂಭಾವನೆಯಲ್ಲಿ 4 ಕೋಟಿ ರೂ. ಕಡಿತ ಮಾಡಿಕೊಂಡಿದ್ದಾರೆ.
ರಾಹುಲ್ ತೆವಾಠಿಯಾ: ಐಪಿಎಲ್ 2024 ರಲ್ಲಿ ಗುಜರಾತ್ ಟೈಟಾನ್ಸ್ ಫ್ರಾಂಚೈಸಿಯು ರಾಹುಲ್ ತೆವಾಠಿಯಾಗೆ ನೀಡಿದ ಮೊತ್ತ 9 ಕೋಟಿ ರೂ. ಆದರೆ ಈ ಬಾರಿ 5 ಕೋಟಿ ರೂ. ಕಡಿತ ಮಾಡಿ ಕೇವಲ 4 ಕೋಟಿ ರೂ.ಗೆ ತೆವಾಠಿಯಾರನ್ನು ರಿಟೈನ್ ಮಾಡಿಕೊಂಡಿದೆ.
ಪ್ಯಾಟ್ ಕಮಿನ್ಸ್: ಐಪಿಎಲ್ 2024 ರ 2ನೇ ಅತ್ಯಂತ ದುಬಾರಿ ಆಟಗಾರ ಪ್ಯಾಟ್ ಕಮಿನ್ಸ್. ಕಳೆದ ಸೀಸನ್ನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿಯು ಕಮಿನ್ಸ್ ಅವರನ್ನು ಬರೋಬ್ಬರಿ 20.50 ಕೋಟಿ ರೂ.ಗೆ ಖರೀದಿಸಿತ್ತು. ಆದರೆ ಈ ಬಾರಿ ನೀಡಿದ್ದು 18 ಕೋಟಿ ರೂ. ಮಾತ್ರ. ಅಂದರೆ ಇಲ್ಲಿ ಕಮಿನ್ಸ್ ಕಳೆದ ಬಾರಿಗಿಂತ 2.50 ಕೋಟಿ ರೂ. ಕಡಿಮೆ ಪಡೆದುಕೊಂಡಿದ್ದಾರೆ.
ಶಾರುಖ್ ಖಾನ್: ಗುಜರಾತ್ ಟೈಟಾನ್ಸ್ ಫ್ರಾಂಚೈಸಿಯು ಐಪಿಎಲ್ 2024 ರಲ್ಲಿ ಸ್ಪೋಟಕ ದಾಂಡಿಗ ಶಾರುಖ್ ಖಾನ್ ಅವರಿಗೆ ನೀಡಿದ ಸಂಭಾವನೆ 7.40 ಕೋಟಿ ರೂ. ಆದರೆ ಈ ಬಾರಿ ಕೇವಲ 4 ಕೋಟಿ ರೂ.ಗೆ ರಿಟೈನ್ ಮಾಡಿಕೊಂಡಿದೆ. ಅಂದರೆ ಶಾರುಖ್ ಖಾನ್ 3.40 ಕೋಟಿ ರೂ. ಕಡಿಮೆ ಮೊತ್ತದೊಂದಿಗೆ ಗುಜರಾತ್ ಟೈಟಾನ್ಸ್ ತಂಡದಲ್ಲೇ ಉಳಿದಿದ್ದಾರೆ.