Smriti Mandhana: ಹೀನಾಯ ಸೋಲಿನ ಬಳಿಕ ಆರ್ಸಿಬಿ ನಾಯಕಿ ಸ್ಮೃತಿ ಮಂಧಾನ ಆಡಿದ ಮಾತುಗಳೇನು ಗೊತ್ತೇ?
RCB vs DC, WPL 2023: ಮಹಿಳಾ ಪ್ರೀಮಿಯರ್ ಲೀಗ್ನ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧದ ಪಂದ್ಯದ ಸೋಲಿನ ಬಗ್ಗೆ ಮಾತನಾಡಿದ ಆರ್ಸಿಬಿ ನಾಯಕಿ ಸ್ಮೃತಿ ಮಂಧಾನ, ನಾವು ಎದುರಾಳಿಗೆ ಹೆಚ್ಚು ರನ್ಗಳನ್ನು ಬಿಟ್ಟುಕೊಟ್ಟೆವು. ಸುಮಾರು 20 ರಿಂದ 30 ರನ್ಗಳನ್ನು ಹೆಚ್ಚು ನೀಡಿದೆವು ಎಂದು ಹೇಳಿದ್ದಾರೆ.
ಮಹಿಳಾ ಪ್ರೀಮಿಯರ್ ಲೀಗ್ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಸೋಲಿನೊಂದಿಗೆ ತನ್ನ ಅಭಿಯಾನ ಆರಂಭಿಸಿದೆ. ಭಾನುವಾರ ಮಧ್ಯಾಹ್ನ ನಡೆದ ಡಬ್ಲ್ಯೂಪಿಎಲ್ 2023 ರ ದ್ವಿತೀಯ ಪಂದ್ಯದಲ್ಲಿ ಆರ್ಸಿಬಿ ಮಹಿಳಾ ತಂಡ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಸೋಲು ಕಂಡಿತು.
1 / 9
ಆರ್ಸಿಬಿ ಪರ ಬೌಲರ್ಗಳು ಸಂಪೂರ್ಣ ವೈಫಲ್ಯ ಅನುಭವಿಸಿದರೆ, ಬ್ಯಾಟರ್ಗಳು ಕೂಡ ನಿರೀಕ್ಷೆಗೆ ತಕ್ಕಂತೆ ಪ್ರದರ್ಶನ ತೋರಲಿಲ್ಲ. 200 ಕ್ಕೂ ಅಧಿಕ ರನ್ ಬಿಟ್ಟುಕೊಟ್ಟ ಬೌಲರ್ಗಳು ದುಬಾರಿಯಾದರೆ ಆರ್ಸಿಬಿ ಮಧ್ಯಮ ಕ್ರಮಾಂಕ ದಿಢೀರ್ ಕುಸಿಯಿತು. ಮಧ್ಯಮ ಓವರ್ನಲ್ಲಿ 7 ರನ್ಗಳ ಅಂತರದಲ್ಲಿ 5 ವಿಕೆಟ್ ಕಳೆದುಕೊಂಡಿತು.
2 / 9
ಪಂದ್ಯ ಮುಗಿದ ಬಳಿಕ ಸೋಲಿನ ಬಗ್ಗೆ ಮಾತನಾಡಿದ ನಾಯಕಿ ಸ್ಮೃತಿ ಮಂಧಾನ, ನಾವು ಎದುರಾಳಿಗೆ ಹೆಚ್ಚು ರನ್ಗಳನ್ನು ಬಿಟ್ಟುಕೊಟ್ಟೆವು. ಸುಮಾರು 20 ರಿಂದ 30 ರನ್ಗಳನ್ನು ಹೆಚ್ಚು ನೀಡಿದೆವು. ನಾವು ಈರೀತಿಯ ಆರಂಭವನ್ನು ಎದುರು ನೋಡಿರಲಿಲ್ಲ. ಡೆಲ್ಲಿ ಬೌಲರ್ಗಳು ಮಧ್ಯಮ ಓವರ್ನಲ್ಲಿ ನಿಧಾನಗತಿಯಲ್ಲಿ ಬೌಲ್ ಎಸೆದರು. ನಾವು ಆ ರೀತಿಯ ಟ್ರಿಕ್ ಉಪಯೋಗಿಸಲು ವಿಫಲರಾದೆವು ಎಂದು ಹೇಳಿದ್ದಾರೆ.
3 / 9
ಮಾತು ಮುಂದುವರೆಸಿದ ಮಂಧಾನ, ನಮ್ಮ ಬೌಲಿಂಗ್ ವಿಭಾಗದಲ್ಲಿ ಇನ್ನಷ್ಟು ಕೆಲಸ ಆಗಬೇಕಿದೆ. ಸೋಮವಾರ ನಮಗೆ ಮತ್ತೊಂದು ಪಂದ್ಯವಿದೆ. ಯೋಚಿಸಿ ಕಮ್ಬ್ಯಾಕ್ ಮಾಡಲು ಸಮಯವಿದೆ. ಈ ಪಂದ್ಯದಲ್ಲಿ ಟಾರ್ಗೆಟ್ ಬೆನ್ನಟ್ಟುವಾಗ ಉತ್ತಮ ಆರಂಭ ಪಡೆದುಕೊಂಡಿದ್ದೆವು. ಆದರೆ, ಅದೇ ಗತಿಯನ್ನು ಮುಂದುವರೆಸಲು ವಿಫಲರಾದೆವು. ಮುಂದಿನ ಪಂದ್ಯಕ್ಕೆ ಇನ್ನಷ್ಟು ಬಲಿಷ್ಠವಾಗಿ ಬರುತ್ತೇವೆ ಎಂಬುದು ಸ್ಮೃತಿ ಮಾತು.
4 / 9
ಈ ಪಂದ್ಯದಲ್ಲಿ ಟಾಸ್ ಗೆದ್ದ ಆರ್ಸಿಬಿ ಬೌಲಿಂಗ್ ಆಯ್ಕೆ ಮಾಡಿಕೊಂಡಿತು. ಅದರಂತೆ ಡೆಲ್ಲಿ ಪರ ಇನ್ನಿಂಗ್ಸ್ ಆರಂಭಿಸಿದ ಶಫಾಲಿ ವರ್ಮಾ ಹಾಗೂ ಮೆಗ್ ಲ್ಯಾನಿಂಗ್ ಬಂದ ಕೂಡಲೇ ಅಬ್ಬರಿಸಲು ಆರಂಭಿಸಿದರು. ಲ್ಯಾನಿಂಗ್ ಅವರೊಂದಿಗೆ ಬಿರುಗಾಳಿಯ ಶೈಲಿಯಲ್ಲಿ ರನ್ ಗಳಿಸಿದ ಶಫಾಲಿ ಶತಕದ ಜೊತೆಯಾಟವನ್ನು ಹಂಚಿಕೊಂಡರು.
5 / 9
ಇವರಿಬ್ಬರು ಈ ಲೀಗ್ನ ಇತಿಹಾಸದಲ್ಲಿ ಮೊದಲ ಶತಕದ ಜೊತೆಯಾಟ ಆಡಿದ ದಾಖಲೆ ಕೂಡ ಬರೆದರು. ಇಬ್ಬರೂ ಮೊದಲ ವಿಕೆಟ್‌ಗೆ 162 ರನ್ಗಳ ಕಾಣಿಕೆ ನೀಡಿದರು. ಕೇವಲ 45 ಎಸೆತಗಳನ್ನು ಎದುರಿಸಿದ ಶಪಾಲಿ,10 ಬೌಂಡರಿ ಹಾಗೂ 4 ಸಿಕ್ಸರ್‌ಗಳ ನೆರವಿನಿಂದ 84 ರನ್ ಚಚ್ಚಿದರು.
6 / 9
ಲ್ಯಾನಿಂಗ್ ಕೇವಲ 43 ಎಸೆತಗಳಲ್ಲಿ 14 ಫೋರ್ನೊಂದಿಗೆ 72 ರನ್ ಸಿಡಿಸಿದರು. ಮರಿಜನ್ನೆ ಕ್ಯಾಪ್ 17 ಎಸೆತಗಳಲ್ಲಿ 3 ಫೋರ್, ಸಿಕ್ಸರ್ನೊಂದಿಗೆ ಅಜೇಯ 39 ಹಾಗೂ ಜೆಮಿಮಾ ರೋಡ್ರಿಗಸ್ ಅಜೇಯ 22 ರನ್ ಬಾರಿಸಿದರು. ಡೆಲ್ಲಿ 20 ಓವರ್ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 223 ರನ್ ಕಲೆಹಾಕಿತು.
7 / 9
ಟಾರ್ಗೆಟ್ ಬೆನ್ನಟ್ಟಿದ ಆರ್ಸಿಬಿ 4 ಓವರ್ ಆಗುವ ಹೊತ್ತಿಗೆ 40 ರನ್ ಬಾರಿಸಿ ಸ್ಫೋಟಕ ಆರಂಭ ಪಡೆದುಕೊಂಡಿತು. ಆದರೆ, ಸೋಫಿ 14 ಹಾಗೂ ನಾಯಕಿ ಮಂಧಾನ 35 ಸಿಡಿಸಿ ಔಟಾದರು. ಎಲ್ಲಿಸ್ ಪೆರ್ರಿ 31 ರನ್ಗಳ ಕಾಣಿಕೆ ನೀಡಿದರು. ಮಧ್ಯಮ ಕ್ರಮಾಂಕದಲ್ಲಿ ಬೆಂಗಳೂರು ದಿಢೀರ್ ಕುಸಿತ ಕಂಡಿತು.
8 / 9
ಹೀದರ್ ನೈಟ್ (34) ರನ್ ಗಳಿಸಿದ್ದರಿಂದ ತಂಡ 150 + ರನ್ ದಾಖಲಿಸಲು ಶಕ್ತವಾಯಿತು. ಮೇಘನ್ ಸ್ಕಟ್ 30 ರನ್ ಬಾರಿಸಿ ಅಜೇಯರಾಗಿ ಉಳಿದರು. ಆರ್ಸಿಬಿ 20 ಓವರ್ಗೆ 8 ವಿಕೆಟ್ ನಷ್ಟಕ್ಕೆ 163 ರನ್ ಗಳಿಸಿತಷ್ಟೆ. ವುಮೆನ್ಸ್ ಪ್ರೀಮಿಯರ್ ಲೀಗ್ನಲ್ಲಿ ಪ್ರಥಮ 5 ವಿಕೆಟ್ ಪಡೆದು ತಾರಾ ನಾರ್ರಿಸ್ ವಿಶೇಷ ದಾಖಲೆ ಮಾಡಿದರು.
