ಗರುಡ ಪುರಾಣದ ಈ ಏಳು ವಿಷಯಗಳನ್ನು ಪಾಲಿಸಿದರೆ ನಿಮ್ಮ ಏಳಿಗೆ ಖಚಿತ

ಪ್ರತಿಯೊಬ್ಬರೂ ಗರುಡ ಪುರಾಣದ ಬಗ್ಗೆ ತಿಳಿದಿರಬೇಕು. ಗರುಡ ಪುರಾಣದಲ್ಲಿ ಸ್ವರ್ಗ, ನರಕ, ಪಾಪ ಮತ್ತು ಪುಣ್ಯಕ್ಕಿಂತ ಹೆಚ್ಚಿನವುಗಳಿವೆ. ಇದು ಜ್ಞಾನ, ವಿಜ್ಞಾನ, ನೀತಿ, ನಿಯಮಗಳು ಮತ್ತು ಧರ್ಮದ ಬಗ್ಗೆ ಮಾತನಾಡುತ್ತದೆ. ಗರುಡ ಪುರಾಣದಲ್ಲಿ ಒಂದು ಕಡೆ ಸಾವಿನ ರಹಸ್ಯವಿದ್ದರೆ ಇನ್ನೊಂದು ಕಡೆ ಜೀವನದ ರಹಸ್ಯ ಅಡಗಿದೆ. ಗರುಡ ಪುರಾಣದಿಂದ ನಮಗೆ ಅನೇಕ ರೀತಿಯ ಉಪದೇಶಗಳು ಸಿಗುತ್ತವೆ. ಗರುಡ ಪುರಾಣದಲ್ಲಿ, ಸಾವಿನ ಮೊದಲು ಮತ್ತು ನಂತರದ ಪರಿಸ್ಥಿತಿಯನ್ನು ವಿವರಿಸಲಾಗಿದೆ. ಈ ಪುರಾಣವು ವಿಷ್ಣುವಿನ ಭಕ್ತಿ ಮತ್ತು ಜ್ಞಾನವನ್ನು ಆಧರಿಸಿದೆ. ಪ್ರತಿಯೊಬ್ಬ ವ್ಯಕ್ತಿಯು ಈ ಪುರಾಣವನ್ನು ಓದಬೇಕು. ಗರುಡ ಪುರಾಣವು ಹಿಂದೂ ಧರ್ಮದ ಪ್ರಸಿದ್ಧ ಧಾರ್ಮಿಕ ಗ್ರಂಥಗಳಲ್ಲಿ ಒಂದಾಗಿದೆ. ಇದನ್ನು 18 ಪುರಾಣಗಳಲ್ಲಿ ಒಂದೆಂದು ಪರಿಗಣಿಸಲಾಗಿದೆ. ಗರುಡ ಪುರಾಣದಲ್ಲಿ ಒಬ್ಬ ವ್ಯಕ್ತಿಯು ತಿಳಿದಿರಬೇಕಾದ ಜೀವನದ ಹಲವು ನಿಗೂಢ ವಿಷಯಗಳನ್ನು ಹೇಳಲಾಗಿದೆ.

ಸಂಯಮ ಮತ್ತು ಜಾಗರೂಕತೆ: ಜೀವನವಿದ್ದರೆ ಮಿತ್ರರೂ ಶತ್ರುಗಳೂ ಇರುತ್ತಾರೆ. ಶತ್ರುಗಳಿಲ್ಲದವನು ತನ್ನ ಜೀವನದಲ್ಲಿ ಏನನ್ನೂ ಮಾಡುತ್ತಿಲ್ಲ ಎಂದು ಹೇಳಲಾಗುತ್ತದೆ. ಅಂತಹ ಪರಿಸ್ಥಿತಿಯಲ್ಲಿ, ಅವನಿಗೆ ಯಾವುದೇ ಸ್ನೇಹಿತರಿಲ್ಲ. ಇದರರ್ಥ ನಾವು ಉದ್ದೇಶಪೂರ್ವಕವಾಗಿ ಜನರನ್ನು ಶತ್ರುಗಳನ್ನಾಗಿ ಮಾಡುತ್ತೇವೆ ಎಂದಲ್ಲ. ನಾವು ನಮ್ಮದೇ ಆದ ರೀತಿಯಲ್ಲಿ ಬದುಕುತ್ತಿದ್ದರೆ ಶತ್ರುಗಳು ಇರುವುದು ಸಹಜ.

ಕೆಲವು ಶತ್ರುಗಳು ಸಾಮಾನ್ಯ ಮತ್ತು ಕೆಲವರು ಅಪಾಯಕಾರಿ: ಅಂದರೆ ಅಪಾಯಕಾರಿ ಶತ್ರುಗಳು ಶತೃತ್ವವನ್ನು ಹೃದಯಕ್ಕೆ ತೆಗೆದುಕೊಂಡುಬಿಡುತ್ತಾರೆ. ಅಂತಹವರು ಇರುವಾಗ ಜೀವನವನ್ನು ಲಘುವಾಗಿ ತೆಗೆದುಕೊಳ್ಳಬೇಡಿ. ಅಂತಹ ಶತ್ರುಗಳನ್ನು ಜಾಣತನದಿಂದ ತಪ್ಪಿಸಬೇಕು; ಇಲ್ಲದಿದ್ದರೆ ಅವರು ನಿಮಗೆ ಯಾವಾಗ, ಎಲ್ಲಿ ಮತ್ತು ಹೇಗೆ ಹಾನಿ ಮಾಡುತ್ತಾರೆ ಎಂಬುದರ ಬಗ್ಗೆ ಯಾವುದೇ ಭರವಸೆ ಇರುವುದಿಲ್ಲ.

ಗರುಡ ಪುರಾಣದ ನೀತಿಸಾರದಲ್ಲಿ ವೈರಿಗಳನ್ನು ಎದುರಿಸಲು ಜಾಗರೂಕತೆ ಮತ್ತು ಜಾಣ್ಮೆಯನ್ನು ಆಶ್ರಯಿಸಬೇಕು ಎಂದು ಹೇಳಲಾಗಿದೆ. ಶತ್ರುಗಳು ನಿರಂತರವಾಗಿ ನಮಗೆ ಹಾನಿ ಮಾಡಲು ಪ್ರಯತ್ನಿಸುತ್ತಾರೆ. ಇಂತಹ ಪರಿಸ್ಥಿತಿಯಲ್ಲಿ ಚಾಕಚಕ್ಯತೆ ತೋರದಿದ್ದರೆ ನಷ್ಟ ಅನುಭವಿಸಬೇಕಾಗುತ್ತದೆ. ಆದ್ದರಿಂದ, ಶತ್ರುಗಳನ್ನು ಸೂಕ್ತ ನೀತಿಗಳನ್ನು ಬಳಸಿ ನಿಯಂತ್ರಿಸಬೇಕು.

ಬಟ್ಟೆ ಶುದ್ಧ ಮತ್ತು ಪರಿಮಳಯುಕ್ತವಾಗಿರಬೇಕು: ನೀವು ಶ್ರೀಮಂತ ಮತ್ತು ಅದೃಷ್ಟಶಾಲಿಯಾಗಲು ಬಯಸಿದರೆ ಸ್ವಚ್ಛ, ಸುಂದರ ಮತ್ತು ಪರಿಮಳಯುಕ್ತ ಬಟ್ಟೆಗಳನ್ನು ಧರಿಸುವುದು ಮುಖ್ಯ. ಗರುಡ ಪುರಾಣದ ಪ್ರಕಾರ ಕೊಳಕು ಬಟ್ಟೆಗಳನ್ನು ಧರಿಸಿದವರ ಅದೃಷ್ಟವು ನಾಶವಾಗುತ್ತದೆ.

Also Read: ಗರುಡ ಪುರಾಣದ ಪ್ರಕಾರ ತಪ್ಪಾಗಿಯೂ ಮಾಡಬಾರದ ಕೆಲವು ಕಾರ್ಯಗಳಿವೆ, ಇಲ್ಲದಿದ್ದರೆ ಲಕ್ಷ್ಮಿ ಕೋಪಗೊಳ್ಳುತ್ತಾಳೆ 

ಕೊಳಕು ಬಟ್ಟೆ ತೊಟ್ಟವರಿರುವ ಮನೆಗೆ ಲಕ್ಷ್ಮಿ ಬರುವುದಿಲ್ಲ. ಇದರಿಂದ ಅದೃಷ್ಟವೂ ಆ ಮನೆಯಿಂದ ದೂರವಾಗುತ್ತದೆ ಮತ್ತು ಅಲ್ಲಿ ಬಡತನ ನೆಲೆಸುತ್ತದೆ. ಸಂಪತ್ತು ಮತ್ತು ಎಲ್ಲಾ ಸೌಕರ್ಯಗಳಿಂದ ಆಶೀರ್ವದಿಸಲ್ಪಟ್ಟರೂ ಕೆಲವು ಜನರು, ಇನ್ನೂ ಕೊಳಕು ಬಟ್ಟೆಗಳನ್ನು ಧರಿಸುತ್ತಾರೆ. ಅಂತಹವರ ಸಂಪತ್ತು ಕ್ರಮೇಣ ನಾಶವಾಗುತ್ತದೆ ಎಂಬುದನ್ನು ಗಮನಿಸಿ. ಆದುದರಿಂದ ಮಹಾಲಕ್ಷ್ಮಿಯ ಆಶೀರ್ವಾದವು ನಮ್ಮ ಮೇಲೆ ಉಳಿಯುವಂತಾಗಲು ಶುಭ್ರವಾದ ಮತ್ತು ಸುವಾಸನೆಯ ವಸ್ತ್ರಗಳನ್ನು ಧರಿಸಬೇಕು.

ಅಭ್ಯಾಸದ ಮೂಲಕ ಜ್ಞಾನದ ಸಂರಕ್ಷಣೆ: ಪ್ರಶ್ನೆ ಎಷ್ಟೇ ಕಠಿಣವಾಗಿರಲಿ, ಅದು ಜ್ಞಾನ, ಬುದ್ಧಿವಂತಿಕೆ ಅಥವಾ ನೆನಪಿಡುವ ಯಾವುದಾದರೂ ಇರಲಿ, ಅದನ್ನು ಅಭ್ಯಾಸದಿಂದ ಮಾತ್ರ ಸಂರಕ್ಷಿಸಬಹುದು. ಅಭ್ಯಾಸವನ್ನು ಮುಂದುವರಿಸುವುದರಿಂದ, ಒಬ್ಬ ವ್ಯಕ್ತಿಯು ಹೇಳಿದ ಜ್ಞಾನದಲ್ಲಿ ಪ್ರವೀಣನಾಗುತ್ತಾನೆ. ಆದರೆ ಅದನ್ನು ಎಂದಿಗೂ ಮರೆಯುವುದಿಲ್ಲ. ಹಗ್ಗವನ್ನು ಪದೇ ಪದೇ ಕಲ್ಲಿನ ಮೇಲೆ ಉಜ್ಜಿದಾಗ ಕಲ್ಲಿನ ಮೇಲೆ ಗುರುತು ಬಿಡಬಹುದು. ಹಾಗಾಗಿ ನಿರಂತರವಾಗಿ ಏನೇ ಅಭ್ಯಾಸ ಮಾಡಲಿ ಅದರಿಂದ ಸಾಫಲ್ಯ ಸಾಧ್ಯವಾಗುತ್ತದೆ. ಅಭ್ಯಾಸಬಲದಿಂದ ಮೂರ್ಖ ವ್ಯಕ್ತಿಯೂ ಬುದ್ಧಿವಂತನಾಗಬಹುದು

ಅಭ್ಯಾಸವಿಲ್ಲದೆ ಜ್ಞಾನ ನಾಶವಾಗುತ್ತದೆ. ಕಾಲಕಾಲಕ್ಕೆ ಜ್ಞಾನ ಅಥವಾ ಬುದ್ಧಿವಂತಿಕೆಯನ್ನು ಅಭ್ಯಾಸ ಮಾಡದಿದ್ದರೆ, ಅದು ಮರೆತುಹೋಗುತ್ತದೆ. ಗರುಡ ಪುರಾಣದ ಪ್ರಕಾರ, ನಾವು ಏನನ್ನು ಓದಿದರೂ ಅದನ್ನು ಒಮ್ಮೆ ಅಭ್ಯಾಸ ಮಾಡಬೇಕು ಎಂದು ತಿಳಿಯಹೇಳಲಾಗಿದೆ. ಆದ್ದರಿಂದ ಆ ಜ್ಞಾನವು ನಮ್ಮ ಮೆದುಳಿನಲ್ಲಿ ಚೆನ್ನಾಗಿ ಕ್ರೋಢೀಕರಿಸಲ್ಪಡುತ್ತದೆ.

ಆರೋಗ್ಯಕರ ದೇಹ: ಸಮತೋಲಿತ ಆಹಾರವನ್ನು ಸೇವಿಸುವುದರಿಂದ ಮಾತ್ರ ಆರೋಗ್ಯಕರ ದೇಹವನ್ನು ಸಾಧಿಸಲಾಗುತ್ತದೆ. ಒಬ್ಬ ವ್ಯಕ್ತಿಯು ಆಹಾರದಿಂದ ಆರೋಗ್ಯವನ್ನು ಪಡೆಯುತ್ತಾನೆ ಮತ್ತು ಆಹಾರ ಸರಿಯಾಗಿ ಇಲ್ಲದಿದ್ದಲ್ಲಿ ಅನಾರೋಗ್ಯಕ್ಕೆ ಒಳಗಾಗುತ್ತಾನೆ. ಆಹಾರವು ನಮ್ಮ ದೇಹಾರೋಗ್ಯದ ಪ್ರಧಾನ ಮೂಲವಾಗಿದೆ.

ನಾವು ಅಸಮತೋಲಿತ ಆಹಾರವನ್ನು ಸೇವಿಸುವುದರಿಂದ ನಮ್ಮ ಅರ್ಧಕ್ಕಿಂತ ಹೆಚ್ಚು ರೋಗಗಳು ಯಾವಾಗಲೂ ಸಂಭವಿಸುತ್ತವೆ. ಇದರಿಂದಾಗಿ ನಮ್ಮ ಜೀರ್ಣಾಂಗ ವ್ಯವಸ್ಥೆಯು ಸರಿಯಾಗಿ ಕಾರ್ಯನಿರ್ವಹಿಸುವುದಿಲ್ಲ. ಆದ್ದರಿಂದ, ನಾವು ಯಾವಾಗಲೂ ಸುಲಭವಾಗಿ ಜೀರ್ಣವಾಗುವ ಆಹಾರವನ್ನು ಸೇವಿಸಬೇಕು. ಅಂತಹ ಆಹಾರದಿಂದ ಜೀರ್ಣಾಂಗ ವ್ಯವಸ್ಥೆಯು ಸರಿಯಾಗಿ ಕಾರ್ಯನಿರ್ವಹಿಸುತ್ತದೆ ಮತ್ತು ದೇಹವು ಆಹಾರದಿಂದ ಪೂರ್ಣ ಶಕ್ತಿಯನ್ನು ಪಡೆಯುತ್ತದೆ. ಜೀರ್ಣಾಂಗ ವ್ಯವಸ್ಥೆಯು ಆರೋಗ್ಯಕರವಾಗಿರುತ್ತದೆ ಮತ್ತು ಇದರಿಂದಾಗಿ ನಾವು ರೋಗಗಳಿಂದ ರಕ್ಷಿಸಲ್ಪಡುತ್ತೇವೆ.

ಏಕಾದಶಿ ಉಪವಾಸ: ಏಕಾದಶಿ ಉಪವಾಸವನ್ನು ಧರ್ಮಗ್ರಂಥಗಳು ಮತ್ತು ಪುರಾಣಗಳಲ್ಲಿ ಅತ್ಯುತ್ತಮವೆಂದು ವಿವರಿಸಲಾಗಿದೆ. ಇದರ ಮಹಿಮೆಯನ್ನು ಗರುಡ ಪುರಾಣದಲ್ಲಿ ವಿಸ್ತಾರವಾಗಿ ಹೇಳಲಾಗಿದೆ. ಏಕಾದಶಿ ಉಪವಾಸವನ್ನು ಆಚರಿಸುವ ವ್ಯಕ್ತಿಯು ಎಲ್ಲಾ ತೊಂದರೆಗಳಿಂದ ಸುರಕ್ಷಿತವಾಗಿರುತ್ತಾನೆ. ಆ ಉಪವಾಸದ ಲಾಭ ಆತನಿಗೆ ಖಂಡಿತವಾಗಿ ಸಿಗುತ್ತದೆ.

ಏಕಾದಶಿ ಉಪವಾಸವನ್ನು ಆಚರಿಸಲು ಕೆಲವು ನಿಯಮಗಳಿವೆ. ನಿಯಮಾನುಸಾರ ಈ ಉಪವಾಸವನ್ನು ಆಚರಿಸಬೇಕು. ಈ ದಿನ ಹಣ್ಣುಗಳನ್ನು ಮಾತ್ರ ತೆಗೆದುಕೊಳ್ಳಬೇಕು. ಯಾವುದೇ ರೀತಿಯ ವ್ಯಸನಕ್ಕೆ ಒಳಗಾಗಬಾರದು, ಆಗ ಮಾತ್ರ ಈ ಉಪವಾಸವು ಫಲಿತಾಂಶವನ್ನು ನೀಡುತ್ತದೆ.

ಇದನ್ನೂ ಓದಿ: Chanakya Timeless Business Lessons: ಚಾಣಕ್ಯ ನೀತಿಯಿಂದ ಎಲ್ಲ ಕಾಲಕ್ಕೂ ಸಲ್ಲುವ ವ್ಯಾಪಾರ ನೀತಿಗಳು ಹೀಗಿವೆ

ತುಳಸಿಯ ಪ್ರಾಮುಖ್ಯತೆಯನ್ನು ಅರ್ಥಮಾಡಿಕೊಳ್ಳಿ: ಗರುಡ ಪುರಾಣವನ್ನು ಹೊರತುಪಡಿಸಿ, ತುಳಸಿಯ ಮಹತ್ವವನ್ನು ಇತರ ಅನೇಕ ಪುರಾಣಗಳಲ್ಲಿಯೂ ಉಲ್ಲೇಖಿಸಲಾಗಿದೆ. ತುಳಸಿಯನ್ನು ಮನೆಯಲ್ಲಿ ಬಳಸುವುದರಿಂದ ಎಲ್ಲಾ ರೀತಿಯ ರೋಗಗಳಿಂದ ಪರಿಹಾರ ದೊರೆಯುತ್ತದೆ. ಇದನ್ನು ಪ್ರತಿನಿತ್ಯ ಸೇವಿಸುವುದರಿಂದ ವ್ಯಕ್ತಿ ಯಾವುದೇ ಕಾಯಿಲೆಯಿಂದ ಬಳಲುವುದಿಲ್ಲ.

ನಿಮ್ಮ ಮನೆಯಲ್ಲಿ ತುಳಸಿ ಗಿಡಕ್ಕೆ ಸ್ಥಳ ಕಲ್ಪಿಸಿ, ನೀರು ಹಾಕುವುದರಿಂದ ನಿಮ್ಮ ಜೀವನದ ಪಥದಲ್ಲಿ ಮುಚ್ಚಿದ ಹಾದಿಗಳು ತೆರೆದುಕೊಳ್ಳುತ್ತವೆ. ತುಳಸಿಯನ್ನು ಸೇವಿಸುವುದರಿಂದ ಎಲ್ಲಾ ದೈಹಿಕ ಮತ್ತು ಮಾನಸಿಕ ಅಸ್ವಸ್ಥತೆಗಳು ಗುಣವಾಗುತ್ತವೆ. ಭಗವಾನ್ ವಿಷ್ಣುವಿನ ಪೂಜೆ, ಆರಾಧನೆಯು ಉತ್ತಮ ಫಲಿತಾಂಶವನ್ನು ನೀಡುತ್ತದೆ.

ದೇವಸ್ಥಾನ ಮತ್ತು ಧರ್ಮವನ್ನು ಗೌರವಿಸಿ: ಯಾವುದೇ ದೇವರು, ದೇವತೆ ಅಥವಾ ಧರ್ಮವನ್ನು ಅವಮಾನಿಸಿದವರು ಜೀವನದಲ್ಲಿ ಒಂದು ದಿನ ಪಶ್ಚಾತ್ತಾಪ ಪಡಬೇಕು ಮತ್ತು ನರಕಕ್ಕೆ ಹೋಗಬೇಕು. ಗುರಡ ಪುರಾಣದ ಪ್ರಕಾರ ಅಂತಹ ಜನರ ಬಗ್ಗೆ ಬಹಳಷ್ಟು ಬರೆಯಲಾಗಿದೆ.

ಗುರುಡ ಪುರಾಣದ ಪ್ರಕಾರ, ಪವಿತ್ರ ಸ್ಥಳಗಳಲ್ಲಿ (ದೇವಾಲಯಗಳು ಇತ್ಯಾದಿಗಳಲ್ಲಿ) ಕೊಳಕು ಕೆಲಸ ಮಾಡುವವರು, ಒಳ್ಳೆಯ ಜನರನ್ನು ವಂಚಿಸುವವರು, ಯಾರನ್ನಾದರೂ ತಮ್ಮ ಪರವಾಗಿ ದುರುಪಯೋಗಪಡಿಸಿಕೊಳ್ಳುವವರು ಮತ್ತು ದುರ್ಬಳಕೆ ಮಾಡುವವರು, ಧರ್ಮ, ವೇದಗಳು, ಪುರಾಣಗಳು ಮತ್ತು ಶಾಸ್ತ್ರಗಳ ಅಸ್ತಿತ್ವವನ್ನು ಪ್ರಶ್ನಿಸುವವರು… ಇವೇ ಮುಂತಾದ ಜನರನ್ನು ನರಕದಿಂದ ರಕ್ಷಿಸಲು ಯಾರಿಂದಲೂ ಸಾಧ್ಯವಿಲ್ಲ.

ಮತ್ತಷ್ಟು ಆಧ್ಯಾತ್ಮ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ

(ಗಮನಿಸಿ: ಈ ಲೇಖನವು ರೂಢಿಗತ, ಜನಪ್ರಿಯ ನಂಬಿಕೆಗಳನ್ನು ಆಧರಿಸಿದೆ. ಈ ಸುದ್ದಿಯಲ್ಲಿ ಒಳಗೊಂಡಿರುವ ಮಾಹಿತಿ ಮತ್ತು ಸತ್ಯಗಳ ನಿಖರತೆಗೆ ಟಿವಿ9 ಜವಾಬ್ದಾರರಾಗಿರುವುದಿಲ್ಲ)