Daily Devotional: ಕಾರ್ತಿಕ ಮಾಸದಲ್ಲಿ ದೀಪದಾನದ ಮಹತ್ವ ಮತ್ತು ಪ್ರಯೋಜನ

ಕಾರ್ತಿಕ ಮಾಸದಲ್ಲಿ ದೀಪದಾನದ ಮಹತ್ವ ಮತ್ತು ಪ್ರಯೋಜನಗಳ ಬಗ್ಗೆ ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯ ಭಕ್ತಿ ಕಾರ್ಯಕ್ರಮದಲ್ಲಿ ವಿವರಿಸಿದ್ದಾರೆ. ಗುರೂಜಿಯವರು ಹೇಳುವಂತೆ, ಕಾರ್ತಿಕ ಮಾಸವು ಹಿಂದೂ ಸಂಪ್ರದಾಯದಲ್ಲಿ ಅತ್ಯಂತ ಪವಿತ್ರವಾದ ತಿಂಗಳು. ಈ ಮಾಸದಲ್ಲಿ ದೀಪಾರಾಧನೆ ಮತ್ತು ಪವಿತ್ರ ಸ್ನಾನಗಳಿಗೆ ವಿಶೇಷ ಪ್ರಾಶಸ್ತ್ಯವನ್ನು ನೀಡಲಾಗಿದೆ. ನದಿಗಳಲ್ಲಿ, ಪವಿತ್ರ ತೀರ್ಥಕ್ಷೇತ್ರಗಳಲ್ಲಿ ಅಥವಾ ದೇವಾಲಯಗಳ ಹತ್ತಿರ ಮಾಡುವ ಸ್ನಾನವು ಪುಣ್ಯಪ್ರದವೆಂದು ನಂಬಲಾಗಿದೆ. ಇದರ ಜೊತೆಗೆ, ದೀಪಾರಾಧನೆಗೂ ಅತೀವ ಮಹತ್ವವನ್ನು ನೀಡಲಾಗುತ್ತದೆ. ಕಾರ್ತಿಕ ಮಾಸದಲ್ಲಿ, ಮನೆಯಲ್ಲಿ ದೀಪವನ್ನು ಸದಾಕಾಲ ಆರದಂತೆ ಉರಿಸುವುದು ಅತಿ ಶ್ರೇಷ್ಠ ಕಾರ್ಯವೆಂದು ಪರಿಗಣಿಸಲಾಗಿದೆ. ಈ ಆಚರಣೆಯು ಮನೆಯಲ್ಲಿ ಸಮೃದ್ಧಿ ಮತ್ತು ಮಂಗಳವನ್ನು ತರುತ್ತದೆ ಎಂದು ನಂಬಲಾಗಿದೆ.

ಶಿವನ ಕೃಪೆಗೆ ಪಾತ್ರವಾಗಲು ಈ ಮಾಸವು ಉತ್ತಮ ಅವಕಾಶ ಒದಗಿಸುತ್ತದೆ. ಸೃಷ್ಟಿ, ಸ್ಥಿತಿ, ಲಯಗಳಿಗೆ ಕಾರಣನಾದ ಭಗವಾನ್ ಶಿವನ ಆಶೀರ್ವಾದವನ್ನು ಪಡೆಯುವುದರಿಂದ ಅಪಮೃತ್ಯು ಭಯವು ದೂರವಾಗುತ್ತದೆ. ಕಾರ್ತಿಕ ಮಾಸದಲ್ಲಿ ದೀಪದಾನಕ್ಕೆ ಅತಿ ಹೆಚ್ಚಿನ ಮಹತ್ವವಿದೆ. ದಾನಗಳಲ್ಲಿ ಅನ್ನದಾನ ಮತ್ತು ವಿದ್ಯಾದಾನದಂತೆ, ಕಾರ್ತಿಕ ಮಾಸದಲ್ಲಿ ದೀಪದಾನವು ಮಹಾಶ್ರೇಷ್ಠವಾದ ದಾನವೆಂದು ಪರಿಗಣಿಸಲಾಗಿದೆ. “ದಾನಂ ದಹತಿ ಪಾಪಂ” ಎಂಬ ಶಾಸ್ತ್ರೋಕ್ತಿ ಪ್ರಕಾರ, ದಾನವು ಪಾಪಗಳನ್ನು ನಾಶಪಡಿಸುತ್ತದೆ. ಅದರಲ್ಲೂ ದೀಪದಾನವು ವಿಶೇಷವಾಗಿ ಪಾಪಗಳನ್ನು ನಿವಾರಿಸುತ್ತದೆ ಎಂದು ಹೇಳಲಾಗುತ್ತದೆ.

ವಿಡಿಯೋ ಇಲ್ಲಿದೆ ನೋಡಿ:

“ಏಕ ಸರ್ವ ದಾನಾನಿ ದೀಪದಾನಂ ತದೈಕತಃ” ಎಂಬ ವಚನದಂತೆ, ಎಲ್ಲಾ ದಾನಗಳಿಗಿಂತಲೂ ದೀಪದಾನವು ಅತ್ಯಂತ ಶ್ರೇಷ್ಠವಾದುದು. ದಾನ ನೀಡುವ ದೀಪಗಳು ಮಣ್ಣಿನದ್ದಾಗಿರಬಹುದು, ಹಿತ್ತಾಳೆಯದ್ದಾಗಿರಬಹುದು, ಅಥವಾ ತಾಮ್ರದದ್ದಾಗಿರಬಹುದು. ತಮ್ಮ ಶಕ್ತ್ಯಾನುಸಾರ ಈ ಮಾಸದಲ್ಲಿ ದೀಪಗಳನ್ನು ದಾನ ಮಾಡುವುದು ಅತ್ಯುತ್ತಮ. ಎರಡು, ಮೂರು, ನಾಲ್ಕು ಅಥವಾ ಐದು ದೀಪಗಳನ್ನು ದಾನ ಮಾಡಬಹುದು. ದಂಪತಿಗಳು ಜೋಡಿ ದೀಪಗಳನ್ನು ದಾನ ಮಾಡುವುದರಿಂದ ವಿಶೇಷ ಫಲಗಳನ್ನು ಪಡೆಯುತ್ತಾರೆ ಎಂದು ನಂಬಲಾಗಿದೆ.

ಇದನ್ನೂ ಓದಿ: ಬಡ್ಡಿ ವ್ಯಾಪಾರ ಮಾಡುವುದು ಶುಭವೇ, ಅಶುಭವೇ? ಧರ್ಮಶಾಸ್ತ್ರಗಳು ಹೇಳುವುದೇನು?

ದೀಪದಾನದಿಂದ ಲಭಿಸುವ ಪ್ರಯೋಜನಗಳು ಹಲವಾರು. ಸಂತಾನಾಪೇಕ್ಷಿಗಳು ಸಂತಾನ ಭಾಗ್ಯವನ್ನು, ಐಶ್ವರ್ಯಾಪೇಕ್ಷಿಗಳು ಸಂಪತ್ತು ಮತ್ತು ಸಮೃದ್ಧಿಯನ್ನು ಪಡೆಯುತ್ತಾರೆ. ಕುಟುಂಬದಲ್ಲಿ ಸುಖ-ಶಾಂತಿ, ನೆಮ್ಮದಿ ಹೆಚ್ಚುತ್ತದೆ. ಅನಾರೋಗ್ಯ ಪೀಡಿತರು ಉತ್ತಮ ಆರೋಗ್ಯವನ್ನು ಪಡೆಯುತ್ತಾರೆ. ಈ ಮಾಸದಲ್ಲಿ, ವಿಶೇಷವಾಗಿ ಸೋಮವಾರದಂದು, ದೇವಾಲಯಗಳಲ್ಲಿ ದೀಪದಾನ ಮಾಡುವುದು ಹೆಚ್ಚು ಪುಣ್ಯಕರ. ದೀಪಗಳನ್ನು ದಾನ ಮಾಡುವಾಗ ಪಾತ್ರರಿಗೆ ದಾನ ಮಾಡುವುದು ಮುಖ್ಯ. ಹಿತ್ತಾಳೆಯ ಎರಡು ದೀಪಗಳನ್ನು ತೆಗೆದುಕೊಂಡು, ಅವುಗಳಿಗೆ ಪೂಜೆ ಮಾಡಿ, ದೇವತಾ ಕ್ಷೇತ್ರದಲ್ಲಿ ಅರ್ಹ ವ್ಯಕ್ತಿಗೆ ದಾನ ಮಾಡಬಹುದು. ಅಪಾತ್ರದಾನವನ್ನು ಮಾಡಬಾರದು.

ದೀಪದಾನದ ಜೊತೆಗೆ, ಗೋಧಿ ಹಿಟ್ಟಿನ ದೀಪ, ಅಕ್ಕಿ ಹಿಟ್ಟಿನ ದೀಪ ಅಥವಾ ಮಣ್ಣಿನ ದೀಪಗಳನ್ನು ಬೆಳಗಿಸುವುದು ಶುಭಕರ. ಬಿಲ್ವ ವೃಕ್ಷಕ್ಕೆ ನೀರೆರೆದು ಅಲ್ಲಿ ದೀಪವಿಡುವುದು, ಹಸುವಿಗೆ ದೀಪದಿಂದ ಆರತಿ ಮಾಡುವುದು ಇಂತಹ ಅನೇಕ ಪುಣ್ಯ ಕಾರ್ಯಗಳನ್ನು ಕಾರ್ತಿಕ ಮಾಸದಲ್ಲಿ ಮಾಡಬಹುದು. ಈ ಎಲ್ಲಾ ಕ್ರಿಯೆಗಳು “ಶುಭಂ ಕರೋತಿ ಕಲ್ಯಾಣಂ ಆರೋಗ್ಯಂ ಧನಸಂಪದ” ಎಂಬ ಸ್ತೋತ್ರದ ಅರ್ಥದಂತೆ ಶುಭವನ್ನು, ಕಲ್ಯಾಣವನ್ನು, ಆರೋಗ್ಯವನ್ನು ಮತ್ತು ಸಂಪತ್ತನ್ನು ತರುತ್ತವೆ. ಅಲ್ಲದೆ, “ಶತ್ರು ಬುದ್ಧಿ ವಿನಾಶನಾಯ ದೀಪರ್ ಜ್ಯೋತಿ ನಮೋಸ್ತುತೇ” ಎಂದು ಸ್ಮರಿಸುವುದರಿಂದ ನಕಾರಾತ್ಮಕ ಶಕ್ತಿಗಳು ದೂರವಾಗುತ್ತವೆ. ಸಾಧ್ಯವಾದಷ್ಟು ದೀಪದಾನ ಮಾಡಿ ಉತ್ತಮ ಫಲಗಳನ್ನು ಪಡೆಯಿರಿ. ಕಾರ್ತಿಕ ಮಾಸದಲ್ಲಿ ಕನಿಷ್ಠ ಮೂರು ಸೋಮವಾರಗಳಂದು ದೀಪದಾನ ಮಾಡಿದವರು ಸಾಕ್ಷಾತ್ ಶಿವನ ಕೃಪೆಗೆ ಪಾತ್ರರಾಗುತ್ತಾರೆ ಎಂದು ಗುರೂಜಿ ಹೇಳಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ