12 ಬೌಲರುಗಳು 653 ರನ್ ಸಿಡಿಸಿದರು: ಕೆಳ ಕ್ರಮಾಂಕದ ಬ್ಯಾಟ್ಸ್​ಮನ್​ಗಳ ಅಬ್ಬರದಲ್ಲಿ ಗೆದ್ದವರ್ಯಾರು?

ಯಾವುದೇ ಕ್ರಿಕೆಟ್​ ತಂಡವಿರಲಿ, ಆ ತಂಡಗಳಿಗೆ ಅಗ್ರ ಬ್ಯಾಟ್ಸ್‌ಮನ್‌ಗಳೇ ದೊಡ್ಡ ಶಕ್ತಿ. ಹೀಗಾಗಿ ಪ್ರತಿ ತಂಡಗಳ ಬಲಿಷ್ಠತೆಯನ್ನು ನೋಡುವಾಗ ಅಗ್ರ ಕ್ರಮಾಂಕದಲ್ಲಿರುವ ಬ್ಯಾಟ್ಸ್​ಮನ್​ಗಳ ಪಟ್ಟಿಯತ್ತ ಗಮನಹರಿಸುತ್ತೇವೆ. ಆದರೆ ಇಲ್ಲೊಂದು ಪಂದ್ಯದಲ್ಲಿ ಇಡೀ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ್ದು ಕೆಳ ಕ್ರಮಾಂಕದ ಬ್ಯಾಟ್ಸ್​ಮನ್​ಗಳು ಎಂಬುದು ವಿಶೇಷ. ಅದು ಬೌಲರುಗಳು ಬ್ಯಾಟ್ಸ್​ಮನ್​ಗಳಾಗಿ ರನ್​ ಮಳೆ ಹರಿಸಿರುವುದು ಮತ್ತೊಂದು ವಿಶೇಷ.

ಹೌದು, ಇಂಗ್ಲೆಂಡ್‌ನಲ್ಲಿ ನಡೆಯುತ್ತಿರುವ ರಾಯಲ್ ಲಂಡನ್ ಒನ್ ಡೇ ಕಪ್ ಟೂರ್ನಮೆಂಟ್‌ನಲ್ಲಿ ಲೀಸೆಸ್ಟರ್‌ಶೈರ್ ಮತ್ತು ಸೊಮರ್‌ಸೆಟ್ ನಡುವಣ ಪಂದ್ಯವು ರೋಚಕತೆ ಸಾಕ್ಷಿಯಾಗಿತ್ತು. ಈ ಪಂದ್ಯದಲ್ಲಿ ಉಭಯ ತಂಡಗಳ ಒಟ್ಟು 12 ಬೌಲರ್‌ಗಳು ಕಲೆಹಾಕಿದ್ದು ಬರೋಬ್ಬರಿ 653 ರನ್​ಗಳು.

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಸೊಮರ್​ಸೆಟ್ ತಂಡವು 50 ಓವರ್​ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 326 ರನ್ ಕಲೆಹಾಕಿತು. ಈ ಬೃಹತ್ ಮೊತ್ತದಲ್ಲಿ ಕೊಡುಗೆ ನೀಡಿದ್ದು 6ನೇ ಮತ್ತು ಏಳನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಬೌಲರುಗಳು ಎಂಬುದು ವಿಶೇಷ. ಆರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಜಾರ್ಜ್ ಬಾರ್ಟ್ಲೆಟ್ ಸಿಡಿಲಬ್ಬರದ ಶತಕ ಸಿಡಿಸಿ ಮಿಂಚಿದ್ದರು. 121 ನಿಮಿಷಗಳ ಕಾಲ ಬ್ಯಾಟಿಂಗ್ ಮಾಡಿದ ಜಾರ್ಜ್​ 89 ಎಸೆತಗಳಲ್ಲಿ 4 ಬೌಂಡರಿ ಮತ್ತು 8 ಸಿಕ್ಸರ್‌ಗಳನ್ನು ಒಳಗೊಂಡಂತೆ 108 ರನ್ ಚಚ್ಚಿದ್ದರು. ಜಾರ್ಜ್​ಗೆ ಸಾಥ್ ನೀಡಿದ 7 ನೇ ಕ್ರಮಾಂಕದ ಬ್ಯಾಟ್ಸ್​ಮನ್ ಜಾರ್ಜ್ ಥಾಮಸ್ 77 ಎಸೆತಗಳಲ್ಲಿ 75 ರನ್ ಬಾರಿಸಿದರು. ಇವರ ಈ ಅಮೋಘ ಆಟದ ಫಲವಾಗಿ ಸೊಮರ್​ಸೆಟ್ ತಂಡವು 326 ರನ್​ ಕಲೆಹಾಕಿತು.

ಈ ಬೃಹತ್ ಮೊತ್ತವನ್ನು ಬೆನ್ನತ್ತಿದ ಲೀಸೆಸ್ಟರ್‌ಶೈರ್ ತಂಡದ ಪರಿಸ್ಥಿತಿ ಕೂಡ ಭಿನ್ನವಾಗಿರಲಿಲ್ಲ. ಅಗ್ರ ಕ್ರಮಾಂಕದ ಬ್ಯಾಟ್ಸ್​ಮನ್​ಗಳು ಕೈಕೊಟ್ಟರು. ಇತ್ತ ನಾಲ್ಕನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ತಂಡದ ನಾಯಕ ಲೆವಿಸ್ ಹಿಲ್ಸ್ ಅದ್ಭುತ ಶತಕ ಬಾರಿಸಿದರು. 106 ಎಸೆತಗಳಲ್ಲಿ 107 ರನ್ ಗಳಿಸಿ ತಂಡವನ್ನು ಆರಂಭಿಕ ಆಘಾತದಿಂದ ಪಾರು ಮಾಡಿದರು. ಇದಾಗ್ಯೂ ಮತ್ತೆ ತಂಡ ಕುಸಿತಕ್ಕೊಳಗಾಯಿತು. ಈ ಹಂತದಲ್ಲಿ 7ನೇ ಕ್ರಮಾಂಕದ ಬ್ಯಾಟ್ ಬೀಸಿದ ಲೂಯಿಸ್ ಕಿಂಬರ್ 57 ಎಸೆತಗಳಲ್ಲಿ 4 ಬೌಂಡರಿ ಮತ್ತು 5 ಸಿಕ್ಸರ್‌ಗಳೊಂದಿಗೆ 85 ರನ್ ಸಿಡಿಸಿದರು. ಪರಿಣಾಮ 5 ಓವರ್​ಗಳು ಬಾಕಿ ಇರುವಂತೆ ಲೀಸೆಸ್ಟರ್‌ಶೈರ್ ತಂಡವು 327 ರನ್​ಗಳ ಗುರಿ ಮುಟ್ಟಿತು. ಉಭಯ ತಂಡಗಳ ಕೆಳ ಕ್ರಮಾಂಕದ ಬ್ಯಾಟ್ಸ್​ಮನ್​ ಭರ್ಜರಿ ಪ್ರದರ್ಶನದೊಂದಿಗೆ ರಾಯಲ್ ಲಂಡನ್ ಒನ್ ಡೇ ಕಪ್ ಎಲ್ಲರ ಗಮನ ಸೆಳೆಯಿತು. ಅಲ್ಲದೆ ಲಂಡನ್ ಕೌಂಟಿ ಇತಿಹಾಸ ಅಪರೂಪದ ಪಂದ್ಯ ಎಂಬ ಹೆಗ್ಗಳಿಕೆಗೂ ಈ ಪಂದ್ಯ ಸಾಕ್ಷಿಯಾಯಿತು.

ಇದನ್ನೂ ಓದಿ: India vs England 2nd Test: ಟೀಮ್ ಇಂಡಿಯಾದಲ್ಲಿ 2 ಬದಲಾವಣೆ ಸಾಧ್ಯತೆ: ಪ್ಲೇಯಿಂಗ್ 11 ಹೀಗಿರಲಿದೆ

ಇದನ್ನೂ ಓದಿ: India vs England: 2ನೇ ಟೆಸ್ಟ್ ವೇಳೆ ಮಳೆಯಾಗಲಿದೆಯಾ? ಇಲ್ಲಿದೆ 5 ದಿನಗಳ ಸಂಪೂರ್ಣ ಹವಾಮಾನ ವರದಿ

(cricket, cricket news, england cricket, Royal London One Day Cup)