Asia Cup 2022: ಶಾಹೀನ್ ಶಾ ಆಫ್ರಿದಿ ಬಳಿಕ ಪಾಕ್ ತಂಡದ ಮತ್ತೊಬ್ಬ ಬೌಲರ್ ಏಷ್ಯಾಕಪ್​ನಿಂದ ಔಟ್..!

ಏಷ್ಯಾಕಪ್ 2022 (Asia Cup 2022)ರ ಆರಂಭಕ್ಕೂ ಮೊದಲು, ಪಾಕಿಸ್ತಾನ ಕ್ರಿಕೆಟ್ ತಂಡದಲ್ಲಿನ ತೊಂದರೆಗಳು ಕಡಿಮೆಯಾಗುವಂತೆ ತೋರುತ್ತಿಲ್ಲ. ಏಷ್ಯಾಕಪ್ ಆರಂಭಕ್ಕೂ ಮುನ್ನ ತಂಡದ ವೇಗದ ಬೌಲರ್ ಶಾಹೀನ್ ಶಾ ಆಫ್ರಿದಿ (Shaheen Shah Afridi) ಇಂಜುರಿಗೊಂಡು ಇಡೀ ಟೂರ್ನಿಯಿಂದ ಹೊರಬಿದ್ದಿದ್ದರು. ಅವರ ಅಲಭ್ಯತೆಯ ಆಘಾತದಿಂದ ಇನ್ನೂ ಹೊರಬರದ ಪಾಕ್ ತಂಡಕ್ಕೆ ಮತ್ತೊಂದು ಶಾಕ್ ಎದುರಾಗಿದೆ. ಅದೆನೆಂದರೆ ಪಾಕಿಸ್ತಾನ ತಂಡದ ಮತ್ತೊಬ್ಬ ವೇಗದ ಬೌಲರ್ ಇಂಜುರಿಗೊಳಗಾಗಿದ್ದು ಇಡೀ ಏಷ್ಯಾಕಪ್​ನಿಂದ ಹೊರಬಿದ್ದಿದ್ದಾರೆ. ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಶುಕ್ರವಾರ, ಆಗಸ್ಟ್ 26 ರಂದು ಹೇಳಿಕೆ ನೀಡಿದ್ದು, ತಂಡದ ಯುವ ವೇಗದ ಬೌಲರ್ ಮೊಹಮ್ಮದ್ ವಾಸಿಮ್ ಜೂನಿಯರ್ (Mohammad Wasim) ಗಾಯದ ಸಮಸ್ಯೆಯಿಂದಾಗಿ ಏಷ್ಯಾಕಪ್‌ನಲ್ಲಿ ಆಡಲು ಸಾಧ್ಯವಾಗುವುದಿಲ್ಲ ಎಂದು ಹೇಳಿದೆ. ಅಲ್ಲದೆ ಅವರ ಬದಲಿಗೆ ಅನುಭವಿ ವೇಗದ ಬೌಲರ್ ಹಸನ್ ಅಲಿಗೆ ತಂಡದಲ್ಲಿ ಅವಕಾಶ ನೀಡಲಾಗಿದೆ.

ಎರಡು ದಿನಗಳ ಹಿಂದೆ ಪಾಕಿಸ್ತಾನ ತಂಡದ ಅಭ್ಯಾಸದ ವೇಳೆ ವಾಸಿಂ ಗಾಯಗೊಂಡಿದ್ದರು, ನಂತರ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಅಂದಿನಿಂದ ವಾಸಿಂ ತಂಡದಿಂದ ನಿರ್ಗಮನದ ಭೀತಿ ಎದುರಾಗಿತ್ತು. ಪಿಸಿಬಿ ತನ್ನ ಹೇಳಿಕೆಯಲ್ಲಿ, ಬುಧವಾರ ಪಾಕಿಸ್ತಾನ ತಂಡ ಅಭ್ಯಾಸ ನಡೆಸುವ ಸಮಯದಲ್ಲಿ ಬೌಲಿಂಗ್ ಮಾಡುವಾಗ ವಾಸಿಂ ಗಾಯಗೊಂಡಿದ್ದರು. ನಂತರ ತಂಡದ ವೈದ್ಯಕೀಯ ಸಿಬ್ಬಂದಿ ಅವರನ್ನು ಪರೀಕ್ಷಿಸಿ, ದುಬೈನಲ್ಲಿ MRI ಸ್ಕ್ಯಾನ್​ಗೆ ಒಳಪಡಿಸಿತ್ತು. ಸ್ಕ್ಯಾನಿಂಗ್​ನಲ್ಲಿ ಬಂದ ವರದಿಯ ಆದಾರದ ಮೇಲೆ ಈಗ ಅವರು ಗಾಯಗೊಂಡಿರುವುದು ದೃಢಪಡಿದ್ದು, ಅವರನ್ನು ಇಡೀ ಟೂರ್ನಿಯಿಂದ ಕೈಬಿಡಲಾಗಿದೆ ಎಂದು ಹೇಳಿದೆ.

ಕೊನೆಗೂ ಹಸನ್ ಅಲಿಗೆ ಅವಕಾಶ ಸಿಕ್ಕಿತು

ವಾಸಿಂ ಅವರ ಫಿಟ್‌ನೆಸ್ ಮತ್ತು ಪುನರ್ವಸತಿ ಬಗ್ಗೆ ಮಂಡಳಿಯು ನಿರಂತರ ನಿಗಾ ಇರಿಸಲಿದೆ ಎಂದು ಪಿಸಿಬಿ ಹೇಳಿದೆ. ಇದರೊಂದಿಗೆ ಪಾಕ್ ಬೋರ್ಡ್ ಅನುಭವಿ ವೇಗಿ ಹಸನ್ ಅಲಿ ಅವರನ್ನು ತಂಡಕ್ಕೆ ಸೇರಿಸಿಕೊಂಡಿದೆ. ಈ ಹಿಂದೆ ಟೂರ್ನಿಗೆ ಆಯ್ಕೆಯಾಗಿದ್ದ ತಂಡದಲ್ಲಿ ಹಸನ್ ಅಲಿಗೆ ಸ್ಥಾನ ನೀಡಿರಲಿಲ್ಲ. ಈ ಬಗ್ಗೆ ಕೆಲವರು ಅಚ್ಚರಿ ವ್ಯಕ್ತಪಡಿಸಿದ್ದರು.

ಶಾಹೀನ್​ಗೂ ಇಂಜುರಿ

ಗಾಯದಿಂದಾಗಿ ಒಂದು ವಾರದೊಳಗೆ ಪಾಕಿಸ್ತಾನ ತನ್ನ ಎರಡನೇ ಬೌಲರ್ ಅನ್ನು ಕಳೆದುಕೊಂಡಿದೆ. ಕಳೆದ ವಾರ, ತಂಡದ ಲೆಜೆಂಡರಿ ವೇಗಿ ಶಾಹೀನ್ ಶಾ ಆಫ್ರಿದಿ ಮೊಣಕಾಲಿನ ಗಾಯದಿಂದಾಗಿ ಪಂದ್ಯಾವಳಿಯಿಂದ ಹೊರಗುಳಿದಿದ್ದರು. ಶಾಹೀನ್ ಬದಲಿಗೆ ಪಾಕಿಸ್ತಾನ ಮೊಹಮ್ಮದ್ ಹಸ್ನೈನ್ ಅವರನ್ನು ತಂಡಕ್ಕೆ ಆಯ್ಕೆ ಮಾಡಿತ್ತು. ಆದರೆ, ಇದೀಗ ಹಸನ್ ಅಲಿ ಆಗಮನದಿಂದ ಪಾಕ್ ಬೌಲಿಂಗ್​ನಲ್ಲಿ ಅನುಭವಕ್ಕೆ ಸ್ಥಾನ ಸಿಕ್ಕಿದೆ. ಏಕೆಂದರೆ ಶಾಹೀನ್ ಅನುಪಸ್ಥಿತಿಯ ನಂತರ ತಂಡ ಕೇವಲ ನಸೀಮ್ ಶಾ, ಹ್ಯಾರಿಸ್ ರೌಫ್ ಮತ್ತು ಮೊಹಮ್ಮದ್ ವಾಸಿಂ ಮೇಲೆ ಅವಲಂಬಿತವಾಗಿತ್ತಯ. ಆದರೆ ಈ ಮೂವರು ಆಟಗಾರರು ಇದುವರೆಗೆ ಹೆಚ್ಚು ಪಂದ್ಯಗಳನ್ನು ಆಡಿರಲಿಲ್ಲ.