AUSW vs INDW: ಆಸ್ಟ್ರೇಲಿಯಾ ವಿರುದ್ಧ ಟೀಮ್ ಇಂಡಿಯಾಗೆ ಹೀನಾಯ ಸೋಲು

ಬ್ರಿಸ್ಬೇನ್​​ನಲ್ಲಿ ನಡೆದ ಭಾರತ ಮಹಿಳಾ ತಂಡದ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಮಹಿಳಾ ತಂಡ ಭರ್ಜರಿ ಜಯ ಸಾಧಿಸಿದೆ. ಅಲೆನ್ ಬಾರ್ಡರ್ ಫೀಲ್ಡ್ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಟೀಮ್ ಇಂಡಿಯಾ ನಾಯಕಿ ಹರ್ಮನ್​ಪ್ರೀತ್ ಕೌರ್ ಬ್ಯಾಟಿಂಗ್ ಆಯ್ದುಕೊಂಡಿದ್ದರು. ಆದರೆ ಭಾರತ ತಂಡದ ನಾಯಕಿಯ ನಿರ್ಧಾರ ತಪ್ಪು ಎಂಬುದನ್ನು ಆಸ್ಟ್ರೇಲಿಯಾ ಬೌಲರ್​​ಗಳು ಪವರ್​​ಪ್ಲೇನಲ್ಲೇ ನಿರೂಪಿಸಿದರು.

ಅತ್ಯುತ್ತಮ ದಾಳಿ ಸಂಘಟಿಸಿದ ಆಸೀಸ್ ವೇಗಿಗಳು ಮೊದಲ 10 ಓವರ್​​ನಲ್ಲೇ ಸ್ಮೃತಿ ಮಂಧಾನ (8), ಪ್ರಿಯಾ ಪುನಿಯಾ (3) ಹಾಗೂ ಹರ್ಲೀನ್ ಡಿಯೋಲ್ (19) ವಿಕೆಟ್ ಕಬಳಿಸಿದ್ದರು. ಇನ್ನು ಮಧ್ಯಮ ಕ್ರಮಾಂಕದಲ್ಲಿ ಕಣಕ್ಕಿಳಿದ ನಾಯಕಿ ಹರ್ಮನ್​ಪ್ರೀತ್ ಕೌರ್ 17 ರನ್ ಬಾರಿಸಿ ಔಟಾದರೆ, ಜೆಮಿಮಾ ರೊಡ್ರಿಗಾಸ್ 23 ರನ್​​ಗಳಿಸಿ ವಿಕೆಟ್ ಒಪ್ಪಿಸಿದರು.

ಆ ಬಳಿಕ ಬಂದ ರಿಚಾ ಘೋಷ್ 14 ರನ್​ಗಳಿಸಿದ್ದು ಬಿಟ್ಟರೆ, ಉಳಿದ ಬ್ಯಾಟರ್​​ಗಳು ಒಂದಂಕಿ ಮೊತ್ತಗಳಿಸಲಷ್ಟೇ ಶಕ್ತರಾದರು. ಪರಿಣಾಮ ಟೀಮ್ ಇಂಡಿಯಾ 34.2 ಓವರ್​ಗಳಲ್ಲಿ 100 ರನ್​ಗಳಿಸಿ ಆಲೌಟ್ ಆಯಿತು.

50 ಓವರ್​ಗಳಲ್ಲಿ 101 ರನ್​ಗಳ ಸುಲಭ ಗುರಿ ಬೆನ್ನತ್ತಿದ ಆಸ್ಟ್ರೇಲಿಯಾ ತಂಡಕ್ಕೆ ಫೋಬೆ ಲಿಚ್‌ಫೀಲ್ಡ್ ಹಾಗೂ ಜಾರ್ಜಿಯಾ ವೋಲ್ ಉತ್ತಮ ಆರಂಭ ಒದಗಿಸಿದರು. ಮೊದಲ ವಿಕೆಟ್​ಗೆ 48 ರನ್​​ಗಳಿಸಿದ ಬಳಿಕ ಫೋಬೆ (35) ಔಟಾದರು. ಈ ವೇಳೆ ಕಣಕ್ಕಿಳಿದ ಎಲ್ಲಿಸ್ ಪೆರ್ರಿ (1) ಹಾಗೂ ಬೆತ್ ಮೂನಿ (1) ರೇಣುಕಾ ಸಿಂಗ್ ಎಸೆತಗಳಲ್ಲಿ ವಿಕೆಟ್ ಒಪ್ಪಿಸಿದರು.

ಟೀಮ್ ಇಂಡಿಯಾ ಬ್ಯಾಕ್ ಟು ಬ್ಯಾಕ್ 3 ವಿಕೆಟ್ ಕಬಳಿಸಿದರೂ ಮತ್ತೊಂದೆಡೆ ಜಾರ್ಜಿಯಾ ವೋಲ್ ಕ್ರೀಸ್​ ಕಚ್ಚಿ ನಿಂತಿದ್ದರು. ಅಲ್ಲದೆ 42 ಎಸೆತಗಳಲ್ಲಿ ಅಜೇಯ 46 ರನ್ ಬಾರಿಸಿ 16.2  ಓವರ್​​ಗಳಲ್ಲಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಈ ಮೂಲಕ ಆಸ್ಟ್ರೇಲಿಯಾ ತಂಡವು 5 ವಿಕೆಟ್​​ಗಳ ಭರ್ಜರಿ ಜಯ ಸಾಧಿಸಿದೆ.

ಭಾರತ ಮಹಿಳಾ ತಂಡ– 100 (34.2)

ಆಸ್ಟ್ರೇಲಿಯಾ ಮಹಿಳಾ ತಂಡ– 102/5 (16.2)

ಆಸ್ಟ್ರೇಲಿಯಾ ಪ್ಲೇಯಿಂಗ್ 11: ಫೋಬೆ ಲಿಚ್‌ಫೀಲ್ಡ್ , ಜಾರ್ಜಿಯಾ ವೋಲ್ , ಎಲ್ಲಿಸ್ ಪೆರ್ರಿ , ಬೆತ್ ಮೂನಿ (ವಿಕೆಟ್ ಕೀಪರ್) , ಅನ್ನಾಬೆಲ್ ಸದರ್‌ಲ್ಯಾಂಡ್ , ಆಶ್ಲೀಗ್ ಗಾರ್ಡ್ನರ್ , ತಹ್ಲಿಯಾ ಮೆಕ್‌ಗ್ರಾತ್ (ನಾಯಕಿ) , ಜಾರ್ಜಿಯಾ ವೇರ್‌ಹ್ಯಾಮ್ , ಅಲಾನಾ ಕಿಂಗ್ , ಕಿಮ್ ಗಾರ್ತ್ , ಮೇಗನ್ ಶುಟ್.

ಇದನ್ನೂ ಓದಿ: ಶರ ವೇಗದ ಸೆಂಚುರಿ ಸಿಡಿಸಿ ವಿಶ್ವ ದಾಖಲೆ ಬರೆದ ಅಭಿಷೇಕ್ ಶರ್ಮಾ

ಭಾರತ ಪ್ಲೇಯಿಂಗ್ 11: ಪ್ರಿಯಾ ಪುನಿಯಾ , ಸ್ಮೃತಿ ಮಂಧಾನ , ಹರ್ಲೀನ್ ಡಿಯೋಲ್ , ಹರ್ಮನ್​ಪ್ರೀತ್ ಕೌರ್ (ನಾಯಕಿ) , ಜೆಮಿಮಾ ರೊಡ್ರಿಗಸ್ , ರಿಚಾ ಘೋಷ್ (ವಿಕೆಟ್ ಕೀಪರ್) , ದೀಪ್ತಿ ಶರ್ಮಾ , ಟಿಟಾಸ್ ಸಾಧು , ಪ್ರಿಯಾ ಮಿಶ್ರಾ , ಸೈಮಾ ಠಾಕೋರ್ , ರೇಣುಕಾ ಠಾಕೂರ್ ಸಿಂಗ್.

Published On - 2:15 pm, Thu, 5 December 24