ಮೊನಚಿಲ್ಲದ ಅರ್ಷದೀಪ್ ಸಿಂಗ್​ರ ಡೆತ್ ಓವರ್

ಟಿ20 ಕ್ರಿಕೆಟ್​ನಲ್ಲಿ ಡೆತ್ ಓವರ್​ಗಳು ಇಡೀ ಪಂದ್ಯದ ಚಿತ್ರಣ ಬದಲಿಸಬಹುದು. ಇದಕ್ಕೆ ಅತ್ಯುತ್ತಮ ಸಾಕ್ಷಿ, ಕಳೆದ ಟಿ20 ವಿಶ್ವಕಪ್​ನಲ್ಲಿ ಪಾಕಿಸ್ತಾನ್ ವಿರುದ್ಧ ವಿರಾಟ್ ಕೊಹ್ಲಿ (Virat Kohli) ಹಾಗೂ ಟೀಮ್ ಇಂಡಿಯಾ ಆಟಗಾರರು ಕೊನೆಯ 18 ಎಸೆತಗಳಲ್ಲಿ 48 ರನ್ ಸಿಡಿಸಿ ರೋಚಕ ಗೆಲುವು ದಾಖಲಿಸಿರುವುದು. ಅತ್ತ ಪಾಕ್ ತಂಡದ ಡೆತ್ ಓವರ್ ಸ್ಪೆಷಲಿಸ್ಟ್​ಗಳ ಬೆಂಡೆತ್ತಿದ ಟೀಮ್ ಇಂಡಿಯಾಗೂ ಅದೇ ಸಮಸ್ಯೆ ಕಾಡುತ್ತಿರುವುದು ಸುಳ್ಳಲ್ಲ. ಇದಕ್ಕೆ ಸಾಕ್ಷಿಯೇ ಅರ್ಷದೀಪ್ ಸಿಂಗ್ ಅವರ ಈ ಅಂಕಿ ಅಂಶಗಳು.

ಐರ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಅರ್ಷದೀಪ್ ಸಿಂಗ್ 18ನೇ ಮತ್ತು 20ನೇ ಓವರ್ ಬೌಲಿಂಗ್ ಮಾಡಿದ್ದರು. 17ನೇ ಓವರ್ ಮುಕ್ತಾಯದ ವೇಳೆಗೆ ಐರ್ಲೆಂಡ್ ಕಲೆಹಾಕಿದ್ದು ಕೇವಲ 114 ರನ್​ಗಳು ಮಾತ್ರ. ಇನ್ನು 18ನೇ ಓವರ್​ನಲ್ಲಿ ಅರ್ಷದೀಪ್ ಸಿಂಗ್ ನೀಡಿದ್ದು ಕೇವಲ 2 ರನ್​ ಮಾತ್ರ.

ಆದರೆ ಇದೇ ಅರ್ಷದೀಪ್ ಸಿಂಗ್ 20ನೇ ಓವರ್​ನಲ್ಲಿ ಚಚ್ಚಿಸಿಕೊಂಡಿದ್ದು ಬರೋಬ್ಬರಿ 22 ರನ್​ಗಳು. ಹೀಗೆ 22 ರನ್​ಗಳನ್ನು ಕಲೆಹಾಕಿರುವುದು ಬ್ಯಾಟಿಂಗ್​ಗೆ ಇಳಿದ ಬೌಲರ್​ಗಳು ಎಂಬುದು ಇಲ್ಲಿ ಉಲ್ಲೇಖಾರ್ಹ.

ಪವರ್​ಪ್ಲೇನಲ್ಲಿ ಮಿಂಚುವ ಅರ್ಷದೀಪ್:

ಇಲ್ಲಿ ಕುತೂಹಲಕಾರಿ ವಿಷಯ ಎಂದರೆ ಅರ್ಷದೀಪ್ ಸಿಂಗ್ ಪವರ್​ಪ್ಲೇನಲ್ಲಿ ಅತ್ಯುತ್ತಮವಾಗಿ ಬೌಲಿಂಗ್ ಮಾಡುತ್ತಾರೆ. ಆದರೆ ಕೊನೆಯ ಓವರ್​ಗಳಲ್ಲಿ ಅತೀ ಹೆಚ್ಚು ರನ್​ ನೀಡುತ್ತಾರೆ ಎಂಬುದು. ಟೀಮ್ ಇಂಡಿಯಾ ಪರ ಇದುವರೆಗೆ 32 ಟಿ20 ಪಂದ್ಯಗಳಲ್ಲಿ ಬೌಲಿಂಗ್ ಮಾಡಿರುವ ಅರ್ಷದೀಪ್ ಸಿಂಗ್ 19ನೇ ಮತ್ತು 20ನೇ ಓವರ್‌ನಲ್ಲಿ 12.73 ರ ಸರಾಸರಿಯಲ್ಲಿ ಒಟ್ಟು 244 ರನ್ ಬಿಟ್ಟು ಕೊಟ್ಟಿದ್ದಾರೆ. ಈ ವೇಳೆ ಒಟ್ಟು 15 ಸಿಕ್ಸ್​ಗಳನ್ನು ಕೂಡ ಹೊಡೆಸಿಕೊಂಡಿದ್ದಾರೆ.

ಡೆತ್ ಓವರ್​ನಲ್ಲಿ ಅರ್ಷದೀಪ್ ಸಿಂಗ್​ರನ್ನು ಬಳಸಿಕೊಳ್ಳಲು ಕಾರಣವೇನು?

ಯುವ ಎಡಗೈ ವೇಗಿ ಐಪಿಎಲ್​ನಲ್ಲಿ ಅತ್ಯುತ್ತಮ ಡೆತ್ ಓವರ್ ಸ್ಪೆಷಲಿಸ್ಟ್ ಆಗಿ ಗುರುತಿಸಿಕೊಂಡಿದ್ದರು. ಐಪಿಎಲ್‌ನಲ್ಲಿ ಕೊನೆಯ ನಾಲ್ಕು ಓವರ್‌ಗಳಲ್ಲಿ 8.98 ಎಕಾನಮಿ ರೇಟ್​ನಲ್ಲಿ ಮಾತ್ರ ರನ್ ನೀಡಿದ್ದಾರೆ. ಅಲ್ಲದೆ 28 ಇನಿಂಗ್ಸ್​ಗಳಲ್ಲಿ ಡೆತ್ ಓವರ್ ಮಾಡಿರುವ ಅರ್ಷದೀಪ್ ಸಿಂಗ್ ಒಟ್ಟು 27 ವಿಕೆಟ್​ಗಳನ್ನು ಪಡೆದಿದ್ದಾರೆ. ಇದೇ ಕಾರಣದಿಂದಾಗಿ ಟೀಮ್ ಇಂಡಿಯಾ ಡೆತ್ ಓವರ್​ ವೇಳೆ ಚೆಂಡನ್ನು ಅರ್ಷದೀಪ್ ಸಿಂಗ್​ಗೆ ನೀಡಲಾಗುತ್ತಿದೆ.

ಇದನ್ನೂ ಓದಿ: Virat Kohli: ವಿರಾಟ್ ಕೊಹ್ಲಿಯನ್ನು ಶೂನ್ಯಕ್ಕೆ ಔಟ್ ಮಾಡುವುದೇ ನನ್ನ ಗುರಿ: ನಸೀಮ್ ಶಾ

ಆದರೆ ಟೀಮ್ ಇಂಡಿಯಾ ಪರ ಕಣಕ್ಕಿಳಿಯುವಾಗ ಅರ್ಷದೀಪ್ ಸಿಂಗ್ 19ನೇ ಅಥವಾ 20ನೇ ಓವರ್​ನಲ್ಲಿ ದುಬಾರಿಯಾಗುತ್ತಿದ್ದಾರೆ. ಇದಕ್ಕೆ ಸಾಕ್ಷಿಯೇ 19ನೇ ಮತ್ತು 20ನೇ ಓವರ್​ಗಳಲ್ಲಿ 12.73 ರ ಸರಾಸರಿಯಲ್ಲಿ ರನ್ ಬಿಟ್ಟು ಕೊಟ್ಟಿರುವುದು. ಇದೀಗ ಟೀಮ್ ಇಂಡಿಯಾಗೆ ಬುಮ್ರಾ ಆಗಮನವಾಗಿದ್ದು, ಹೀಗಾಗಿ ಈ ಸಮಸ್ಯೆಗೆ ಪರಿಹಾರ ಸಿಗಲಿದೆಯಾ ಕಾದು ನೋಡಬೇಕಿದೆ.