Glenn Maxwell: ಅರ್ಧಶತಕ ಸಿಡಿಸಿದ ವೇಳೆ ಗ್ಲೆನ್ ಮ್ಯಾಕ್ಸ್ವೆಲ್ ಆರ್ಸಿಬಿ ಜೆರ್ಸಿ ತೋರಿಸಿ ಮಾಡಿದ್ದೇನೆ ನೋಡಿ
RR vs RCB, IPL 2021: ಬುಧವಾರದ ರಾಜಸ್ಥಾನ್ ರಾಯಲ್ಸ್ ವಿರುದ್ಧದ ಪಂದ್ಯದಲ್ಲಿ ಆರ್ಸಿಬಿಯ ಗ್ಲೆನ್ ಮ್ಯಾಕ್ಸ್ವೆಲ್ ಮ್ಯಾಚ್ ವಿನ್ನಿಂಗ್ ಪ್ರದರ್ಶನ ನೀಡಿದರು. ಇದೇವೇಳೇ ಮ್ಯಾಕ್ಸ್ವೆಲ್ ವಿಶೇಷ ಸಂಭ್ರಮಾಚರಣೆಯನ್ನೂ ಮಾಡಿದರು.
Updated on:Sep 30, 2021 | 2:19 PM
ಕಳೆದ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ (Indian Premier League) ಅತ್ಯಂತ ಕಳಪೆ ಪ್ರದರ್ಶನ ತೋರಿದ ಗ್ಲೆನ್ ಮ್ಯಾಕ್ಸ್ವೆಲ್ (Glenn Maxwell) ಅವರನ್ನು ಐಪಿಎಲ್ 2021ರ (IPL 2021) ಹರಾಜಿನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (Royal Challengers Bangalore) ತಂಡ ದೊಡ್ಡ ಮೊತ್ತ ಕೊಟ್ಟು ಖರೀದಿ ಮಾಡಿತು. ಇದಕ್ಕಾಗಿ ಕೆಲವರು ಆರ್ಸಿಬಿ (RCB) ಫ್ರಾಂಚೈಸಿಯನ್ನು ಹೀಯಾಳಿಸಿದ್ದೂ ಇದೆ. ಇದನ್ನೇ ಚಾಲೆಂಜ್ ಆಗಿ ಸ್ವೀಕರಿಸಿರುವ ಗ್ಲೆನ್ ಮ್ಯಾಕ್ಸ್ವೆಲ್, ಆರ್ಸಿಬಿ ತಮ್ಮ ಮೇಲಿಟ್ಟಿರುವ ನಂಬಿಕೆಯನ್ನು ಹುಸಿ ಮಾಡದೆ ಈ ಬಾರಿ ಅಬ್ಬರಿಸುತ್ತಿದ್ದಾರೆ. ಬೆಂಗಳೂರು (Bengaluru) ತಂಡಕ್ಕೆ ಜಯ ತಂದು ಕೊಡುವಲ್ಲಿ ಇವರು ಪ್ರಮುಖ ಪಾತ್ರವಹಿಸುತ್ತಿದ್ದಾರೆ. ಅಲ್ಲದೆ ಈ ಬಾರಿ ಆರ್ಸಿಬಿಗೆ ಚೊಚ್ಚಲ ಕಪ್ ಗೆಲ್ಲಿಸಿಕೊಡುವ ವಿಶ್ವಾಸವನ್ನೂ ಹೊಂದಿದ್ದಾರೆ. 11 ಪಂದ್ಯಗಳಲ್ಲಿ 4 ಅರ್ಧಶತಕ ಬಾರಿಸಿ 350 ರನ್ ಸಿಡಿಸಿರುವ ಮ್ಯಾಕ್ಸ್ವೆಲ್ ಐಪಿಎಲ್ 2021 ರಲ್ಲಿ ಅತಿ ಹೆಚ್ಚು ರನ್ ಗಳಿಸಿರುವ ಪಟ್ಟಿಯಲ್ಲಿ 6ನೇ ಸ್ಥಾನದಲ್ಲಿದ್ದಾರೆ.
ಬುಧವಾರದ ರಾಜಸ್ಥಾನ್ ರಾಯಲ್ಸ್ ವಿರುದ್ಧದ ಪಂದ್ಯದಲ್ಲೂ ಮ್ಯಾಕ್ಸ್ವೆಲ್ ಮ್ಯಾಚ್ ವಿನ್ನಿಂಗ್ ಪ್ರದರ್ಶನ ನೀಡಿದರು. ಅನಗತ್ಯ ಹೊಡೆತಕ್ಕೆ ಕೈ ಹಾಕದೆ ಎಚ್ಚರಿಕೆಯಿಂದ ಬ್ಯಾಟ್ ಬೀಸಿ 30 ಎಸೆತಗಳಲ್ಲಿ 6 ಬೌಂಡರಿ, 1 ಸಿಕ್ಸರ್ ಮೂಲಕ ಅಜೇಯ 50 ರನ್ ಚಚ್ಚಿದರು. ಇದೇವೇಳೆ ಮ್ಯಾಕ್ಸ್ವೆಲ್ ವಿಶೇಷ ಸಂಭ್ರಮಾಚರಣೆಯನ್ನೂ ಮಾಡಿದರು.
ಹೌದು, ಅರ್ಧಶತಕ ಸಿಡಿಸಿದ ವೇಳೆ ಮ್ಯಾಕ್ಸ್ವೆಲ್ ಅವರು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಜೆರ್ಸಿಯಲ್ಲಿರುವ ಲೋಗೋವನ್ನು ಮುಟ್ಟಿ ಡಗೌಟ್ನಲ್ಲಿದ್ದ ತಮ್ಮ ತಂಡದ ಕಡೆ ಕೈ ತೋರಿಸಿದರು. ನನ್ನ ಪಾತ್ರವನ್ನು ನಿಭಾಹಿಸಿದ್ದೇನೆ, ಈ ಅರ್ಧಶತಕ ತಂಡದ ಗೆಲುವಿಗಾಗಿ ಎಂದು ಬ್ಯಾಟ್ ಎತ್ತಿ ಜೆರ್ಸಿಯಲ್ಲಿರುವ ಆರ್ಸಿಬಿ ಲೋಗೋವನ್ನು ಮುಟ್ಟಿ ಮನ ಗೆದ್ದರು.
Maxwell 50 Moment#RRvRCB #Maxwell pic.twitter.com/lVvuWQYnDA
— Vikash Badal Dubey (@itsvbd) September 29, 2021
ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ರಾಜಸ್ಥಾನ್ ತಂಡ ಸ್ಪೋಟಕ ಆರಂಭ ಪಡೆದುಕೊಂಡಿತು. ಎವಿನ್ ಲೆವಿಸ್ ಹಾಗೂ ಯಶಸ್ವಿ ಜೈಸ್ವಾಲ್ ಆರ್ಸಿಬಿ ಬೌಲರ್ಗಳ ಬೆಂಡೆತ್ತಿದರು. 7 ಓವರ್ ಆಗುವ ಹೊತ್ತಿಗೆನೇ ತಂಡದ ಮೊತ್ತವನ್ನು 70ರ ಅಂಚಿಗೆ ತಂದಿಟ್ಟಿದ್ದರು. ಈ ಮೂಲಕ 200ರ ಗಡಿ ದಾಟಿಸುವ ಸೂಚನೆ ನೀಡಿದರು. ಆದರೆ, ಜೈಸ್ವಾಲ್ 22 ಎಸೆತಗಳಲ್ಲಿ 31 ಮತ್ತು ಲೆವಿಸ್ 37 ಎಸೆತಗಳಲ್ಲಿ 58 ರನ್ ಬಾರಿಸಿ ಔಟ್ ಆಗಿದ್ದೇ ತಡ ಪಂದ್ಯ ಆರ್ಸಿಬಿ ಪರ ವಾಲಿತು.
ಯುಜ್ವೇಂದ್ರ ಚಹಾಲ್ ಹಾಗೂ ಶಹ್ಬಾಜ್ ಅಹ್ಮದ್ ಸ್ಪಿನ್ ಮೋಡಿಗೆ ಆರ್ಆರ್ ಬ್ಯಾಟರ್ಗಳು ಪೆವಿಲಿಯನ್ ಕಡೆ ಹೆಜ್ಜೆ ಹಾಕತೊಡಗಿದರು. ಅಂತಿಮವಾಗಿ ರಾಜಸ್ಥಾನ್ 20 ಓವರ್ನಲ್ಲಿ 9 ವಿಕೆಟ್ ನಷ್ಟಕ್ಕೆ 149 ರನ್ ಬಾರಿಸಿತು. ಆರ್ಸಿಬಿ ಪರ ಹರ್ಷಲ್ ಪಟೇಲ್ 3 ಹಾಗೂ ಚಹಾಲ್ ಮತ್ತು ಶಹ್ಬಾಜ್ ತಲಾ 2 ವಿಕಟ್ ಕಿತ್ತರು.
ಸಾಧಾರಣ ಟಾರ್ಗೆಟ್ ಬೆನ್ನಟ್ಟಿದ ಆರ್ಸಿಬಿ ಕೂಡ ಭರ್ಜರಿ ಆರಂಭ ಪಡೆದುಕೊಂಡಿತು. ಜೊತೆಗೆ ದೇವದತ್ ಪಡಿಕ್ಕಲ್ (22) ಮತ್ತು ನಾಯಕ ವಿರಾಟ್ ಕೊಹ್ಲಿ (25) ವಿಕೆಟ್ ಕೂಡ ಕಳೆದುಕೊಂಡಿತು. ಆದರೆ, ಮಧ್ಯಮ ಕ್ರಮಾಂಕದಲ್ಲಿ ಶ್ರೀಕರ್ ಭರತ್ ಮತ್ತು ಗ್ಲೆನ್ ಮ್ಯಾಕ್ಸ್ವೆಲ್ ಎಚ್ಚರಿಕೆಯಿಂದ ಬ್ಯಾಟ್ ಬೀಸಿ ತಂಡದ ಗೆಲುವಿಗೆ ಕಾರಣರಾದರು.
ಭರತ್ 35 ಎಸೆತಗಳಲ್ಲಿ 44 ರನ್ ಮತ್ತು ಮ್ಯಾಕ್ಸ್ವೆಲ್ ಅಜೇಯ 50 ರನ್ ಬಾರಿಸಿ 17.1 ಓವರ್ನಲ್ಲಿ 3 ವಿಕೆಟ್ ನಷ್ಟಕ್ಕೆ 153 ರನ್ ಗಳಿಸುವ ಮೂಲಕ ತಂಡಕ್ಕೆ ಗೆಲುವು ತಂದುಕೊಟ್ಟರು. 7 ವಿಕೆಟ್ಗಳ ಭರ್ಜರಿ ಗೆಲುವಿನೊಂದಿಗೆ ಆರ್ಸಿಬಿ ಟೂರ್ನಿಯಲ್ಲಿ ಏಳನೇ ಜಯ ಸಾಧಿಸಿದ್ದು ಪ್ಲೇ ಆಫ್ ಹಂತಕ್ಕೆ ತಲುಪಲು ಬಾಕಿ ಉಳಿದಿರುವ ಮೂರು ಪಂದ್ಯಗಳಲ್ಲಿ ಒಂದರಲ್ಲಿ ಗೆಲ್ಲಬೇಕಿದೆ.
Virat Kohli: ಆ ಒಂದು ಕ್ಷಣ ಪಂದ್ಯದ ಸ್ಥಿತಿಯೇ ಬದಲಾಯಿಸಿತು: ಮ್ಯಾಚ್ ಬಳಿಕ ವಿರಾಟ್ ಕೊಹ್ಲಿ ಏನಂದ್ರು ಕೇಳಿ
(Glenn Maxwell shows RCB Jersey during he score half century against Rajasthan Royals Match IPL 2021)
Published On - 11:24 am, Thu, 30 September 21
