IND vs BAN: ಅಶ್ವಿನ್- ಅಯ್ಯರ್ ರೋಚಕ ಜೊತೆಯಾಟ; ಬಾಂಗ್ಲಾ ನೆಲದಲ್ಲಿ ಟೆಸ್ಟ್ ಸರಣಿ ಗೆದ್ದ ಭಾರತ

ಢಾಕಾದಲ್ಲಿ ನಡೆದ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಬಾಂಗ್ಲಾದೇಶವನ್ನು 3 ವಿಕೆಟ್​ಗಳಿಂದ ಮಣಿಸಿದ ಟೀಂ ಇಂಡಿಯಾ (India Vs Bangladesh) ಎರಡು ಪಂದ್ಯಗಳ ಟೆಸ್ಟ್ ಸರಣಿಯನ್ನು ಕ್ಲೀನ್ ಸ್ವೀಪ್ ಮಾಡಿದೆ. ಮತ್ತೊಮ್ಮೆ ಸಂಕಷ್ಟಕ್ಕೆ ಸಿಲುಕಿದ ಟೀಂ ಇಂಡಿಯಾಕ್ಕೆ ನೆರವಾದ ಶ್ರೇಯಸ್ ಅಯ್ಯರ್ ಮತ್ತು ಆರ್ ಅಶ್ವಿನ್ (Shreyas Iyer and R Ashwin) ತಂಡವನ್ನು ಗೆಲುವಿನ ದಡ ಸೇರಿಸಿದರು. ಚಟ್ಟೋಗ್ರಾಮ್​ನಲ್ಲಿ ನಡೆದಿದ್ದ ಮೊದಲ ಟೆಸ್ಟ್​ ಪಂದ್ಯವನ್ನು ಗೆದ್ದು ಬೀಗಿದ್ದ ಭಾರತ, ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿತ್ತು. ಅಲ್ಲದೆ ಈ ಮೊದಲು ನಡೆದಿದ್ದ ಏಕದಿನ ಸರಣಿಯಲ್ಲಿ ಬಾಂಗ್ಲಾ ಎದುರು ಮಂಕಾಗಿದ್ದ ಭಾರತ ಈ ಸರಣಿಯನ್ನು ಗೆಲ್ಲಲೇಬೇಕಾದ ಒತ್ತಡದಲ್ಲಿತ್ತು. ಆದರೆ ಗೆಲುವಿಗೆ ಕೇವಲ 145 ರನ್​ಗಳ ಸಾಧಾರಣ ಗುರಿ ಪಡೆದಿದ್ದರೂ ಟೀಂ ಇಂಡಿಯಾ (Team India) ಒಂದು ಹಂತದಲ್ಲಿ ಸೋಲಿನ ದವಡೆಯಲ್ಲಿತ್ತು. 145 ರನ್‌ಗಳ ಗುರಿಗೆ ಉತ್ತರವಾಗಿ ಭಾರತ 74 ರನ್‌ಗಳಿಗೆ 7 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು ಹೀಗಾಗಿ ಪಂದ್ಯ ಬಾಂಗ್ಲಾ ಪರ ವಾಲಿತ್ತು. ಆದರೆ ಅಂತಿಮ ಹಂತದಲ್ಲಿ ಅಶ್ವಿನ್ ಹಾಗೂ ಅಯ್ಯರ್ 71 ರನ್‌ಗಳ ಮುರಿಯದ ಜೊತೆಯಾಟ ಆಡುವುದರೊಂದಿಗೆ ತಂಡಕ್ಕೆ ರೋಚಕ ಜಯ ತಂದುಕೊಟ್ಟರು. ಅಶ್ವಿನ್ 42 ರನ್ ಮತ್ತು ಅಯ್ಯರ್ 28 ರನ್ ಗಳಿಸಿ ಅಜೇಯರಾಗಿ ಉಳಿದರು.

ಮೊದಲ ಇನ್ನಿಂಗ್ಸ್‌ನಲ್ಲಿ ಭಾರತದ ಬಲಿಷ್ಠ ದಾಳಿಗೆ ಆತಿಥೇಯ ತಂಡ 227 ರನ್‌ಗಳಿಗೆ ಆಲೌಟ್ ಆಗಿತ್ತು. ನಂತರ ಭಾರತ ಮೊದಲ ಇನ್ನಿಂಗ್ಸ್‌ನಲ್ಲಿ 314 ರನ್ ಗಳಿಸಿ ಮುನ್ನಡೆ ಸಾಧಿಸಿತು. ಬಳಿಕ ಬಾಂಗ್ಲಾದೇಶ ತನ್ನ ಎರಡನೇ ಇನ್ನಿಂಗ್ಸ್‌ನಲ್ಲಿ 231 ರನ್ ಗಳಿಸುವ ಮೂಲಕ ಭಾರತಕ್ಕೆ 145 ರನ್‌ಗಳ ಗುರಿಯನ್ನು ನೀಡಿತ್ತು. ಅಂತಿಮವಾಗಿ 4ನೇ ದಿನದಾಟದ ಮೊದಲ ಸೆಷನ್‌ನಲ್ಲಿ ಅಯ್ಯರ್ ಮತ್ತು ಆರ್ ಅಶ್ವಿನ್ ಅವರ ಜೊತೆಯಾಟದಿಂದಾಗಿ ಭಾರತ ತಂಡ ಗುರಿ ಸಾಧಿಸಿತು.

Virat Kohli: ಬಾಂಗ್ಲಾ ಆಟಗಾರರ ಓವರ್ ರಿಯಾಕ್ಷನ್; ಜಗಳಕ್ಕಿಳಿದ ಕಿಂಗ್ ಕೊಹ್ಲಿ! ವಿಡಿಯೋ ಸಖತ್ ವೈರಲ್

ರೋಚಕ ಘಟ್ಟ ತಲುಪಿದ 4ನೇ ದಿನದಾಟ

ಬಾಂಗ್ಲಾ ನೀಡಿದ 145 ರನ್​ಗಳ ಗುರಿ ಬೆನ್ನಟ್ಟಿದ್ದ ಭಾರತ 3ನೇ ದಿನದಾಟದಂತ್ಯಕ್ಕೆ ಕೇವಲ 45 ರನ್​ಗಳಿಗೆ 4 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಇಲ್ಲಿಂದ 4ನೇ ದಿನದಾಟ ಆರಂಭಿಸಿದ ಭಾರತಕ್ಕೆ ಉತ್ತಮ ಆರಂಭ ಸಿಗಲಿಲ್ಲ. ನೈಟ್ ವಾಚ್​ಮಾನ್ ಆಗಿ ಕಣಕ್ಕಿಳಿದಿದ್ದ ಜಯದೇವ್ ಉನದ್ಕಟ್ 13 ರನ್​ಗಳಿಸಿ ತಮ್ಮ ವಿಕೆಟ್ ಒಪ್ಪಿಸಿದರು. ಆ ನಂತರ ಬಂದ ರಿಷಭ್ ಪಂತ್ ಕೂಡ 9 ರನ್​ಗಳಿಗೆ ಸುಸ್ತಾದರು. ಹೀಗಾಗಿ ಪಂತ್ ವಿಕೆಟ್ ಪಡೆದ ಬಾಂಗ್ಲಾ ತಂಡ ಆಗಲೇ ಪಂದ್ಯ ಗೆದ್ದ ಖುಷಿಯಲ್ಲಿತ್ತು. ಏಕೆಂದರೆ ಇಡೀ ಟೆಸ್ಟ್ ಸರಣಿಯಲ್ಲಿ ಬಾಂಗ್ಲಾ ತಂಡವನ್ನು ಹೆಚ್ಚಾಗಿ ಕಾಡಿದ್ದು ರಿಷಭ್ ಪಂತ್ ಮಾತ್ರ.

ಬಳಿಕ ಟೀಂ ಇಂಡಿಯಾ ಪಾಲಿಗೆ ಗೆಲುವಿನ ಆಶಾಕಿರಣವಾಗಿದ್ದ ಅಕ್ಷರ್ ಪಟೇಲ್ ಕೂಡ ತಮ್ಮ ಇನ್ನಿಂಗ್ಸ್ ಅನ್ನು 34 ರನ್​ಗಳಿಗೆ ಕೊನೆಗೊಳಿಸಿದರು. ಇದರಿಂದ ಪಂದ್ಯ ಭಾಗಶಃ ಭಾರತದ ಕೈಯಿಂದ ಜಾರಿತ್ತು. ಆದರೆ ನಂತರ ಅಯ್ಯರ್ ಮತ್ತು ಅಶ್ವಿನ್ ಜೋಡಿ ಗೋಡೆಯಂತೆ ನಿಂತು ಬಾಂಗ್ಲಾ ಬೌಲರ್​ಗಳನ್ನು ಸಮರ್ಥವಾಗಿ ಎದುರಿಸಿ ಗೆಲುವಿನ ಸ್ಕ್ರಿಪ್ಟ್ ಬರೆಯಿತು.

ಅಶ್ವಿನ್  ಡಬಲ್ ಫೀಟ್

ಅಶ್ವಿನ್ ಮೊದಲು ಎರಡೂ ಇನ್ನಿಂಗ್ಸ್‌ಗಳಲ್ಲಿ ಒಟ್ಟು 6 ವಿಕೆಟ್‌ಗಳನ್ನು ಕಿತ್ತು ಬಾಂಗ್ಲಾದೇಶವನ್ನು ಸಂಕಷ್ಟಕ್ಕೆ ಸಿಲುಕಿಸಿದಲ್ಲದೆ ಬ್ಯಾಟಿಂಗ್​ನಲ್ಲೂ ತಮ್ಮ ಕೈಚೆಳಕ ತೋರಿದರು. ಅದರಲ್ಲೂ ಎರಡನೇ ಇನ್ನಿಂಗ್ಸ್​ನಲ್ಲಿ 62 ಎಸೆತಗಳನ್ನು ಎದುರಿಸಿದ ಅಶ್ವಿನ್ 4 ಬೌಂಡರಿ ಹಾಗೂ 1 ಸಿಕ್ಸರ್ ಸಹಿತ 42 ರನ್ ಬಾರಿಸಿದರು. ಅದೇ ವೇಳೆ ಅಯ್ಯರ್ ಕೂಡ 46 ಎಸೆತಗಳಲ್ಲಿ 4 ಬೌಂಡರಿ ಸಹಿತ 29 ರನ್ ಬಾರಿಸುವ ಮೂಲಕ ಅಶ್ವಿನ್​ಗೆ ಬೆಂಬಲ ನೀಡಿದರು. ಅಯ್ಯರ್ ಈ ಮೊದಲು ಮೊದಲ ಇನಿಂಗ್ಸ್‌ನಲ್ಲೂ 87 ರನ್​ಗಳ ಇನ್ನಿಂಗ್ಸ್ ಆಡಿದ್ದರು.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 10:52 am, Sun, 25 December 22