8 ವರ್ಷಗಳ ಬಳಿಕ ಈ ದೇಶದ ಪ್ರವಾಸ ಮಾಡುತ್ತಿದೆ ಪಾಕ್ ತಂಡ..!
IRE vs PAK: ಪಾಕಿಸ್ತಾನ ತಂಡವು ಕಳೆದ ಎಂಟು ವರ್ಷಗಳಿಂದ ಭೇಟಿ ನೀಡದ ದೇಶಕ್ಕೆ ದ್ವಿಪಕ್ಷೀಯ ಸರಣಿಗಾಗಿ ಪ್ರವಾಸ ಬೆಳೆಸುತ್ತಿದೆ. ಆ ದೇಶ ಬೇರ್ಯಾವುದು ಅಲ್ಲ, ಕ್ರಿಕೆಟ್ ಶಿಶು ಎನಿಸಿಕೊಂಡಿರುವ ಐರ್ಲೆಂಡ್. ಐರ್ಲೆಂಡ್ ವಿರುದ್ಧ ಮೂರು ಪಂದ್ಯಗಳ ಟಿ20 ಸರಣಿಗಾಗಿ ಪಾಕಿಸ್ತಾನ ತಂಡ ಐರ್ಲೆಂಡ್ ಪ್ರವಾಸ ಕೈಗೊಳ್ಳಲಿದೆ.
Updated on:Mar 30, 2024 | 6:39 PM
ಭಾರತದಲ್ಲಿ ನಡೆಯುತ್ತಿರುವ 17ನೇ ಆವೃತ್ತಿಯ ಐಪಿಎಲ್ನಲ್ಲಿ (IPL 2024) ವಿಶ್ವದಾದ್ಯಂತ ಅನೇಕ ಕ್ರಿಕೆಟಿಗರು ಆಡುತ್ತಿದ್ದಾರೆ. ಹೀಗಾಗಿ ವಿಶ್ವ ಕ್ರಿಕೆಟ್ನ ಪ್ರಮುಖ ತಂಡಗಳು ಈ ಸಮಯದಲ್ಲಿ ಯಾವುದೇ ದ್ವಿಪಕ್ಷೀಯ ಸರಣಿಯನ್ನು ಸಾಮಾನ್ಯವಾಗಿ ಆಯೋಜಿಸುವುದಿಲ್ಲ. ಆದರೆ ಪಾಕಿಸ್ತಾನ ಕ್ರಿಕೆಟ್ ತಂಡದ ಕಥೆ ಹಾಗಲ್ಲ. ಪಾಕ್ ಕ್ರಿಕೆಟ್ ತಂಡದಲ್ಲಿ (Pakistan Cricket Team) ಹಲವು ಪ್ರತಿಭಾವಂತ ಕ್ರಿಕೆಟಿಗರಿದ್ದರೂ ಉಭಯ ದೇಶಗಳ ನಡುವಣ ಸಂಬಂಧ ಸರಿ ಇಲ್ಲದ ಕಾರಣ ಅವರ್ಯಾರು ಐಪಿಎಲ್ನಲ್ಲಿ ಭಾಗವಹಿಸುವಂತಿಲ್ಲ. ಹೀಗಾಗಿ ಪಾಕ್ ಕ್ರಿಕೆಟ್ ತಂಡ ಮಾತ್ರ ಈ ಸಮಯದಲ್ಲಿ ಇತರ ದೇಶಗಳ ಜೊತೆ ದ್ವಿಪಕ್ಷೀಯ ಸರಣಿಯನ್ನು ಆಡುತ್ತದೆ. ಅದರಂತೆ ಇದೀಗ ಪಾಕಿಸ್ತಾನ ತಂಡವು ಕಳೆದ ಎಂಟು ವರ್ಷಗಳಿಂದ ಭೇಟಿ ನೀಡದ ದೇಶಕ್ಕೆ ದ್ವಿಪಕ್ಷೀಯ ಸರಣಿಗಾಗಿ ಪ್ರವಾಸ ಬೆಳೆಸುತ್ತಿದೆ. ಆ ದೇಶ ಬೇರ್ಯಾವುದು ಅಲ್ಲ, ಕ್ರಿಕೆಟ್ ಶಿಶು ಎನಿಸಿಕೊಂಡಿರುವ ಐರ್ಲೆಂಡ್. ಐರ್ಲೆಂಡ್ ವಿರುದ್ಧ ಮೂರು ಪಂದ್ಯಗಳ ಟಿ20 ಸರಣಿಗಾಗಿ ಪಾಕಿಸ್ತಾನ ತಂಡ, ಐರ್ಲೆಂಡ್ (PAK vs IRE) ಪ್ರವಾಸ ಕೈಗೊಳ್ಳಲಿದೆ.
ಸರಣಿ ಯಾವಾಗ ನಡೆಯಲಿದೆ?
ಪಾಕಿಸ್ತಾನ ಮತ್ತು ಐರ್ಲೆಂಡ್ ನಡುವಿನ ಟಿ20 ಸರಣಿಯು ಮೇ 10 ರಿಂದ ಮೇ 14 ರವರೆಗೆ ಆಯೋಜಿಸಲಾಗಿದೆ. ಈ ಸರಣಿಯ ಎಲ್ಲಾ ಪಂದ್ಯಗಳು ಡಬ್ಲಿನ್‌ನ ಕ್ಯಾಸಲ್ ಅವೆನ್ಯೂದಲ್ಲಿ ನಡೆಯಲಿವೆ. ಪಾಕಿಸ್ತಾನ ತಂಡ 2009 ರಲ್ಲಿ ಐರ್ಲೆಂಡ್ ವಿರುದ್ಧ ಕೊನೆಯ ಬಾರಿಗೆ ಟಿ20 ಸರಣಿಯನ್ನು ಆಡಿತ್ತು. ಅಂದಿನಿಂದ ಉಭಯ ದೇಶಗಳು ಯಾವುದೇ ಸಂದರ್ಭದಲ್ಲಿ ಈ ಮಾದರಿಯಲ್ಲಿ ಆಡಿಲ್ಲ. ಜುಲೈ 2020 ರಲ್ಲಿ ಎರಡು ತಂಡಗಳ ನಡುವೆ ಎರಡು ಪಂದ್ಯಗಳ ಟಿ20 ಸರಣಿಯನ್ನು ಆಡಲು ನಿರ್ಧರಿಸಲಾಗಿತ್ತು. ಆದರೆ ಕೋವಿಡ್ -19 ಸಾಂಕ್ರಾಮಿಕ ರೋಗದಿಂದಾಗಿ ಪ್ರವಾಸವು ಮುಂದುವರಿಯಲು ಸಾಧ್ಯವಾಗಲಿಲ್ಲ.
ಟಿ20 ಸರಣಿ ವೇಳಾಪಟ್ಟಿ
- 10 ಮೇ: 1ನೇ ಟಿ20 ಪಂದ್ಯ, ಡಬ್ಲಿನ್
- 12 ಮೇ 2 ನೇ ಟಿ20 ಪಂದ್ಯ, ಡಬ್ಲಿನ್
- 14 ಮೇ: 3ನೇ ಟಿ20 ಪಂದ್ಯ, ಡಬ್ಲಿನ್
ಐಪಿಎಲ್ ನಡುವೆ ಪಾಕಿಸ್ತಾನ ಭರ್ಜರಿ ತಯಾರಿ
ಪಾಕಿಸ್ತಾನ ಕ್ರಿಕೆಟ್ ತಂಡವು ಐಸಿಸಿ ಪುರುಷರ ಟಿ20 ವಿಶ್ವಕಪ್ 2024 ಗಾಗಿ ಅಮೇರಿಕಾ ಮತ್ತು ವೆಸ್ಟ್ ಇಂಡೀಸ್‌ನಲ್ಲಿ ತನ್ನ ಸಿದ್ಧತೆಗಳನ್ನು ಹೆಚ್ಚಿಸಲು ಸಜ್ಜಾಗಿದೆ. ಅದರಂತೆ ಪಂದ್ಯಾವಳಿಗೂ ಮುನ್ನ 12 ಟಿ20 ಅಂತರಾಷ್ಟ್ರೀಯ ಪಂದ್ಯಗಳನ್ನು ಆಡುತ್ತಿದೆ. ಈ ಅವಧಿಯಲ್ಲಿ ಐರ್ಲೆಂಡ್ ಹೊರತಾಗಿ ಇಂಗ್ಲೆಂಡ್ ಮತ್ತು ನ್ಯೂಜಿಲೆಂಡ್ ವಿರುದ್ಧ ಟಿ20 ಸರಣಿಗಳನ್ನೂ ಆಡಲಿದೆ. ಇಂಗ್ಲೆಂಡ್ ವಿರುದ್ಧ ನಾಲ್ಕು ಪಂದ್ಯಗಳ ಟಿ20 ಸರಣಿ ಹಾಗೂ ನ್ಯೂಜಿಲೆಂಡ್ ವಿರುದ್ಧ ಐದು ಪಂದ್ಯಗಳ ಟಿ20 ಸರಣಿಯನ್ನು ಆಡಲಿದೆ. ಈ ಎರಡೂ ಸರಣಿಗಳು ಐಪಿಎಲ್ ಸಮಯದಲ್ಲೇ ನಡೆಯಲ್ಲಿವೆ. ಇಂತಹ ಪರಿಸ್ಥಿತಿಯಲ್ಲಿ, ಐಪಿಎಲ್ ನಡುವೆ ಟಿ20 ವಿಶ್ವಕಪ್ ಸಿದ್ಧತೆಯನ್ನು ಬಲಪಡಿಸಲು ಪಾಕಿಸ್ತಾನ ತಂಡವು ಸಿದ್ಧವಾಗಿದೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 6:37 pm, Sat, 30 March 24
