ಜೈಪುರ ಕ್ರೀಡಾಂಗಣದಲ್ಲಿದ್ದ 25 ಪಾಕ್ ಕ್ರಿಕೆಟಿಗರ ಫೋಟೋಗಳನ್ನು ಕಿತ್ತೆಸದ ಆರ್ಸಿಎ
Jaipur stadium: ಜೈಪುರದ ಸವಾಯಿ ಮಾನ್ಸಿಂಗ್ ಕ್ರೀಡಾಂಗಣದ "ವಾಲ್ ಆಫ್ ಗ್ಲೋರಿ"ಯಿಂದ 25 ಪಾಕಿಸ್ತಾನಿ ಕ್ರಿಕೆಟಿಗರ ಫೋಟೋಗಳನ್ನು ತೆಗೆದುಹಾಕಲಾಗಿದೆ. ಇದು ಭಾರತ ಮತ್ತು ಪಾಕಿಸ್ತಾನದ ನಡುವಿನ ಇತ್ತೀಚಿನ ಉದ್ವಿಗ್ನತೆಯ ನಂತರ ನಡೆದಿದೆ. ಈ ನಿರ್ಧಾರವು 2019 ರ ಪುಲ್ವಾಮಾ ದಾಳಿಯ ನಂತರದಂತೆಯೇ ಇದೆ. ಪಾಕಿಸ್ತಾನ ಪರ ಆಡಿದ ಕೊನೆಯ ಹಿಂದೂ ಕ್ರಿಕೆಟಿಗ ಡ್ಯಾನಿಶ್ ಕನೇರಿಯಾ ಅವರ ಫೋಟೋ ಕೂಡ ಇದರಲ್ಲಿ ಸೇರಿದೆ.
Updated on:May 19, 2025 | 10:05 PM
ಇತ್ತೀಚೆಗೆ ಭಾರತ ಮತ್ತು ಪಾಕಿಸ್ತಾನ ನಡುವೆ ಯುದ್ಧದ ವಾತಾವರಣವೇ ಸೃಷ್ಟಿಯಾಗಿತ್ತು. ವಾಸ್ತವವಾಗಿ, ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್ನಲ್ಲಿ ನಡೆದ ಭಯೋತ್ಪಾದಕ ದಾಳಿಯ (pahalgam terror attack) ನಂತರ, ಭಾರತವು ಆಪರೇಷನ್ ಸಿಂಧೂರ್ (operation sindoor) ಹೆಸರಿನಲ್ಲಿ ಅನೇಕ ಭಯೋತ್ಪಾದಕರನ್ನು ಹೊಡೆದುರುಳಿಸಿತ್ತು. ಇದಾದ ಬಳಿಕ ಪಾಕಿಸ್ತಾನ ಕೂಡ ಭಾರತದ ಮೇಲೆ ಹಲವಾರು ದಾಳಿಗಳನ್ನು ಮಾಡಿತು, ಆದರೆ ಭಾರತೀಯ ವಾಯು ರಕ್ಷಣಾ ಪಡೆಗಳು ಅವುಗಳನ್ನು ವಿಫಲಗೊಳಿಸಿದವು. ಈ ಸಮಯದಲ್ಲಿ ಅನೇಕ ಪಾಕಿಸ್ತಾನಿ ಆಟಗಾರರು ಭಾರತದ ವಿರುದ್ಧ ವಿಷ ಕಾರಿದ್ದರು. ಇದೀಗ ಅದಕ್ಕೆ ಪ್ರತಿಕಾರವಾಗಿ ಜೈಪುರದ ಸವಾಯಿ ಮಾನ್ಸಿಂಗ್ ಕ್ರೀಡಾಂಗಣದಲ್ಲಿ (Jaipur stadium) ಇರಿಸಲಾಗಿದ್ದ ಪಾಕ್ ಆಟಗಾರರ ಫೋಟೋಗಳನ್ನು ತೆಗೆದು ಹಾಕಲಾಗಿದೆ.
ಪಾಕ್ ಆಟಗಾರರ ಫೋಟೋ ಕಿತ್ತೆಸದ ಆರ್ಸಿಎ
ಜೈಪುರದ ಸವಾಯಿ ಮಾನ್ಸಿಂಗ್ ಕ್ರೀಡಾಂಗಣದಲ್ಲಿರುವ ‘ವಾಲ್ ಆಫ್ ಗ್ಲೋರಿ’ಯಿಂದ ಎಲ್ಲಾ ಪಾಕಿಸ್ತಾನಿ ಕ್ರಿಕೆಟಿಗರ ಫೋಟೋಗಳನ್ನು ತೆಗೆದುಹಾಕಲಾಗಿದೆ. ಈ ಮೈದಾನದಲ್ಲಿ ಆಡಿದ ಎಲ್ಲಾ ಅಂತರರಾಷ್ಟ್ರೀಯ ಕ್ರಿಕೆಟಿಗರ ಫೋಟೋಗಳನ್ನು ಸವಾಯಿ ಮಾನ್ಸಿಂಗ್ ಕ್ರೀಡಾಂಗಣದಲ್ಲಿ ಇರಿಸಲಾಗಿದೆ. ಪಾಕಿಸ್ತಾನ ಇಲ್ಲಿ ಒಂದು ಟೆಸ್ಟ್ ಮತ್ತು ನಾಲ್ಕು ಏಕದಿನ ಪಂದ್ಯಗಳನ್ನು ಆಡಿದೆ, ಈ ಕಾರಣದಿಂದಾಗಿ ಒಟ್ಟು 25 ಪಾಕಿಸ್ತಾನಿ ಕ್ರಿಕೆಟಿಗರ ಫೋಟೋಗಳು ‘ವಾಲ್ ಆಫ್ ಗ್ಲೋರಿ’ಯ ಭಾಗವಾಗಿದ್ದವು. ಆದರೆ ರಾಜಸ್ಥಾನ ಕ್ರಿಕೆಟ್ ಸಂಸ್ಥೆ (ಆರ್ಸಿಎ) ಎಲ್ಲಾ ಪಾಕಿಸ್ತಾನಿ ಆಟಗಾರರ ಫೋಟೋಗಳನ್ನು ತೆಗೆದುಹಾಕಿದೆ.
ಇಂತಹ ಹೆಜ್ಜೆ ಇಡುತ್ತಿರುವುದು ಇದೇ ಮೊದಲಲ್ಲ. 2019 ರಲ್ಲಿ ಪುಲ್ವಾಮಾ ಭಯೋತ್ಪಾದಕ ದಾಳಿಯ ನಂತರವೂ, ಪಾಕಿಸ್ತಾನಿ ಕ್ರಿಕೆಟಿಗರ ಫೋಟೋಗಳನ್ನು ಕ್ರೀಡಾಂಗಣದಿಂದ ತೆಗೆದುಹಾಕಲಾಯಿತು. ಇದೀಗ ಈ 25 ಆಟಗಾರರಲ್ಲಿ ಪಾಕಿಸ್ತಾನ ಪರ ಆಡಿದ ಕೊನೆಯ ಹಿಂದೂ ಕ್ರಿಕೆಟಿಗ ಡ್ಯಾನಿಶ್ ಕನೇರಿಯಾ ಕೂಡ ಸೇರಿದ್ದಾರೆ. ವಾಸ್ತವವಾಗಿ, ಈ ದಾಳಿಯ ನಂತರ, ಕನೇರಿಯಾ ಪಾಕಿಸ್ತಾನ ಸರ್ಕಾರವನ್ನು ಬಹಿರಂಗವಾಗಿ ಟೀಕಿಸಿದ್ದರು. ಇದರೊಂದಿಗೆ ಪಾಕಿಸ್ತಾನ ಭಯೋತ್ಪಾದಕರಿಗೆ ಆಶ್ರಯ ನೀಡುತ್ತಿದೆ ಎಂದು ಅವರು ಆರೋಪಿಸಿದ್ದರು.
ಬಿಸಿಸಿಐನ ಒಂದು ನಿರ್ಧಾರದಿಂದ ಪಾಕ್ ಕ್ರಿಕೆಟ್ಗೆ 220 ಕೋಟಿ ರೂ. ನಷ್ಟ..!
ಡ್ಯಾನಿಶ್ ಕನೇರಿಯಾ ವೃತ್ತಿಜೀವನ
ಡ್ಯಾನಿಶ್ ಕನೇರಿಯಾ ಪಾಕಿಸ್ತಾನ ಪರ ಒಟ್ಟು 79 ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದಾರೆ. ಕನೇರಿಯಾ 61 ಟೆಸ್ಟ್ ಮತ್ತು 18 ಏಕದಿನ ಪಂದ್ಯಗಳನ್ನು ಆಡಿದ್ದರು. ಈ ಅವಧಿಯಲ್ಲಿ, ಅವರು ಟೆಸ್ಟ್ ಪಂದ್ಯಗಳಲ್ಲಿ 34.79 ಸರಾಸರಿಯಲ್ಲಿ 261 ವಿಕೆಟ್, ಮತ್ತು ಏಕದಿನ ಪಂದ್ಯಗಳಲ್ಲಿ 15 ವಿಕೆಟ್ಗಳನ್ನು ಉರುಳಿಸಿದ್ದರು. ಪಾಕಿಸ್ತಾನ ಕ್ರಿಕೆಟ್ ತಂಡದಲ್ಲಿ ಹಿಂದೂ ಎಂಬ ಕಾರಣಕ್ಕಾಗಿ ತಾರತಮ್ಯಕ್ಕೊಳಗಾಗಿದ್ದ ಬಗ್ಗೆಯೂ ಕನೇರಿಯಾ ಬಹಿರಂಗವಾಗಿ ಮಾತನಾಡಿದ್ದರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 10:03 pm, Mon, 19 May 25
