138 ರನ್​ಗಳ ಟಾರ್ಗೆಟ್: ಬಿರುಗಾಳಿ ಶತಕ ಸಿಡಿಸಿ ಏಕಾಂಗಿಯಾಗಿ ಮ್ಯಾಚ್ ಫಿನಿಶ್ ಮಾಡಿದ ಆರಂಭಿಕ..!

ಎದುರಾಳಿ ತಂಡ ಕಲೆಹಾಕಿದ ಒಟ್ಟಾರೆ ಮೊತ್ತವನ್ನು ಏಕೈಕ ಬ್ಯಾಟ್ಸ್​ಮನ್ ಚೇಸ್ ಮಾಡಿದ್ರೆ ಹೇಗಿರಬಹುದು? ಇಂತಹದೊಂದು ಅಪರೂಪದ ರನ್​ ಚೇಸಿಂಗ್​ಗೆ ಇಂಗ್ಲೆಂಡ್​ನ ದಿ ಹಂಡ್ರೆಡ್ ಲೀಗ್ ಸಾಕ್ಷಿಯಾಗಿದೆ. ಭಾನುವಾರ ನಡೆದ ಲೀಗ್​ನ 14ನೇ ಪಂದ್ಯದಲ್ಲಿ ಓವಲ್ ಇನ್ವಿನ್ಸಿಬಲ್ಸ್ ಹಾಗೂ ಸದರ್ನ್ ಬ್ರೇವ್ ತಂಡಗಳು ಮುಖಾಮುಖಿಯಾಗಿತ್ತು. ಟಾಸ್ ಗೆದ್ದ ಓವಲ್ ತಂಡವು ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡಿತು.

ನಾಯಕ ಸ್ಯಾಮ್ ಬಿಲ್ಲಿಂಗ್ ಅವರ ನಿರ್ಧಾರವನ್ನು ಸಮರ್ಥಿಸುವಂತೆ ಬೌಲಿಂಗ್ ದಾಳಿ ಸಂಘಟಿಸಿದ ಓವಲ್ ತಂಡವು ಎದುರಾಳಿಗಳನ್ನು ರನ್​ಗಳಿಸದಂತೆ ನಿಯಂತ್ರಿಸಿದರು. ಇದಾಗ್ಯೂ ಬಲಗೈ ಬ್ಯಾಟ್ಸ್​ಮನ್​ ಮಾರ್ಕಸ್​ ಸ್ಟೋಯಿನಿಸ್ 27 ಎಸೆತಗಳಲ್ಲಿ 37 ರನ್​ ಬಾರಿಸುವ ಮೂಲಕ ಮಧ್ಯಮ ಕ್ರಮಾಂಕದಲ್ಲಿ ಸದರ್ನ್​ ಬ್ರೇವ್ ತಂಡಕ್ಕೆ ಆಸರೆಯಾದರು. ಪರಿಣಾಮ 100 ಎಸೆತಗಳಲ್ಲಿ 6 ವಿಕೆಟ್ ನಷ್ಟಕ್ಕೆ ಸದರ್ನ್​ ಬ್ರೇವ್ ತಂಡವು ಕೇವಲ 137 ರನ್​ ಕಲೆಹಾಕಿತು.

138 ರನ್​ಗಳ ಟಾರ್ಗೆಟ್ ಬೆನ್ನತ್ತಿದ ಓವಲ್ ಇನ್ವಿನ್ಸಿಬಲ್ಸ್ ಉತ್ತಮ ಆರಂಭ ಪಡೆದಿರಲಿಲ್ಲ. ಆರಂಭಿಕ ಆಟಗಾರ ಜೇಸನ್ ರಾಯ್ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿ ಹೊರನಡೆದಿದ್ದರು. ಅತ್ತ ಮೊದಲ ಓವರ್​ನಲ್ಲೇ ಮೊದಲ ವಿಕೆಟ್ ಪಡೆದ ಖುಷಿಯಲ್ಲಿದ್ದ ಸದರ್ನ್​ ಬ್ರೇವ್ ತಂಡಕ್ಕೆ ಮಾರಕವಾಗಿ ಪರಿಣಮಿಸಿದ್ದು ಮತ್ತೋರ್ವ ಆರಂಭಿಕ ವಿಲ್ ಜಾಕ್ಸ್.

2ನೇ ಓವರ್​ನಿಂದ ಅಬ್ಬರಿಸಲಾರಂಭಿಸಿದ ವಿಲ್ ಜಾಕ್ಸ್​ ಸದರ್ನ್ ಬೌಲರ್​ಗಳನ್ನು ಹಿಗ್ಗಾಮುಗ್ಗಾ ದಂಡಿಸಿದರು. ಅತ್ತ ವಿಕೆಟ್​ಗಾಗಿ ಪರದಾಡಿದ್ದ ಸದರ್ನ್​ ಬ್ರೇವ್ ತಂಡದ ಬೌಲರ್​ಗಳು ರನ್​ ಗತಿ ನಿಯಂತ್ರಿಸಲು ಹರಸಾಹಸಪಡಬೇಕಾಯಿತು. ಏಕೆಂದರೆ ಮೈದಾನದ ಮೂಲೆ ಮೂಲೆಗೂ ವಿಲ್ ಜಾಕ್ಸ್ ಚೆಂಡನ್ನು ಬಾರಿಸುತ್ತಿದ್ದರು.

ಅದರಂತೆ 8 ಸಿಕ್ಸ್ ಹಾಗೂ 10 ಫೋರ್ ಸಿಡಿಸಿದ ವಿಲ್ ಜಾಕ್ಸ್​ ಭರ್ಜರಿ ಶತಕ ಸಿಡಿಸಿದರು. ಅಲ್ಲದೆ ಕೇವಲ 48 ಎಸೆತಗಳಲ್ಲಿ ಅಜೇಯ 108 ರನ್​ ಬಾರಿಸಿದರು. ಈ ಮೂಲಕ 82 ಎಸೆತಗಳಲ್ಲಿ 142 ರನ್​ ಕಲೆಹಾಕುವ ತಂಡವನ್ನು ಗುರಿಮುಟ್ಟಿಸಿ 7 ವಿಕೆಟ್​ಗಳ ಭರ್ಜರಿ ಜಯ ತಂದುಕೊಟ್ಟರು.

ಇಲ್ಲಿ 138 ರನ್​ಗಳ ಟಾರ್ಗೆಟ್​ನಲ್ಲಿ ವಿಲ್ ಜಾಕ್ಸ್​ ಒಬ್ಬರೇ 108 ರನ್​ ಬಾರಿಸಿದ್ದು ವಿಶೇಷ. ಅಂದರೆ ಉಳಿದ ನಾಲ್ವರು ಬ್ಯಾಟ್ಸ್​ಮನ್​ ಸೇರಿ​ ಕಲೆಹಾಕಿದ್ದು ಕೇವಲ 34 ರನ್​ಗಳು ಮಾತ್ರ. ಇನ್ನು ಈ ಬಿರುಗಾಳಿ ಶತಕದೊಂದಿಗೆ ಅಬ್ಬರಿಸಿದ ವಿಲ್ ಜಾಕ್ಸ್ ಪಂದ್ಯಶ್ರೇಷ್ಠ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.