ಕೆಎಲ್ ರಾಹುಲ್, ಶುಭ್​ಮನ್​ ಗಿಲ್​ಗೆ ಕಾಲು ನೋವು: ಇಂಗ್ಲೆಂಡ್​ಗೆ ತಲೆ ನೋವು

ಬರೋಬ್ಬರಿ 311 ರನ್​ಗಳ ಮುನ್ನಡೆ… ಮ್ಯಾಂಚೆಸ್ಟರ್​ ಟೆಸ್ಟ್​ನ 4ನೇ ದಿನದಾಟದ ಮೊದಲ ಸೆಷನ್​ನಲ್ಲಿ ಇಂಗ್ಲೆಂಡ್ ತಂಡವು ಮೊದಲ ಇನಿಂಗ್ಸ್​ ಅನ್ನು 669 ರನ್​ಗಳೊಂದಿಗೆ ಅಂತ್ಯಗೊಳಿಸಿದ್ದರು. ಈ 669 ರನ್​ಗಳೊಂದಿಗೆ ಇಂಗ್ಲೆಂಡ್ ತಂಡ ಪಡೆದ ಮುನ್ನಡೆ ಬರೋಬ್ಬರಿ 311 ರನ್​ಗಳು. ಈ ಹಿನ್ನಡೆಯೊಂದಿಗೆ ಟೀಮ್ ಇಂಡಿಯಾ ದ್ವಿತೀಯ ಇನಿಂಗ್ಸ್ ಆರಂಭಿಸಬೇಕಿತ್ತು.

ಅದರಂತೆ ಎರಡನೇ ಇನಿಂಗ್ಸ್ ಶುರು ಮಾಡಿದ ಟೀಮ್ ಇಂಡಿಯಾಗೆ ಮೊದಲ ಓವರ್​ನಲ್ಲೇ ಕ್ರಿಸ್ ವೋಕ್ಸ್ ಆಘಾತ ನೀಡಿದ್ದರು. ಭಾರತ ತಂಡದ ದ್ವಿತೀಯ ಇನಿಂಗ್ಸ್​ನ ಮೊದಲ ಓವರ್​ನ 4ನೇ ಎಸೆತದಲ್ಲಿ ಯಶಸ್ವಿ ಜೈಸ್ವಾಲ್ (0) ಸ್ಲಿಪ್​​ನಲ್ಲಿ ಕ್ಯಾಚ್ ನೀಡಿ ನಿರ್ಗಮಿಸಿದ್ದರು.  ಮರು ಎಸೆತದಲ್ಲೇ ಸಾಯಿ ಸುದರ್ಶನ್ (0) ಹ್ಯಾರಿ ಬ್ರೂಕ್​ಗೆ ಕ್ಯಾಚಿತ್ತು ಹೊರ ನಡೆದರು. ಅಂದರೆ ಟೀಮ್ ಇಂಡಿಯಾ ದ್ವಿತೀಯ ಇನಿಂಗ್ಸ್​ನಲ್ಲಿ ರನ್ ಖಾತೆ ತೆರೆಯುವ ಮುನ್ನವೇ 2 ವಿಕೆಟ್ ಕಳೆದುಕೊಂಡಿತು.

ಇತ್ತ ಬ್ಯಾಕ್ ಟು ಬ್ಯಾಕ್ ಎರಡು ವಿಕೆಟ್ ಕಬಳಿಸಿ ಇಂಗ್ಲೆಂಡ್ ತಂಡವು ಹೊಸ ಹುರುಪಿನಲ್ಲಿ ಕಾಣಿಸಿಕೊಂಡಿದ್ದರು. ಅಲ್ಲದೆ ನಾಲ್ಕನೇ ದಿನದಾಟದಲ್ಲೇ ಪಂದ್ಯ ಮುಗಿಸುವ ಸೂಚನೆಯನ್ನು ಸಹ ನೀಡಿದ್ದರು. ಆದರೆ ಈ ಹಂತದಲ್ಲಿ ಜೊತೆಗೂಡಿದ ಕೆಎಲ್ ರಾಹುಲ್ ಹಾಗೂ ಶುಭ್​ಮನ್ ಗಿಲ್ ಬಂಡೆಯಂತೆ ಕ್ರೀಸ್ ಕಚ್ಚಿ ನಿಂತರು. ಇಂಗ್ಲೆಂಡ್ ವೇಗಿಗಳ ಮಾರಕ ದಾಳಿಗೆ ಎದೆಯೊಡ್ಡಲು ನಿರ್ಧರಿಸಿದರು. ಪರಿಣಾಮ ದ್ವಿತೀಯ ಸೆಷನ್​ನಲ್ಲಿ ಆಂಗ್ಲ ಬೌಲರ್​ಗಳಿಗೆ ಒಂದೇ ಒಂದು ವಿಕೆಟ್ ಪಡೆಯಲು ಸಾಧ್ಯವಾಗಲಿಲ್ಲ.

ಇದರ ನಡುವೆ ಜವಾಬ್ದಾರಿಯುತ ಬ್ಯಾಟಿಂಗ್​ನೊಂದಿಗೆ ಕೆಎಲ್ ರಾಹುಲ್ ಹಾಗೂ ಶುಭ್​ಮನ್ ಗಿಲ್ 26 ಓವರ್​ಗಳಲ್ಲಿ 86 ರನ್ ಕಲೆಹಾಕಿದರು. ಆ ಬಳಿಕ ಮೂರನೇ ಸೆಷನ್​ನಲ್ಲೂ ಆಂಗ್ಲರು ಹಲವು ತಂತ್ರಗಳನ್ನು ಪ್ರಯೋಗಿಸಿದರೂ ರಾಹುಲ್ ಹಾಗೂ ಗಿಲ್ ಜೋಡಿಯನ್ನು ಬೇಪಡಿಸಲು ಸಾಧ್ಯವಾಗಲೇ ಇಲ್ಲ. ಅತ್ತ ಮೂರನೇ ಸೆಷನ್​ನಲ್ಲಿ 34 ಓವರ್​ಗಳನ್ನು ಎದುರಿಸಿದ ಗಿಲ್-ಕೆಎಲ್ ಜೋಡಿ ಒಟ್ಟು 88 ರನ್​ ಕಲೆಹಾಕಿದರು.

ಈ ಮೂಲಕ ನಾಲ್ಕನೇ ದಿನದಾಟದಲ್ಲಿ 3ನೇ ವಿಕೆಟ್ ಕಳೆದುಕೊಳ್ಳದಂತೆ ಜವಾಬ್ದಾರಿಯುತ ಇನಿಂಗ್ಸ್ ಆಡಿದರು. ಈ ಇನಿಂಗ್ಸ್​ನಲ್ಲಿ ಉಭಯ ದಾಂಡಿಗರು ಎದುರಿಸಿರುವುದು ಬರೋಬ್ಬರಿ 373 ಎಸೆತಗಳನ್ನು. ಈ ಮೂಲಕ 174 ರನ್​ಗಳ ಭರ್ಜರಿ ಜೊತೆಯಾಟ ಪ್ರದರ್ಶಿಸಿದ್ದಾರೆ.

ಅತ್ತ ಕ್ರೀಸ್ ಕಚ್ಚಿ ನಿಂತ ಪರಿಣಾಮ ಕೆಎಲ್ ರಾಹುಲ್ ಹಾಗೂ ಶುಭ್​ಮನ್ ಗಿಲ್​ ಕಾಲು ನೋವಿಗೆ ಒಳಗಾದರು. ಈ ನೋವಿನ ನಡುವೆಯೂ ಆಂಗ್ಲ ಬೌಲರ್​ಗಳ ಮುಂದೆ ಸೆಟೆದು ನಿಂತರು. ಇತ್ತ ರಾಹುಲ್ ಹಾಗೂ ಗಿಲ್​ಗೆ ಕಾಲು ನೋವು ಶುರುವಾಗಿದ್ದರೆ, ಅತ್ತ ವಿಕೆಟ್ ಪಡೆಯಲು ಹರಸಾಹಸ ಪಡುತ್ತಿದ್ದ ಇಂಗ್ಲೆಂಡ್ ಬೌಲರ್​ಗಳಿಗೆ ತಲೆ ನೋವು ಆರಂಭವಾಗಿತ್ತು. ಈ ನೋವುಗಳ ನಡುವೆ ನಾಲ್ಕನೇ ದಿನದಾಟ ಮುಗಿದಿದೆ.

ಇದನ್ನೂ ಓದಿ: KL Rahul: ಬರೋಬ್ಬರಿ 46 ವರ್ಷಗಳ ಬಳಿಕ ಹೊಸ ಇತಿಹಾಸ ನಿರ್ಮಿಸಿದ ಕೆಎಲ್ ರಾಹುಲ್

ಇದೀಗ ಐದನೇ ದಿನದಾಟ ಟೀಮ್ ಇಂಡಿಯಾ ಪಾಲಿಗೆ ನಿರ್ಣಾಯಕ. ಭಾನುವಾರ ಭಾರತ ತಂಡವು ಆಲೌಟ್ ಆಗದಿದ್ದರೆ, ಈ ಪಂದ್ಯವನ್ನು ಡ್ರಾ ಮಾಡಿಕೊಳ್ಳಬಹುದು. ಈ ಮ್ಯಾಚ್ ಅನ್ನು ಟೀಮ್ ಇಂಡಿಯಾ ಡ್ರಾ ಮಾಡಿಕೊಂಡರೆ ಅದು ಭಾರತದ ಪಾಲಿಗೆ ಗೆಲುವು ಎಂದರ್ಥ.

ಅತ್ತ 311 ರನ್​ಗಳ ಮುನ್ನಡೆ ಹೊಂದಿರುವ ಇಂಗ್ಲೆಂಡ್ ತಂಡವು ಇನ್ನೂ 8 ವಿಕೆಟ್ ಕಬಳಿಸಿ ಗೆಲ್ಲುವ ಹಾದಿಯನ್ನು ನೋಡಬೇಕಿದೆ. ಹೀಗಾಗಿ ಐದನೇ ದಿನದಾಟದಲ್ಲಿ ಉಭಯ ತಂಡಗಳಿಂದ ಭರ್ಜರಿ ಪೈಪೋಟಿಯನ್ನು ನಿರೀಕ್ಷಿಸಬಹುದು.