2 ಓವರ್​ಗಳಲ್ಲಿ 60 ರನ್ ನೀಡಿದ ಡಚ್ ವೇಗಿ..!

ಒಂದೇ ಓವರ್​ನಲ್ಲಿ 36 ರನ್ ಬಾರಿಸಿದ ಬ್ಯಾಟರ್​ಗಳ ಬಗ್ಗೆ ಕೇಳಿರುತ್ತೀರಿ… ಆದರೆ ಇಲ್ಲೊಬ್ಬರು ಬೌಲರ್​ ಎರಡು ಓವರ್​ಗಳಲ್ಲಿ 60 ರನ್ ನೀಡುವ ಮೂಲಕ ಸುದ್ದಿಯಾಗಿದ್ದಾರೆ. ಅದು ಕೂಡ ಅಂತಾರಾಷ್ಟ್ರೀಯ ಕ್ರಿಕೆಟರ್ ಎಂಬುದು ವಿಶೇಷ. ವೆಸ್ಟ್ ಇಂಡೀಸ್​ನ ಕೇಮನ್ ಐಲ್ಯಾಂಡ್​ನಲ್ಲಿ ನಡೆಯುತ್ತಿರುವ ಮ್ಯಾಕ್ಸ್​60 ಟಿ10 ಲೀಗ್​ನಲ್ಲಿ ನೆದರ್​ಲೆಂಡ್ಸ್ ಬೌಲರ್ ಲೋಗನ್ ವ್ಯಾನ್ ಬೀಕ್ ಬರೋಬ್ಬರಿ 60 ರನ್​ಗಳನ್ನು ಬಿಟ್ಟುಕೊಟ್ಟಿದ್ದಾರೆ. ಅದು ಸಹ 12 ಎಸೆತಗಳಲ್ಲಿ ಎಂಬುದೇ ಅಚ್ಚರಿ.

ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಕೆರಿಬಿಯನ್ ಟೈಗರ್ಸ್ ತಂಡದ ಪರ ಜೋಶ್ ಬ್ರೌನ್ 23 ಎಸೆತಗಳಲ್ಲಿ 5 ಸಿಕ್ಸ್​ಗಳೊಂದಿಗೆ 56 ರನ್ ಚಚ್ಚಿದ್ದರು. ಇನ್ನು ನಿಕ್ ಹಾಬ್ಸನ್ 12 ಎಸೆತಗಳಲ್ಲಿ 4 ಭರ್ಜರಿ ಸಿಕ್ಸ್ ಹಾಗೂ 3 ಫೋರ್​ಗಳೊಂದಿಗೆ 40 ರನ್ ಸಿಡಿಸಿದರು. ಈ ಇಬ್ಬರ ಸಿಡಿಲಬ್ಬರಕ್ಕೆ ಸಿಲುಕಿದ ಲೋಗನ್ ವ್ಯಾನ್ ಬೀಕ್ ಮೊದಲ ಓವರ್​ನಲ್ಲಿ 24 ರನ್ ನೀಡಿದ್ದರು.

ಇದಾದ ಬಳಿಕ ಮತ್ತೆ ದಾಳಿಗಿಳಿದ ಲೋಗನ್ ವ್ಯಾನ್ ಬೀಕ್ ಮೂರು ಸಿಕ್ಸ್, ಮೂರು ಫೋರ್, ಎರಡು ನೋ ಬಾಲ್, ಒಂದು ವೈಡ್, ನಾಲ್ಕು ರನ್ ಸಹಿತ ಒಟ್ಟು 36 ರನ್​ಗಳನ್ನು ನೀಡಿದರು. ಈ ಮೂಲಕ ಕೇವಲ 2 ಓವರ್​ಗಳಲ್ಲಿ 60 ರನ್​ಗಳನ್ನು ಬಿಟ್ಟುಕೊಟ್ಟರು. ಪರಿಣಾಮ ಕೆರಿಬಿಯನ್ ಟೈಗರ್ಸ್ ತಂಡವು 10 ಓವರ್​ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 153 ರನ್ ಕಲೆಹಾಕಿತು.

ಈ ಗುರಿಯನ್ನು ಬೆನ್ನತ್ತಿದ ಗ್ರಾಂಡ್ ಕೇಮನ್ ಜಾಗ್ವಾರ್ಸ್ ತಂಡವು 10 ಓವರ್​ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 88 ರನ್​ಗಳಿಸಲಷ್ಟೇ ಶಕ್ತರಾದರು. ಈ ಮೂಲಕ ಕೆರಿಬಿಯನ್ ಟೈಗರ್ಸ್ ತಂಡವು 65 ರನ್​ಗಳ ಭರ್ಜರಿ ಜಯ ಸಾಧಿಸಿದೆ.

ಇದಕ್ಕೂ ಮುನ್ನ ಲೋಗನ್ ವ್ಯಾನ್ ಬೀಕ್ ನ್ಯೂಝಿಲೆಂಡ್​ನಲ್ಲಿ ನಡೆದ ಸೂಪರ್ ಸ್ಮ್ಯಾಶ್ ಟಿ20 ಲೀಗ್​ನಲ್ಲಿ 5 ಎಸೆತಗಳಲ್ಲಿ 33 ರನ್ ನೀಡಿ ಸುದ್ದಿಯಾಗಿದ್ದರು. ಈ ಪಂದ್ಯದ ಕೊನೆಯ 4 ಓವರ್​ಗಳಲ್ಲಿ 33 ರನ್​ಗಳು ಬೇಕಿತ್ತು. ಈ ವೇಳೆ ದಾಳಿಗಿಳಿದ ವ್ಯಾನ್ ಬೀಕ್ 33 ರನ್​ಗಳನ್ನು ನೀಡುವ ಮೂಲಕ ವೆಲ್ಲಿಂಗ್ಟನ್ ತಂಡದ ಸೋಲಿಗೆ ಕಾರಣರಾಗಿದ್ದರು. ಇದೀಗ ಮತ್ತೆ 60 ರನ್​ಗಳೊಂದಿಗೆ ವ್ಯಾನ್ ಬೀಕ್ ಹೆಸರು ಮುನ್ನಲೆಗೆ ಬಂದಿದೆ.

ಇದನ್ನೂ ಓದಿ: IPL 2025: LSG ತಂಡಕ್ಕೆ ಝಹೀರ್ ಖಾನ್..?

ಅಂದಹಾಗೆ ಲೋಗನ್ ವ್ಯಾನ್ ಬೀಕ್ ನೆದರ್​ಲೆಂಡ್ಸ್ ತಂಡದ ಖಾಯಂ ಸದಸ್ಯ. ಈಗಾಗಲೇ 33 ಏಕದಿನ ಪಂದ್ಯಗಳನ್ನಾಡಿರುವ ಅವರು 46 ವಿಕೆಟ್ ಕಬಳಿಸಿದ್ದಾರೆ. ಹಾಗೆಯೇ 30 ಟಿ20 ಪಂದ್ಯಗಳಿಂದ 36 ವಿಕೆಟ್ ಉರುಳಿಸಿದ್ದಾರೆ. ಇನ್ನು ನೆದರ್​ಲೆಂಡ್ಸ್ ಪರ ಏಕದಿನ ವಿಶ್ವಕಪ್ ಹಾಗೂ ಟಿ20 ವಿಶ್ವಕಪ್ ಆಡಿದ ಆಟಗಾರರಲ್ಲಿ ಲೋಗನ್ ವ್ಯಾನ್ ಬೀಕ್ ಕೂಡ ಒಬ್ಬರು. ಆದರೀಗ ಕೇವಲ 12 ಎಸೆತಗಳಲ್ಲಿ 60 ರನ್ ನೀಡುವ ಮೂಲಕ ಸುದ್ದಿಯಾಗಿದ್ದು ಮಾತ್ರ ವಿಪರ್ಯಾಸ.