21 ಎಸೆತಗಳಲ್ಲಿ 5 ವಿಕೆಟ್ ಕಬಳಿಸಿದ 21 ವರ್ಷದ ಯುವ ವೇಗಿ

ಎಂಟೆಬ್ಬೆಯಲ್ಲಿ ನಡೆದ ಪರ್ಲ್​ ಆಫ್ ಆಫ್ರಿಕಾ ಟಿ20 ಸರಣಿಯ ಐದನೇ ಪಂದ್ಯದಲ್ಲಿ ಯುಎಇ ತಂಡ ಭರ್ಜರಿ ಜಯ ಸಾಧಿಸಿದೆ. ಈ ಗೆಲುವಿನ ರೂವಾರಿ 21 ವರ್ಷದ ಯುವ ವೇಗಿ ಮುಹಮ್ಮದ್ ಝುಹೈಬ್. ಎಂಟೆಬ್ಬೆ ಕ್ರಿಕೆಟ್ ಓವಲ್ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ನೈಜೀರಿಯಾ ತಂಡವು ಬ್ಯಾಟಿಂಗ್ ಆಯ್ದುಕೊಂಡಿದ್ದರು.

ಅದರಂತೆ ಮೊದಲು ಬ್ಯಾಟ್ ಮಾಡಿದ ನೈಜೀರಿಯಾ ತಂಡಕ್ಕೆ ಆರಂಭಿಕ ಆಘಾತ ನೀಡುವಲ್ಲಿ ಆಕಿಫ್ ರಾಜ ಯಶಸ್ವಿಯಾದರು. ಮೊದಲ ಓವರ್​ನ ಮೊದಲ ಎಸೆತದಲ್ಲಿ ಸುಲೈಮಾನ್ ರನ್ಸೆವೆ (0) ಯನ್ನು ಕ್ಲೀನ್ ಬೌಲ್ಡ್ ಮಾಡಿದ ಆಕಿಫ್ ಯುಎಇ ತಂಡಕ್ಕೆ ಮೊದಲ ಯಶಸ್ಸು ತಂದುಕೊಟ್ಟರು. ಇದರ ಬೆನ್ನಲ್ಲೇ ಅಖೆಲೆ ಇಸೆಸೆಲೆ (2) ಕೂಡ ಆಕಿಫ್​ಗೆ ವಿಕೆಟ್ ಒಪ್ಪಿಸಿದರು. ಇನ್ನು ಹೈದರ್ ಅಲಿ ಎಸೆತದಲ್ಲಿ ಸೊಲೊಮನ್ ಚಿಲೆಮಾನ್ಯ (9) ಔಟಾದರು.

ಪರಿಣಾಮ ಪವರ್​ಪ್ಲೇನಲ್ಲಿ ನೈಜೀರಿಯಾ ತಂಡವು ಕೇವಲ 34 ರನ್​ಗಳಿಸಿ 3 ವಿಕೆಟ್ ಕಳೆದುಕೊಂಡಿತು. ಈ ಹಂತದಲ್ಲಿ ದಾಳಿಗಿಳಿದ ಮುಹಮ್ಮದ್ ಝುಹೈಬ್ ಕರಾರುವಾಕ್ ಬೌಲಿಂಗ್​ನೊಂದಿಗೆ ಮಿಂಚಿದರು.

ನಾಯಕ ಸಿಲ್ವಸ್ಟರ್​ ಒಕೆಪೆ (4) ವಿಕೆಟ್ ಕಬಳಿಸುವ ಮೂಲಕ ಶುಭಾರಂಭ ಮಾಡಿದ ಝುಹೈಬ್ ಆ ಬಳಿಕ ಐಸಾಕ್ (17), ಮೊಹಮೀದ್ ಟೈವೊ (0), ಐಸಾಕ್ ಒಕೆಪೆ (0), ಪ್ರೊಸ್ಪರ್ ಉಸೇನಿ (6) ವಿಕೆಟ್ ಉರುಳಿಸಿದರು. ಈ ಮೂಲಕ ಕೇವಲ 3.3 ಓವರ್​ಗಳಲ್ಲಿ 21 ರನ್ ನೀಡಿ 5 ವಿಕೆಟ್​ಗಳನ್ನು ಕಬಳಿಸಿದರು. ಇತ್ತ ಮುಹಮ್ಮದ್ ಝುಹೈಬ್ ಅವರ ಮಾರಕ ದಾಳಿಗೆ ತತ್ತರಿಸಿದ ನೈಜೀರಿಯಾ ತಂಡವು 13.3 ಓವರ್​ಗಳಲ್ಲಿ 58 ರನ್​ಗಳಿಸಿ ಆಲೌಟ್ ಆಯಿತು.

ಅದರಂತೆ 59 ರನ್​ಗಳ ಸುಲಭ ಗುರಿ ಪಡೆದ ಯುಎಇ ತಂಡವು 4.5 ಓವರ್​ಗಳಲ್ಲಿ 3 ವಿಕೆಟ್ ಕಳೆದುಕೊಂಡು ಗುರಿ ಮುಟ್ಟುವ ಮೂಲಕ 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ. ಈ ಗೆಲುವಿನೊಂದಿಗೆ ಪರ್ಲ್​ ಆಫ್ ಆಫ್ರಿಕಾ ಟಿ20 ಸರಣಿಯ ಅಂಕ ಪಟ್ಟಿಯಲ್ಲಿ ಯುಎಇ ತಂಡವು ದ್ವಿತೀಯ ಸ್ಥಾನಕ್ಕೇರಿದೆ.

ನೈಜೀರಿಯಾ ಪ್ಲೇಯಿಂಗ್ 11: ಸುಲೈಮಾನ್ ರುನ್ಸೆವೆ , ಸೊಲೊಮನ್ ಚಿಲೆಮಾನ್ಯ (ವಿಕೆಟ್ ಕೀಪರ್) , ಅಖೆರೆ ಇಸೆಸೆಲೆ , ಐಸಾಕ್ ದನ್ಲಾಡಿ , ಸಿಲ್ವೆಸ್ಟರ್ ಒಕೆಪೆ (ನಾಯಕ) , ವಿನ್ಸೆಂಟ್ ಅಡೆವೊಯ್ , ಮೊಹಮೀದ್ ಟೈವೊ , ಪ್ರೊಸ್ಪರ್ ಉಸೇನಿ , ಅಬ್ದುಲ್ರಹ್ಮಾನ್ ಜಿಮೋಹ್ , ಪೀಟರ್ ಅಹೋ , ಐಸಾಕ್ ಒಕೆಪೆ.

ಇದನ್ನೂ ಓದಿ: ಬರೋಬ್ಬರಿ 13 ಸಿಕ್ಸ್​: ತೂಫಾನ್ ಸೆಂಚುರಿ ಸಿಡಿಸಿದ ಜೋಶ್

ಯುಎಇ ಪ್ಲೇಯಿಂಗ್ 11: ಮುಹಮ್ಮದ್ ಝೊಹೈಬ್ , ಮುಹಮ್ಮದ್ ವಸೀಮ್ (ನಾಯಕ) , ಅಲಿಶನ್ ಶರಾಫು , ರಾಹುಲ್ ಚೋಪ್ರಾ (ವಿಕೆಟ್ ಕೀಪರ್) , ಆಸಿಫ್ ಖಾನ್ , ಎಥಾನ್ ಡಿಸೋಜಾ , ಸಘೀರ್ ಖಾನ್ , ಹೈದರ್ ಅಲಿ , ಅಕಿಫ್ ರಾಜ , ಮುಹಮ್ಮದ್ ಝುಹೈಬ್ , ಮುಹಮ್ಮದ್ ರೋಹಿದ್ ಖಾನ್.