37 ಎಸೆತಗಳಲ್ಲಿ ಶತಕ, ಬರೋಬ್ಬರಿ 173 ರನ್: ಭರ್ಜರಿ ದಾಖಲೆ ಬರೆದ ನಮನ್​ ಧೀರ್ 

ಪಂಜಾಬ್ ಕ್ರಿಕೆಟ್ ಸಂಸ್ಥೆಯ ಬಿಂದ್ರಾ ಕ್ರೀಡಾಂಗಣದಲ್ಲಿ ನಡೆದ ಶೇರ್-ಎ-ಪಂಜಾಬ್ ಟಿ20 ಲೀಗ್​ನಲ್ಲಿ ಅಮೃತಸರ್ ಸೂರ್ಮಾಸ್ ತಂಡದ ನಾಯಕ ನಮನ್ ಧೀರ್ ವಿಸ್ಫೋಟಕ ಸೆಂಚುರಿ ಸಿಡಿಸಿದ್ದಾರೆ. ಈ ಶತಕದೊಂದಿಗೆ ಟಿ20 ಲೀಗ್ ಇತಿಹಾಸದಲ್ಲೇ ಗರಿಷ್ಠ ವೈಯುಕ್ತಿಕ ಸ್ಕೋರ್​ಗಳಿಸಿದ ಭಾರತೀಯ ಬ್ಯಾಟರ್ ಎಂಬ ದಾಖಲೆಯನ್ನು ನಮನ್ ​ಧೀರ್ ತಮ್ಮದಾಗಿಸಿಕೊಂಡಿದ್ದಾರೆ.

37 ಎಸೆತಗಳಲ್ಲಿ ಶತಕ, ಸಿಕ್ಸರ್‌ಗಳ ಸುರಿಮಳೆ!

ಮೊಹಾಲಿ ಕಿಂಗ್ಸ್ ವಿರುದ್ಧದ ಈ ಪಂದ್ಯದಲ್ಲಿ ಇನ್ನಿಂಗ್ಸ್ ಆರಂಭಿಸಿದ ನಮನ್ ಧೀರ್, ಮೈದಾನದ ಮೂಲೆ ಮೂಲೆಗೂ ಸಿಕ್ಸ್​-ಫೋರ್​ಗಳ ಸುರಿಮಳೆಗೈದರು. ಪರಿಣಾಮ ಕೇವಲ 37 ಎಸೆತಗಳಲ್ಲಿ ಶತಕ ಮೂಡಿಬಂತು.

ಭರ್ಜರಿ ಸೆಂಚುರಿ ಬಳಿಕ ಸ್ಫೋಟಕ ಇನಿಂಗ್ಸ್ ಮುಂದುವರೆಸಿದ ನಮನ್ ಧೀರ್ 16 ಬೌಂಡರಿ ಹಾಗೂ 12 ಸಿಕ್ಸರ್‌ಗಳು ಒಳಗೊಂಡಂತೆ ಕೇವಲ 64 ಎಸೆತಗಳಲ್ಲಿ 173 ರನ್​ ಬಾರಿಸಿ ವಿಕೆಟ್ ಒಪ್ಪಿಸಿದರು.

ಭರ್ಜರಿ ದಾಖಲೆ ಬರೆದ ನಮನ್​ ಧೀರ್:

ಶೇರ್-ಎ-ಪಂಜಾಬ್ ಟಿ20 ಟೂರ್ನಿಯಲ್ಲಿ ಕೇವಲ 64 ಎಸೆತಗಳಲ್ಲಿ 173 ರನ್ ಚಚ್ಚಿದ ನಮನ್ ಧೀರ್, ಭಾರತೀಯ ಕ್ರಿಕೆಟ್ ಹಾಗೂ ವಿಶ್ವ ಚುಟುಕು ಕ್ರಿಕೆಟ್ ಇತಿಹಾಸದಲ್ಲಿ ಹಲವು ಬೃಹತ್ ದಾಖಲೆಗಳನ್ನು ಬರೆದಿದ್ದಾರೆ. ಆ ದಾಖಲೆಗಳ ಪಟ್ಟಿ ಇ ಕೆಳಗಿನಂತಿದೆ…

ಗರಿಷ್ಠ ವೈಯಕ್ತಿಕ ಸ್ಕೋರ್: ಭಾರತದ ಯಾವುದೇ ಬ್ಯಾಟರ್ ಅಧಿಕೃತ ಅಥವಾ ರಾಜ್ಯ ಮಟ್ಟದ ಟಿ20 ಲೀಗ್‌ಗಳಲ್ಲಿ ಗಳಿಸಿದ ಅತ್ಯಧಿಕ ವೈಯಕ್ತಿಕ ಸ್ಕೋರ್ ಇದಾಗಿದೆ. ಈ ಮುನ್ನ ಐಪಿಎಲ್ 2026 ರಲ್ಲಿ ಕೆ.ಎಲ್. ರಾಹುಲ್ ಅವರು ಡೆಲ್ಲಿ ಕ್ಯಾಪಿಟಲ್ಸ್ ಪರ ಗಳಿಸಿದ್ದ 152* ರನ್ ಗಳ ದಾಖಲೆಯನ್ನು ನಮನ್ ಧೀರ್ ಮುರಿದಿದ್ದಾರೆ.

2ನೇ ಗರಿಷ್ಠ ಸ್ಕೋರ್: ಒಟ್ಟಾರೆ ಜಾಗತಿಕ ಟಿ20 ಕ್ರಿಕೆಟ್ ಇತಿಹಾಸದಲ್ಲಿ ಇದು ಎರಡನೇ ಅತ್ಯುತ್ತಮ ಸ್ಕೋರ್ ಆಗಿದೆ. ಕ್ರಿಸ್ ಗೇಲ್ ಅವರ ಸಾರ್ವಕಾಲಿಕ ವಿಶ್ವ ದಾಖಲೆ (175* ರನ್) ಯನ್ನು ಮುರಿಯುವ ಅವಕಾಶವನ್ನು ಕೇವಲ 3 ರನ್​ಗಳಿಂದ ನಮನ್​ ಧೀರ್ ತಪ್ಪಿಸಿಕೊಂಡಿದ್ದಾರೆ.

ಅತೀ ವೇಗದ ಶತಕ: ನಮನ್ ಧೀರ್ ಕೇವಲ 37 ಎಸೆತಗಳಲ್ಲಿ ಶತಕ ಪೂರೈಸುವ ಮೂಲಕ ಶೇರ್-ಎ-ಪಂಜಾಬ್ ಟಿ20 ಟೂರ್ನಿ ಇತಿಹಾಸದಲ್ಲೇ ಅತ್ಯಂತ ವೇಗದ ಶತಕ ಬರೆದ ಆಟಗಾರ ಎನಿಸಿಕೊಂಡರು.

ಅತಿ ಹೆಚ್ಚು ಬೌಂಡರಿ: ಒಂದೇ ಇನ್ನಿಂಗ್ಸ್‌ನಲ್ಲಿ 16 ಫೋರ್ ಹಾಗೂ 12 ಸಿಕ್ಸರ್ ಒಳಗೊಂಡಂತೆ ಒಟ್ಟು 28 ಬೌಂಡರಿಗಳನ್ನು ಬಾರಿಸಿ ಹೊಸ ಮೈಲಿಗಲ್ಲು ಸ್ಥಾಪಿಸಿದರು.

ಇದನ್ನೂ ಓದಿ: ದುಲೀಪ್ ಟ್ರೋಫಿ ಫೈನಲ್: ಭಾರೀ ಹಿನ್ನಡೆ ಭೀತಿಯಲ್ಲಿ ಸೌತ್ ಝೋನ್

ಸೂರ್ಮಾಸ್‌ ತಂಡಕ್ಕೆ ಸೂಪರ್ ಜಯ:

ನಮನ್ ಧೀರ್ ಅವರ ಭರ್ಜರಿ ಶತಕದ ನೆರವಿನೊಂದಿಗೆ ಈ ಪಂದ್ಯದಲ್ಲಿ ಅಮೃತಸರ್ ಸೂರ್ಮಾಸ್ ತಂಡ ನಿಗದಿತ 20 ಓವರ್‌ಗಳಲ್ಲಿ 279/7 ರನ್‌ಗಳ ಬೃಹತ್ ಮೊತ್ತ ಪೇರಿಸಿತು. ಈ ಗುರಿ ಬೆನ್ನಟ್ಟಿದ ಮೊಹಾಲಿ ಕಿಂಗ್ಸ್ ತಂಡವನ್ನು 212/9 ರನ್‌ಗಳಿಗೆ ನಿಯಂತ್ರಿಸಿ, ಸೂರ್ಮಾಸ್ 67 ರನ್‌ಗಳ ಭರ್ಜರಿ ಜಯ ದಾಖಲಿಸಿತು. ಬ್ಯಾಟಿಂಗ್‌ನಲ್ಲಿ ಅಬ್ಬರಿಸಿದ್ದ ನಮನ್ ಧೀರ್, ಬೌಲಿಂಗ್‌ನಲ್ಲೂ ಮಿಂಚಿ 8 ರನ್‌ಗಳಿಗೆ 2 ವಿಕೆಟ್ ಕಸಿದು ಪಂದ್ಯ ಶ್ರೇಷ್ಠ ಪ್ರಶಸ್ತಿ ಮುಡಿಗೇರಿಸಿಕೊಂಡರು.