Namibia vs Punjab: ನಮೀಬಿಯಾ ವಿರುದ್ಧ ಗೆದ್ದು ಬೀಗಿದ ಪಂಜಾಬ್
Namibia vs Punjab: ಪಂಜಾಬ್ ತಂಡವು 5 ಪಂದ್ಯಗಳ ಏಕದಿನ ಸರಣಿಗಾಗಿ ನಮೀಬಿಯಾಗೆ ತೆರಳಿದೆ. ಈ ಸರಣಿಯ ಮೊದಲ ಪಂದ್ಯದಲ್ಲಿ ಆತಿಥೇಯರ ವಿರುದ್ಧ ಪಂಜಾಬ್ ತಂಡ ಗೆಲುವು ದಾಖಲಿಸಿದೆ. ಇನ್ನು ಸರಣಿಯ ದ್ವಿತೀಯ ಏಕದಿನ ಪಂದ್ಯವು ಜುಲೈ 5 ರಂದು ನಡೆಯಲಿದ್ದು, ಈ ಪಂದ್ಯದ ಮೂಲಕ ಕಂಬ್ಯಾಕ್ ಮಾಡುವ ವಿಶ್ವಾಸದಲ್ಲಿ ನಮೀಬಿಯಾ ತಂಡ.
Updated on: Jul 04, 2024 | 11:13 AM
ನಮೀಬಿಯಾ ವಿರುದ್ಧ ಮೊದಲ ಪಂದ್ಯದಲ್ಲಿ ಪಂಜಾಬ್ ತಂಡ ರೋಚಕ ಜಯ ಸಾಧಿಸಿದೆ. ವಿಂಡ್ಹೋಕ್ನ ವಾಂಡರರ್ಸ್ ಕ್ರಿಕೆಟ್ ಗ್ರೌಂಡ್ನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಪಂಜಾಬ್ ತಂಡವು ಬೌಲಿಂಗ್ ಆಯ್ದುಕೊಂಡಿತ್ತು. ಅದರಂತೆ ಮೊದಲು ಬ್ಯಾಟ್ ಮಾಡಿದ ನಮೀಬಿಯಾ ತಂಡ ಉತ್ತಮ ಆರಂಭ ಪಡೆಯಲು ಸಾಧ್ಯವಾಗಿರಲಿಲ್ಲ. ಸಿದ್ಧಾರ್ಥ್ ಕೌಲ್ ಎಸೆದ ಮೊದಲ ಓವರ್ನಲ್ಲೇ ನಾಯಕ ಮಲನ್ ಕ್ರುಗರ್ (0) ಔಟಾದರು.
ಆ ಬಳಿಕ ಗುರ್ನೂರ್ ಬ್ರಾರ್ ಎಸೆತದಲ್ಲಿ ಲೋಹಾನ್ ಲೌರೆನ್ಸ್ (2) ಕ್ಲೀನ್ ಬೌಲ್ಡ್ ಆದರು. ಈ ಹಂತದಲ್ಲಿ ಕಣಕ್ಕಿಳಿದ ಜಾನ್ ಫ್ರೈಲಿಂಕ್ 27 ರನ್ ಬಾರಿಸಿದರೆ, ಅಲೆಕ್ಸಾಂಡರ್ ಬುಸಿಂಗ್ 39 ರನ್ಗಳ ಕೊಡುಗೆ ನೀಡಿದರು.
ಇನ್ನು ವಿಕೆಟ್ ಕೀಪರ್ ಬ್ಯಾಟರ್ ಜೀನ್-ಪಿಯರ್ ಕೋಟ್ಜೆ 74 ಎಸೆತಗಳಲ್ಲಿ 1 ಸಿಕ್ಸ್ ಹಾಗೂ 3 ಫೋರ್ಗಳೊಂದಿಗೆ 51 ರನ್ ಬಾರಿಸಿದರು. ಇದಾಗ್ಯೂ ಉಳಿದ ಬ್ಯಾಟರ್ಗಳಿಂದ ಉತ್ತಮ ಸಾಥ್ ಸಿಕ್ಕಿರಲಿಲ್ಲ. ಅಂತಿಮವಾಗಿ ನಮೀಬಿಯಾ ತಂಡವು 41.3 ಓವರ್ಗಳಲ್ಲಿ 173 ರನ್ಗಳಿಸಿ ಆಲೌಟ್ ಆಯಿತು.
ಪಂಜಾಬ್ ಪರ ಉತ್ತಮ ದಾಳಿ ಸಂಘಟಿಸಿದ ಸಿದ್ದಾರ್ಥ್ ಕೌಲ್ 7 ಓವರ್ಗಳಲ್ಲಿ 28 ರನ್ ನೀಡಿ 3 ವಿಕೆಟ್ ಪಡೆದರೆ, ನಮನ್ ಧೀರ್ 2.3 ಓವರ್ಗಳಲ್ಲಿ 14 ರನ್ ನೀಡಿ 3 ವಿಕೆಟ್ ಕಬಳಿಸಿ ಮಿಂಚಿದರು.
ಗೆದ್ದು ಬೀಗಿದ ಪಂಜಾಬ್:
174 ರನ್ಗಳ ಸುಲಭ ಗುರಿಯನ್ನು ಬೆನ್ನತ್ತಿದ ಪಂಜಾಬ್ ಪರ ನಾಯಕ ನಮನ್ ಧೀರ್ ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದರು. 64 ಎಸೆತಗಳನ್ನು ಎದುರಿಸಿದ ನಮನ್ 1 ಸಿಕ್ಸ್ ಹಾಗೂ 6 ಫೋರ್ಗಳೊಂದಿಗೆ 61 ರನ್ ಕಲೆಹಾಕಿದರು.
ಇನ್ನು ಸನ್ವೀರ್ ಸಿಂಗ್ 79 ಎಸೆತಗಳಲ್ಲಿ 10 ಫೋರ್ಗಳೊಂದಿಗೆ 70 ರನ್ ಬಾರಿಸಿ ಮಿಂಚಿದರು. ಆದರೆ ನಮನ್ ಧೀರ್ ಹಾಗೂ ಸನ್ವೀರ್ ವಿಕೆಟ್ ಪತನಗೊಳ್ಳುತ್ತಿದ್ದಂತೆ ದಿಢೀರ್ ಕುಸಿತಕ್ಕೊಳಗಾದ ಪಂಜಾಬ್ ತಂಡವು ಬ್ಯಾಕ್ ಟು ಬ್ಯಾಕ್ ವಿಕೆಟ್ ಕಳೆದುಕೊಂಡಿತು.
ಇದಾಗ್ಯೂ 33 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 179 ರನ್ ಬಾರಿಸುವ ಮೂಲಕ ಪಂಜಾಬ್ ತಂಡವು 3 ವಿಕೆಟ್ಗಳ ರೋಚಕ ಜಯ ಸಾಧಿಸಿದೆ. ಈ ಮೂಲಕ ಐದು ಪಂದ್ಯಗಳ ಏಕದಿನ ಸರಣಿಯಲ್ಲಿ ಪಂಬಾಜ್ 1-0 ಅಂತರದಿಂದ ಮುನ್ನಡೆ ಸಾಧಿಸಿದೆ.
ನಮೀಬಿಯಾ ಪ್ಲೇಯಿಂಗ್ 11: ಜೀನ್-ಪಿಯರ್ ಕೋಟ್ಜೆ, ಲೋಹಾನ್ ಲೌರೆನ್ಸ್, ಜಾನ್ ಫ್ರೈಲಿಂಕ್, ಮಲನ್ ಕ್ರುಗರ್, ಅಲೆಕ್ಸಾಂಡರ್ ಬುಸಿಂಗ್-ವೋಲ್ಶೆಂಕ್, ಗೆರ್ಹಾರ್ಡ್ ಎರಾಸ್ಮಸ್, ಶಾನ್ ಫೌಚೆ, ತಂಗೇಣಿ ಲುಂಗಮೇನಿ, ಬೆನ್ ಶಿಕೊಂಗೊ, ಪೀಟರ್ ಡೇನಿಯಲ್ ಬ್ಲಿಗ್ನೌ, ಜೂನಿಯರ್ ಕರಿಯಾಟ.
ಇದನ್ನೂ ಓದಿ: ಟಿ20 ವಿಶ್ವಕಪ್ ಮುಕ್ತಾಯದ ಬೆನ್ನಲ್ಲೇ ನಿವೃತ್ತಿ ಘೋಷಿಸಿದ ಐವರು ಆಟಗಾರರು..!
ಪಂಜಾಬ್ ಪ್ಲೇಯಿಂಗ್ 11: ಪ್ರಭ್ಸಿಮ್ರಾನ್ ಸಿಂಗ್, ಅನ್ಮೋಲ್ ಮಲ್ಹೋತ್ರಾ, ಉದಯ್ ಸಹಾರನ್, ಪುಖರಾಜ್ ಮನ್, ರಮಣ್ದೀಪ್ ಸಿಂಗ್, ನಮನ್ ಧೀರ್, ಸನ್ವೀರ್ ಸಿಂಗ್, ಸಿದ್ದಾರ್ಥ್ ಕೌಲ್, ಹರ್ಪ್ರೀತ್ ಬ್ರಾರ್, ಗುರ್ನೂರ್ ಬ್ರಾರ್, ಜಸಿಂದರ್ ಸಿಂಗ್.
