ಈ ರೀತಿಯ ಫೀಲ್ಡ್ ಸೆಟ್ಟಿಂಗ್​ನ ನೀವು ಯಾವ ಪಂದ್ಯದಲ್ಲಾದ್ರು ನೋಡಿದ್ರಾ..? ವಿಡಿಯೋ ನೋಡಿ

ಕ್ರಿಕೆಟ್, ಜಗತ್ತಿನಲ್ಲಿ ಯಾಕಿಷ್ಟು ಪ್ರಸಿದ್ಧಿ ಪಡೆದಿದೆ ಎಂಬುದಕ್ಕೆ ಸಾಕ್ಷಿಯಾಗಿ ಆಗಾಗ್ಗೆ ಕೆಲವು ಅಚ್ಚರಿಯ ಘಟನೆಗಳು ನಡೆಯುತ್ತಿರುತ್ತವೆ. ಈ ಆಟದಲ್ಲಿ ಸಿಗುವ ಮನರಂಜನೆಯ ಜೊತೆಗೆ ಆಟದ ನಡುವೆ ನಡೆಯುವ ಘಟನೆಗಳು ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಟ್ರೆಂಡಿಂಗ್ ಆಗಿಬಿಡುತ್ತವೆ. ಈಗ ಅದೇ ರೀತಿಯ ಘಟನೆಯೊಂದು ಕ್ರಿಕೆಟ್ ಪಂದ್ಯವೊಂದರಲ್ಲಿ ನಡೆದಿದ್ದು, ಈ ದೃಶ್ಯ ನೋಡಿದ ನೆಟ್ಟಿಗರು ಕ್ರಿಕೆಟ್​ನಲ್ಲಿ ಏನುಬೇಕಾದರೂ ಸಾಧ್ಯ ಎಂದು ಮಾತನಾಡಿಕೊಳ್ಳಲು ಆರಂಭಿಸಿದ್ದಾರೆ. ಪ್ರಸ್ತುತ ಯುರೋಪಿಯನ್ ಕ್ರಿಕೆಟ್ ಲೀಗ್‌ ನಡೆಯುತ್ತಿದ್ದು, ಈ ಲೀಗ್​ನಲ್ಲಿ ಮುಖಾಮುಖಿಯಾಗಿದ್ದ ರೊಮೇನಿಯಾ ಮತ್ತು ನಾರ್ವೆ ತಂಡಗಳು ಈಗ ಸಖತ್ ಸುದ್ದಿಯಾಗಿವೆ. ರೊಮೇನಿಯಾ ಮತ್ತು ನಾರ್ವೆ ನಡುವೆ ನಡೆದ 18 ನೇ ಪಂದ್ಯದಲ್ಲಿ ನಾರ್ವೆ ತಂಡದ ಬೌಲರ್ ಮಾಡಿದ ಫೀಲ್ಡ್ ಸೆಟ್ಟಿಂಗ್ ಈಗ ಸಾಕಷ್ಟು ವೈರಲ್ ಆಗುತ್ತಿದೆ.

ಡಿ ಗುಂಪಿನ ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ನಾರ್ವೆ 10 ಓವರ್​ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 97 ರನ್ ಗಳಿಸಿತ್ತು. ನಾರ್ವೆ ನೀಡಿದ ಗುರಿಗೆ ಉತ್ತರವಾಗಿ ರೊಮೇನಿಯಾ ತಂಡ ಗುರಿಯ ಸಮೀಪವೂ ತಲುಪಲು ಸಾಧ್ಯವಾಗದೆ 10 ಓವರ್‌ಗಳಲ್ಲಿ 7 ವಿಕೆಟ್‌ಗೆ 54 ರನ್ ಗಳಿಸಲಷ್ಟೇ ಶಕ್ತವಾಯಿತು. ಸೋಲಿನ ನಡುವೆಯೂ ರೊಮೇನಿಯನ್ ಬ್ಯಾಟ್ಸ್‌ಮನ್ ಆಟ ನೋಡಿ ಕಂಗೆಟ್ಟ ನಾರ್ವೆ ತಂಡದ ಬೌಲರ್ ತನ್ನ ತಂಡದ ಎಲ್ಲಾ ಫೀಲ್ಡರ್‌ಗಳನ್ನು ಸ್ಲಿಪ್‌ನಲ್ಲಿ ಫೀಲ್ಡಿಂಗ್​ಗೆ ಹಾಕಿದರು.

9 ಸ್ಲಿಪ್ ಇದ್ದರೂ ರನ್ ಗಳಿಸಿದ ಬ್ಯಾಟರ್

ನಾರ್ವೆಯ ಬಿಗಿಯಾದ ಫೀಲ್ಡಿಂಗ್ ಹೊರತಾಗಿಯೂ, ಬ್ಯಾಟ್ಸ್‌ಮನ್ ಆ ದಿಕ್ಕಿನಲ್ಲೇ ಬಾಲನ್ನು ಹೊಡೆದು ರನ್ ಗಳಿಸುವುದರಲ್ಲಿ ಯಶಸ್ವಿಯಾದರು. ಈಗ ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿದೆ.

View this post on Instagram

A post shared by Fox Cricket (@foxcricket)

ನಾರ್ವೆ ಎದುರು ಸೋತ ರೊಮೇನಿಯಾ

ಈ ಪಂದ್ಯದಲ್ಲಿ ನಾರ್ವೆ ಪರ ಆಡುತ್ತಿರುವ ಪಾಕಿಸ್ತಾನ ಮೂಲದ ಇಕ್ಬಾಲ್ ಒಂದು ಬೌಂಡರಿ ಹಾಗೂ ಮೂರು ಸಿಕ್ಸರ್ ಸಹಿತ ಕೇವಲ 16 ಎಸೆತಗಳಲ್ಲಿ 32 ರನ್ ಚಚ್ಚಿದರು. ಇಕ್ಬಾಲ್ ಹೊರತುಪಡಿಸಿ, ಪ್ರತೀಶ್ 10 ಎಸೆತಗಳಲ್ಲಿ 16 ರನ್ ಮತ್ತು ಅಲಿ ಸುಫಿಯಾನ್ 7 ಎಸೆತಗಳಲ್ಲಿ 13 ರನ್ ಗಳಿಸಿದರು. ರೊಮೇನಿಯಾದ ಅಬ್ದುಲ್ ಆಸಿಫ್ 12 ರನ್ ನೀಡಿ 3 ವಿಕೆಟ್ ಪಡೆದರು. ಗುರಿ ಬೆನ್ನಟ್ಟಿದ ರೊಮೇನಿಯಾ ತಂಡದ ಯಾವುದೇ ಬ್ಯಾಟ್ಸ್​ಮನ್​ಗೆ ನಾರ್ವೆ ದಾಳಿಯನ್ನು ಎದುರಿಸಲು ಸಾಧ್ಯವಾಗಲಿಲ್ಲ.

ಬೌಲಿಂಗ್​ನಲ್ಲೂ ಮಿಂಚಿದ ಇಕ್ಬಾಲ್

ಯುರೋಪಿಯನ್ ಕ್ರಿಕೆಟ್ ಲೀಗ್‌ನ ಈ ಪಂದ್ಯದಲ್ಲಿ ರೊಮೇನಿಯಾದ 8 ಬ್ಯಾಟ್ಸ್‌ಮನ್‌ಗಳು ಎರಡಂಕಿ ದಾಟಲು ಸಾಧ್ಯವಾಗಲಿಲ್ಲ. ರೊಮೇನಿಯಾ ಪರ ಭಾರತ ಮೂಲದ ರಮೇಶ್ ಸತೀಶನ್ 14 ರನ್ ಗಳಿಸಿದರು. ಈ ಪಂದ್ಯದಲ್ಲಿ ಆಲ್​ರೌಂಡರ್ ಆಟ ಪ್ರದರ್ಶಿಸಿದ ನಾರ್ವೆಯ ಇಕ್ಬಾಲ್, ಮೊದಲು ಬ್ಯಾಟಿಂಗ್​ನಲ್ಲಿ 32 ರನ್ ಬಾರಿಸಿದರೆ, ಬಳಿಕ ಬೌಲಿಂಗ್​ನಲ್ಲಿ 6 ರನ್ ನೀಡಿ 4 ವಿಕೆಟ್ ಪಡೆದರು. ಇಕ್ಬಾಲ್ ಅವರ ಆಲ್ ರೌಂಡ್ ಪ್ರದರ್ಶನದಿಂದ ನಾರ್ವೆ ತಂಡ 43 ರನ್​ಗಳಿಂದ ಜಯಗಳಿಸಿತು.

Published On - 5:52 pm, Sun, 9 October 22