NZ vs SL: ಮ್ಯಾಥ್ಯೂಸ್ ದಾಖಲೆಯ ಆಟ; ಬಲಿಷ್ಠ ಆರಂಭ ಪಡೆದ ಲಂಕಾ; ಭಾರತಕ್ಕೆ ತಳಮಳ
NZ vs SL: ಶ್ರೀಲಂಕಾ ತಂಡ ಕೂಡ ಭಾರತದಂತೆ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ಗೆ ತಲುಪುವ ಅವಕಾಶವನ್ನು ಹೊಂದಿದ್ದು, ಫೈನಲ್ ಆಡಬೇಕೆಂದರೆ ನ್ಯೂಜಿಲೆಂಡ್ ವಿರುದ್ಧದ 2 ಪಂದ್ಯಗಳ ಸರಣಿಯನ್ನು ವೈಟ್ವಾಶ್ ಮಾಡಬೇಕಾಗಿದೆ.
Updated on:Mar 09, 2023 | 4:43 PM
ಅಹಮದಾಬಾದ್‌ನಲ್ಲಿ ನಡೆಯುತ್ತಿರುವ ಟೆಸ್ಟ್ ಪಂದ್ಯ ಟೀಂ ಇಂಡಿಯಾಕ್ಕೆ (Team India) ಎಷ್ಟು ಮಹತ್ವದ್ದಾಗಿದೆಯೋ, ದೂರದ ಕ್ರೈಸ್ಟ್ಚರ್ಚ್ನಲ್ಲಿ ನಡೆಯುತ್ತಿರುವ ಟೆಸ್ಟ್ ಪಂದ್ಯ ಕೂಡ ಶ್ರೀಲಂಕಾ (Sri Lanka) ತಂಡಕ್ಕೆ ಅಷ್ಟೇ ಮಹತ್ವದ್ದಾಗಿದೆ. ಅಹಮದಾಬಾದ್‌ನಲ್ಲಿ ಆಸ್ಟ್ರೇಲಿಯವನ್ನು ಸೋಲಿಸುವ ಸವಾಲು ಭಾರತದ (India vs Australia) ಮುಂದಿದ್ದರೆ, ಇನ್ನೊಂದೆಡೆ ಟೆಸ್ಟ್ ಸರಣಿಯಲ್ಲಿ ಶ್ರೀಲಂಕಾ, ನ್ಯೂಜಿಲೆಂಡ್ (Sri Lanka vs New Zealand) ತಂಡವನ್ನು ಸೋಲಿಸುವುದು ಅನಿವಾರ್ಯವಾಗಿದೆ. ಇದಕ್ಕೆ ಪೂರಕವೆಂಬಂತೆ, ಶ್ರೀಲಂಕಾ ಕೂಡ ಕಿವೀಸ್ ವಿರುದ್ಧ ತನ್ನ ಅಭಿಯಾನವನ್ನು ಚೆನ್ನಾಗಿಯೇ ಆರಂಭಿಸಿದೆ. ಕ್ರೈಸ್ಟ್ಚರ್ಚ್ನಲ್ಲಿ ಇಂದಿನಿಂದ ಆರಂಭವಾಗಿರುವ ಮೊದಲ ಟೆಸ್ಟ್ನ ಮೊದಲ ದಿನದಾಟದ ಅಂತ್ಯಕ್ಕೆ ಲಂಕಾ ತಂಡ 6 ವಿಕೆಟ್‌ ಕಳೆದುಕೊಂಡು 305 ರನ್ ಗಳಿಸಿದೆ. ಈ ವೇಳೆ ಕರುಣರತ್ನೆ ಮತ್ತು ಕುಸಾಲ್ ಮೆಂಡಿಸ್ ಅರ್ಧಶತಕ ಬಾರಿಸಿದರೆ, ಏಂಜೆಲೊ ಮ್ಯಾಥ್ಯೂಸ್ (Angelo Mathews) 16 ವರ್ಷಗಳ ಹಳೆಯ ದಾಖಲೆಯನ್ನು ಮುರಿಯುವ ಕೆಲಸ ಮಾಡಿದ್ದಾರೆ.
ಏಂಜೆಲೊ ಮ್ಯಾಥ್ಯೂಸ್ ಕ್ರೈಸ್ಟ್ಚರ್ಚ್ ಟೆಸ್ಟ್ನ ಮೊದಲ ಇನ್ನಿಂಗ್ಸ್‌ನಲ್ಲಿ ಕೇವಲ 3 ರನ್‌ಗಳಿಂದ ಅರ್ಧಶತಕ ವಂಚಿತರಾದರು. ಆದರೆ, ಈ ಸ್ಕೋರ್‌ನೊಂದಿಗೆ ಅವರು 16 ವರ್ಷಗಳ ಹಳೆಯ ದಾಖಲೆಯನ್ನು ಮುರಿಯುವಲ್ಲಿ ಯಶಸ್ವಿಯಾದರು. ವಾಸ್ತವವಾಗಿ ಮ್ಯಾಥ್ಯೂಸ್, ಟೆಸ್ಟ್ ಕ್ರಿಕೆಟ್‌ನಲ್ಲಿ 7000 ರನ್‌ಗಳ ಗಡಿ ದಾಟಿದ ಮೂರನೇ ಶ್ರೀಲಂಕಾದ ಆಟಗಾರ ಎನಿಸಿಕೊಂಡಿದ್ದಾರೆ.
WPL 2023: ಆರ್ಸಿಬಿ ಮಣಿಸಿದ ಗುಜರಾತ್ಗೆ ಬಿಗ್ ಶಾಕ್; ನಾಯಕಿ ಬೆತ್ ಮೂನಿ ಟೂರ್ನಿಯಿಂದಲೇ ಔಟ್!
16 ವರ್ಷಗಳ ದಾಖಲೆ ಮುರಿದ ಮ್ಯಾಥ್ಯೂಸ್
7 ಸಾವಿರ ರನ್ ಪೂರೈಸುವುದರೊಂದಿಗೆ ಏಂಜೆಲೊ ಮ್ಯಾಥ್ಯೂಸ್ ಟೆಸ್ಟ್ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಸನತ್ ಜಯಸೂರ್ಯ ಅವರ ದಾಖಲೆಯನ್ನು ಮುರಿದಿದ್ದಾರೆ. ಜಯಸೂರ್ಯ ಅವರು 1991 ಮತ್ತು 2007 ರ ನಡುವೆ 110 ಟೆಸ್ಟ್ ಪಂದ್ಯಗಳನ್ನು ಆಡಿದ್ದು, ಅದರಲ್ಲಿ 6973 ರನ್ ಗಳಿಸಿದ್ದಾರೆ. ಇದೀಗ 16 ವರ್ಷಗಳ ನಂತರ ಏಂಜೆಲೊ ಮ್ಯಾಥ್ಯೂಸ್ ಅವರು ಜಯಸೂರ್ಯ ಮಾಡಿದ ಟೆಸ್ಟ್ ರನ್‌ಗಳ ದಾಖಲೆಯನ್ನು ದಾಟಿದ್ದಾರೆ. ಕ್ರೈಸ್ಟ್ಚರ್ಚ್ ಟೆಸ್ಟ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 47 ರನ್‌ಗಳ ಇನ್ನಿಂಗ್ಸ್ ಆಡಿದ ಮ್ಯಾಥ್ಯೂಸ್, ಟೆಸ್ಟ್ ಕ್ರಿಕೆಟ್‌ನಲ್ಲಿ 7000 ರನ್‌ಗಳನ್ನು ಪೂರೈಸಿದರು. 101 ಟೆಸ್ಟ್ ಪಂದ್ಯಗಳ 179ನೇ ಇನ್ನಿಂಗ್ಸ್‌ನಲ್ಲಿ ಮ್ಯಾಥ್ಯೂಸ್ ಈ ದಾಖಲೆ ಬರೆದಿದ್ದಾರೆ.
ಮೊದಲ ದಿನ ಬಲಿಷ್ಠ ಸ್ಥಿತಿಯಲ್ಲಿ ಶ್ರೀಲಂಕಾ
ಕ್ರೈಸ್ಟ್ಚರ್ಚ್ ಟೆಸ್ಟ್ನಲ್ಲಿ ಮೊದಲು ಬ್ಯಾಟಿಂಗ್ ಆರಂಭಿಸಿರುವ ಶ್ರೀಲಂಕಾ ತಂಡ, ದಿನದಾಟದಂತ್ಯಕ್ಕೆ 75 ಓವರ್‌ ಬ್ಯಾಟಿಂಗ್ ಮಾಡಿ 6 ವಿಕೆಟ್‌ಗೆ 305 ರನ್ ಗಳಿಸಿದೆ. ತಂಡದ ಪರ ದಿಮುತ್ ಕರುಣಾರತ್ನೆ 87 ಎಸೆತಗಳಲ್ಲಿ 50 ರನ್ ಗಳಿಸಿದರೆ, ಕುಸಾಲ್ ಮೆಂಡಿಸ್ 83 ಎಸೆತಗಳಲ್ಲಿ 17 ಬೌಂಡರಿಗಳ ನೆರವಿನಿಂದ 87 ರನ್ ಗಳಿಸಿದರು.
ಇದೀಗ ಶ್ರೀಲಂಕಾ ತಂಡ ಕೂಡ ಭಾರತದಂತೆ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ಗೆ ತಲುಪುವ ಅವಕಾಶವನ್ನು ಹೊಂದಿದ್ದು, ಫೈನಲ್ ಆಡಬೇಕೆಂದರೆ ನ್ಯೂಜಿಲೆಂಡ್ ವಿರುದ್ಧದ 2 ಪಂದ್ಯಗಳ ಸರಣಿಯನ್ನು ವೈಟ್ವಾಶ್ ಮಾಡಬೇಕಾಗಿದೆ. ಇತ್ತ ಅಹಮದಾಬಾದ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ನಡೆಯುತ್ತಿರುವ 4ನೇ ಮತ್ತು ಅಂತಿಮ ಟೆಸ್ಟ್ನಲ್ಲಿ ಭಾರತ ಜಯಗಳಿಸಿದರೆ ಶ್ರೀಲಂಕಾ WTC ಫೈನಲ್ ರೇಸ್‌ನಿಂದ ಹೊರಗುಳಿಯಲಿದೆ. ಹೀಗಾಗಿ ಭಾರತಕ್ಕೂ ಅಂತಿಮ ಟೆಸ್ಟ್ ಬಹಳ ಮುಖ್ಯವಾಗಿದೆ.
ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 4:42 pm, Thu, 9 March 23
